ພາຍຫຼັງປ່ຽນໜ້າເວັບໄຊ vovworld.vn ໃໝ່, ພວກຂ້າພະເຈົ້າໄດ້ຮັບຫຼາຍຄຳເຫັນປະກອບທີ່ຕັ້ງໜ້າຈາກທ່ານຜູ້ຟັງ, ຜູ້ອ່ານຄື:
ເພື່ອນ ຄຳສີ ຢູ່ນະຄອນຫຼວງ ວຽງຈັນ ແບ່ງປັນວ່າ: “ຂ້າພະເຈົ້າມັກໜ້າໃໝ່ຂອງເວັບໄຊ, ງາມ ແລະ ເບິ່ງທັນສະໄໝທີ່ສຸດ”.
ຈາກ ອິນເດຍ, ເພື່ອນ Najimuddin ໄດ້ສົ່ງຈົດໝາຍເຖິງລາຍການກະຈາຍສຽງພາກພາສາ ຍີ່ປຸ່ນ ໂດຍໃຫ້ຮູ້ວ່າ: “ໜ້າໃໝ່ຂອງເວັບໄຊງາມຫຼາຍ, ຜ່ານເວັບໄຊ vovworld.vn, ຂ້າພະເຈົ້າມີຄວາມເຂົ້າໃຈຫຼາຍຢ່າງກ່ຽວກັບ ຫວຽດນາມ ຕື່ມອີກ. ຂ້າພະເຈົ້າມັກຄໍລຳຂ່າວຕ່າງປະເທດ ແລະ ຄົ້ນຫາ ຫວຽດນາມ ທີ່ສຸດ ຍ້ອນມີຫຼາຍຂໍ້ມູນທີ່ເປັນໜ້າເຊື່ອຖື ແລະ ຈັບໃຈ”.
ສ່ວນເພື່ອນ ຄຳປະເສີດ ຢູ່ແຂວງ ໄຊສົມບູນ ໄດ້ຂຽນມາວ່າ: “ຜ່ານການຕິດຕາມຂ່າວ, ບົດໃນເວັບໄຊ vovworld.vn, ຂ້າພະເຈົ້າ ມັກແບບວິທີພັດທະນາການທ່ອງທ່ຽວຂອງ ຫວຽດນາມ ທີ່ສຸດ. ຂ້າພະເຈົ້າ ຫາກໍ່ກັບມາຈາກ ດ່າໜັງ ແລະ ໂຮ້ຍອານ ກ່ອນນີ້ 2 – 3 ອາທິດ ເຊິ່ງ ເຫັນວ່າ ຢູ່ ຫວຽດນາມ ມີຫຼາຍຜະລິດຕະພັນທ່ອງທ່ຽວທີ່ຈັບໃຈ ແລະ ດູດດື່ມ, ໂດຍສະຫຼັບສັບຊ້ອນຫຼາຍກິດຈະກຳເຂົ້າກັນ ນັບແຕ່ວັດທະນະທຳ, ສິລະປະ, ກິລາ, ການຄ້າ… ທັງມີລັກສະນະທີ່ເປັນມູນເຊື້ອ ທັງທັນສະໄໝ ແລະ ມີຫຼາຍຮູບຫຼາຍສີ”.
