រដ្ឋមន្ត្រីការបរទេសអ៊ីរ៉ង់ លោក Abbas Araghchi ថ្លែងសុន្ទរកថា ក្នុងពេលមានភាពចលាចល កាន់តែខ្លាំងឡើងនៅទីក្រុងតេអេរ៉ង់ ប្រទេសអ៊ីរ៉ង់ ថ្ងៃទី១២ ខែមករា ឆ្នាំ២០២៦ (រូបថតអេក្រង់ពីវីដេអូ៖ IRIB/Handout តាមរយៈ REUTERS)

ថ្លែងទៅកាន់អ្នកការទូតបរទេសនៅទីក្រុងតេអេរ៉ង់ រដ្ឋមន្ត្រីការបរទេសលោក Araghchi បាននិយាយថា ការតវ៉ាដំបូងឡើយបានកើតចេញពីការលំបាកផ្នែកសេដ្ឋកិច្ច រួមទាំងការធ្លាក់ចុះយ៉ាងខ្លាំងនៃវិធានការកែទម្រង់ប្រាក់រីអាលអ៊ីរ៉ង់ និងប្រាក់ឧបត្ថម្ភ ប៉ុន្តែក្រោយមក “បានប្រែក្លាយទៅជាអំពើហិង្សា និងការបង្ហូរឈាម” សំដៅបង្កើតលេសសម្រាប់ការជ្រៀតជ្រែកពីខាងក្រៅ។ រដ្ឋមន្ត្រីការបរទេសអ៊ីរ៉ង់បានបញ្ជាក់ថា ទីក្រុងតេអេរ៉ង់បានប្រមូលភស្តុតាងនៃការចូលរួមរបស់សហរដ្ឋអាមេរិក និងអ៊ីស្រាអែលនៅក្នុងអ្វីដែលអ៊ីរ៉ង់ហៅថា “ភេរវកម្មក្នុងស្រុក” ហើយបាននិយាយថា កងកម្លាំងសន្តិសុខនឹងបង្ក្រាបអ្នកដែលជាប់ពាក់ព័ន្ធ។ ក្រសួងការបរទេសអ៊ីរ៉ង់ក៏បានទាមទារឱ្យរដ្ឋាភិបាលចក្រភពអង់គ្លេស បារាំង អាល្លឺម៉ង់ និងអ៊ីតាលីដកចេញេរាល់សេចក្តីប្រកាសផ្លូវការដែលគាំទ្រក្រុមបាតុករ។

ទាក់ទងនឹងទំនាក់ទំនងជាមួយទីក្រុងវ៉ាស៊ីនតោន លោក Araghchi បានសង្កត់ធ្ងន់ថា អ៊ីរ៉ង់ត្រៀមខ្លួនរួចជាស្រេចដើម្បីចរចាជាមួយសហរដ្ឋ អាមេរិក ប៉ុន្តែគ្រាន់តែឈរលើមូលដ្ឋាននៃសមភាព ការគោរពគ្នាទៅវិញទៅមក និងមិនទទួលយកការដាក់គំនាប។

ប្រធានាធិបតីអាមេរិក លោក ដូណាល់ ត្រាំ បានប្រកាសនាថ្ងៃទី១២ ខែមករាថា លោកនឹងដាក់ពន្ធ ២៥% លើប្រទេសណាមួយដែលធ្វើអាជីវកម្មជាមួយអ៊ីរ៉ង់។ នៅលើវេទិកាប្រព័ន្ធផ្សព្វផ្សាយសង្គម Truth Social លោក ត្រាំ បានថ្លែងថា ពន្ធនេះ «មានប្រសិទ្ធភាពភ្លាមៗ»។ ដូច្នេះ ប្រទេសណាមួយដែលធ្វើពាណិជ្ជកម្មជាមួយសាធារណរដ្ឋអ៊ីស្លាមនឹងត្រូវទទួលរងពន្ធ ២៥% លើប្រតិបត្តិការណាមួយ ឬទាំងអស់ជាមួយសហរដ្ឋអាមេរិក។ កាលពីម្សិលមិញដែរ ចិន និងរុស្ស៊ី សុទ្ធតែបានថ្កោលទោសការជ្រៀតជ្រែកពីបរទេសនៅក្នុងអ៊ីរ៉ង់៕