តំបន់សិលាចារឹកបណ្ឌិតនៅក្នុង Van Mieu - Quoc Tu Giam។ (រូបថត៖ VOV)

ខ្សែភាពយន្ដដែលផលិតដោយបច្ចេកវិទ្យាទំនើបត្រូវបានគេរំពឹងថា នឹងទាក់ទាញភ្ញៀវទេសចរមកទស្សនា និងស្វែងយល់អំពីតម្លៃវប្បធម៌ និងប្រវត្តិសាស្ត្រនៃកេរ្តិ៍ដំណែលជាតិពិសេស Van Mieu - Quoc Tu Giam នៅរដ្ឋធានីហាណូយ។

ដំណើរកម្សាន្តពេលរាត្រីនៅ Van Mieu - Quoc Tu Giam មានភាពទាក់ទាញផ្ទាល់ខ្លួន ព្រោះអ្នកទស្សនាមិនត្រឹមតែអាចស្វែងយល់ពីភាពស្រស់ស្អាតនៃបេតិកភណ្ឌវប្បធម៌របស់ប្រទេសជាតិ តាមរបៀបថ្មីក្នុងទិដ្ឋភាពរាត្រីដ៏អាថ៌កំបាំងប៉ុណ្ណោះទេ ថែមទាំងបានគយគន់ការសម្ដែងពន្លឺចម្រុះពណ៌ ដែលបង្ហាញដោយបច្ចេកវិទ្យាទំនើបទៀតផង។ បន្ទាប់ពីទស្សនាខ្សែភាពយន្តទម្រង់ 3D mapping "សិលាចារឹកប្រវត្តិសាស្រ្តតម្កល់កេរ្តិ៍ឈ្មោះ” យុវជន Nguyen Van Vu នៅទីក្រុងហាណូយ មានការចាប់អារម្មណ៍ខ្លាំងដែលមិនអាចបំភ្លេចបាន៖

“ខ្ញុំគិតថា ដំណើរកម្សាន្តពេលរាត្រីថ្មីនៅ Van Mieu Quoc Tu Giam គឺមានអត្ថន័យណាស់ ព្រោះថាបន្ទាប់ពីជោគជ័យនៃដំណើរកម្សាន្ត "អគ្គសារនៃការអប់រំ" នេះគឺជាជំហានបន្ទាប់។ "សិលាចារឹកប្រវត្តិសាស្រ្តតម្កល់កេរ្តិ៍ឈ្មោះ" គឺជារឿងរ៉ាវអំពីដំណើររបស់លោកបណ្ឌិតក្នុងសម័យមុនៗដែលកេរ្តិ៍ឈ្មោះរបស់ពួកគេត្រូវបានតម្កល់ទុកនៅលើសិលាចារឹក ដូច្នេះវានឹងជួយឱ្យអ្នកទស្សនាស្វែងយល់អំពីអត្ថន័យនៃសិលាចារឹកនៅក្នុង Van Mieu Quoc Tu Giam”។

បច្ចេកវិទ្យា 3D Mapping ជាមួយនឹងការរួមបញ្ចូលគ្នាប្រកបដោយភាពសុខដុមរមនា និងភាពច្នៃប្រឌិតរវាងសិល្បៈសម្ដែងសម្លេងនិងពន្លឺ គឺជាកត្តាដ៏សំខាន់ដែលធ្វើឲ្យខ្សែភាពយន្ត "សិលាចារឹកប្រវត្តិសាស្ត្រតម្កល់កេរ្តិ៍ឈ្មោះ" កាន់តែមានភាពទាក់ទាញ។ អាស្រ័យហេតុនេះ ទស្សនិកជន និងភ្ញៀវទេសចរយ៉ាងច្រើនកុះករមានឱកាសស្វែងយល់អំពីអត្ថន័យប្រវត្តិសាស្ត្រ និងវប្បធម៌នៃសិលាចារឹកបណ្ឌិតនៅក្នុង Van Mieu - Quoc Tu Giam។ ខ្សែភាពយន្តនេះដំណាល់រឿងអំពីសត្វអណ្តើកមួយក្បាលដែលចង់ស្វែងរកតម្លៃលាក់កំបាំងនៅពីក្រោយផ្ទៃថ្មនៃសិលាចារឹកបណ្ឌិតទាំង ៨២ ផ្ទាំង។ សត្វអណ្ដើកនេះ បានរកឃើញថា សិលាចារឹកនីមួយៗ គឺជារឿងប្រវត្តិសាស្ត្រមួយស្ដីពីការប្រឡងនិងអ្នកដែលប្រឡងជាប់។ យោងតាមលោក Truong Quoc Toan អ្នកនិពន្ធរឿង "សិលាចារឹកប្រវត្តិសាស្ត្រតម្កល់កេរ្តិ៍ឈ្មោះ" បានឲ្យដឹងថា ក្នុងខ្សែភាពយន្តនេះ សិលាចារឹកនីមួយៗ ប្រៀបប្រដូចជាសៀវភៅប្រវត្តិសាស្ត្រមួយក្បាលសម្រាប់ភ្ញៀវទេសចរស្វែងយល់៖

