ការប្តេជ្ញាចិត្តខ្ពស់ ផែនទីបង្ហាញផ្លូវនិងទិសដៅជាក់លាក់

នាពេលកន្លងមក វៀតណាមមានសកម្មភាពយ៉ាងប្ដូរផ្ដាច់ជាច្រើនដើម្បីកសាងប្រព័ន្ធអេកូឡូស៊ីសម្រាប់អភិវឌ្ឍន៍ឧស្សាហកម្ម semiconductor និងទាក់ទាញការវិនិយោគពីបរទេស។ វៀតណាមបានចេញផ្សាយយុទ្ធសាស្ត្រអភិវឌ្ឍន៍ឧស្សាហកម្ម Semiconductor វៀតណាមដល់ឆ្នាំ ២០៣០ និងចក្ខុវិស័យដល់ឆ្នាំ ២០៥០; កម្មវិធីអភិវឌ្ឍន៍ធនធានមនុស្សក្នុងឧស្សហកម្ម semiconductor ដល់ឆ្នាំ ២០៣០ និងចក្ខុវិស័យដល់ឆ្នាំ ២០៥០។ បច្ចុប្បន្ននេះ ប្រទេសវៀតណាមមានគម្រោងវិនិយោគផ្ទាល់ពីបរទេស (FDI) ចំនួន ១៧៤ នៅក្នុងវិស័យ semiconductor ដែលមានទុនចុះបញ្ជីសរុបជិត ១១,៦ ពាន់លានដុល្លារអាមេរិក។ NVIDIA ដែលជាសម្ព័ន្ធក្រុមហ៊ុនបច្ចេកវិទ្យាលេខ ១ របស់ពិភពលោក នាពេលថ្មីៗនេះបានបង្កើតមជ្ឈមណ្ឌលស្រាវជ្រាវនិងអភិវឌ្ឍន៍ និងមជ្ឈមណ្ឌលទិន្នន័យ AI នៅក្នុងប្រទេសវៀតណាម។

ទោះជាយ៉ាងណាក៏ដោយ semiconductor គឺជាឧស្សាហកម្មពិសេសមួយ ដែលទាមទារទុនវិនិយោគដ៏ធំ តម្រូវការខ្ពស់ទាក់ទងនឹងធនធានមនុស្ស និងបច្ចេកវិទ្យា ហើយការប្រកួតប្រជែងខ្លាំងក្នុងការទាក់ទាញការវិនិយោគ ដូច្នេះហើយវៀតណាមបានកំណត់ថា ត្រូវមានការប្តេជ្ញាចិត្តដ៏ធំ និងផែនទីបង្ហាញផ្លូវដ៏ជាក់លាក់។ នៅក្នុងសម័យប្រជុំនៃគណៈកម្មាធិការជាតិដឹកនាំការអភិវឌ្ឍឧស្សាហកម្ម Semiconductor លោកនាយករដ្ឋមន្ត្រី ហ្វាម មិញជីញ បានសង្កត់ធ្ងន់ថា៖

“ការប្ដេជ្ញាចិត្តត្រូវតែបង្ហាញដោយសកម្មភាពដ៏ជាក់លាក់ មានរបៀបរៀបរយ លក្ខណៈវិទ្យាសាស្ត្រ មានការផ្ដោតសំខាន់ ធ្វើការងារណាគឺសម្រេចការងារនោះ។ មានតែពេលនោះទេ ទើបយើងអាចឈានទៅដល់គោលដៅអភិវឌ្ឍន៍សេដ្ឋកិច្ច-សង្គមដោយផ្អែកលើវិទ្យាសាស្ត្រ បច្ចេកវិទ្យា និងនវានុវត្តន៍ ដែលក្នុងនោះឧស្សាហកម្ម semiconductor គឺជាវិស័យអាទិភាពសំខាន់មួយសម្រាប់ការអភិវឌ្ឍ”។

