លោកស្រី Hoang Thi Lan ធ្វើបាញ់គួង Thanh Tri។ (រូបថត៖ Huyen Trang/VOV៥)

នៅជាប់ឆ្នាំងចំហុយដ៏តូច អ្នកស្រី Hoang Thi Lan កំពុងប្រញាប់ប្រញាល់វៀសម្សៅឲ្យបានស្ដើងបំផុត។ ពេលដែលមានអតិថិជនមកពីឆ្ងាយ លោកស្រី Lan តែងតែដំណាល់រឿងប្រកបដោយមោទនភាពអំពីរបរធ្វើបាញ់គួងនៃស្រុកកំណើតខ្លួនឯង។ គ្រួសាររបស់លោកស្រីបានប្រកបរបរធ្វើបាញ់គួង Thanh Tri បាន ៣ ជំនាន់មកហើយ។ លោកស្រីបានរៀនរបរពីម្តាយ ប៉ុន្តែមិនមានរូបមន្តជាក់លាក់ណាមួយឡើយ។ ចាប់ពីការកិនម្សៅ រហូតដល់ការវៀសម្សៅ សុទ្ធតែអាស្រ័យទៅលើបទពិសោធន៍ អារម្មណ៍ និងសេចក្តីស្រឡាញ់ផ្ទាល់ខ្លួន។ កាលពីមុន ប្រជាជន Thanh Tri បានប្រើឆ្នាំងស្ពាន់ ចង្ក្រានធ្យូង និងវៀសម្សៅដោយដៃ។ សព្វថ្ងៃនេះ ប្រជាជនប្រើប្រាស់ម៉ាស៊ីនកិនម្សៅ និងឆ្នាំងអគ្គិសនី ប៉ុន្តែនៅតែរក្សាបាននូវបច្ចេកទេសធ្វើបាញ់គួងបែបប្រពៃណីតាំងពីមុន។ ថ្វីត្បិតតែមានការផ្លាស់ប្ដូរជាច្រើនក៏ដោយ ក៏ក្ដីស្រឡាញ់ និងការជក់ចិត្តចិត្តចំពោះវិជ្ជាជីវៈនេះ នៅតែត្រូវបានរក្សាដដែល។ លោកស្រី Hoang Thi Lan បានឲ្យដឹងថា៖

“ខ្ញុំធ្វើបាញ់គួងតាំងពីអាយុ១២ឆ្នាំមកហើយ។ ពេលនោះ ខ្ញុំកិនម្សៅឲ្យម្តាយធ្វើ។ កាលពីមុន ខ្ញុំកិនដោយត្បាល់ថ្ម។ ក្មេងស្រីទាំងអស់នៅ Thanh Tri ត្រូវចេះធ្វើបាញ់គួង។ មើលម្តាយធ្វើ ហើយយើងរៀនបណ្តើរៗពីម្ដាយ ហើយកូនខ្ញុំក៏រៀនបែបនេះដែរ។ ពីមុនម្តាយខ្ញុំចិញ្ចឹមបងប្អូន៥។ ឥឡូវនេះ ខ្ញុំចិញ្ចឹមកូន២នាក់ ទាំងកូនប្រុសកូនស្រីអាចធ្វើបាញ់គួងដោយខ្លួនឯង»។

មុខម្ហូបបាញ់គួង Thanh Tri។ (រូបថត៖ VOV៥)