“សារដែលយើងខ្ញុំចង់បង្ហាញតាមរយៈខ្សែភាពយន្តនេះ គឺការឧទ្ទេសនាមដល់ទស្សនិកជនអំពីរូបភាពថ្មី និងទស្សនៈដ៏ប្លែកលើសិលាចារឹកបណ្ឌិត Thang Long ទាំង ៨២ ផ្ទាំងនេះ។ ព្រោះតាំងពីយូរណាស់មកហើយ នៅពេលភ្ញៀវទេសចរមកទស្សនា Van Mieu – Quoc Tu Giam ម្ដងៗ ពួកគេតែងតែធ្វើដំណើរឆ្លងកាត់តំបន់សិលាចារឹកបណ្ឌិតនេះ ប៉ុន្តែពួកគេស្ទើរតែដើររហ័សឆ្លងកាត់វា។ ចំណែកឯយើងខ្ញុំចង់ឱ្យមនុស្សគ្រប់គ្នាយល់ថា សិលាចារឹកបណ្ឌិតនីមួយៗ គឺជារឿងប្រវត្តិសាស្ត្រអំពីការប្រឡង អ្នកប្រឡង់ជាប់ និងអំពីការអប់រំរបស់ប្រទេសវៀតណាម។ ដោយសារវាជារឿងប្រវត្តិសាស្រ្ត ជាសៀវភៅមួយក្បាល យើងគួរតែឈប់យូរបន្តិចទៀត ហើយបើកសៀវភៅនោះ ដើម្បីដឹងថាតម្លៃនៅក្នុងសៀវភៅនោះជាអ្វី”។

ខ្សែភាពយន្តនេះបានដក់ជាប់ក្នុងបេះដូងទស្សនិកជនជាច្រើន ហើយសម្រាប់អ្នកដែលធ្វើការក្នុងវិស័យទេសចរណ៍ដូចអ្នកស្រី Doan Ha បុគ្គលិកក្រុមហ៊ុនទេសចរណ៍មិត្តភាពវៀតណាម នាងនឹងឧទ្ទេសនាមខ្សែភាពយន្តនេះទៅកាន់ភ្ញៀវទេសចរយ៉ាងច្រើនកុះករ ជាពិសេសភ្ញៀវទេសចរអន្តរជាតិ។

“ពេលទស្សនារឿង "សិលាចារឹកប្រវត្តិសាស្ត្រតម្កល់កេរ្តិ៍ឈ្មោះ" នាងខ្ញុំអាចយល់អំពីដំណើរសិក្សារៀនសូត្រដ៏ពោរពេញទៅដោយការលំបាករបស់លោកបណ្ឌិតម្នាក់ៗ តាំងពីជំហានដំបូងៗ រហូតដល់ពេលគេប្រឡងជាប់ ទទួលបានជោគជ័យ។ ពេលទស្សនារូបភាពរួមផ្សំនឹងសំឡេងនៃខ្សែភាពយន្តនេះ ខ្ញុំអាចទទួលក្នុងអារម្មណ៍នូវបរិយាកាសវីរភាព គួរឲ្យរំភើបចិត្ត មិនត្រឹមតែរូបភាពប៉ុណ្ណោះទេ ថែមទាំងសំឡេង និងអារម្មណ៍ទៀតផង។ ប្រាកដថា ខ្ញុំនឹងផ្សព្វផ្សាយខ្សែភាពយន្តនេះដល់អតិថិជនរបស់យើងខ្ញុំ ហើយខ្ញុំនឹងផ្សព្វផ្សាយដំណើរកម្សាន្តពេលរាត្រីនៅ Van Mieu ដល់ភ្ញៀវទេសចរបរទេស”។

