“ ເພີ່ມທະວີການກໍ່ສ້າງພັກໃຫ້ໂປ່ງໃສ, ໝັ້ນຄົງເຂັ້ມແຂງ” ນີ້ແມ່ນເນື້ອໃນທຳອິດຖືກເນັ້ນໜັກໃນຫົວເລື່ອງຂອງ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ຊຶ່ງໄຂຂຶ້ນຢູ່ຮ່າໂນ້ຍແຕ່ວັນທີ 20 ຫາວັນທີ 28/1. ນີ້ແມ່ນຄວາມຮຽກຮ້ອງຕ້ອງການອັນໃຫຍ່ຫຼວງ ແລະ ຮອບດ້ານເມື່ອທຽບໃສ່ ຄວາມຮຽກຮ້ອງຕ້ອງການທີ່ວາງອອກທີ່ກອງປະຊຸມໃຫຍ່ຜູ້ແທນທົ່ວປະເທດຂອງພັກຄັ້ງກ່ອນໆ, ແມ່ນເງື່ອນໄຂຕັດສິນຊີ້ຂາດເພື່ອໃຫ້ພັກກຳອຳນາດມີຄວາມ ໝັ້ນຄົງເຂັ້ມແຂງ, ຍືນຍົງຄົງຕົວ ແລະໄດ້ຮັບຄວາມເຊື່ອໝັ້ນຈາກປະຊາຊົນ.
(ພາບປະກອບ)
|
ກອງປະຊຸມໃຫຍ່ຜູ້ແທນທົ່ວປະເທດຂອງພັກຄັ້ງມໍ່ໆມານີ້ ລ້ວນແຕ່ຖືວຽກການ ກໍ່ສ້າງພັກແມ່ນໜຶ່ງໃນບັນດາເນື້ອໃນສຳຄັນຂອງບົດລາຍງານການເມືອງ. ໃນນັ້ນ, ຢູ່ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10, ພັກກອມມູນິດຫວຽດນາມໄດ້ເນັ້ນໜັກເຖິງການ “ຍົກສູງຄວາມສາມາດນຳພາ ແລະ ກຳລັງຕໍ່ສູ້ຂອງພັກ”; ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກໄດ້ຊີ້ແຈ້ງເຖິງການ “ສືບຕໍ່ຍົກສູງຄວາມສາມາດນຳພາ ແລະ ກຳລັງຕໍ່ສູ້ຂອງພັກ ”. ໃນຮ່າງບົດລາຍງານການເມືອງທີ່ຍື່ນສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ ແມ່ນໄດ້ເຕື້ອງເຖິງຢ່າງຮອບດ້ານກ່ຽວກັບວຽກງານກໍ່ສ້າງພັກ ນັບທັງທາງດ້ານຄຸນສົມບັດ ແລະ ຄວາມສາມາດນຳພາ.
ວຽກງານກໍ່ສ້າງພັກແມ່ນໜ້າທີ່ປະຕິບັດເປັນປະຈຳ ແລະ ຕໍ່ເນື່ອງ
ວຽກງານກໍ່ສ້າງພັກໄດ້ຖືກເຕື້ອງເຖິງໃນຮ່າງບົດລາຍງານການເມືອງທີ່ຍື່ນສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກແມ່ນການສືບທອດການປະຕິບັດມະຕິວ່າດ້ວຍ “ບາງບັນຫາຮີບດ່ວນກ່ຽວກັບການກໍ່ສ້າງພັກໃນປະຈຸບັນ”
