ភូមិរបរ Long Dien។ (រូបថត៖ brt.vn)

ឆ្លងកាត់រយៈពេលរាប់រយឆ្នាំនៃការបង្កើត និងអភិវឌ្ឍមក អ្នកភូមិនៅតែបន្ត និងថែរក្សាមុខរបរចាក់ពុម្ភសំរិទ្ធ ដើម្បីឲ្យម៉ាកយីហោសំរិទ្ធ Long Dien បន្តត្រូវបានគេស្គាល់ដល់យ៉ាងទូលំទូលាយក្នុងជីវភាពសម័យបច្ចេកវិទ្យាទំនើបនាពេលបច្ចុប្បន្ន។  

សព្វថ្ងៃនេះ ប្រសិនបើមានឱកាសមកទីនេះ ភ្ញៀវទេសចរអាចទស្សនាសិប្បកម្មចាក់ពុម្ភសំរិទ្ធ ទស្សនាសិប្បករឆ្លាក់លំនាំនីមួយៗយ៉ាងប៉ិនប្រសប់ ឬស្តាប់សំឡេងដាប់ចោះដ៏អ៊ូអរពាសពេញផ្លូវក្នុងភូមិ។

ដំណាក់កាលមួយដើម្បីបង្ហើយផលិតផលសំរិទ្ធ។ (ប្រភព៖ brt.vn)

ចាប់ពីសតវត្សន៍ទី ១៧ មក ផលិតផលសំរិទ្ធនៃភូមិ Long Dien មានភាពល្បីល្បាញនៅទូទាំងតំបន់ប៉ែកខាងលិចភូមិភាគខាងត្បូង ជាមួយនឹងផលិតផលជាច្រើនដូចជា ជួង ជើងដោតធូប ជាដើម។ ឆ្លងកាត់ជាច្រើនជំនាន់មកហើយ មុខរបរចាក់ពុម្ភសំរិទ្ធនៅតែត្រូវបានរក្សាទុកដោយមនុស្សដែលស្រឡាញ់របរនេះ៖

“តាំងពីខ្ញុំមានអាយុ១០ឆ្នាំ ខ្ញុំបានឃើញអ្នកភូមិទាំងមូលប្រកបរបរ ចាក់ពុម្ភសំរិទ្ធនេះហើយ។ ពេលខ្ញុំធំដឹងក្ដី ឪពុកម្ដាយបានបង្រៀនខ្ញុំពីរបរនេះ។ ខ្ញុំស្រឡាញ់របរនេះ ព្រោះវាបានបន្សល់ទុកពីជីដូនជីតា និងឪពុកម្តាយរបស់ខ្ញុំ ហើយខ្ញុំប្ដេជ្ញាចិត្តថែរក្សារបរនេះ”។

“ជីដូនជីតា និងឪពុកម្តាយរបស់ខ្ញុំបានបន្សល់ទុករបរនេះ។ ពេលដែលខ្ញុំធំដឹងក្តី ខ្ញុំបន្តអាជីពគ្រួសារ មិនជ្រើសរើសរបរផ្សេងទៀតឡើយ។ រហូតមកដល់ពេលនេះ គ្រួសារខ្ញុំប្រកបរបរនេះបាន៤ជំនាន់ហើយ។ ខ្ញុំមិនដែលបោះបង់ចោលរបរនេះទេ លុះត្រាតែពេលខ្ញុំស្លាប់ បើមិនដូច្នេះទេ ខ្ញុំនៅតែតាំងចិត្តប្រកបរបរនេះ។ ប្រសិនបើជំនាន់យុវជនចង់រៀន ខ្ញុំត្រៀមបង្រៀនគេគ្រប់បែបយ៉ាង”។

លោក Tran Van Nhan សិប្បករនៃភូមិចាក់ពុម្ភសំរិទ្ធ Long Dien។ (ប្រភព៖ brt.vn)

ជាមួយនឹងភាពប៉ិនប្រសប់ និងច្នៃប្រឌិត របស់ជាងសិតសំរឹទ្ធស្ទាត់ជំនាញ ផលិតផលសំរិទ្ធនៃភូមិរបរនេះ នៅតែរក្សាបាននូវលក្ខណៈប្រពៃណីផ្ទាល់ខ្លួនខណៈដែលមានការច្នៃប្រឌិតសមស្របនឹងសម័យកាល។ ជាពិសេស ការអនុវត្តបច្ចេកវិទ្យា និងគ្រឿងម៉ាស៊ីនក្នុងការផលិតបានរួមចំណែកជំរុញផលិតកម្ម នៅក្នុងភូមិ ជួយឱ្យសិប្បកម្មលើកកម្ពស់សមត្ថភាពប្រកួតប្រជែង និងនាំមកនូវតម្លៃសេដ្ឋកិច្ចខ្ពស់។ លោក Tran Van Nhan សិប្បករក្នុងភូមិបានឲ្យដឹងថា៖

