ຄຸ້ມເມືອງເກົ່າ ໂຮ້ຍອານ ເບິ່ງຈາກບ່ອນສູງ

     ໂດຍໄດ້ຮັບການສ້າງຕັ້ງ ແລະ ຂະຫຍາຍຕົວນັບແຕ່ສະຕະວັດທີ  XVI, ໂຮ້ຍອານ ເຄີຍແມ່ນໜຶ່ງບັນດາທ່າກຳປັ່ນການຄ້າສາກົນທີ່ມີການເຄື່ອນໄຫວຢ່າງຟົດຟື້ນທີ່ສຸດຢູ່ພາກພື້ນ. ບັນດາກິດຈະກຳສະຖາປັດຕະຍະກຳ ແລະ ຄຸນຄ່າວັດທະນະທຳຂອງຄຸ້ມຖະໜົນເກົ່າ ໂຮ້ຍອານ ໄດ້ເຕົ້າໂຮມຫຼາຍພື້ນຖານວັດທະນະທຳ ຝ່າຍຕາເວັນອອກ ແລະ ຕາເວັນຕົກ ອັນໄດ້ປະກອບສ່ວນເພີ່ມຄວາມອຸດົມສົມບູນ ແລະ ຄວາມເປັນຫຼາຍຮູບຫຼາຍສີທາງດ້ານວັດທະນະທຳຂອງຄຸ້ມເມືອງເກົ່າ ໂຮ້ຍອານ. ຜ່ານການເວລາ ໂຮ້ຍອານໄດ້ສ້າງຄວາມປະທັບໃຈໃຫ້ແກ່ແຂກທ່ອທ່ຽວດ້ວຍບັນດາຫຼັງຄາເຮືອນທີ່ເກົ່າແກ່, ຝາເຮືອນທີ່ເກົ່າແກ່ຖືກຕົກສີໄປຕາມເວລາ. ນະຄອນ ໂຮ້ຍອານ ມີຮ່ອງຮອຍສະຖານລະດັບຊາດ 27 ແຫ່ງ ໃນນັ້ນຄຸ້ມຖະໜົນເກົ່າ ໂຮ້ຍອານ ມີເຖິງ 9 ສະຖານທີ່. ຄຸ້ມຖະໜົນເກົ່າ ໂຮ້ຍອານແມ່ນຮ່ອງຮອຍສະຖານພິເສດລະດັບຊາດ ເຊິ່ງອົງການ Unesco ໄດ້ຮັບຮອງແມ່ນມໍລະດົກໂລກເມື່ອປີ 1999. ທ່ານ ຫງວຽນແທັງຮົ່ງ ຫົວໜ້າພະແນກວັດທະນະທຳ ກິລາ ແລະ ທ່ອງທ່ຽວ ແຂວງ ກວ໋າງນາມໃຫ້ຮູ້ວ່າ:

      “ໃນ 25 ປີທີ່ຜ່ານມາ ອຳນາດການປົກຄອງນະຄອນ ໂຮ້ຍອານ ໄດ້ຄຸ້ມຄອງມໍລດົກເປັນຢ່າງດີທີ່ສຸດ ເຊິ່ງໄດ້ຮັບການຕີລາຄາ ມີປະສິດທິຜົນໃນວຽກງານຄຸ້ມຄອງຈາກຂັ້ນແຂວງ ຂັ້ນສູນກາງກໍ່ຄື ອົງການ Unesco. ພາຍຫຼັງທີ່ໄດ້ຮັບການຮັບຮອງເປັນມໍລະດົກ, ຄຸ້ມເມືອງເກົ່າ ໂຮ້ຍອານ ໄດ້ປະກອບສ່ວນຢ່າງໃຫຍ່ຫຼວງເຂົ້າໃນການພັດທະນາການທ່ອງທ່ຽວຂອງແຂວງ ກວ໋າງນາມ ພິເສດປກອບສ່ວນໃຫ້ແກ່ເສດຖະກິດສັງຄົມຂອງນະຄອນ”.

