ផលិតផលសេរ៉ាមិចត្រូវបានដាក់តាំងបង្ហាញនៅក្នុងមជ្ឈមណ្ឌលច្នៃប្រឌិតភូមិសិប្បកម្មដំបូងគេ នៅ Bat Trang។ (រូបថត៖ Viet Trung/congluan.vn)

យោងតាមការវាយតម្លៃរបស់គណៈមេប្រយោគអន្តរជាតិនៃក្រុមប្រឹក្សាសិប្បកម្មពិភពលោក ភូមិសេរ៉ាមិច Bat Trang ឆ្លើយតបនឹងលក្ខណៈវិនិច្ឆ័យទាំងអស់ទាំងខាងសេដ្ឋកិច្ច វប្បធម៌ សង្គម និងបរិស្ថាន ដែលសក្តិសមក្លាយជាសមាជិកនៃបណ្តាញទីក្រុងសិប្បកម្មច្នៃប្រឌិតពិភពលោក។ ការដែលក្រុមប្រឹក្សាសិប្បកម្មពិភពលោកបានផ្តល់វិញ្ញាបនបត្រសមាជិកភាពជាផ្លូវការដល់ភូមិសេរ៉ាមិច Bat Trang គឺជាក្តីសប្បាយរីករាយដ៏ធំសម្រាប់ប្រជាជននៅមូលដ្ឋាន។

“ខ្ញុំគិតថា នេះជាឱកាសដ៏អស្ចារ្យមួយដើម្បីឧទ្ទេសនាមសេរ៉ាមិច Bat Trang ដល់មិត្តភក្តិអន្តរជាតិ ហើយដើម្បីឲ្យមនុស្សទាំងអស់គ្នាដឹងអំពីភូមិសេរ៉ាមិចមួយដែលនៅតែរក្សាបាននូវលក្ខណៈសិប្បកម្មប្រពៃណី ក៏ដូចជាផលិតផលសេរ៉ាមិច Bat Trang ដ៏ប្លែកៗពីគេ”។

“ជាមួយនឹងទិសដៅគួបផ្សំលក្ខណៈប្រពៃណី ជាមួយនឹងដង្ហើមសហសម័យនោះ Bat Trang នឹងក្លាយទៅជាភូមិផលិតកម្មសិប្បកម្មនិងទេសចរណ៍។នេះគឺជាសញ្ញាល្អមួយ។ Bat Trang កំពុងផ្លាស់ប្តូរ”។

ផលិតផលសេរ៉ាមិច Bat Trang។ (រូបថត៖ VOV2)

យោងតាមសិប្បការិនី Ha Thi Vinh អនុប្រធានសមាគមភូមិរបរសិប្បកម្មវៀតណាម ប្រធានសមាគមសិប្បកម្មវិចិត្រសិល្បៈ និងភូមិរបរសិប្បកម្មទីក្រុងហាណូយ ព្រឹត្តិការណ៍នេះគឺជាឱកាសសម្រាប់ Bat Trang បញ្ជាក់ពីតម្លៃដ៏ពិសេសរបស់ខ្លួន ក៏ដូចជាបើកឱកាសដើម្បីផ្សព្វផ្សាយភូមិសិប្បកម្មទៅកាន់ពិភពលោក។

“នេះគឺជាមោទនភាពសម្រាប់យើងខ្ញុំ។ ពីមោទនភាពនេះ យើងខ្ញុំនឹងកសាងម៉ាកយីហោដ៏វិសេសវិសាលមួយ មិនត្រឹមតែល្បីល្បាញក្នុងស្រុកប៉ុណ្ណោះទេ ថែមទាំងលើទូទាំងពិភពលោកទៀតផង។ នោះគឺជាសុបិនរបស់យើងខ្ញុំ។ តាមរយៈម៉ាកយីហោនេះ យើងខ្ញុំនឹងនិទានរឿងរ៉ាវប្រវត្តិសាស្ត្រវប្បធម៌នៃស្រុកកំណើត ហើយយើងខ្ញុំនឹងបង្កើតវិបុលភាពសម្រាប់កូនចៅជំនាន់ក្រោយៗ។ នៅពេលក្លាយជាសមាជិកនៃបណ្តាញ ជាដំបូង យើងរៀនបានច្រើនពីភូមិសិប្បកម្មនានាលើពិភពលោក ដែលចូលរួមក្នុងបណ្តាញនេះ ហើយពីនោះ ស្វែងយល់ពីគុណតម្លៃរបស់ពិភពលោកសម្រាប់ភូមិសិប្បកម្មរបស់វៀតណាម។ ទីពីរ តាមរយៈបណ្តាញសិប្បកម្មពិភពលោក យើងក៏ផ្សព្វផ្សាយលក្ខណៈវិសេសវិសាលនៃភូមិសិប្បកម្ម Bat Trang ទៅកាន់ពិភពលោកផងដែរ”។

សិប្បករ Pham Ngoc Huy បាន "រក្សាអណ្ដាតភ្លើង" នៃសេរ៉ាមិច Bat Trang អស់រយៈពេលជាង ៥០ ឆ្នាំមកហើយ។ (រូបថត៖ កាសែត Hai Duong)