លោកបណ្ឌិត Le Xuan Kieu នាយកមជ្ឈមណ្ឌលសកម្មភាពវប្បធម៌និងវិទ្យាសាស្ត្រ Van Mieu-Quoc Tu Giam ថ្លែងនៅពិធីបង្ហាញមុខខ្សែភាពយន្ត។ (រូបថត៖ VOV)

ខ្សែភាពយន្ត "សិលាចារឹកប្រវត្តិសាស្រ្តតម្កល់កេរ្តិ៍ឈ្មោះ" ត្រូវបានរៀបចំយ៉ាងចុះសម្រុងគ្នាដោយកត្តាជាច្រើន ទាំងលក្ខណៈអប់រំផង ទាំងលក្ខណៈវប្បធម៌ និងកម្សាន្តផង។ រឿងនិទៀនអំពីបេតិកភណ្ឌ ប៉ុន្តែមិនដើរតាមគន្លងចាស់ទេ ប៉ុន្តែមានភាពទាក់ទាញជាងមុន ដោយទម្រង់និទានរឿងបែបសហសម័យ ជាមួយនឹងទស្សនៈប្រកបដោយភាពច្នៃប្រឌិត ដូច្នេះហើយទើបមានភាពទាក់ទាញដល់អ្នកទស្សនាគ្រប់វ័យ ជាពិសេសយុវវ័យ។ លោកបណ្ឌិត Le Xuan Kieu នាយកមជ្ឈមណ្ឌលសកម្មភាពវប្បធម៌និងវិទ្យាសាស្ត្រ Van Mieu-Quoc Tu Giam បានឲ្យដឹងថា៖

"សិលាចារឹកប្រវត្តិសាស្រ្តតម្កល់កេរ្តិ៍ឈ្មោះ" គឺជាខ្លឹមសារបន្ទាប់នៃដំណើរកម្សាន្ត "អគ្គសារនៃការអប់រំ"។ យើងខ្ញុំសង្ឃឹមថា ខ្សែភាពយន្តនេះ ក៏ដូចជាខ្សែភាពយន្តបន្ទាប់ នឹងជួយឱ្យអ្នកទស្សនាយល់កាន់តែច្បាស់អំពីគុណតម្លៃចម្រុះនៃតំបន់ Van Mieu - Quoc Tu Giam តាមរយៈការរួមបញ្ចូលគ្នានៃបច្ចេកវិទ្យានិងសិល្បៈដើម្បីខិតជិតមកភ្ញៀវទេសចរបានងាយស្រួលជាង។ យើងខ្ញុំសង្ឃឹមថា យុវជន និងក្រុមគ្រួសារនឹងនាំកូនៗមកទីនេះដើម្បីចូលរួមដំណើរកម្សាន្តពេលរាត្រីនៅ Van Mieu - Quoc Tu Giam បង្កើតការតភ្ជាប់ និងការអប់រំអំពីប្រពៃណីសិក្សារៀនសូត្រ ដើម្បីបង្កើតកម្លាំងចលករដ៏ខ្លាំងក្លាសម្រាប់យុវជនលើដំណើរឆ្ពោះទៅរកចំណេះដឹង”។

ខ្សែភាពយន្ត 3D mapping "សិលាចារឹកប្រវត្តិសាស្ត្រតម្កល់កេរ្តិ៍ឈ្មោះ" ត្រូវបានចាក់បញ្ចាំងក្នុងដំណើរកម្សាន្តពេលរាត្រីនៅ Van Mieu – Quoc Tu Giam ចាប់ពីថ្ងៃទី ១ ខែធ្នូ ឆ្នាំ ២០២៤។ ពេលវេលាដើម្បីទស្សនាខ្សែភាពយន្ត 3D mapping នេះ គឺម៉ោង ៨ ៩ និងម៉ោង ១០ យប់ នៅថ្ងៃពុធ ថ្ងៃសៅរ៍ និងថ្ងៃ
អាទិត្យ៕