ພວກແມ່ປ້າພວມຕາກປາໃຫ້ແຫ້ງ

      ດົ່ງທາບ ແມ່ນເຂດພື້ນທີ່ຕ່ຳກ່ວາໝູ່ໃນເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ ດ້ວຍລະດູນ້ຳຖ້ວມກໍ່ເຕັມໄປດ້ວຍນ້ຳຢູ່ທຸກຫົນແຫ່ງ. ຈາກລະດູ ນ້ຳຖ້ວມນັ້ນ ກໍ່ໄດ້ໃຫ້ກຳເນີດໝູ່ບ້ານອາຊີບເຮັດປາແຫ້ງ ຕາແສງ ຝູເຖາະ ເມືອງ ຕາມນົງ. ຕາມບັນດາຜູ້ອາຍຸສູງຢູ່ທ້ອງຖິ່ນ, ໃນຊຸມປີ 2000 ຢູ່ ດົ່ງທາບ ເຄີຍເກີດນ້ຳຖ້ວມ. ຕາມກະແສນ້ຳໄຫຼ, ປາ ກຸ້ງກໍ່ພາກັນມາເຕົ້າໂຮມຢູ່ເຂດຈຸດສຸມຂອງເມືອງຕາມນົງ. ເພື່ອມີແຫຼ່ງປາເປັນສ່ວນແຮກິນຍາວນານ, ເອື້ອຍນ້ອງແມ່ຍິງໃນຕາແສງຝູເຖາະ ໄດ້ມີຫຼາຍວິທີ ໃນນັ້ນ ການເຮັດປາແຫ້ງກໍມີຄວາມສະດວກສະບາຍ. ຂ່າວດີຂ່າວມ່ວນໄດ້ຖືກສົ່ງໄປໄກ, ອາຫານແຫ້ງທີ່ແຊບນົວຢູ່ແຫ່ງນີ້ ໄດ້ຖືກສົ່ງໄປທົ່ວປະເທດ, ດັ່ງນັ້ນເຂົາເຈົ້າກໍ່ໄດ້ພາກັນມາຫາ ຕາມນົງ ເພື່ອຊື້ອາຫານແຫ້ງ ແລ້ວກໍ່ຄ່ອຍໆປາກົດມີເຂດຕະຫຼາດທີ່ໃສ່ຊື່ວ່າ ຕະຫຼາດອາຫານແຫ້ງ ຕາມນົງ. ຍ້ອນລົດຊາດພິເສດ ດັ່ງນັ້ນໃນໂອກາດບຸນເຕັດ, ລະດູບານໃໝ່ວຽນມາ, ປະຊາຊົນກໍ່ໄດ້ມາສັ່ງຊື້ປາແຫ້ງຂອງພໍ່ແມ່ພີ່ນ້ອງຢູ່ຕາແສງ ຝູເຖາະ. ແລະ ອາຊີບເຮັດປາແຫ້ງຢູ່ທີ່ນີ້ກໍ່ຂະຫຍາຍຕົວໄປນຳ. ນາງ ໂຮ່ທິຈິງ ເຈົ້າຂອງຮາກຖານຜະລິດອາຫານແຫ້ງ ຕູ໊ຈິງ ຕາແສງ ຝູເຖາະ ເມືອງ ຕາມນົງໃຫ້ຮູ້ວ່າ:

     “ຈາກແຂວງ ກ່າເມົາ, ເກິ່ນເທີ, ນະຄອນໂຮ່ຈີມິນ, ແຂວງ ບິ່ງເຢືອງ ເຂົາເຈົ້າກໍ່ມາຫາຢູ່ທີ່ນີ້ເພື່ອຊື້ອາຫານແຫ້ງ. ພວກຂ້າພະເຈົ້າຢູ່ທີ່ນີ້ ຍາມໃດກໍ່ປັບປຸງຜະລິດຕະພັນຕາມຄວາມຕ້ອງການຂອງລູກຄ້າ”.

   ຢູ່ທີ່ນີ້, ແຕ່ລະຄອບຄົວດຳລົງຊີວິດຢູ່ແຄມທາງ ກໍ່ແມ່ນຮາກຖານຜະລິດແຫ່ງໜຶ່ງ. ຢູ່ໜ້າເຮືອນກໍ່ລ້ວນແຕ່ມີຮ້ານຕາກຂອງແຫ້ງ ທັງຕາກທັງຂາຍ. ລູກຄ້າສາມາມາຊອກຊື້ປາ ນ້ຳຈືດແຫ້ງທຸກຊະນິດ. ນາງ ໂຮ່ທິຈິງ ໃຫ້ຮູ້ຕື່ມອີກວ່າ:

     “ຍາມນີ້ ປາມີຫຼາຍແທ້  ພໍ່ແມ່ພີ່ນ້ອງໄປຫາຢູ່ຕາມແມ່ນ້ຳ ແລະ ເອົາມານີ້ຂາຍ. ພວກຂ້າພະເຈົ້າຊື້ເປັນຂອງແຮ ເພື່ອເຮັດຂອງແຫ້ງໃນຍາມບຸນເຕັດ”.