ບັນດາຜູ້ຈັດທຳລາຍການພວກຂ້າພະເຈົ້າ ຮູ້ສຶກດີໃຈທີ່ສຸດ ເມື່ອໄດ້ຮັບຈົດໝາຍ ແລະ ຄຳແບ່ງປັນຈາກທ່ານຜູ້ຟັງ, ຜູ້ອ່ານ. ຂອບໃຈທຸກໆທ່ານທີ່ໄດ້ໃຫ້ການສະໜັບສະໜູນ, ຕິດຕາມ ແລະ ຝາກຈົດໝາຍມາຍັງລາຍການ. ພວກຂ້າພະເຈົ້າກໍຫວັງຢ່າງຍິ່ງວ່າ ພວກທ່ານຈະເປັນຂົວຕໍ່ຊ່ວຍໃຫ້ຄື້ນກະຈາຍສຽງຂອງ VOV ໄດ້ແຜ່ກະຈາຍໄປໄກກວ່າ, ຊ່ວຍແນະນຳເຖິງມະຫາຊົນຫຼາຍຄົນໃຫ້ໄດ້ຮູ້ຈັກເຖິງ ແລະ ປະກອບສ່ວນເຮັດໃຫ້ເຂົາເຈົ້າມີຄວາມເຂົ້າໃຈກ່ຽວກັບ ຫວຽດນາມ, ກ່ຽວກັບສາຍພົວພັນມິດຕະພາບ ຫວຽດນາມ - ລາວ ໝັ້ນຄົງທະນົງແກ່ນໄປຊົ່ວກາລະນານ. ເນື່ອງໃນໂອກາດບຸນປີໃໝ່ລາວ ພສ. 2569, ພວກຂ້າພະເຈົ້າຂໍຝາກຄຳອວຍພອນໄຊອັນປະເສີດມາຍັງທຸກໆທ່ານ. ໃນປີໃໝ່ນີ້ ຂໍອວຍພອນໃຫ້ທ່ານ ພ້ອມດ້ວຍຄອບຄົວ ມີພາລະນາໄມສົມບູນ, ມີຄວາມຜາສຸກ ແລະ ປະສົບຜົນສຳເລັດໃນທຸກໜ້າທີ່ການງານ.
ເພື່ອສືບຕໍ່ລາຍການ, ພວກຂ້າພະເຈົ້າຂໍຕອບຄຳຖາມຈຳນວນໜຶ່ງ ທີ່ຜູ້ຟັງ, ຜູ້ອ່ານໄດ້ຝາກມາລາຍການໃນອາທິດຜ່ານມາ. ກ່ອນອື່ນໝົດ, ແມ່ນຈົດໝາຍຂອງເພື່ອນ ຄຳສີ ຢູ່ນະຄອນຫຼວງ ວຽງຈັນ, ເພື່ອນຢາກຊອກຮູ້ກ່ຽວກັບວັນບຸນໄຫວ້ບູຊາບັນດາເຈົ້າຊີວິດ ຮຸ່ງ.
ວັນບຸນໄຫວ້ບູຊາບັນດາເຈົ້າຊີວິດ ຮຸ່ງ ຍັງໄດ້ເອີ້ນວ່າ ວັນບຸນວິຫານ ຮຸ່ງ ແມ່ນວັນບຸນໃຫຍ່ຂອງ ຫວຽດນາມ ເພື່ອອາໄລຫາ ແລະ ສະແດງຄວາມຮູ້ບຸນຄຸນຕໍ່ຄຸນງາມຄວາມດີຂອງບັນດາເຈົ້າຊີວິດ ຮຸ່ງ, ບັນດາເຈົ້າຊີວິດອົງທຳອິດຂອງຊາດ ໃນການສ້າງຕັ້ງປະເທດ ຫວຽດນາມ. ວັນບຸນໄຫວ້ບູຊາເຈົ້າຊີວິດ ຮຸ່ງ ໄດ້ດຳເນີນຢູ່ ວິຫານ ຮຸ່ງ, ແຂວງ ຝູເຖາະ ໃນວັນທີ 10 ເດືອນ 3 ໄລ່ຕາມຈັນທະປະຕິທິນຂອງທຸກໆປີ. ຕາມຮີດຄອງປະເພນີຂອງ ຫວຽດນາມ ແລ້ວ, ວັນທີ 10 ເດືອນ 3 ໄລ່ຕາມຈັນທະປະຕິທິນຂອງທຸກໆປີ ໄດ້ກາຍເປັນ “ວັນນັດພົບ” ທາງດ້ານຈິດວິນຍານຂອງຊາວ ຫວຽດນາມ ແຕ່ລະຄົນ, ຊາວ ຫວຽດນາມ ທຸກຄົນທີ່ຢູ່ທຸກແຖບຖິ່ນໃນທົ່ວປະເທດ ກໍພ້ອມກັນອວ່າຍໜ້າເມືອງຫາບ້ານເກີດເມືອງນອນ, ກົກເຄົ້າເຫງົ້າກໍຂອງຕົນ. ວັນທີ 6 ທັນວາ 2012, ຄວາມໝາຍຂອງວັນບຸນໄຫວ້ບູຊາບັນດາເຈົ້າຊີວິດ ຮຸ່ງ ໄດ້ເປັນທີ່ຮູ້ຈັກຂອງທົ່ວໂລກ ເມື່ອອົງການ UNESCO ຮັບຮອງເອົາ “ການເຫຼື້ອມໃສບູຊາບັນດາເຈົ້າຊີວິດ ຮຸ່ງ ຢູ່ແຂວງ ຝູເຖາະ” - ສັນຍາລັກຂອງຈິດໃຈມະຫາສາມັກຄີ, ມູນເຊື້ອຫຼັກສິນທຳ “ກິນເຂົ້າຄິດຮອດຄຸນນາ ກິນປາຄິດຮອດຄຸນນ້ຳ” ຂອງ ຊາດ ຫວຽດນາມ ວ່າແມ່ນມໍລະດົກວັດທະນະທຳນາມມະທຳ ຕົວແທນຂອງມວນມະນຸດ.
