(VOVWORLD) - SIAL Interfood 2024 ແມ່ນໜຶ່ງໃນບັນດາງານວາງສະແດງອາຫານ ແລະ ເຄື່ອງດື່ມໃຫຍ່ສຸດໃນພາກພື້ນອາຊີຕາເວັນອອກສ່ຽງໃຕ້, ເຊິ່ງແກ່ຍາວແຕ່ວັນທີ 13 – 16 ພະຈິກ ຢູ່ ຈາກາຕາ, ອິນໂດເນເຊຍ. ຫວຽດນາມ ມີ 5 ວິສາຫະກິດເຂົ້າຮ່ວມ ດ້ວຍເປົ້າໝາຍແນະນຳ ແລະ ໂຄສະນາບັນດາຜະລິດຕະພັນ, ພ້ອມທັງຊອກຮູ້ໂອກາດສຳຜັດກັບຕະຫຼາດ ອິນໂດເນເຊຍ ທີ່ມີກຳລັງບົ່ມຊ້ອນ ກໍຄືພາກພື້ນ ແລະ ສາກົນ. ໃນລາຍການຊາຍຄາ ອາຊຽນ ພາກນີ້, ເຊີນທ່ານຮັບຟັງບົດຂຽນທີ່ພາດຫົວຂໍ້ “ວິສາຫະກິດ ຫວຽດນາມ ພິຊິດຕະຫຼາດ “ເອົາໃຈຍາກ” ອິນໂດເນເຊຍ ເທື່ອລະກ້າວ.
 ຊາວ ອິນໂດເນເຊຍ ມີຄວາມສົນໃຈຕໍ່ສິນຄ້າ ຫວຽດນາມ (ພາບ: VOV) |
ມີວິສາຫະກິດຂອງຫຼາຍກວ່າ 25 ປະເທດ ທີ່ມາຈາກຫຼາຍພາກພື້ນແຕກຕ່າງກັນໃນໂລກເຂົ້າຮ່ວມງານວາງສະແດງ SIAL Interfood 2024. ງານວາງສະແດງຄັ້ງນີ້ ໄດ້ແນະນຳບັນດາການປ່ຽນແປງໃໝ່ໃນຂົງເຂດອາຫານ, ເຄື່ອງດື່ມ, ການບໍລິການວາງສະແດງອາຫານ, ໂຮງແຮມ, ພັດທະຄານ, ຮ້ານກາເຟ ແລະ ຮ້ານຂາຍເຂົ້າໜົມ. ມີ 1.200 ຫົວໜ່ວຍເຂົ້າຮ່ວມ, ລວມມີວິສາຫະກິດຂະໜາດນ້ອຍ ແລະ ກາງ (MSME) 150 ແຫ່ງຈາກຫຼາຍພາກພື້ນທີ່ແຕກຕ່າງກັນ, ເຄື່ອນໄຫວໃນຂົງເຂດຜະລິດ, ປຸງແຕ່ງ, ນຳເຂົ້າສົ່ງອອກ ແລະ ຈຳໜ່າຍອາຫານ ແລະ ເຄື່ອງດື່ມ.
 ທ່ານ ຟ້າມເຖເກື່ອງ ທີ່ປຶກສາດ້ານການຄ້າ ຫວຽດນາມ ປະຈຳ ອິນໂດເນເຊຍ (ພາບ: VOV) |
ທ່ານ ຟ້າມເຖເກື່ອງ ທີ່ປຶກສາດ້ານການຄ້າ ຫວຽດນາມ ປະຈຳ ອິນໂດເນເຊຍ ໃຫ້ຮູ້ວ່າ, ວົງເງິນການຄ້າສອງຝ່າຍ ຫວຽດນາມ - ອິນໂດເນເຊຍ ໃນໄລຍະຜ່ານມາໄດ້ເພີ່ມຂຶ້ນຢ່າງວ່ອງໄວ. ໃນ 9 ເດືອນຂອງປີ 2024, ການສົ່ງອອກຂອງ ຫວຽດນາມ ໄປຍັງ ອິນໂດເນເຊຍ ໄດ້ເພີ່ມຂຶ້ນ 22%. ການບັນລຸໄດ້ຜົນງານດັ່ງກ່າວ ແມ່ນຍ້ອນມີການປະກອບສ່ວນຢ່າງໃຫຍ່ຫຼວງຂອງບັນດາວິສາຫະກິດ ຫວຽດນາມ ຜ່ານບັນດາການເຄື່ອນໄຫວສົ່ງເສີມວິສາຫະກິດສຳຜັດກັບຕະຫຼາດ, ລວມມີການເຂົ້າຮ່ວມງານວາງສະແດງ, ກອງປະຊຸມສົ່ງເສີມການຄ້າ. ທ່ານໃຫ້ຮູ້ວ່າ ມີວິສາຫະກິດ 5 ແຫ່ງຂອງ ຫວຽດນາມ ເຂົ້າຮ່ວມງານວາງສະແດງຄັ້ງນີ້. ທ່ານ ຟ້າມເຖເກື່ອງ ທີ່ປຶກສາດ້ານການຄ້າ ຫວຽດນາມ ປະຈຳ ອິນໂດເນເຊຍ ໃຫ້ຮູ້ຕື່ມອີກວ່າ:
“ອິນໂດເນເຊຍ ແມ່ນຕະຫຼາດໃຫຍ່ສຸດພາກພື້ນ ອາຊີຕາເວັນອອກສ່ຽງໃຕ້, ດ້ວຍຈຳນວນປະຊາກອນປະມານ 280 ລ້ານຄົນ, ມີຄວາມສາມາດບົ່ມຊ້ອນໃຫຍ່ຫຼວງເປັນພິເສດໃນຂົງເຂດອາຫານ ແລະ ເຄື່ອງດື່ມ. ແຕ່ລະປີ, ອິນໂດເນເຊຍ ໄດ້ນຳເຂົ້າສິນຄ້າທີ່ມີມູນຄ່າກວ່າ 20 ຕື້ USD, ດັ່ງນັ້ນ ນີ້ແມ່ນຕະຫຼາດທີ່ມີກຳລັງບົ່ມຊ້ອນສຳລັບໝວດຜະລິດຕະພັນອາຫານ ແລະ ເຄື່ອງດື່ມຂອງ ຫວຽດນາມ. ຄວາມຕ້ອງການຂອງຕະຫຼາດ ອິນໂດເນຊຍ ກໍຫຼາກຫຼາຍພໍສົມຄວນ ແລະ ຫວຽດນາມ ກໍມີຄວາມອາດສາມາດຕອບສະໜອງໄດ້ຄວາມຕ້ອງການທັງໝົດນີ້”.
 ມີຫຼາຍຜະລິດຕະພັນຂອງ ຫວຽດນາມ ໄດ້ນຳມາວາງສະແດງ (ພາບ: TTXVN) |
ໂດຍໄດ້ຮັບການຕີລາຄາວ່າ ແມ່ນຕະຫຼາດທີ່ມີກຳລັງບົ່ມຊ້ອນ, ແຕ່ ອິນໂດເນເຊຍ ກໍໄດ້ຮຽກຮ້ອງກ່ຽວກັບມາດຕະຖານການຜະລິດຕະພັນຢ່າງເຄັ່ງຄັດ, ພິເສດແມ່ນອາຫານ ແລະ ເຄື່ອງດື່ມ, ຕ້ອງຕອບສະໜອງໄດ້ມາດຕະຖານຂອງປະເທດທີ່ມີຈຳນວນປະຊາກອນຖືສາສະໜາ ອິດສະລາມ ເປັນຈຳນວນຫຼາຍ, ໃນນັ້ນ ມີໃບຢັ້ງຢືນ Halal. ເພື່ອພິຊິດຕະຫຼາດທີ່ “ເອົາໃຈຍາກ” ນີ້, ບັນດາວິສາຫະກິດ ຫວຽດນາມ ທີ່ເຂົ້າຮ່ວມງານວາງສະແດງຄັ້ງນີ້ ໄດ້ກະກຽມເອກະສານທີ່ຈຳເປັນ ເພື່ອຂະຫຍາຍໄປຍັງຕະຫຼາດສຳຄັນນີ້. ທ່ານ ຫວູຖ໊າຍເຊີນ, ຜູ້ອຳນວຍການບໍລິສັດ ລອງເຊີນ - ເຊິ່ງເປັນ ໜຶ່ງໃນ 5 ວິສາຫະກິດ ຫວຽດນາມ ທີ່ເຂົ້າຮ່ວມງານວາງສະແດງ ໄດ້ແບ່ງປັນວ່າ:
“ນີ້ແມ່ນຄັ້ງທຳອິດທີ່ບໍລິສັດ ລອງເຊີນ ເຂົ້າຮ່ວມງານວາງສະແດງຢູ່ ອິນໂດເນເຊຍ. ອິນໂດເນເຊຍ ແມ່ນຕະຫຼາດມີຊາວມຸດສະລິມເປັນຈຳນວນຫຼາຍ ແລະ ມີກຳລັງບົ່ມຊ້ອນ. ຢູ່ ອິນໂດເນເຊຍ ກໍມີຜະລິດຕະພັນໝາກມ່ວງຫິມະພານ ແຕ່ຍັງມີຄວາມຕ້ອງການກ່ຽວກັບຜະລິດຕະພັນນີ້ເປັນຈຳນວນຫຼາຍ. ດັ່ງນັ້ນ, ວິສາຫະກິດພວກຂ້າພະເຈົ້າ ຢາກແນະນຳຜະລິດຕະພັນນີ້ເຖິງຕະຫຼາດ ອິນໂດເນເຊຍ, ພ້ອມທັງຫວັງວ່າ ຈະຂະຫຍາຍລູກຄ້າຢູ່ ອິນໂດເນເຊຍ. ວິສາຫະກິດພວກຂ້າພະເຈົ້າກໍພວມກະກຽມໃບຢັ້ງຢືນ Halal ໃຫ້ຄົບຖ້ວນ”.
