អគ្គលេខាធិការអង្គការសហប្រជាជាតិចង្អុលបង្ហាញពីបញ្ហាប្រឈមនៅឆ្នាំ ២០២៦
(VOVWORLD) - អគ្គលេខាធិការអង្គការសហប្រជាជាតិ លោក António Guterres នាថ្ងៃទី ១៥ ខែមករា បានថ្លែងសុន្ទរកថាគោលនយោបាយលើកដំបូងរបស់លោកក្នុងឆ្នាំនេះ ក្នុងនាមជាប្រធានអង្គការពហុភាគីធំជាងគេបំផុតរបស់ពិភពលោក ដោយគូសបញ្ជាក់ពីបញ្ហាប្រឈមសកលសម្រាប់ឆ្នាំ ២០២៦។
លោក Guterres បានព្រមានថា ពិភពលោកសព្វថ្ងៃនេះ «ពោរពេញដោយជម្លោះ វិសមភាព និងការអភិវឌ្ឍដែលមិនអាចទាយទុកជាមុនបាន» នៅពេលដែលកិច្ចសហប្រតិបត្តិការអន្តរជាតិកំពុងចុះខ្សោយនៅពេលវេលាដ៏សំខាន់បំផុតនេះ។ ក្នុងពេលជាមួយគ្នានោះ ប្រព័ន្ធសកលក៏ស្ថិតនៅក្រោមសម្ពាធដែលមិនធ្លាប់មានពីមុនមក ដោយសារសង្គ្រាម ការបែកបាក់ ការប្រែប្រួលអាកាសធាតុ និងការរិករិលលើការគោរពនីតិរដ្ឋអន្តរជាតិ។ លោកបានវាយតម្លៃថា នៅក្នុងបរិបទបច្ចុប្បន្ន ពហុភាគីនិយមពិតជាកំពុងប្រឈមមុខនឹងការសាកល្បងមួយ។
ទាក់ទងនឹងការប្រែប្រួលអាកាសធាតុ លោកអគ្គលេខាធិការអង្គការសហប្រជាជាតិបានព្រមានថា ពិភពលោកដែលមានភាពច្របូកច្របល់នៃអាកាសធាតុ «មិនអាចជាពិភពលោកដែលមានសន្តិភាពបានទេ» ហើយបានអំពាវនាវឱ្យមានកិច្ចខិតខំប្រឹងប្រែងពន្លឿន ដើម្បីកាត់បន្ថយការបំភាយឧស្ម័ន ការផ្លាស់ប្តូរថាមពលដោយយុត្តិធម៌ និងការបង្កើនហិរញ្ញប្បទានអាកាសធាតុ៕