ທ່ານລັດຖະມົນຕີຊ່ວຍວ່າການການຄ້າ, ອຸດສາຫະກຳ ແລະ ສິ່ງແວດລ້ອມ
ປະເທດ Timor Leste, Constancio Pinto (ພາບ:iisd.ca)
(vovworld) – ວັນທີ 4/6, ທ່ານລັດຖະມົນຕີຊ່ວຍວ່າການການຄ້າ, ອຸດສາຫະກຳ ແລະ ສິ່ງແວດລ້ອມປະເທດ Timor Leste, Constancio Pinto ຕີລາຄາສູງການສະໜັບສະໜູນຂອງລັດຖະບານຫວຽດນາມ ສຳລັບບັນດາຄວາມມານະພະຍາຍາມເຂົ້າເປັນສະມາຊິກ ASEAN ຂອງ Timor Leste, ພ້ອມທັງສະແດງຄວາມຫວັງວ່າ Timor Leste ຈະເຂົ້າເປັນສະມາຊິກ ASEAN ໃນ 2 ປີຈະມາເຖິງ. ເມື່ອຕອບສຳພາດຕໍ່ນັກຂ່າວສຳນັກຂ່າວສານຫວຽດນາມ ຢູ່ Timor Leste, ທ່ານລັດຖະມົນຕີຊ່ວຍວ່າການ Pinto ໃຫ້ຮູ້ວ່າ: ຫວຽດນາມ ຍາມໃດກໍ່ສະໜັບສະໜູນ Timor Leste ກາຍເປັນສະມາຊິກ ASEAN ແລະ Timor Leste ຂອບອົກຂອບໃຈກໍ່ຄືປາດຖະໜາວ່າຫວຽດນາມ ຈະສືບຕໍ່ການສະໜັບສະໜູນນີ້. ທ່ານ Pinto ເນັ້ນໜັກວ່າ: ທີ່ກອງປະຊຸມຂັ້ນສູງ ASEAN ຄັ້ງທີ່ 26 ຢູ່ມາເລເຊຍເມື່ອເດືອນ 4 ຜ່ານມາ, ບັນດາປະເທດສະມາຊິກ ASEAN ໄດ້ເຫັນດີເຫັນພ້ອມຕໍ່ເລື່ອງ Timor Leste ຈະເຂົ້າເປັນສະມາຊິກຂອງ ASEAN. ASEAN ໄດ້ຈັດຕັ້ງກຸ່ມປະຕິບັດງານ ເພື່ອພິຈາລະນາໃບຄຳຮ້ອງເຂົ້າເປັນສະມາຊິກຂອງ Timor Leste ແລະ ປະຈຸບັນຍັງບໍ່ທັນມີຄວາມເຫັນທີ່ຫຍໍ້ທໍ້ໃດກ່ຽວກັບເລື່ອງນີ້.
ເນື່ອງໃນໂອກາດນີ້, ທ່ານ Pinto ຕີລາຄາສູງເລື່ອງກຸ່ມບໍລິສັດໂທລະຄົມກອງທັບ Viettel ຂອງຫວຽດນາມ ໄດ້ລົງທຶນເຂົ້າ Timor Leste ຜ່ານເຄື່ອງໝາຍການຄ້າ Telemor. ພາຍຫຼັງເຄື່ອນໄຫວພຽງກ່ວາ 3 ປີເທົ່ານັ້ນ, ແຕ່ Telemor ໄດ້ກາຍເປັນກຸ່ມບໍລິສັດທີ່ສະໜອງບໍລິການໂທລະຄົມໃຫຍ່ອັນດັບໜຶ່ງຢູ່ Timor Leste, ປະກອບສ່ວນເຂົ້າໃນການພັດທະນາພື້ນຖານໂຄງລ່າງໂທລະຄົມ, ພັດທະນາເສດຖະກິດ ແລະ ສ້າງວຽກເຮັດງານທຳໃຫ້ແກ່ຊາວ Timor Leste.