ក្រៅពីការផ្ដល់ធនធានសម្រាប់បំពេញសសរស្តម្ភទាំងបីនៃឧស្សាហកម្ម semiconductor នោះគឺ យន្តការ គោលនយោបាយ និងហេដ្ឋារចនាសម្ព័ន្ធ វៀតណាមក៏យកចិត្តទុកដាក់ពិសេសដល់ការអភិវឌ្ឍប្រភពធនធានមនុស្សប្រកបដោយគុណភាពខ្ពស់។ រដ្ឋាភិបាលបានស្នើឱ្យក្រសួង និងផ្នែកនានា រៀបចំដើមទុន ដើម្បីគាំទ្រដល់ការអនុវត្តភារកិច្ចនេះ សំដៅសម្រេចបានគោលដៅដល់ឆ្នាំ២០៣០ ប្រទេសមានវិស្វករយ៉ាងហោចណាស់ ៥០០០ នាក់ ដែលមានជំនាញជ្រៅជ្រះផ្នែកបញ្ញាសិប្បនិមិត្ត ព្រមទាំងបណ្តុះបណ្តាលយ៉ាងស៊ីជម្រៅ ដល់គ្រូបង្រៀនចំនួន ១៣០០ នាក់ ដែលបង្រៀននៅវិទ្យាស្ថានស្រាវជ្រាវ សាកលវិទ្យាល័យនានា គ្រឹះស្ថានបណ្តុះបណ្តាល និងសហគ្រាសនានា។ លោកស្រី Nguyen Thi Le Quyen ទទួលបន្ទុកមជ្ឈមណ្ឌលនវានុវត្តន៍ជាតិ ចំណុះក្រសួងផែនការ និងវិនិយោគ បានធ្វើអត្ថាធិប្បាយថា៖

“នេះគឺជាដំណោះស្រាយទម្លុះទម្លាយ។ ការអភិវឌ្ឍឧស្សាហកម្ម semiconductor ត្រូវតែមានភាពស៊ីសង្វាក់គ្នាជាមួយនឹងការអភិវឌ្ឍប្រព័ន្ធអេកូឡូស៊ីដោយផ្សារភ្ជាប់នឹងការបណ្តុះបណ្តាលវិទ្យា
សាស្ត្រមូលដ្ឋាន វិទ្យាសាស្ត្រឯកទេស ស្របតាមផែនទីបង្ហាញផ្លូវ និងវិស័យដែលវៀតណាមមានប្រៀបខ្លាំង។ លើកកម្ពស់ទំនាក់ទំនងរវាងរដ្ឋ សាលារៀន និងសហគ្រាស។ ទន្ទឹមនឹងនោះ ធ្វើពិពិធកម្មទម្រង់ និងធនធានបណ្ដុះបណ្ដាល។ ក្នុងដំណាក់កាលដំបូង ត្រូវតែផ្តល់អាទិភាពដល់ការបណ្តុះបណ្តាលជួរគ្រូបង្រៀន”។

ពង្រីកកិច្ចសហប្រតិបត្តិការអន្តរជាតិ ដើម្បីអភិវឌ្ឍន៍ឧស្សាហកម្ម semiconductor

ក្រៅពីដំណោះស្រាយដើម្បីបន្តជំរុញកំណែទម្រង់បែបបទរដ្ឋបាលសម្រាប់សកម្មភាពផលិតកម្ម និងអាជីវកម្មក្នុងវិស័យ semiconductor ការបង្កើតហេដ្ឋារចនាសម្ព័ន្ធសមកាលកម្មសម្រាប់ឧស្សាហកម្ម semiconductor និងការអភិវឌ្ឍធនធានមនុស្សនោះ វៀតណាមក៏បានផ្តោតសំខាន់លើការជំរុញកិច្ចសហប្រតិបត្តិការអន្តរជាតិ ពង្រីកកិច្ចសហប្រតិបត្តិការទ្វេភាគី និងពហុភាគីលើវិស័យ semiconductor ផងដែរ។ លោក Do Nam Trung អនុប្រធាននាយកដ្ឋានឧស្សាហកម្មព័ត៌មាននិងផ្សព្វផ្សាយ នៃក្រសួងព័ត៌មាននិងផ្សព្វផ្សាយ បានឲ្យដឹងថា៖