របរប្រពៃណីធ្វើបាញ់គួង Thanh Tri បង្កប់នូវគុណតម្លៃនៃចំណេះដឹងប្រជាប្រិយអំពីដំណើរការផលិត ចាប់ពីដំណាក់កាលជ្រើសរើសអង្កររហូតដល់របៀបកែច្នៃ។ គ្រឿងផ្សំស្នូលសម្រាប់ធ្វើបាញ់គួងគឺអង្ករ។ បាញ់គួងមាន ២ ប្រភេទគឺ បាញ់គួងខ្ចប់ខ្ទឹមវែងចៀន និងបាញ់គួងខ្ចប់សាច់ចិញ្ច្រាំ។ សំបកបាញ់គួង Thanh Tri ត្រូវបានវៀសដោយដៃ សំបកកាន់តែស្តើង កាន់តែឆ្ងាញ់។ ដើម្បីធ្វើបានមុខម្ហូបនេះ ត្រូវតែមានរូបមន្តនិងបាតដៃដ៏ប៉ិនប្រសប់របស់ប្រជាជន Thanh Tri។ លោកស្រី Duong Thi Tuyet បានឲ្យដឹងថា៖

“បាញ់គួង Thanh Tri ត្រូវតែធ្វើឲ្យស្តើងបំផុត។ ពីមុន ម្សៅកិនដោយដៃ មិនម៉ត់ស្មើគ្នាទេ តែឥឡូវ កិនដោយម៉ាស៊ីនដូច្នេះម្សៅរលោង ម៉ត់ខែនិងឆ្ងាញ់ណាស់។ ខ្ញុំត្រាំអង្កររយៈពេល ២ ម៉ោង រួចកិន ពេលកិនម្សៅខ្ញុំដាក់ទឹក និងទឹកកកឱ្យម្សៅត្រជាក់ កិនរួចមកខ្ញុំដាក់ទឹកបន្ថែមទៀត។ សម្រាប់ម្សៅ ៣ គីឡូក្រាមខ្ញុំដាក់បន្ថែមអំបិល ១០០ ក្រាម កូរឱ្យបានម៉ត់ហ្មត់។ ពេលវៀសម្សៅត្រូវធ្វើឲ្យស្មើគ្នា។ នោះគឺជាអាថ៌កំបាំងរបស់ Thanh Tri ដែលមិនអាចរកឃើញនៅកន្លែងផ្សេងៗបានឡើយ”។

នៅពេលដែលចំណេះដឹងប្រជាប្រិយអំពីរបរធ្វើបាញ់គួង Thanh Tri ត្រូវបានទទួលស្គាល់ជាបេតិកភណ្ឌវប្បធម៌អរូបីរបស់ជាតិ ប្រជាជន Thanh Tri ជាពិសេសជំនាន់យុវជនដែលកំពុងស្នងបន្តអាជីពនេះ មានសេចក្តីសប្បាយរីករាយយ៉ាងក្រៃលែង។ សម្រាប់ពួកគេ នេះជាឱកាសមួយ ប៉ុន្តែក៏ជាទំនួលខុសត្រូវក្នុងការថែរក្សា និងផ្សព្វផ្សាយបន្ថែមទៀតអំពីរបរប្រពៃណីនៃស្រុកកំណើត។ អ្នកស្រី Nguyen Thi Lan Huong បានឲ្យដឹងថា៖

“ខ្ញុំពិតជាមានមោទនភាពខ្លាំងណាស់ ដែលបានកើតនិងធំដឹងក្ដីនៅក្នុងគ្រួសារដែលមានប្រពៃណីធ្វើបាញ់គួង។ ប្រសិនបើចង់ផ្សព្វផ្សាយឲ្យមុខរបរប្រពៃណីរបស់ភូមិខ្ញុំ ដំបូងឡើយ ខ្ញុំត្រូវលើកកំពស់ជំនាញ ខិតខំប្រឹងប្រែងបន្តិចម្ដងៗជារៀងរាល់ថ្ងៃ ដើម្បីឲ្យមុខម្ហូបដែលខ្ញុំធ្វើ ត្រូវបានអតិថិជនសរសើរថា ឆ្ងាញ់ជាងថ្ងៃមុន។ ជោគជ័យដំបូងគឺមកពីបទពិសោធន៍របស់អតិថិជន។ បន្ទាប់នោះទើបខ្ញុំផ្សព្វផ្សាយយ៉ាងទូលំទូលាយជាង ដូចជាការបង្ហោះនៅលើ Facebook, Zalo ឬប្រព័ន្ធផ្សព្វផ្សាយជាច្រើនផ្សេងទៀត ដើម្បីឧទ្ទេសនាមផលិតផលរបស់ខ្លួនទៅកាន់មនុស្សកាន់តែច្រើន”។

