ຕອນບ່າຍວັນທີ 18/1, ນະຄອນ ດ່າໜັງໄດ້ຈັດຕັ້ງການພົບປະສັງສັນກັບຊາວຫວຽດນາມອາໄສຢູ່ຕ່າງປະເທດ ທີ່ກັບເມືອບ້ານເກີດເມືອງນອນຕ້ອນຮັບບຸນປີໃໝ່ປະຈຳຊາດບຸນເຕັດ. ການນຳນະຄອນ ດ່າໜັງໄດ້ອວຍພອນປີໃໝ່ໃຫ້ແກ່ພໍ່ແມ່ຊາວຫວຽດນາມອາໄສຢູ່ຕ່າງປະເທດຈົ່ງມີຄວາມຜາສຸກ, ທຸກຢ່າງລາບລື້ນ ແລະ ຫວັງວ່າ ພໍ່ແມ່ນຊາວຫວຽດນາມອາໄສຢູ່ຕ່າງປະເທດຈະສືບຕໍ່ປະກອບສ່ວນເຂົ້າໃນການສ້າງສາປະເທດຊາດ. ທ່ານ ຫງວຽນວັນເຈີຍ, ຊາວຫວຽດນາມອາໄສຢູ່ອາເມລິກາ ແບ່ງປັນວ່າ:
“ປີໃດຂ້າພະເຈົ້າກໍ່ໄດ້ກັບເມືອປະເທດ, ແຕ່ລະເທື່ອແມ່ນຢູ່ 6 ເດືອນ. ມື້ນີ້, ດ່າໜັງໄດ້ຈັດຕັ້ງການພົບປະສັງສັນຢ່າງມ່ວນຊື່ນ. ພວກຂ້າພະເຈົ້າມີຄວາມເອກອ້າງທະນົງໃຈເມື່ອໄດ້ກັບເມືອບ້ານເກີດເມືອງນອນ. ເນື່ອງໃນໂອກາດປີໃໝ່ຂໍອວຍພອນໃຫ້ທຸກຄົນຈົ່ງຢູ່ເຢັນເປັນສຸກ ແລະ ມີສຸຂະພາບເຂັ້ມແຂງ”
ຕອນຄ່ຳວັນທີ 18/1, ແຂວງບິນເຢືອງກໍຈັດຕັ້ງການພົບປະສັງສັນກັບຊາວຫວຽດນາມອາໄສຢູ່ຕ່າງປະເທດ 150 ຄົນ ກັບເມືອປະເທດຕ້ອນຮັບບຸນປີໃໝ່ປະຈຳຊາດ, ປີມະໂຣງ 2012. ການນຳແຂວງບິນເຢືອງໄດ້ເນັ້ນໜັກເຖິງບັນດາຜົນງານເຊິ່ງແຂວງ ບິນເຢືອງ ບັນລຸໄດ້ໃນຊຸມປີຜ່ານມາໂດຍມີການປະກອບສ່ວນຢ່າງຕັ້ງໜ້າຂອງຊາວຫວຽດນາມ ອາໄສຢູ່ຕ່າງປະເທດ. ຊາວຫວຽດນາມອາໄສຢູ່ຕ່າງປະເທດແມ່ນຂົວເຊື່ອມຕໍ່ເພື່ອໂຄສະນາພາບພົດຂອງແຂວງບິນເຢືອງ ແລະ ປະເທດຊາດອອກສູ່ເພື່ອນມິດສາກົນ.
ກໍ່ໃນວັນດຽວກັນ ຢູ່ປັກກິ່ງ, ສະຖານທູດຫວຽດນາມປະຈຳຈີນໄດ້ຈັດຕັ້ງການພົບປະ, ສັງສັນກັບພໍ່ແມ່ຊາວຫວຽດນາມອາໄສຢູ່ນະຄອນຫຼວງ. ຕາມນັກຂ່າວວິທະຍຸກະຈາຍສຽງຫວຽດນາມປະຈຳຈີນແລ້ວ, ກ່ອນທີ່ຈັດຕັ້ງການພົບປະສັງສັນ, ພໍ່ແມ່ຊາວຫວຽດນາມອາໄສຢູ່ຈີນໄດ້ໄປຍັງຫໍບູຊາລຸງໂຮ່ ໃນສຳນັກງານສະຖານທູດ ເພື່ອຖະຫວາຍທູບທຽນ, ອາໄລຫາປະທານໂຮ່ຈີມິນ. ທ່ານຮ່ວາງງອກວິງ, ອຸປະທູດຊົ່ວຄາວສະຖານທູດຫວຽດນາມປະຈຳຈີນ ໄດ້ແຈ້ງໃຫ້ພໍ່ແມ່ນປະຊາຊົນຮັບຊາບບັນຫາສຳຄັນກ່ຽວກັບສະພາບການເມືອງ, ເສດຖະກິດ, ສັງຄົມພາຍໃນປະເທດ, ກໍ່ຄືບັນດາບາດກ້າວໃໝ່ໃນການພົວພັນລະຫວ່າງຫວຽດນາມ - ຈີນ. ພໍ່ແມ່ຊາວຫວຽດນາມອາໄສຢູ່ຈີນລ້ວນແຕ່ສະແດງຄວາມພາກພູມໃຈຕໍ່ບັນດາໝາກຜົນທີ່ຫວຽດນາມບັນລຸໄດ້ໃນຊຸມປີຜ່ານມາ, ຖືວ່າ: ນີ້ແມ່ນການລະດົມກຳລັງໃຈອັນໃຫຍ່ຫຼວງທີ່ມີຕໍ່ໍຊາວຫວຽດນາມຢູ່ຫ່າງໄກຈາກບ້ານເກີດເມືອງນອນ. ປ້າ ຫວູທິເຍີນ, ອາຍຸເກືອບ 80 ປີໃຫ້ຮູ້ວ່າ:
“ສະຖານທູດຫວຽດນາມປະຈຳຈີນມີຄວາມເອົາໃຈໃສ່ຕໍ່ພໍ່ແມ່ຊາວຫວຽດນາມອາໄສຢູ່ຈີນຫຼາຍ. ແຕ່ລະປີ, ເມືອໄດ້ມາພົບປະສັງສັນຢູ່ສະຖານທູດພວກຂ້າພະເຈົ້າຮູ້ສຶກມ່ວນຫຼາຍ. ຂ້າພະເຈົ້າຫາກໍ່ມີໂອກາດກັບເມືອຫວຽດນາມ, ເຫັນວ່າປະເທດເຮົາມີການປ່ຽນແປງຫຼາຍແລ້ວ, ໃຜໆກໍ່ກິນອີ່ມນຸ່ງອຸ່ນ ແລະ ຢູ່ເຢັນເປັນສຸກ, ຂ້າພະເຈົ້າດີໃຈຫຼາຍ.”