ບົດລາຍງານການເມືອງຢູ່ທີ່ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ທີ່ພວມດຳເນີນຢູ່ຮ່າໂນ້ຍ ໄດ້ຢືນຢັນວ່າ : ມະຫາສາມັກຄີທົ່ວປວງຊົນທັງຊາດແມ່ນແນວທາງຍຸດທະສາດຂອງການປະຕິວັດຫວຽດນາມ, ແມ່ນກຳລັງໜູນ ແລະ ແຫຼ່ງກຳລັງອັນໃຫຍ່ຫຼວງໃນການສ້າງສາ ແລະ ປົກປັກຮັກສາປະເທດຊາດ. ພະນັກງານ, ສະມາຊິກພັກ ແລະ ປະຊາຊົນໃນທົ່ວປະເທດມີຄວາມຫວັງຢາກໃຫ້ພັກຍາມໃດກໍສືບທອດ ແລະ ເສີມຂະຫຍາຍບັນດາບົດຮຽນກ່ຽວກັບ ມະຫາສາມັກຄີ, ສະແດງໃຫ້ເຫັນບົດບາດແກ່ນສານຂອງກຸ່ມກ້ອນ ມະຫາສາມັກຄີທົ່ວປວງຊົນທັງຊາດໃນສະພາບການໃໝ່.
ທ່ານ ຝ້າມເທ້ຢວຽດ ອະດີດປະທານຄະນະກຳມະການສູນກາງແນວໂຮມປະເທດຊາດຫວຽດນາມ |
ນັບຕັ້ງແຕ່ເວລາມີພັກກອມມູນິດຫວຽດນາມນຳພາການປະຕິວັດຫວຽດນາມມາຮອດປະຈຸບັນ, ກຳລັງແຮງມະຫາສາມັກຄີຂອງຊາດໄດ້ຮັບການເສີມຂະຫຍາຍນັບມື້ນັບສູງຂຶ້ນ ຍ້ອນມີການປະສານສົມທົບລະຫວ່າງມູນເຊື້ອທີ່ປະເສີດຂອງຊາດ ແລະ ການກຳນົດທິດຢ່າງມີວິທະຍາສາດຂອງລັດທິມາກເລນິນ, ແນວຄິດໂຮ່ຈິມິນກ່ຽວກັບ ມະຫາສາມັກຄີທົ່ວປວງຊົນທັງຊາດ. ທ່ານ ຝ້າມເທ້ຢວຽດ ອະດີດປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຖືວ່າ ພັກກອມມູນິດຫວຽດນາມ ແລະ ປະທານໂຮ່ຈິມິນໄດ້ເຕົ້າໂຮມສາມັກຄີປະຊາຊົນທຸກຊັ້ນວັນນະ, ສ້າງກຳລັງແຮງສັງລວມເພື່ອຍາດໄດ້ໄຊຊະນະໃນການຕໍ່ຕ້ານຕ້ານຝະລັ່ງ ແລະ ອາເມລິກາເພື່ອກູ້ຊາດ. ກິດຈະການຫັນປະເທດຊາດເປັນອຸດສາຫະກຳ, ທັນສະໄໝ ແລະ ເຊື່ອມໂຍງເຂົ້າກັບສາກົນໃນປະຈຸບັນ ໄດ້ວາງອອກຄວາມຮຽກຮ້ອງໃໝ່ທີ່ມີຕໍ່ການສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ. ດັ່ງນັ້ນ ພັກຄວນສືບຕໍ່ເຊີດຊູຄັນທຸງແຫ່ງມະຫາສາມັກຄີທົ່ວປວງຊົນທັງຊາດ. ທ່ານ ຝ້າມເທ້ຢວຽດ ອະດີດປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຢືນຢັນວ່າ :