សំបកបាញ់គួងត្រូវបានធ្វើឲ្យស្ដើងបំផុត។ (រូបថត៖ VOV៥)

ចំណែកឯខាងអាជ្ញាធរវិញ លោកស្រី Quan Thi Van Anh អនុប្រធានគណៈកម្មាធិការប្រជាជនសង្កាត់ Vinh Hung បានមានប្រសាសន៍ថា៖

“ការចុះបញ្ជីចំណេះដឹងប្រជាប្រិយអំពីរបរធ្វើបាញ់គួង Thanh Tri ក្នុងបញ្ជីបេតិកភណ្ឌជាតិគឺជាការទទួលស្គាល់របស់រដ្ឋ ចំពោះតម្លៃវប្បធម៌ប្រពៃណីដ៏វិសេសវិសាល ដែលត្រូវបានថែរក្សា និងបន្សល់ទុកពីជំនាន់មួយទៅជំនាន់មួយទៀត បញ្ជាក់អំពីតម្លៃប្រវត្តិសាស្ត្រ វប្បធម៌ និងបច្ចេកទេសប្រពៃណីនៃមុខរបរនេះ ព្រមទាំងបង្កើតលក្ខខណ្ឌអំណោយផលសម្រាប់មូលដ្ឋានក្នុងការអភិរក្ស លើកតម្កើង និងផ្សព្វផ្សាយមុខរបរឲ្យកាន់តែប្រសើរឡើង។ នេះក៏ជាមូលដ្ឋានដ៏សំខាន់ ដើម្បីឲ្យសិប្បករ ក្រុមគ្រួសារប្រកបរមុខរបរនេះ ទទួលបានគោលនយោបាយគាំទ្ររបស់រដ្ឋ និងលើកកម្ពស់ការយល់ដឹងអំពីការថែរក្សាលក្ខណៈស្រស់ស្អាតប្រពៃណី អភិវឌ្ឍន៍ផលិតកម្ម និងបណ្តុះបណ្តាលវិជ្ជាជីវៈដល់ជំនាន់យុវជនផងដែរ។ នាពេលខាងមុខ អាជ្ញាធរសង្កាត់ Vinh Hung នឹងផ្តោតលើការអនុវត្តដំណោះស្រាយជាក់លាក់មួយចំនួន ដើម្បីអភិរក្សនិងពង្រីកតម្លៃនៃមុខរបរធ្វើបាញ់គួង Thanh Tri ដោយផ្សារភ្ជាប់ជាមួយនឹងការផ្សព្វផ្សាយរូបភាពមូលដ្ឋាននិងអភិវឌ្ឍន៍ទេសចរណ៍ប្រកបដោយនិរន្តរភាព។”

បាញ់គួង Thanh Tri ធ្លាប់បានឈានចូលស្នាដៃអក្សរសិល្ប៍របស់អ្នកនិពន្ធវៀតណាមល្បីៗដូចជា៖ Thach Lam, Vu Bang, To Hoai... មុខរបរធ្វើបាញ់គួង Thanh Tri ត្រូវបានបង្កើតម៉ាកយីហោសមូហភាពក្នុងឆ្នាំ ២០១៥ ហើយចំណេះដឹងប្រជាប្រិយអំពីរបរធ្វើបាញ់គួង Thanh Tri ទើបតែត្រូវបានទទួលស្គាល់ជាបេតិកភណ្ឌអរូបីជាតិ។ បាញ់គួង Thanh Tri នឹងឈានឆ្ងាយបន្ថែមទៀត ដើម្បីរួមចំណែកផ្សព្វផ្សាយលក្ខណៈវិសេសវិសាលនៃភោជនីហារដ្ឋធានី៕