“ជីវភាពឥឡូវនេះ បានផ្លាស់ប្តូរច្រើន និងទំនើបជាងមុន។ ឥឡូវនេះ សិប្បកម្មនៅតែធ្វើតាមប្រពៃណីការចាក់ពុម្ភសំរឹទ្ធរបស់ដូនតា ប៉ុន្តែក៏ប្រើបច្ចេកវិទ្យាបន្ថែមទៀត។ លែងប្រើអុសទៀតហើយជំនួសដោយម៉ាស៊ីន។ ប្រការសំខាន់គឺផលិតផលរបស់យើងផ្លាស់ប្តូរដើម្បីបំពេញតាមចំណង់ចំណូលចិត្តទីផ្សារ។ ជាទូទៅ មុខរបរនេះមានស្ថិរភាព ហើយមិនត្រូវសាបសូន្យឡើយ”។

របរស្ថេរភាពបានបង្កើតការងារ និងប្រាក់ចំណូលស្ថិរភាពសម្រាប់កម្មកររាប់ម៉ឺននាក់នៅក្នុងនិងក្រៅប្រទេស។ ជាពិសេស យុវជនកាន់តែមានការជក់ចិត្តនឹងមុខរបរដែលដូនតាបន្សល់ទុកមក។ លោក Nguyen Thanh Hoai សិប្បកម្មចាក់ពុម្ភសំរឹទ្ធ Tran Tam Hong Nhan បានឲ្យដឹងថា៖

“នៅពេលខ្ញុំមកទីនេះដើម្បីធ្វើការ ខ្ញុំត្រូវបានណែនាំយ៉ាងយកចិត្តទុកដាក់។ ចំណែកប្រាក់ចំណូលក៏មានស្ថិរភាព ហើយប្រាកដជា ខ្ញុំនឹងបន្តប្រកបមុខរបរនេះយ៉ាងយូរអង្វែង”។

ដើម្បីមានផលិតផលសំរិទ្ធពេញលេញ សិប្បករត្រូវអនុវត្តន៍ដំណាក់កាលជាច្រើនដូចជា បង្កើតពុម្ភ លាយសំរិទ្ធ និងចាក់សំរឹទ្ធទៅក្នុងពុម្ភ...។ ក្នុងនោះ ដំណាក់កាលបង្កើតពុម្ភត្រូវចំណាយពេលវេលាច្រើនបំផុត ដោយទាមទារឱ្យសិប្បករមានភាពល្អិតល្អន់ និងប៉ិនប្រសប់។

ជួងសំរិទ្ធគឺជាផលិតផលដ៏ល្បីមួយរបស់ភូមិ Long Dien។ (ប្រភព៖ brt.vn)

គ្រាន់តែឃើញដោយផ្ទាល់ភ្នែកនូវជួងសំរិទ្ធពណ៌ភ្លឺរលោងជាមួយនឹងក្បូរក្បាច់រចនាសត្វនាគបង្វិលមួយគូ និងពាក្យពេជ្រដែលបានឆ្លាក់លើតួកណ្ដឹង ទើបអ្នកអាចយល់ច្បាស់ពីទេពកោសល្យរបស់សិប្បករ។ ភ្ញៀវទេសចរ Duong Van Thai មកពី Hai Phong បានសម្តែងថា៖

“ពិតជាអស្ចារ្យណាស់ដែលមុខរបរប្រពៃណីត្រូវបានរក្សាទុកនៅទីនេះ។ ខ្ញុំមានអារម្មណ៍សោមនស្សរីករាយ ដោយបានទស្សនាសិប្បករបង្កើតជួងសំរិទ្ធ។ ចាប់ពីដំណាក់កាលភ្ជាប់ក្រមួនឃ្មុំ រួចយកទៅសម្ងួត បង្កើតពុម្ភ ចាក់ពុម្ភ ដំណាក់កាលនីមួយៗគឺល្អិតល្អន់និងស្មុគ្រស្មាញណាស់”។

ជាងសំរិទ្ធជាមួយនឹងទេពកោសល្យ ភាពប៉ិនប្រសប់របស់ខ្លួន បានបង្កើតជាផលិតផលសំរិទ្ធដ៏ស្រស់ស្អាត និងប្រណិត ដូចជា ជើងពានធូប ជើងចង្កៀង ជួងធំ ជួងតូច ឆាប គងឃ្មោះ ឬរបស់របរប្រើប្រាស់ប្រចាំថ្ងៃដូចជា ស្ពក ឆ្នាំង ហិបស្លា ថាស ចាន ជាដើម។ នៅចំពោះមុខការផ្លាស់ប្ដូរយ៉ាងឆាប់រហ័សនៃនគរភាវូបនីយកម្ម និងការពេញនិយមនៃរបស់របរងាយស្រួលប្រើប្រាស់ក្នុងជីវភាពសម័យបច្ចេកវិទ្យាទំនើប ផលិតផលសំរឹទ្ធ Long Dien នៅតែត្រូវបានមនុស្សជាច្រើនចូលចិត្ត និងជ្រើសរើស។ ផលិតផលរបស់ភូមិរបរប្រពៃណី Long Dien ត្រូវបានប្រជាជនច្រើនជំនាន់នៅទីនេះថែរក្សាជារៀងរហូត៕