(vovworld) – ໂດຍສືບຕໍ່ລາຍການເຮັດວຽກຂອງກອງປະຊຸມສະໄໝສາມັນ ເທື່ອທີ 3 ສະພາແຫ່ງຊາດຫວຽດນາມ ຊຸດທີ 13, ວັນທີ 30/5, ສະພາແຫ່ງຊາດໄດ້ປຶກສາຫາລືກ່ຽວກັບ ຮ່າງກົດໝາຍ 2 ສະບັບ. ຕອນເຊົ້າວັນທີ 30/5, ພາຍໃຕ້ການເປັນປະທານຂອງທ່ານນາງຮອງປະທານສະພາແຫ່ງຊາດ Tong Thi Phong, ບັນດາສະມາຊິກສະພາແຫ່ງຊາດ (ຫຼື ສສຊ) ໄດ້ປຶກສາຫາລືກ່ຽວກັບຮ່າງກົດໝາຍວ່າດ້ວຍການໂຄສະນາ. ຮ່າງກົດໝາຍວ່າດ້ວຍການໂຄສະນາ ໄດ້ເຕື້ອງເຖິງບັນດາບັນຫາຈຸດສຸມຄື: ອົງການຄຸ້ມຄອງລັດກ່ຽວກັບການໂຄສະນາ, ແກ້ໄຂການລະເມີດໃນການເຄື່ອນໄຫວໂຄສະນາ, ສິດ, ພັນທະຂອງອົງການ, ສ່ວນບຸກຄົນ ເຂົ້າຮ່ວມການເຄື່ອນໄຫວໂຄສະນາ, ໂຄສະນາຜ່ານບັນດາພາຫະນະສື່ມວນຊົນ...
ຄຳຄິດຄຳເຫັນສ່ວນຫຼາຍໄດ້ເຫັນດີ ກັບເລື່ອງກະຊວງວັດທະນະທຳ, ກິລາ ແລະ ການທ່ອງທ່ຽວ ແມ່ນອົງການຄຸ້ມຄອງລັດກ່ຽວກັບການໂຄສະນາ. ກະຊວງວັດທະນະທຳ, ກິລາ ແລະ ການທ່ອງທ່ຽວ ແມ່ນອົງການຮັບຜິດຊອບ ສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງ ແລະ ບັນດາທ້ອງຖີ່ນເພື່ອຄຸ້ມຄອງການເຄື່ອນໄຫວໂຄສະນາ. ບັນດາຄຳຄິດຄຳເຫັນກໍຖືວ່າ: ໃນອະນາຄົດການໂຄສະນາທາງອີນເຕີເນັດຈະພັດທະນານັບມື້ນັບວ່ອງໄວ ແລະ ແຂງແຮງກ່ວາເມື່ອທຽບໃສ່ບັນດາໂຄສະນາປະເພດອື່ນໆ. ດັ່ງນັ້ນ, ບັນດາຂໍ້ກຳນົດຂອງກົດໝາຍວ່າດ້ວຍການໂຄສະນາຕ້ອງໄປກ່ອນບາດກ້າວໜຶ່ງ ເພື່ອຕອບສະໜອງການພັດທະນາຂອງການໂຄສະນາຜ່ານທາງ ອີນເຕີເນັດ. ທ່ານນາງ Nguyen Thi Hong Ha, ສສຊ ນະຄອນ ຮ່າໂນ້ຍ ໃຫ້ຄຳເຫັນວ່າ:
“ຂ້າພະເຈົ້າເຫັນດີກັບເລື່ອງມອບສິດໃຫ້ ກະຊວງວັດທະນະທຳ, ກິລາ ແລະ ການທ່ອງທ່ຽວ ເປັນອົງການຄຸ້ມຄອງລັດ ກ່ຽວກັບການໂຄສະນາ ແລະ ບັນຫາໂຄສະນາສິນຄ້າພິເສດ. ກ່ຽວກັບການໂຄສະນາໃນປ້າຍ, ໂພດສະເຕີ, ຜ່ານໜ້າຈໍ, ຂ້າພະເຈົ້າໄດ້ເຫັນດີຕໍ່ເລື່ອງຮັກສາຂໍ້ກຳນົດອອກໃບອະນຸຍາດກໍ່ສ້າງກິດຈະກຳໂຄສະນາ ເພື່ອແນໃສ່ຮັບປະກັນທັດສະນີຍະພາບຂອງເຂດຕົວເມືອງ ແລະ ຮັບປະກັນຄວາມເປັນລະບຽບຮຽບຮ້ອຍທາງສັງຄົມ. ດັ່ງນັ້ນ, ເລື່ອງອອກໃບອະນາຍາດກໍ່ສ້າງກິດຈະກຳໂຄສະນາໃນ ກົດໝາຍ ແມ່ນຈຳເປັນທີ່ສຸດ, ສ້າງຄວາມສະດວກໃຫ້ແກ່ຜູ້ເຄື່ອນໄຫວໂຄສະນາ ແລະ ອົງການຄຸ້ມຄອງລັດກ່ຽວກັບການໂຄສະນາ.”