ພາຍຫຼັງປະຕິບັດມາເປັນເວລາ 4 ປີ, ມະຕິສູນກາງພັກຄັ້ງທີ 4 ຊຸດທີ 11 ໄດ້ບັນລຸບັນດາໝາກຜົນໃນເບື້ອງຕົ້ນທີ່ສຳຄັນ, ປະກອບສ່ວນເພີີ່ມທະວີລະບຽບວິໄນ, ກົດລະບຽບຂໍ້ບັງຄັບ, ມີຄຸນປະໂຫຍດກ່າວເຕືອນ ແລະ ສະກັດກັ້ນບັນດາປະກົດການຫຍໍ້ທໍ້, ສ້າງປະຖົມປັດໄຈເພື່ອຍູ້ແຮງວຽກງານກໍ່ສ້າງພັກ. ບັນດາປະກົດການຊຸດໂຊມທາງດ້ານແນວຄິດການເມືອງ, ຄຸນສົມບັດ, ວິຖີຊີວິດໃນໝູ່ພະນັກງານ, ສະມາຊິກພັກໄດ້ຖືກສະກັດກັ້ນເທື່ອລະກ້າວ, ສາມາດຈຳກັດສະພາບສໍ້ລາດບັງຫຼວງ, ການຟຸມເຟືອຍໃນເບື້ອງຕົ້ນ. ວຽກງານວາງແຜນກຳນົດ, ກໍ່ສ້າງ, ບຳລຸງ, ສັບຊ້ອນພະນັກງານໄດ້ຮັບການຍູ້ແຮງກວ່າເກົ່າ. ຂະບວນວິວັດຜັນຂະຫຍາຍປະຕິບັດ ມະຕິສູນກາງພັກຄັ້ງທີ 4, ເບິ່ງລວມແລ້ວ ໄດ້ມີຜົນກະທົບຊຸກຍູ້ປະເທດຊາດຜ່ານຜ່າຄວາມຫຍຸ້ງຍາກ, ຮັກສາສະຖຽນລະພາບທາງດ້ານການເມືອງໃຫ້ໝັ້ນຄົງ, ພັດທະນາເສດຖະກິດ, ສັງຄົມ, ປັບປຸງຄວາມເຊື່ອໝັ້ນໃນພັກ ແລະ ໃນໝູ່ປະຊາຊົນ.
ໂດຍສືບທອດບັນດາໝາກຜົນທີ່ຕັ້ງໜ້ານີ້, ໃນໜ້າທີ່ຈຸດສຸມ 6 ປະການທີ່ຄວນສຸມທຸກຄວາມມານະພະຍາຍາມປະຕິບັດຂອງອາຍຸການກອງປະຊຸມໃຫຍ່ຄັ້ງທີ 12 ຂອງພັກ, ພັກກອມມູນິດຫວຽດນາມໄດ້ນຳຂຶ້ນແຖວໜ້າສຳລັບໜ້າທີ່ “ ເພີ່ມທະວີການກໍ່ສ້າງ, ປັບປຸງພັກ, ສະກັດກັ້ນ, ຍູ້ຖອຍປະກົດການຊຸດໂຊມທາງດ້ານແນວຄິດການເມືອງ, ຄຸນສົມບັດ, ວິຖີຊີວິດ, ປະກົດການ “ຜັນແປໂດຍຕົນເອງ”, “ຫັນປ່ຽນໂດຍຕົນເອງ” ຢູ່ພາຍໃນ. ເລັ່ງໃສ່ການກໍ່ສ້າງຖັນແຖວພະນັກງານ, ເປັນຕົ້ນແມ່ນຖັນແຖວພະນັກງານຂັ້ນຍຸດທະສາດ, ກຳລັງຄວາມສາມາດ, ຄຸນນະທາດຢ່າງພຽງພໍ, ໄດ້ຮັບຄວາມໄວ້ເນື້ອເຊື່ອໃຈ”. ສິ່ງນີ້ໄດ້ສະແດງໃຫ້ເຫັນຄວາມສຳຄັນຂອງ ວຽກງານກໍ່ສ້າງ, ປັບປຸງພັກ. ພະນັກງານ, ສະມາຊິກພັກແຕ່ລະຄົນ, ແຕ່ລະອົງການຈັດຕັ້ງພັກ ແລະ ທົ່ວພັກ ຍົກສູງສະຕິຄວາມຮັບຜິດຊອບຕໍ່ໜ້າປະຊາຊົນ ແລະ ຊົນຊາດເພື່ອຫັນຄວາມຕັດສິນໃຈທາງດ້ານການເມືອງເປັນການກະທຳປະຕິວັດ, ສ້າງການປ່ຽນແປງທີ່ມີລັກສະນະກະໂດດຂັ້ນຂອງກິດຈະການພັດທະນາປະເທດຊາດ, ເລີ່ມແຕ່ວຽກງານກໍ່ສ້າງ, ປັບປຸງພັກຊຶ່ງແມ່ນໜ້າທີ່ແຖວໜ້າ. ທ່ານຮອງສາດສະດາຈານ, ດຣ ຫງວຽນວຽດທົງ, ເລຂາທິການໃຫຍ່ສະພາທິດສະດີສູນກາງ, ສະມາຊິກໃນຄະນະຮຽບຮຽງຮ່າງບົດລາຍງານການເມືອງທີ່ຍື່ນສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ ໃຫ້ຮູ້ວ່າ :
“ ບັນດາກອງປະຊຸມໃຫຍ່ຄັ້ງມໍ່ໆມານີ້, ຫົວເລື່ອງກອງປະຊຸມໃຫຍ່ ( ຫົວຂໍ້ຂອງບົດລາຍງານການເມືອງ) ລ້ວນແຕ່ມີປັດໄຈທຳອິດເວົ້າເຖິງພັກ. ແຕ່ໃນຄັ້ງນີ້, ຮ່າງບົດລາຍການເມືອງໄດ້ຊີ້ແຈ້ງເຖິງການເພີ່ມທະວີວຽກງານກໍ່ສ້າງພັກໃຫ້ໂປ່ງໃສ, ໝັ້ນຄົງເຂັ້ມແຂງ, ນັ້ນແມ່ນການເຕື້ອງເຖິງວຽກງານກໍ່ສ້າງພັກຢ່າງຮອບດ້ານ ຕາມຈິດໃຈຂອງໂຄງການການເມືອງເພີ່ມເຕີມພັດທະນາປີ 2011. ການນຳພາອັນຖືກຕ້ອງຂອງພັກແມ່ານປັດໄຈອັນດັບໜຶ່ງ ຕັດສິນໄຊຊະນະຂອງການປະຕິວັດຫວຽດນາມ”
ກໍ່ສ້າງພັກໃຫ້ໝັ້ນຄົງເຂັ້ມແຂງເພື່ອປະຕິບັດບົດບາດນຳພາຢ່າງຮອບດ້ານ
ຮ່າງບົດລາຍການເມືອງຢືນຢັນການຍູ້ແຮງວຽກງານກໍ່ສ້າງພັກໃຫ້ດີກວ່າອີກ ຊຶ່ງຈຸດສຸມແມ່ນເດັດດຽວ, ຍຶດໝັ້ນສືບຕໍ່ປະຕິບັດມະຕິສູນກາງພັກຄັ້ງທີ 4 ຊຸດທີ 11 . ຕາມນັ້ນແລ້ວ, ຕ້ອງປະຕິບັດຢ່າງຄົບຊຸດ, ຮອບດ້ານ, ຈາກທິດສະດີຕະຫຼອດຮອດພຶດຕິກຳຕົວຈິງ. ທາງດ້ານການເມືອງ, ພັກຍຶດໝັ້ນເດີນຕາມລັດທິມາກ-ເລນິນ, ແນວຄິດໂຮ່ຈິມິນ, ໝູນໃຊ້ຢ່າງມີຫົວຄິດປະດິດສ້າງ ແລະ ພັດທະນາຢ່າງສອດຄ່ອງກັບພຶດຕິກຳຢູ່ຫວຽດນາມ; ຍຶດໝັ້ນຈຸດໝາຍເອກະລາດແຫ່ງຊາດ ແລະ ລັດທິສັງຄົມນິຍົມ; ຍຶດໝັ້ນແນວທາງປ່ຽນແປງໃໝ່. ກ່ຽວກັບການປ່ຽນແປງໃໝ່ວຽກງານແນວຄິດ, ທິດສະດີ, ພັກສືບຕໍ່ຕໍ່ສູ້, ສະກັດກັ້ນ, ຍູ້ຖອຍປະກົດການຊຸດໂຊມທາງດ້ານແນວຄິດການເມືອງ, ຄຸນສົມບັດ, ວິຖີຊີວິດ, ປະກົດການ “ຜັນແປໂດຍຕົນເອງ”, “ຫັນປ່ຽນໂດຍຕົນເອງ”. ໄປຄຽງຄູ່ກັນນັ້ນ, ແມ່ນການຕ້ານລັດທິສ່ວນຕົວ, ສວຍໂອກາດ, ສະແຫວງຫາຜົນປະໂຫຍດ, ກໍ່ສ້າງຖັນແຖວສະມາຊິກພັກນຳໜ້າ, ເປັນແບບຢ່າງ, ໃກ້ຊິດຕິດແທດກັບປະຊາຊົນ, ມີຄວາມຮັບຜິດຊອບສູງໃນວຽກງານ, ມີຄວາມສາມາດເພື່ອສຳເລັດວຽກງານ. ໂດຍໄດ້ກຳນົດການຕໍ່ສູ້, ປ້ອງກັນ ແລະ ຕ້ານໄພສໍ້ລາດບັງຫຼວງ, ການຟຸມຟືອຍ ແມ່ນໜ້າທີ່ຫຍຸ້ງຍາກ, ສັບສົນ ແລະ ຍາວນານ. ຮ່າງບົດລາຍການເມືອງ ກໍໄດ້ຊີ້ແຈ້ງເຖິງການເດັດດຽວປ້ອງກັນ ແລະ ຕ້ານໄພສໍ້ລາດບັງຫຼວງ, ການຟຸມຟືອຍ. ທ່ານຝ້າມເທ້ຢວຽດ ອະດີດກຳມະການກົມການເມືອງ, ອະດີດປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຖືວ່າ :
“ມະຕິສູນກາງພັກຄັ້ງທີ 4 ກ່ຽວກັບວຽກງານກໍ່ສ້າງ, ປັບປຸງພັກຕ້ອງພະຍາຍາມສືບຕໍ່ປະຕິບັດໃຫ້ດີ. ຢາກເຮັດໃຫ້ດີນັ້ນ, ແມ່ນພຽງແຕ່ອີງຕາມບົດຮຽນຂອງຕົນເອງ. ພະນັກງານຂັ້ນສູງຍິ່ງມີຄວາມເປັນແບບຢ່າງເທົ່າໃດ, ກໍຍິ່ງສາມາດເກ້ຍກ່ອມ ແລະ ສົ່ງຜົນກະທົບຕໍ່ຂັ້ນລຸ່ມເທົ່ານັ້ນ. ພັກສາມັກຄີເປັນຈິດໜຶ່ງໃຈດຽວ ມີຄວາມເປັນຫ່ວງເປັນໄຍໃຫ້ປະຊາຊົນນັ້ນ, ກຸ່ມກ້ອມມະຫາສາມັກຄີທົ່ວປວງຊົນທັງຊາດເຂັ້ມແຂງທີ່ສຸດ. ດ້ວຍທັງຂະບວນວິວັດແຫ່ງປະຕິວັດ, ໄລຍະທີ່ຈະມາເຖິງ , ຫວຽດນາມເຊື່ອມໂຍງຢ່າງກ້ວາງເລິກເຂົ້າກັບສາກົນ, ຫວຽດນາມຍິ່ງພັດທະນາໄວ ”
ເພີ່ມທະວີການກໍ່ສ້າງພັກໃຫ້ໂປ່ງໃສ, ໝັ້ນຄົງເຂັ້ມແຂງ ແມ່ນການເຕື້ອງເຖິງຢ່າງຮອບດ້ານກ່ຽວກັບວຽກງານກໍ່ສ້າງພັກນັບທັງທາງດ້ານຄຸນສົມບັດ ແລະ ກຳລັງຄວາມສາມາດນຳພາ. ພັກມີຄວາມໂປ່ງໃສ, ໝັ້ນຄົງເຂັ້ມແຂງຢ່າງແທ້ຈິງນັ້ນ, ຈຶ່ງຈະຊ່ວຍໃຫ້ພັກເຮັດຫຼ້ອນໜ້າທີ່ປະຫວັດສາດຂອງພັກກຳອຳນາດ, ນຳພາພາລະກິດປ່ຽນແປງໃໝ່ ແລະ ກໍ່ສ້າງສັງຄົມນິຍົມຢ່າງສຳເລັດຜົນ.