     ໂຮ້ຍອານ ບໍ່ພຽງແຕ່ແມ່ນສາງເກັບຮັກສາຄຸນຄ່າທາງດ້ານສະຖາປັດຕະຍະກຳທີ່ເກົ່າແກ່ເທົ່ານັ້ນ ຫາກຍັງແມ່ນເຂດວັດທະນະທຳທີ່ເຕັມໄປດ້ວຍພະລັງຊີວິດອີກດ້ວຍ. ປັດຈຸບັນ ໂຮ້ຍອານ ມີ 6 ໝູ່ບ້ານອາຊີບຫັດຖະກຳ ດ້ວຍເກືອບ 50 ຂະແໜງອາຊີບຫັດຖະກຳ ທີ່ຍັງຄົງໄດ້ຮັບການຮັກສາ ແລະ ຂະຫຍາຍຕົວຈາກຊາວທ້ອງຖິ່ນ. ເລື່ອງກາຍເປັນມໍລະດົກວັດທະນະທຳໂລກ ກໍ່ສ້າງເງື່ອນໄຂເພື່ອໃຫ້ ໂຮ້ຍອານ ອະນຸລກບັນດາເຂດວັດທະນະທຳທີ່ເປັນເອກະລັກ ບັນດາໝູ່ບ້ານອາຊີບທີ່ລືຊື່ທີ່ມີມານັບ 100 ປີ ຕະຫຼອດຮອດຮີດຄອງປະເພນີການເຫຼື້ອມໃສ ແລະ ສິລະປະພື້ນເມືອງເປັນເອກະລັກ ໄດ້ນຳມໍລະດົກບໍ່ເປັນວັດຖຸນີ້ກາຍເປັນຜະລິດຕະພັນທ່ອງທ່ຽວວັດທະນະທຳທີ່ດູດດື່ມ ສຳລັບແຂກທ່ອງທ່ຽວທັງຢູ່ພາຍໃນ ແລະ ສາກົນ. ນັກສິລະປະການ ບຸ່ຍກຸ໊ຍຟອງ ເຮັດໜ້າກາກເຈ້ຍ ແລະ ນັກສິລະປະການ ຮວິ່ງເສືອງ ເຮັດເຟີນີເຈີຢູ່ ໂຮ້ຍອານ ແບ່ງປັນວ່າ:

      “ໂຮ້ຍອານ ສວຍສົດງົດງາມນັບແຕ່ສະໄໝເປັນເທດສະບານ. ຜ່ານບັນດາການເຄື່ອນໄຫວ, ທຸກຄົນມີຄວາມໃກ້ຊິດສະໜິດສະໜົມ ແລະ ເຂົ້າໃຈກັນກວ່າ ອັນໄດ້ສ້າງເປັນກຸ່ມຮ່ອງຮອຍສະຖານ ດ້ວຍຫຼາຍກິດຈະກຳສົມເປັນການເຊີດຊູ ແລະ ຮັກສາເພື່ອໃຫ້ລູກຫຼານໃນພາຍພາກໜ້າສືບທອດທຸກສິ່ງທຸກຢ່າງທີ່ພວກເຮົາໄດ້ເຮັດໃນວັນນີ້”.

      “ການອະນຸລັກສີສັນວັດທະນະທຳຂອງບັນດາໝູ່ບ້ານອາຊີບ ແມ່ນສຳຄັນທີ່ສຸດ ເພາະວ່າຍ້ອນສິ່ງນີ້ໄດ້ສ້າງສີສັນເປັນເອກະລັກສະເພາະ. ແຕ່ລະໜູ່ບ້ານອາຊີບກໍ່ມີສີສັນສະເພາະຂອງຕົນ ຈາກນັ້ນພວກຂ້າພະເຈົ້າໄດ້ສ້າງບັນດາຄຸນຄ່າຜະລິດຕະພັນທີ່ມີຄຸນຄ່າທາງດ້ານສິລະປະ, ໃນນັ້ນພວວກຂ້າພະເຈົ້າໄດ້ນຳສີສັນວັດທະນະທຳ ຫວຽດນາມ  ແລະ ຂອງໂຮ້ຍອານເຂົ້າໄປໃນນັ້ນ”.

      ພ້ອມກັບການເຄື່ອນໄຫວທາງວັດທະນະທຳໃນຊຸມປີທີ່ຜ່ານມາ, ນອກຈາກວຽກງານອະນຸລັກ ແລະ ຮັກສາບັນດາຄຸນຄ່າທີ່ມີມາແຕ່ດົນນານແລ້ວ ໂຮ້ຍອານກໍ່ໄດ້ຕັ້ງໜ້າເຂົ້າຮ່ວມຂະບວນວິວັດພັດທະນາການຫັນເປັນອຸດສາຫະກຳຂອງທ້ອງຖິ່ນ. ປັດຈຸບັນ ໂຮ້ຍອານໄດ້ສ້າງສາຍພົວພັນອັນດີງາມກັບບັນດານະຄອນຢູ່ ເຢຍລະມັນ, ຍີ່ປຸ່ນ, ສ ເກົາຫຼີ, ຮົງກາຣີ… ຜ່ານນັ້ນກໍ່ໄດ້ເປີດໂອກາດພົວພັນແລກປ່ຽນຮ່ວມມືຂອງທ້ອງຖິ່ນກັບໂລກພາຍນອກ. ທ່ານ ຫງວຽນວັນແລັງ ຮອງປະທານຄະນະກຳມະການປະຊາຊົນນະຄອນ ໂຮ້ຍອານ ໃຫ້ຮູ້ວ່າ:

     “ບັນດາການເຄື່ອນໄຫວຮ່ວມມືສາກົນ ໃນວຽກງານອະນຸລັກໄດ້ຮັບການຍູ້ແຮງຈາກນະຄອນ. ໂຮ້ຍອານ ກໍ່ໄດ້ມີການພົວພັນແລກປ່ຽນກັບຫຼາຍອົງການສາກົນ ແລກປ່ຽນແຮກສ່ຽວກັບຫຼາຍນະຄອນຂອງປະເທດຕ່າງໆໃນໂລກ. ໃນນັ້ນເອົາໃຈໃສ່ເຖິງການເຄືອນໄຫວພົວພັນຮ່ວມມືໃນວຽກງານອະນຸລັກຮັກສາ ແລະ ເສີມຂະຫຍາຍຄຸນຄ່າມໍລະດົກວັດທະນະທຳ”.

       ຄະນະກຳມະການປະຊາຊົນແຂວງ ກວ໋າງນາມ ໄດ້ສ້າງແຜນອະນຸລັກ ແລະ ເສີມຂະຫຍາຍຄຸນຄ່າມໍລະດົກວັດທະນະທຳໂລກຄຸ້ມເມືອງເກົ່າ ໂຮ້ຍອານ ເຖິງປີ 2030, ກຳນົດທິດເຖິງປີ 2035. ເປົ້າໝາຍແມ່ນສ້າງ ໂຮ້ຍອານ ກາຍເປັນນະຄອນຊີວະພາບ - ວັດທະນະທຳ - ທ່ອງທ່ຽວ ທັງສາມາດຮັກສາສີສັນ ທັງຂຸດຄົ້ນປະສິດທິຜົນຄວາມສາມາດບົ່ມຊ້ອນທາງດ້ານເສດຖະກິດຈາກມໍລະດົກພິເສດ ໂຮ້ຍອານຈະສືບຕໍ່ການຊຸກຍູ້ສາກົນໃນວຽກງານຄົ້ນຄວ້າ ແລະ ອະນຸລັກມໍລະດົກ ເປີດກວ້າງໂອກາດໂຄສະນາພາບພົດເຖິງເພື່ອນມິດສາກົນ