( ໃນອະນາຄົດການໂຄສະນາທາງອີນເຕີເນັດຈະພັດທະນານັບມື້ນັບວ່ອງໄວ )
ແລະໃນຕອນບ່າຍວັນດຽວກັນ ພາຍໃຕ້ການເປັນປະທານຂອງທ່ານຮອງປະທານສະພາແຫ່ງຊາດຫວຽດນາມ Uong Chu Luu, ສະພາແຫ່ງຊາດ ໄດ້ປຶກສາຫາລື ກ່ຽວກັບຮ່າງກົດໝາຍວ່າດ້ວຍການປັບໄໝການກະທຳຜິດທາງດ້ານບໍລິຫານ. ນີ້ແມ່ນຮ່າງກົດໝາຍມີຂອບຂະໜາດໃຫຍ່, ປະກອບສ່ວນຍົກສູງຜົນສັກສິດ, ປະສິດທິຜົນຂອງການຄຸ້ມຄອງລັດ ກໍຄືຍົກສູງສະຕິການປະຕິບັດກົດໝາຍຂອງພົນລະເມືອງ. ຮ່າງກົດໝາຍວ່າດ້ວຍການປັບໄໝການກະທຳຜິດທາງດ້ານບໍລິຫານໄດ້ສຸມໃສ່ບັນດາບັນຫາຄື: ປັບໄໝເງິນຕໍ່ຜູ້ລະເມີດການບໍລິຫານ, ເລື່ອງກັກຂອງກາງ, ພາຫະນະ, ໃບອະນຸຍາດ,ໃບຢັ້ງຢືນປະກອບອາຊີບໄວ້ ຊົ່ວຄາວ. ມີບາງຄຳເຫັນໄດ້ສະເໜີວ່າ: ຕ້ອງແຍກຂົງເຂດຊັບສິນທາງປັນຍາ ອອກຈາກກົດໝາຍ ເພາະວ່າໄດ້ມີກົດໝາຍວ່າດ້ວຍຊັບສິນທາງປັນຍາຢູ່ແລ້ວ. ມີຫຼາຍຄຳເຫັນຖືວ່າ: ເຖິງວ່າເລື່ອງກັກພາຫະນະ, ຂອງກາງ, ໃບອະນຸຍາດ, ໃບຢັ້ງຢືນປະກອບອາຊີບໄວ້ ຊົ່ວຄາວ ບໍ່ແມ່ນມາດຕະການແກ້ໄຂຕໍ່ການກະທຳລະເມີດດ້ານບໍລິຫານກໍຕາມ ແຕ່ວ່ານີ້ແມ່ນມາດຕະການມີລັກສະນະຕັກເຕືອນ, ສຶກສາອົບຮົມສູງກ່ວາບັນດາມາດຕະການປັບໄໝ. ທ່ານ Than Duc Nam, ສະມາຊິກສະພາແຫ່ງຊາດນະຄອນ ດ່ານັງ ປະກອບຄຳເຫັນວ່າ:
“ກ່ຽວກັບການປັບໄໝເງິນຕໍ່ການລະເມີດບໍລິຫານ, ຂ້າພະເຈົ້າຖືວ່າ: ລະດັບປັບໄໝສູງສຸດຕໍ່ສ່ວນບຸກຄົນ ແມ່ນ 1 ຕື້ດົ່ງ, ສຳລັບອົງການຈັດຕັ້ງ ແມ່ນ 2 ຕື້ດົ່ງ ທີ່ໄດ້ກຳນົດຄືຢູ່ໃນຮ່າງກົດໝາຍແມ່ນສູງໂພດ. ລະດັບປັບໄໝເງິນສູງບໍ່ແມ່ນມາດຕະການທີ່ມີປະສິດທິຜົນ, ຈຳກັດການລະເມີດ, ຫາກຍັງພາໄປເຖິງການເກີດປະກົດການຫຍໍ້ທໍ້. ຂ້າພະເຈົ້າສະເໜີໃຫ້ຄວນຊັ່ງຊາ ເພີ່ມການປັບໄໝໃນລະດັບສູງສຸດໃນແຕ່ລະຂົງເຂດໃຫ້ເໝາະສົມ, ທັງຮັບປະກັນລັກສະນະຕັກເຕືອນ, ສຶກສາອົບຮົບ, ທັງເໝາະສົມກັບເງື່ອນໄຂເສດຖະກິດ - ສັງຄົມ, ລະດັບລາຍຮັບສະເລຍໃສ່ຫົວຄົນຂອງປະຊາຊົນໃນປະຈຸບັນ”