“វៀតណាមបានកំណត់ចូលរួមយ៉ាងសកម្មក្នុងគ្រប់ដំណាក់កាលនៃខ្សែសង្វាក់ផ្គត់ផ្គង់ យោងតាមផែនទីបង្ហាញផ្លូវ។ នោះគឺការឆ្លៀតយកនិន្នាការពិភពលោក ដើម្បីរៀបចំរចនាសម្ព័ន្ធឧស្សាហកម្ម semiconductor ឡើងវិញតាមបាវចនាអត្ថប្រយោជន៍បូកមួយ ដែលក្នុងនោះវៀតណាមខិតខំក្លាយទៅជា ទិសដៅបូកមួយ ពោលគឺមានការចូលរួមពីប្រទេសដទៃទៀតនិងអង្គការដទៃទៀត នៅក្នុងខ្សែសង្វាក់ផ្គត់ផ្គង់នេះ ទាក់ទាញសហគ្រាស semiconductor ឈានមុខគេលើពិភពលោកមកបណ្តាក់ទុននៅវៀតណាម”។

នៅចំពោះមុខនឹងការប្តេជ្ញាចិត្តដ៏ខ្លាំងក្លារបស់វៀតណាម ដៃគូអន្តរជាតិ និងសហគ្រាសឈានមុខគេជាច្រើនក្នុងឧស្សាហកម្ម semiconductor បានបញ្ចេញមតិប្រកបដោយសុទិដ្ឋិនិយមចំពោះយថាទស្សន៍អំពីឧស្សាហកម្ម semiconductor របស់វៀតណាម ហើយបង្ហាញការត្រៀមខ្លួនជាស្រេចដើម្បីសហប្រតិបត្តិការ។ លោកស្រី Mariam Sherman នាយិកាធនាគារពិភពលោកប្រចាំនៅវៀតណាមបានអះអាងថា៖

“ទោះបីជានៅតែស្ថិតក្នុងដំណាក់កាលដំបូងនៃការអភិវឌ្ឍក៏ដោយ ប៉ុន្តែវៀតណាមបានក្លាយជាប្រទេសនាំចេញសារធាតុ semiconductor ធំជាងគេទី ៣ ទៅកាន់សហរដ្ឋអាមេរិកនៅឆ្នាំ ២០២៣ ជាមួយនឹងប្រាក់ចំណូលដ៏គួរឱ្យចាប់អារម្មណ៍ចំនួន ២០,១ ពាន់លានដុល្លារអាមេរិក ហើយ
វៀតណាមបាននិងកំពុងលេចឡើងជាមជ្ឈមណ្ឌលផលិតកម្មឈានមុខគេនៅក្នុងតំបន់ផងដែរ។ ក្រុមហ៊ុនបច្ចេកវិទ្យាយក្សសកលដូចជា Samsung Intel និង Apple បានបង្កើតប្រតិបត្តិការសំខាន់ៗនៅក្នុងប្រទេសវៀតណាម។ ក្រុមហ៊ុនបច្ចេកវិទ្យាឈានមុខគេរបស់ពិភពលោកដូចជា Nvidia Meta និង Google កំពុងពន្លឿនការចូលរួមរបស់ពួកគេ ដែលបង្ហាញពីការត្រៀមខ្លួនជាស្រេចស់វៀតណាម ដើម្បីក្លាយទៅជាមជ្ឈមណ្ឌលបច្ចេកវិទ្យាខ្ពស់នៅអាស៊ី”។

ជាមួយនឹងការប្តេជ្ញាចិត្តខ្ពស់របស់រដ្ឋាភិបាល ក៏ដូចជាដំណោះស្រាយនិងផែនទីបង្ហាញផ្លូវជាក់លាក់នោះ វៀតណាមកំពុងខិតខំប្រឹងប្រែងចាប់យកឱកាសដើម្បីអភិវឌ្ឍន៍ឧស្សាហកម្ម semiconductor យ៉ាងឆាប់រហ័ស និងខ្លាំងក្លា តាមនោះនាំវៀតណាមស្ទុះឈានទៅយុគសម័យថ្មី នៅពេលដែលបច្ចេកវិទ្យាដើរតួនាទីជាគន្លឹះ៕