    ພວກພໍ່ຄ້າຊາວຂາຍຢູ່ຕະຫຼາດອາຫານແຫ້ງ ຕາມນົງ ກໍ່ໄດ້ກຳນົດສະເພາະໃຫ້ຕົນເອງກ່ຽວກັບບັນດາປະເພດສິນຄ້າທີ່ເປັນປາຍແຫຼມ, ໃນນັ້ນຢືນອັນດັບໜຶ່ງ ແມ່ນປາຄໍ່ໂຫຼ້ແຫ້ງ. ປາຄໍ່ໂຫຼ້ພາຍຫຼັງຫາມາໄດ້ ກໍ່ຕ້ອງທຳຄວາມສະອາດ ແລ້ວກໍ່ເອືອບເຄື່ອງປຸງຄື ເກືອ, ນ້ຳປາ, ໝາກເພັດ, ຫົວສີໄຄ ແລະ ຂີ້ໝິ້ນ ເພື່ອກຳຈັດກິ່ນຄາວຂອງປາ. ຍ້ອນປະຕິບັດບັນດາຂັ້ນຕອນແບບຄົບວົງຈອນຈາກເຂດລ້ຽງຫາຂອດປຸງແຕ່ງ, ການຮັບປະກັນຫຼັກອະນາໄມດ້ານສະບຽງອາຫານ ດັ່ງນັ້ນປາຄໍ່ໂຫຼ້ແຫ້ງ ຕາມນົງ ສາມາດມີທ່າໄດ້ປຽບແກ້ງແຍ້ງທາງດ້ານຄຸນນະພາບ ກໍ່ຄືລາຄາຂາຍ. ສະເລ່ຍຢູ່ທີ່ນີ້ ແຕ່ລະຄອບຄົວ ໃນແຕ່ລະປີກໍ່ເອົາປາສົດປະມານ 200 ໂລເພື່ອເຮັດເປັນປາແຫ້ງ. ສຳລັບໃນວັນບຸນຄື ວັນບຸນເຕັດ ກໍ່ເພີ່ມຂຶ້ນປະມານ 500 ໂລຕໍ່ວັນ. ນາງ ດວ່ານທິກີມເຟື້ອງ ເຈົ້າຂອງຄອບຄົວຜະລິດປາແຫ້ງຢູ່ຕາແສງ ຝູເຖາະເປີດເຜີຍວ່າ:

        “ເຮົາກໍ່ຕາກປາແຕ່ຮຸ່ງເຊົ້າຫາ 13 ໂມງ ແລະ ຮອດຕອນແລງຈຶ່ງເອົາໃສ່ຕູ້ເຢັນ. ຕາກຮອດມື້ທີສາມຈຶ່ງນຳໄປຂາຍໃຫ້ລູກຄ້າໄດ້. ແຕ່ນີ້ຫາບຸນເຕັດກໍ່ເຮັດຕະຫຼອດ, ປາຄໍ່ໂຫຼ້ເຂົາເຈົ້າກໍ່ສັ່ງຊຶ້ຫຼາຍ ເພື່ອໃຊ້ເປັນຂອງຕ້ອນ ດັ່ງນັ້ນກໍ່ເຮັດຢ່າງບໍ່ມີຍາມພັກເຊົາ”.

      ຕະຫຼາດອາຫານແຫ້ງຕາມນົງ ໃນປັດຈຸບັນມີຫຼາຍກວ່າ 40 ຄອບຄົວເຂົ້າຮ່ວມການຜະລິດ ດຳເນີນທຸລະກິດຄ້າຂາຍປາແຫ້ງ ປະກອບສ່ວນແກ້ໄຂວຽກເຮັດງານທຳໃຫ້ແກ່ແຮງງານທ້ອງຖິ່ນນັບ 100 ຄົນ. ປີ 2019 ປາແຫ້ງພິເສດຂອງຕາແສງ ຝູເຖາະ ໄດ້ຮັບກາໝາຍ“ປາແຫ້ງ ຝູເຖາະ” ຈາກກົມຊັບສິນທາງປັນຍາ. ນີ້ແມ່ນປັດໄຈທີ່ສຳຄັນເພື່ອໃຫ້ຜູ້ບໍລິໂພກໃນທົ່ວປະເທດມີຄວາມເຊື່ອໝັ້ນຕໍ່ອິດທິພົນກໍ່ຄືຄຸນນະພາບຂອງຜະລິດຕະພັນປາແຫ້ງ ຝູເຖາະ ຢູ່ ຕາມນົງ.