ດ້ວຍ 87% ໃນຈຳນວນປະຊາກອນທັງໝົດ 280 ລ້ານຄົນ ຖືສາສະໜາ ອິດສະລາມ, ຕະຫຼາດ Halal ຂອງ ອິນໂດເນເຊຍ ມີກຳລັງບົ່ມຊອ້ນຫຼາຍສຳລັບຫຼາຍປະເທດ. ຫວຽດນາມ ໄດ້ຮັບການຕີລາຄາວ່າ ແມ່ນປະເທດທີ່ມີທ່າໄດ້ປຽບຫຼາຍຢ່າງ ຍ້ອນວ່າ ລ້ວນແຕ່ເປັນປະເທດ ອາຊີຕາເວັນອອກສ່ຽງໃຕ້, ວັດທະນະທຳກໍມີຈຸດຄ້າຍຄືກັນ ສະນັ້ນ ສິນຄ້າ ຫວຽດນາມ ຈະໄດ້ຮັບການຮັບຮອງຢ່າງງ່າຍດາຍໃນຕະຫຼາດນີ້. ທ່ານ Eko Cahyanto, ເລຂາທິການໃຫຍ່ກະຊວງອຸດສາຫະກຳ ອິນໂດເນເຊຍ, ຢັ້ງຢືນວ່າ:
“ອິນໂດເນເຊຍ ໄດ້ຮ່ວມມືກັບຫຼາຍປະເທດໃນຂົງເຂດນີ້. ເມື່ອຂ້າພະເຈົ້າ ມາຢ້ຽມຢາມ ຫວຽດນາມ ເມື່ອຕົ້ນປີ 2024, ຂ້າພະເຈົ້າເຫັນວ່າ ຫວຽດນາມ ມີຄວາມສົນໃຈເຖິງຂົງເຂດ Halal ກັບ ອິນໂດເນເຊຍ. ພວກຂ້າພະເຈົ້າເຫັນວ່າ ກຳລັງບົ່ມຊ້ອນຈາກບາງຜະລິດຕະພັນ Halal ຂອງ ຫວຽດນາມ ເຊິ່ງ ອິນໂດເນເຊຍ ພວມມີຄວາມຕ້ອງການ. ທະແນມວ່າ ບັນດາຜະລິດຕະພັນ ຫວຽດນາມ ຜະລິດ ມີຄຸນນະພາບທີ່ດີ, ພິເສດ ຕອບສະໜອງໄດ້ຄວາມຮຽກຮ້ອງຕ້ອງການກ່ຽວກັບມາດຕະຖານ ແລະ ຄວາມຕ້ອງການຂອງຊາວ ອິນໂດເນເຊຍ”.
ງານວາງສະແດງ SIAL Interfood 2024 ໄດ້ດຳເນີນພາຍໃນ 04 ວັນ, ດຶງດູດແຂກມາຢ້ຽມຊົມກວ່າ 90.000 ເທື່ອຄົນ, ເຊິ່ງເປັນສະຖານທີ່ທີ່ດີເພື່ອໃຫ້ບັນດາຫົວໜ່ວຍເຄື່ອນໄຫວໃນຂົງເຂດນີ້ ກໍຄື ຜູ້ບໍລິໂພກຂອງຫຼາຍປະເທດໃນໂລກເປີດກວ້າງເຄືອຂ່າຍ, ເຂົ້າເຖິງແຫຼ່ງຄວາມຮູ້ ແລະ ສຶກສາບັນດາທ່າອ່ຽງໃໝ່. ບັນດາຜະລິດຕະພັນຂອງ ຫວຽດນາມ ຄື ເຂົ້າໜົມ, ໝາກມ່ວງຫິມະພານ, ນົມ, ກາເຟ… ໄດ້ຮັບຄວາມສົນໃຈຈາກຜູ້ຊົມເປັນຈຳນວນຫຼາຍ ບໍ່ພຽງແຕ່ຈາກວິສາຫະກິດ ອິນໂດເນເຊຍ ເທົ່ານັ້ນ, ຫາກນັບທັງບັນດາວິສາຫະກິດຢູ່ພາກພື້ນ ແລະ ສາກົນ ກໍມີຄວາມສົນໃຈ ແລະ ໃຫ້ການຕີລາຄາສູງ. ນີ້ກໍແມ່ນໂອກາດໃຫ້ວິສາຫະກິດ ຫວຽດນາມ ເຂົ້າຮ່ວມງານວາງສະແດງ ສຳຜັດ ແລະ ມຸ່ງໄປເຖິງການ “ພິຊິດ” ຕະຫຼາດ ອິນໂດເນເຊຍ “ໃຈຍາກ” ແຕ່ເຕັມໄປດ້ວຍກຳລັງບົ່ມຊ້ອນນີ້ ເທື່ອລະກ້າວ./.