សមិទ្ធិផលនេះគឺជាការរួមបញ្ចូលគ្នានៃគុណតម្លៃរបស់ភូមិសេរ៉ាមិចបុរាណជាមួយនឹងប្រវត្តិសាស្ត្រ ៥០០ ឆ្នាំ ដែលស្ថិតនៅតាមដងទន្លេក្រហម (នៅភូមិ Gia Cao និងភូមិ Bat Trang ឃុំ Bat Trang ខណ្ឌ Gia Lam ទីក្រុងហាណូយ)។ ក្នុងរយៈពេលរាប់រយឆ្នាំកន្លងមកនេះ បណ្ដាសិប្បករ និងជាងស្មូនសេរ៉ាមិចដ៏ពូកែនៅក្នុងភូមិ ដោយការជក់ចិត្តចំពោះរបរសិប្បកម្មប្រពៃណី ភាពច្នៃប្រឌិត បាទដៃបិនប្រសប់ និងអាថ៌កំបាំងផ្ទាល់ខ្លួនដែលបានបន្សល់ទុកជាច្រើនជំនាន់មក បានបង្កើតផលិតផលសេរ៉ាមិចដ៏ល្អប្រណិត ទាក់ភ្នែក វិសេសវិសាល និងមានតម្លៃខ្ពស់។ ជាពិសេស គំរូសេរ៉ាមិចពីសម័យបុរាណដូចជា រាជកាល Ly, Tran, Le, Mac ត្រូវបានបណ្ដាសិប្បករនៅ Bat Trang ស្ដារឡើងវិញដោយជោគជ័យ។ សិប្បករ Pham Ngoc Huy បានឲ្យដឹងថា៖

“កាចាពណ៌ត្បូង ពណ៌ខៀវ ឬពណ៌ត្នោត អាចរកបានតែនៅភូមិ Bat Trang ប៉ុណ្ណោះ ពីព្រោះសេរ៉ាមិច Bat Trang ត្រូវបានដុតនៅសីតុណ្ហភាពខ្ពស់ ពី  ១២៥០ - ១៣២០ អង្សារសេ។ កាចាសេរ៉ាមិច Bat Trang មានចំណុចខុសពីគេ គឺវាត្រូវបានដុតក្នុងឡដុតអុស។ ដូច្នេះកាចាមានពណ៌ប្លែកពីគេ”។

លក្ខណៈវប្បធម៌ និងប្រវត្តិសាស្ត្រដ៏វិសេសវិសាលបានបង្កើតភាពទាក់ទាញ ដែលធ្វើឱ្យផលិតផលសេរ៉ាមិច Bat Trang កាន់តែមានប្រជាប្រិយភាពខ្លាំងពីអ្នកប្រើប្រាស់ក្នុងស្រុក និងបរទេស ហើយបាននាំចេញទៅកាន់បណ្ដាប្រទេសអាស៊ី អឺរ៉ុប និងអាមេរិក។ ជាពិសេស ផលិតផលសិល្បៈលំដាប់ខ្ពស់ជាច្រើនរបស់ភូមិសិប្បកម្មនេះ ក៏ត្រូវបានជ្រើសរើសជាកាដូសម្រាប់ប្រមុខរដ្ឋ និងគណៈប្រតិភូការទូតពេលមកបំពេញទស្សនកិច្ចនៅវៀតណាមផងដែរ។

បច្ចុប្បន្ននេះ ភូមិសិប្បកម្មសេរ៉ាមិច Bat Trang មានសិប្បករជាង ១០០នាក់ អាជីវកម្មជិត ២០០ និងប្រជាជនផលិតនិងធ្វើអាជីវកម្មសេរ៉ាមិចប្រមាណ ១០០០ គ្រួសារ។ យុវជនក្នុងភូមិរហូតដល់ ៩០% ចេះធ្វើគ្រឿងសេរ៉ាមិច។ អ្នកស្រី Vu Nhu Quynh សិប្បការិនីវ័យក្មេងនៃភូមិសិប្បកម្ម Bat Trang មានមោទនភាពយ៉ាងខ្លាំងចំពោះរបរសិប្បកម្មប្រពៃណីដែលដូនតាបានបន្សល់ទុកមក។

“កាលពីមុន គ្រឿងសេរ៉ាមិចត្រូវបានផលិតដោយដៃទាំងស្រុងដូច្នេះ ផលិតផលត្រូវបាត់បង់ ខូចខាត ឬបែកបាក់ច្រើនណាស់។ ក្រៅពីការរក្សាប្រពៃណី និងអាថ៌កំបាំងសិប្បកម្ម ខ្ញុំនៅតែធ្វើបច្ចុប្បន្នភាពបច្ចេកវិទ្យា និងបច្ចេកទេស ដើម្បីគាំទ្រផលិតផលសេរ៉ាមិចធ្វើដោយដៃ។ សព្វថ្ងៃនេះ ជាងស្មូនសេរ៉ាមិច មិនត្រឹមតែចេះធ្វើផលិតផលប៉ុណ្ណោះទេ ថែមទាំងចេះពីរបៀបផ្សព្វផ្សាយ ណែនាំ ចេះនិទានរឿងអំពីគ្រឿងសេរ៉ាមិច ដើម្បីនាំផលិតផលសេរ៉ាមិចឈានទៅឆ្ងាយៗទៀតផង”។

ក្នុងរយៈពេលប៉ុន្មានឆ្នាំកន្លងមក ប្រជាជន Bat Trang បានទាញយកសក្តានុពល និងប្រៀបខ្លាំងនៃភូមិសិប្បកម្មប្រពៃណីដែលមានប្រវត្តិសាស្ត្រនិងវប្បធម៌ដ៏យូរលង់ ហើយវិនិយោគពង្រីកទ្រង់ទ្រាយ និងអភិវឌ្ឍន៍ទេសចរណ៍ឆ្លងកាត់បទពិសោធន៍នៅភូមិសិប្បកម្ម។ Bat Trang សព្វថ្ងៃគឺជាគោលដៅទេសចរណ៍ដ៏ល្បីល្បាញមួយនៃរដ្ឋធានីហាណូយ។