សិល្បករ Tran Quang Huy និង Wadcharin Suksabsri។

នៅលើឆាកសម្តែង CLEFS Stages នាយប់ថ្ងៃអាទិត្យមួយ ដើមខែឧសភា សិល្បករ Tran Quang Huy និង Wadcharin Suksabsri បានសម្តែងយ៉ាងរំភើបចិត្តនូវស្នាដៃ Milonga Argentina – Justo Tomás Morales ដោយចាប់ផ្តើមការសំដែងរបស់សិល្បករទាំងពីររូបនៅទីក្រុងហាណូយ - ជារាត្រីទី ៨ ក្នុងចំណោមរាត្រីទាំង១៥ នៃ SagoBako។ ម្រាមដៃរបស់សិល្បករទាំងពីរបានរំកិលលើខ្សែហ្គីតា ជាមួយនឹងរចនាបថរបស់ពួកគេ បានដណ្ដើមចំណាប់អារម្មណ៍របស់ទស្សនិកជនយ៉ាងច្រើន។       

ដោយបានជួបគ្នាលើកដំបូងនៅពិធីប្រគល់ពានរង្វាន់និងមហោស្រពហ្គីតាអាស៊ីអាគ្នេយ៍ឆ្នាំ ២០១៨ នៅទីក្រុងបាងកក សេចក្តីស្រឡាញ់រួមចំពោះហ្គីតាបុរាណបានក្លាយជាតំណភ្ជាប់ ជួយពួកគេឆ្លងកាត់ឧបសគ្គផ្នែកភូមិសាស្ត្រដើម្បីបង្កើតក្រុមសម្តែងដែលសមគ្នាល្អ។ ដោយរស់នៅក្នុងប្រទេសពីរផ្សេងគ្នា ការហ្វឹកហាត់ជាមួយគ្នាក៏ជាបញ្ហាសាកល្បងដែរ។  Quang Huy និង Wadcharin បានឆ្លៀតយកឱកាសជួបគ្នានៅឯពិធីបុណ្យហ្គីតាក្នុងតំបន់ ដើម្បីហ្វឹកហាត់ជាមួយគ្នាដោយផ្ទាល់ ហើយសូម្បីតែធ្វើដំណើរទៅកាន់ប្រទេសទីបីដើម្បីហ្វឹកហាត់ជាមួយគ្នា។ លើសពីនេះ សិល្បករទាំងពីរក៏បានទំនាក់ទំនងគ្នាតាមរយៈការថតសំឡេងផងដែរ។ សិល្បករ Tran Quang Huy បានចែករំលែកថា៖

“មនុស្សម្នាក់នឹងថតវីដេអូ នូវការហ្វឹកហាត់របស់ខ្លួនជាមុន មិនចាំបាច់លេងបទទាំងមូលទេ ប៉ុន្តែហាត់លេងផ្នែកនីមួយៗ រួចផ្ញើវីដេអូឲ្យគ្នាទៅវិញទៅមក។ ជាឧទាហរណ៍៖ Wadcharin ហ្វឹកហាត់ហើយផ្ញើវីដេអូមកខ្ញុំ បន្ទាប់មកខ្ញុំបើកវីដេអូ ហើយលេងហ្គីតាជាមួយវីដេអូនោះ។ ខ្ញុំក៏ថតដំណើរការនោះ ហើយផ្ញើទៅ Wadcharin វិញ ដើម្បីពិនិត្យថា តើផ្នែកមួយនោះបានឬនៅ ហើយបន្តរហូតដល់ទាល់តែបាន”។

គំនិតនៃការរៀបចំ កម្មវិធីសម្តែងអន្តរជាតិ SagoBako ត្រូវបានគ្រោងទុកតាំងពីចុងឆ្នាំ ២០២៤មក។ SagoBako ក៏ជាឈ្មោះរបស់ក្រុម ដែលមានអត្ថន័យថា "Sago" ជា Saigon - កន្លែងដែលលោក Tran Quang Huy កំពុងរស់នៅ និង "Bako" ជាទីក្រុងបាងកក - កន្លែងដែល Wadcharin រស់នៅ។ "SagoBako" ក៏មានន័យថា ទំនាក់ទំនងរវាងសិល្បករពីរនាក់នៅក្នុងប្រទេសពីរផ្សេងគ្នា។ ជាមួយនឹង SagoBako ២០២៥ សិល្បករទាំងពីរនឹងសម្តែងនៅទីក្រុងហូជីមិញ Can Tho, Long Xuyen, Da Lat, Hai Phong និងទីក្រុងហាណូយ(វៀតណាម) សិង្ហបុរី និងទីក្រុងបាងកក(ថៃ)។

“ថ្វីត្បិតតែយើងខ្ញុំរស់នៅប្រទេសផ្សេងគ្នា ដែលមានវប្បធម៌ខុសៗគ្នា ប៉ុន្តែតន្ត្រីជួយយើងជំនះរាល់ឧបសគ្គនៃភាសានិងវប្បធម៌។ នៅពេលដែលយើងនៅជាមួយគ្នា យើងខ្ញុំជា SagoBako។ យើងប្រើប្រាស់ភាសាតន្ត្រីដើម្បីលេងនិងទំនាក់ទំនងគ្នាទៅវិញទៅមក”។

"តាមរយៈ កម្មវិធីសម្តែងនេះ យើងខ្ញុំមានបំណងចង់នាំយកសម្រស់ស្អាតរបស់តន្ត្រីទៅកាន់មនុស្សគ្រប់រូប ដើម្បីជំរុញមនុស្សម្នាឱ្យលេងហ្គីតាជាមួយគ្នា។ ដូចជា Wadcharin និងខ្ញុំ ដែលរស់នៅប្រទេសពីរផ្សេងគ្នា យើងនៅតែអាចលេងហ្គីតាជាមួយគ្នាបាន ដូច្នេះមនុស្សនៅទីក្រុងតែមួយក៏អាចតភ្ជាប់ទំនាក់ទំនងនិងលេងហ្គីតាជាមួយគ្នាបានដែរ"។

បន្ទាប់ពីការសម្តែងនៅទីក្រុងហាណូយ សិល្បករទាំងពីរបានបន្តទៅសម្តែងនៅទីក្រុង Hai Phong ប្រទេសសិង្ហបុរី និងប្រទេសថៃ។ កម្មវិធីប្រគុំតន្ត្រីនេះ នឹងបញ្ចប់នៅថ្ងៃទី ១៧ ខែឧសភា នៅក្នុងពិធីប្រគល់ពានរង្វាន់និងមហោស្រពហ្គីតាអាស៊ីអាគ្នេយ៍ នៅទីក្រុងបាងកក។ បន្ទាប់ពីកម្មវិធីប្រគុំតន្ត្រីនេះ សិល្បករTran Quang Huy និង Wadcharin កំពុងរៀបចំការប្រគុំតន្ត្រីមួយចំនួននៅក្នុងប្រទេសផ្សេងទៀត ដូចជាប្រទេសឥណ្ឌូនេស៊ី ជាកន្លែងដែលក្រុមបានទទួលការអញ្ជើញទៅសម្តែងផងដែរ៕