ທ່ານສະມາຊິກລັດຖະສະພາ ຍີ່ປຸ່ນ Soramoto Seiki (ພາບ: TTXVN)

        ການຢ້ຽມຢາມ ຍີ່ປຸ່ນ ຂອງທ່ານປະທານສະພາແຫ່ງຊາດ ຫວຽດນາມ ເຈິ່ນແທັງເໝີນ ແຕ່ວັນທີ 03 – 07 ທັນວາ, ໄດ້ປະກອບສ່ວນເຮັດໃຫ້ການພົວພັນ ຄວາມໄວ້ເນື້ອເຊື່ອໃຈ ແລະ ຄວາມເຂົ້າໃຈເຊິ່ງກັນແລະກັນລະຫວ່າງບັນດານັກສ້າງກົດໝາຍ 2 ປະເທດເລິກເຊິ່ງຂຶ້ນຕື່ມ. ນີ້ແມ່ນຂໍ້ສັງເກດຂອງທ່ານສະມາຊິກລັດຖະສະພາ ຍີ່ປຸ່ນ Soramoto Seiki ທີ່ການແລກປ່ຽນກັບນັກຂ່າວ VOV ປະຈຳ ຍີ່ປຸ່ນ.

        ຕາມທ່ານ Soramoto Seiki ແລ້ວ, ການພົວພັນແລກປ່ຽນປະຊາຊົນລະຫວ່າງ 2 ປະເທດ ຍີ່ປຸ່ນ ແລະ ຫວຽດນາມ ພວມຢູ່ໃນໄລຍະອັນດີງາມທີ່ສຸດນັບແຕ່ກ່ອນມາຮອດປະຈຸບັນ. ໃນສະພາບການນັ້ນ, ສະພາແຫ່ງຊາດ 2 ປະເທດກໍ່ໄດ້ຮັດແໜ້ນຢ່າງບໍ່ຢຸດຢັ້ງ ແລະ ເຮັດໃຫ້ການພົວພັນ ແລະ ຄວາມສະໜິດຕິດພັນລະຫວ່າງບັນດາສະມາຊິກລັດຖະສະພາເລິກເຊິ່ງຂຶ້ນຕື່ມ.

        “ບັນດາການປະກອບສ່ວນຢ່າງໃຫຍ່ຫຼວງຂອງສະພາແຫ່ງຊາດ 2 ປະເທດສະແດງໃຫ້ເຫັນວ່າ ການພັດທະນາການພົວພັນລະຫວ່າງ 2 ປະເທດແມ່ນໃຫຍ່ຫຼວງທີ່ສຸດ ແລະ ມີຄວາມສຳຄັນຍິ່ງ, ກ່ຽວຂ້ອງເຖິງລະບອບ, ນະໂຍບາຍ ແລະ ບັນດາການເຄື່ອນໄຫວລະອຽດ. ເຖິງຢ່າງໃດກໍ່ຕາມ, ຝ່າຍ ຍີ່ປຸ່ນ ຈະບໍ່ຢຸດຢູ່ລະດັບນັ້ນ ແລະ ໃນໄລຍະຈະມາເຖິງນີ້ ຈະສືບຕໍ່ມານະພະຍາຍາມເພື່ອເພີ່ມທະວີການຮ່ວມມື, ເຮັດໃຫ້ການພົວພັນ 2 ຝ່າຍເລິກເຊິ່ງຂຶ້ນຕື່ມ. ບັນດາສະມາຊິກລັດຖະສະພາກໍ່ຈະສືບຕໍ່ມານະພະຍາຍາມເພື່ອເປີດກວ້າງການຮ່ວມມື”.

        ນອກຈາກການຊຸກຍູ້ການພົວພັນລະຫວ່າງມະນຸດດ້ວຍກັນແລ້ວ, ຍີ່ປຸ່ນ ກໍ່ປາດຖະໜາວ່າ ທ່ານປະທານສະພາແຫ່ງຊາດ ຫວຽດນາມ ຈະສຸມໃສ່ປຶກສາຫາລືຢ່າງເລິກເຊິ່ງ ແລະ ລະອຽດກັບຝ່າຍ ຍີ່ປຸ່ນ ກ່ຽວກັບການຮ່ວມມືດ້ານອຸດສາຫະກຳ, ວິທະຍາສາດ - ເຕັກນິກລະຫວ່າງ 2 ປະເທດ, ພ້ອມກັບບັນດາມາດຕະການເພີ່ມທະວີການເຊື່ອມຕໍ່ໃນຂົງເຂດດັ່ງກ່າວ.