ທ່ານນາງ ຮອງປະທານປະເທດ ຫວໍທິແອັງຊວັນ ກ່າວຄຳເຫັນທີ່ພິທີ

ຕອນບ່າຍວັນທີ 6 ມັງກອນ, ຢູ່ຮ່າໂນ້ຍ,  ສະຫະພັນບັນດາອົງການຈັດຕັ້ງມິດຕະພາບ ຫວຽດນາມ, ສະມາຄົມມິດຕະພາບ ຫວຽດນາມ - ອິນເດຍ ໄດ້ສົມທົບກັບສະຖານທູດ ອິນເດຍ ປະຈຳ ຫວຽດນາມ ຈັດພິທີສະເຫຼີມສະຫຼອງ ວັນສ້າງຕັ້ງການພົວພັນທາງການທູດ ລະຫວ່າງ ຫວຽດນາມ - ອິນເດຍ ຄົບຮອບ 50 ປີ.

ສະມາຄົມມິດຕະພາບ ຫວຽດນາມ - ອິນເດຍ ແລະ ສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ຍາມໃດກໍ່ຮ່ວມມືກັນຢ່າງແໜ້ນແຟ້ນ ກັບບັນດາຄູ່ຮ່ວມມື ອິນເດຍ ແລະ ບັນດາອົງການທີ່ກ່ຽວຂ້ອງຂອງທັງສອງປະເທດ ເພື່ອແນໃສ່ເພີ່ມທະວີການເຄື່ອນໄຫວພົວພັນແລກປ່ຽນຂັ້ນປະຊາຊົນໃຫ້ຫຼາຍກ່ວາອີກ, ຮັກສາ ແລະ ເພີ່ມພູນຄູນສ້າງ ນ້ຳໃຈມິດຕະພາບ. ກ່າວຄຳເຫັນທີພິທີ, ທ່ານນາງ ຫວໍທິແອັງຊວັນ ຮອງປະທານປະເທດ ຫວຽດນາມ ຢັ້ງຢືນວ່າ, ພັກ, ລັດ ແລະ ປະຊາຊົນ ຫວຽດນາມ ຍາມໃດກໍ່ເອົາໃຈໃສ່ພັດທະນາການພົວພັນຄູ່ຮ່ວມມືຍຸດທະສາດຢ່າງຮອບດ້ານ ແລະ ຖື ອິນເດຍ ແມ່ນຄູ່ຮ່ວມມືສຳຄັນ ແຖວໜ້າ, ແມ່ນເພື່ອນມິດທີ່ມີຄວາມໄວ້ເນື້ອເຊື່ອໃຈ. ທ່ານນາງ ຮອງປະທານປະເທດ ຫວໍທິແອັງຊວັນ ສະເໜີວ່າ:

ສອງປະເທດ ຫວຽດນາມ - ອິນເດຍ ຄວນຍູ້ແຮງການຮ່ວມມືໃນທຸກຂົງເຂດບຸລິມະສິດໃຫ້ຫຼາຍກ່ວາອີກ ຄື: ເຕັກໂນໂລຢີຂໍ້ມູນຂ່າວສານ, ການປ່ຽນແປງໃໝ່, ປະດິດຄິດສ້າງ, ພະລັງງານ, ການຫັນເປັນດີຈີຕອນ, ສາທາລະນະສຸກ, ການຢາ, ການທ່ອງທ່ຽວ, ເສດຖະກິດຂຽວ, ການຮັບມືກັບປ່ຽນແປງຂອງດິນຟ້າອາກາດ, ການບຳລຸງສ້າງແຫຼ່ງຊັບພະຍາກອນມະນຸດ, ວັດທະນະທຳ, ການທ່ອງທ່ຽວ ແລະ ການພົວພັນແລກປ່ຽນປະຊາຊົນ ເພື່ອແນໃສ່ເສີມຂະຫຍາຍທ່າແຮງຂອງສອງປະເທດ ເພື່ອຟື້ນຟູເສດຖະກິດ, ພັດທະນາແບບຍືນຍົງພາຍຫຼັງໂລກລະບາດໂຄວິດ - 19.