“ ຂ້າພະເຈົ້າຄິດວ່າ ຖ້າຫາກເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດໃຫ້ໄດ້ນັ້ນ, ພັກຕ້ອງສາມັກຄີ, ສູນກາງພັກຕ້ອງສາມັກຄີ, ຕ້ອງເປັນແບບຢ່າງເພື່ອໃຫ້ມະຫາຊົນປະຕິບັດຕາມ. ປະຊາຊົນຮຽກຮ້ອງໃຫ້ພັກກອມມູນິດຫວຽດນາມຕ້ອງປະຕິບັດແນວທາງ, ມະຕິທີ່ໄດ້ວາງອອກໃຫ້ໄດ້. ເຮັດສິ່ງນັ້ນເປັນຢ່າງດີນັ້ນ, ພວກເຮົາຈຶ່ງສາມາດສືບຕໍ່ເສີມຂະຫຍາຍກຳລັງແຮງມະຫາສາມັກຄີເພື່ອປະຕິບັດ ກິດຈະການຫັນປະເທດຊາດເປັນອຸດສາຫະກຳ, ທັນສະໄໝ ແລະ ເຊື່ອມໂຍງເຂົ້າກັບສາກົນຢ່າງສຳເລັດຜົນ”
ປັບປຸງ ແລະ ເສີມຂະຫຍາຍກຳລັງແຮງ ມະຫາສາມັກຄີທົ່ວປວງຊົນທັງຊາດແມ່ນເນື້ອໃນປະການໜຶ່ງທີ່ສຳຄັນໃນແນວທາງການປະຕິວັດຂອງພັກໃນກວ່າ 85 ປີທີ່ຜ່ານມາ. ບົດລາຍງານການເມືອງຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ຍັງຢືນຢັນວ່າ : “ມະຫາສາມັກຄີທົ່ວປວງຊົນທັງຊາດແມ່ນແນວທາງຍຸດທະສາດຂອງການປະຕິວັດຫວຽດນາມ, ແມ່ນກຳລັງໜູນ ແລະ ແຫຼ່ງກຳລັງອັນໃຫຍ່ຫຼວງໃນການສ້າງສາ ແລະ ປົກປັກຮັກສາປະເທດຊາດ”. ທ່ານຮອງສາດສະດາຈານ ດຣ ຝ້າມຊວນຮັ່ງ ສັງກັດມະຫາວິທະຍາໄລວິທະຍາສາດສັງຄົມ ແລະ ມະນຸດສາດ ທີ່ຂຶ້ນກັບມະຫາວິທະຍາໄລແຫ່ງຊາດຮ່າໂນ້ຍ ຖືວ່າ: ພາລະກິດການປະຕິວັດຫວຽດນາມໂດຍພັກກອມມູນິດຫວຽດນາມນຳພາ ແມ່ນພາລະກິດທີ່ບໍ່ອາດຕັດແຍກອອກຈາກການສະໜັບສະໜູນ ປະກອບສ່ວນຂອງປະຊາຊົນໄດ້. ທ່ານຮອງສາດສະດາຈານ ດຣ ຝ້າມຊວນຮັ່ງ ເວົ້າວ່າ:
“ ເພື່ອປຸກລະດົມກຳລັງແຮງທົ່ວທັງຊາດໃນໄລຍະປະຈຸບັນໃຫ້ໄດ້ນັ້ນ, ພັກຕ້ອງລົງເລິກເຂົ້າໃນການເຄື່ອນໄຫວຂອງແນວໂຮມຄື ໃນບັນດາໄລຍະຕໍ່ສູ້ເພື່ອປົກປັກຮັກສາປະເທດຊາດ ເພື່ອເປັນແກ່ນສານຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ. ກຳລັງແຮງຂອງ ກຸ່ມກ້ອນມະຫາສາມັກຄີທົ່ວປວງຊົນທັງຊາດ ຈະສາມາດສ້າງໃຫ້ມີກຳລັງພາຍໃນແຫ່ງຊາດໄດ້. ໃນຈຸດເວລານີ້, ພັກຕ້ອງສະແດງໃຫ້ເຫັນບົດບາດຂອງຕົນ, ຕ້ອງສາມັກຄີ, ກ່ອນອື່ນໝົດຕ້ອງແມ່ນແກ່ນສານຂອງ ກຸ່ມກ້ອນມະຫາສາມັກຄີທົ່ວປວງຊົນທັງຊາດ ”
ບົດລາຍງານການເມືອງຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ຍັງຊີ້ແຈ້ວ່າ: ມະຫາສາມັກຄີທົ່ວປວງຊົນທັງຊາດ ແມ່ນຕ້ອງອີງໃສ່ພື້ນຖານການແກ້ໄຂຢ່າງກົມກ່ຽວລະຫວ່າງບັນດາສະມາຊິກໃນສັງຄົມ; ປົກປ້ອງສິດ ແລະ ຜົນປະໂຫຍດອັນຊອບທຳຂອງປະຊາຊົນ, ຍົກສູງຊີວິດດ້ານວັດຖຸ ແລະ ຈິດໃຈໃຫ້ແກ່ປະຊາຊົນ. ທຸກໆແຜນນະໂຍບາຍ, ແນວທາງຂອງພັກ, ນະໂຍບາຍ, ກົດໝາຍຂອງລັດ ລ້ວນແຕ່ແມ່ນເພື່ອ ຜົນປະໂຫຍດຂອງປະຊາຊົນ. ນັກທະນາຍຄວາມ ບຸຍຊວນດຶກ ຢືນຢັນວ່າ :
“ມະຫາສາມັກຄີທົ່ວປວງຊົນທັງຊາດ ແມ່ນຕ້ອງອີງໃສ່ພື້ນຖານການແກ້ໄຂຢ່າງກົມກ່ຽວລະຫວ່າງບັນດາສະມາຊິກໃນສັງຄົມ. ມະຫາສາມັກຄີແມ່ນ ມະຫາສາມັກຄີໃນການເມືອງ, ໃນພາລະກິດການປະຕິວັດ. ໂດຍແມ່ນກຳລັງກຳອຳນາດ, ພັກຕ້ອງສາມັກຄີລະຫວ່າງບັນດາກຳລັງຕາມເນື້ອໃນຈິດໃຈ ມະຫາສາມັກຄີ ”
ດ້ວຍຄວາມເຊື່ອໝັ້ນຕໍ່ການປ່ຽນແປງໃໝ່ ແລະ ການນຳພາອັນສະຫຼາດສ່ອງໃສຂອງພັກ, ຕໍ່ອະນາຄົດຂອງປະເທດຊາດ, ປະຊາຊົນຫວຽດນາມທຸກຊັ້ນຄົນ ມີຄວາມຫວັງວ່າ ຜ່ານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ, ກຳລັງແຮງ ມະຫາສາມັກຄີທົ່ວປວງຊົນທັງຊາດຈະໄດ້ຮັບການເພີ່ມທະວີ ແລະ ເສີມຂະຫຍາຍ. ເຮັດໄດ້ເຊັ່ນນັ້ນ, ທົ່ວປວງຊົນ, ທົ່ວກອງທັບຫວຽດນາມ ຈະຮ່ວມແຮງຮ່ວມໃຈພ້ອມກັບພັກ, ລັດ, ເສີມຂະຫຍາຍກຳລັງແຮງພາຍໃນໃນລະດັບສູງສຸດ, ຍາດແຍ່ງກາລະໂອກາດ, ຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ປະຕິບັດບັນດາໜ້າທີ່ພັດທະນາເສດຖະກິດ-ສັງຄົມ, ການປ້ອງກັນຊາດ, ປ້ອງກັນຄວາມສະຫງົບ, ສ້າງສາ ແລະ ປົກປັກຮັກສາປະເທດຫວຽດນາມໃຫ້ຮັ່ງມີ, ໝັ້ນຄົງເຂັ້ມແຂງ.