ກ່ອນຈະສິ້ນສຸດລາຍການ, ພວກຂ້າພະເຈົ້າຂໍຕອບຄຳຖາມຂອງເພື່ອນ ອຸ່ນຄຳ ຢູ່ຈຳປາສັກ. ເພື່ອນຖາມວ່າ: “ຜ່ານການຕິດຕາມຂ່າວ, ບົດໃນເວັບໄຊ vovworld.vn, ຂ້າພະເຈົ້າຈຶ່ງໄດ້ຮູ້ວ່າ ດົ່ງນາຍ ແມ່ນແຂວງໜຶ່ງທີ່ສົ່ງອອກກ້ວຍດ້ວຍປະລິມານຫຼາຍທີ່ສຸດ. ຂ້າພະເຈົ້າຢາກຮູ້ວ່າ ແນວພັນກວ້ຍທີ່ແຂວງ ດົ່ງນາຍ ປູກເພື່ອສົ່ງອອກນີ້ ແມ່ນແນວພັນຫຍັງ?
ດົ່ງນາຍ ແມ່ນເມືອງເອກປູກກ້ວຍເພື່ອສົ່ງອອກຂອງ ຫວຽດນາມ ດ້ວຍເນື້ອທີ່ເກືອບ 21 ເຮັກຕາ. ແນວພັນກ້ວຍ ທີ່ເພື່ອນສົນໃຈນັ້ນແມ່ນ ກວ້ຍຫອມ ຄາເວນດິສ (Cavendish banana). ໃນພິທີສົ່ງອອກກວ້ຍ ແລະ ສົ່ງເສີມການສົ່ງອອກຜະລິດຕະພັນກະເສດແຂວງ ດົ່ງນາຍ ປີ 2026 ທີ່ຫາກໍ່ຈັດຂຶ້ນເມື່ອຕົ້ນເດືອນ ເມສາ 2026 ຜ່ານມາ ໃຫ້ຮູ້ວ່າ ມີຄອນເທນເນີບັນຈຸກ້ວຍ Cavendish ເຖິງ 11 ຕູ້ ດ້ວຍປະລິມານ 220 ໂຕນ ຂອງບັນດາວິສາຫະກິດໄດ້ສົ່ງອອກໄປຍັງຕະຫຼາດ ຍີ່ປຸ່ນ, ສ.ເກົາຫຼີ ແລະ ຈີນ. ນອກຈາກນັ້ນແລ້ວ, ຢູ່ແຂວງ ດົ່ງນາຍ ຍັງປູກ ກ້ວຍນ້ຳ ແລະ ກ້ວຍໄຂ່ ເພື່ອສົ່ງອອກ. ເຖິງຢ່າງໃດກໍຕາມ, ກ້ວຍ Cavendish ຍັງຄົງກວມເອົາອັດຕາສ່ວນໃຫຍ່ທີ່ສຸດ ແລະ ແມ່ນຜະລິດຕະພັນສົ່ງອອກຕົ້ນຕໍໄປຍັງບັນດາຕະຫຼາດທີ່ເຄັ່ງຄັດຄື ຍີ່ປຸ່ນ, ສ.ເກົາຫຼີ, ຈີນ ແລະ ເອີຣົບ.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນຊ່ວຍໃຫ້ລາຍການຂອງພວກເຮົາ ນັບມື້ນັບດີກວ່າເກົ່າ. ພວກເພື່ອນກໍ່ສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງ ຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼື ໂທມາໂດຍກົງກໍ່ໄດ້ ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວບໄຊ vovworld.vn.
ຂໍຂອບໃຈ
