ពិព័រណ៍សប្បុរសធម៌ដោយស្ម័គ្រចិត្ត “ដំណើនៃរពន្លឺ”

(VOVWORLD) - ក្នុងឱកាសរំលឹកខួបឆ្នាំទី១០ធ្វើសកម្មភាព ក្លឹបថតរូបពន្លឺចំណុះ LPA បាន រៀបចំពិព័រណ៍រូបថតសប្បុរសធម៌ដោយស្ម័គ្រចិត្តក្រោមប្រធានបទ “ដំណើរនៃ ពន្លឺ”។

ពិព័រណ៍នេះបានតាំងបង្ហាញរូបថតពី៦០ដល់៨០ផ្ទាំងរបស់បណ្ដាសិក្ខាកាមនិងសមាជិកក្នុងក្លឹប។ បន្ទាប់ពីពិព័រណ៍បិទបញ្ចប់ វណ្ណកម្មទាំងនេះនឹងត្រូវបានដាក់លក់ដើម្បីបង្កើតមូលនិធិសប្បុរសធម៌ដោយស្ម័គ្រចិត្ត តាមនោះរួមចំណែកនាំមកនូវពន្លឺហើយបំពេញហេដ្ឋារចនាសម្ព័ន្ធសម្រាប់សាលាមត្តេយ្យនិងសាលាបឋមនៅឃុំ Thuong Cuu ស្រុក Thanh Son ខេត្ត Phu Tho ជាកន្លែងដែលមានសិស្សានុសិស្សចំនួន៦១នាក់និងគ្រូបង្រៀនចំនួន៥នាក់ ប៉ុន្តែមិនទាន់មានអគ្គីសនី ទឹកសាប ហើយជីវភាពរស់នៅជួបការលំបាក ការខ្វះខាតជាច្រើន។

ជាងថតរូប Nguyen Viet Hung ជាស្ថាបនិកនៃវិទ្យាស្ថានថតរូបពន្លឺ។ លោកត្រូវបានស្គាល់ដល់យ៉ាងទូលំទូលាយតាមរយៈការបំពេញដំណើរតាមឆ្នេរសមុទ្រវៀតណាមដើម្បីថតរូបពីសំរាមនិងកាកសំណល់ តាមនោះអំពាវនាវអោយសហគមន៍ផ្លាស់ប្ដូរមនសិការក្នុងការសំអាតសំរាមនិងកាកសំណល់ប៉្លាស្ទិក។

ពិព័រណ៍បានប្រាព្ធឡើងនារសៀលថ្ងៃទី១៦ ខែវិច្ឆិកា កន្លងទៅ នៅសារមន្ទីរវិចិត្រសិល្បៈវៀតណាម លេខ៦៦វិថី Nguyen Thai Hoc រដ្ឋធានីហាណូយ ហើយនឹងអូសបន្លាយដល់ដំណាច់ថ្ងៃទី២៤ ខែវិច្ឆិកា។

ក្នុងរង្វង់ត្រឹម២ថ្ងៃចាប់តាំងពីការប្រារព្ធឡើងប៉ុណ្ណោះ ពិព័រណ៍បានទាក់ទាញភ្ញៀវទាំងជាតិនិងអន្តរជាតិយ៉ាងច្រើនកុះករមកទស្សនានិងទិញរូបថត។ គណៈចាត់តាំងបានអោយដឹងថា គេលក់បានរូបថតជាង៤០ផ្ទាំងរួមជាមួយវត្ថុជាច្រើនផ្សេងៗទៀត។