ພາບປະກອບ
|
(vovworld) – ໂດຍສືບຕໍ່ວາລະປະຊຸມຄັ້ງທີ 35 ຂອງຄະນະປະຈຳສະພາແຫ່ງຊາດ, ຕອນບ່າຍວັນທີ 25/2, ບັນດາ ສະມາຊິກສະພາແຫ່ງຊາດ (ສສຊ) ໄດ້ປະກອບຄຳເຫັນກ່ຽວກັບຮ່າງກົດໝາຍວ່າດ້ວຍການລົງປະຊາມະຕິ ແລະ ກົດໝາຍວ່າດ້ວຍການເລືອກຕັ້ງ ສສຊ ແລະ ສະພາປະຊາຊົນ. ເມື່ອໃຫ້ຄຳເຫັນ ກ່ຽວກັບຮ່າງກົດໝາຍວ່າດ້ວຍການລົງປະຊາມະຕິ, ຄະນະປະຈຳສະພາແຫ່ງຊາດ ໄດ້ເຫັນດີເຖິງຄວາມຈຳເປັນຕ້ອງປະກາດໃຊ້ກົດໝາຍນີ້ ເພື່ອເສີມຂະຫຍາຍສິດປະຊາທິປະໄຕຂອງປະຊາຊົນກວ່າອີກ. ພິເສດແມ່ນສິດປະຊາທິປະໄຕໂດຍກົງ, ແຕ່ສະເໜີຕ້ອງມີບັນດາຂໍ້ກຳນົດຢ່າງແໜ້ນແຟ້ນ, ຈະແຈ້ງ ເພື່ອຫຼີກເວັ້ນສະພາບສວຍໃຊ້ປະຊາທິປະໄຕເພື່ອກໍ່ຄວາມຂາດສະຖຽນລະພາບດ້ານການເມືອງ.
ກ່ອນໜ້ານັ້ນ, ຕອນເຊົ້າວັນທີ 25/2, ພາຍໃຕ້ການເປັນປະທານຂອງທ່ານປະທານສະພາແຫ່ງຊາດ ຫງວຽນຊິງຮູ່ງ, ຄະນະປະຈຳສະພາແຫ່ງຊາດໄດ້ໄຂວາລະປະຊຸມຄັ້ງທີ 35, ປະກອບຄຳເຫັນກ່ຽວກັບບາງບັນຫາໃຫຍ່ທີ່ຍັງມີຄວາມແຕກຕ່າງກັນຂອງຮ່າງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ. ຄຳເຫັນສ່ວນຫຼາຍເຫັນດີເຫັນພ້ອມກັບວິທີຮັກສາບັນດາຂໍ້ກຳນົດກ່ຽວກັບສະພາເລືອກຕັ້ງແຫ່ງຊາດຄືເນື້ອໃນຂອງຮ່າງກົດໝາຍ. ຕາມນັ້ນແລ້ວ, ສະພານີ້ໄດ້ຮັບການສ້າງຕັ້ງເມື່ອປະກາດວັນເລືອກຕັ້ງ ແລະ ສິ້ນສຸດໜ້າທີ່ພາຍຫຼັງສະພາແຫ່ງຊາດຢັ້ງຢືນຖານະເປັນສະມາຊິກສະພາແຫ່ງຊາດ. ທ່ານນາງ ເຈືອງທິມາຍ, ຫົວໜ້າກຳມາທິການບັນດາບັນຫາສັງຄົມຂອງສະພາແຫ່ງຊາດຖືວ່າ:
“ເບິ່ງຕົວຈິງ, ຂ້າພະເຈົ້າເຫັນດີຕໍ່ຄຳເຫັນ ແລະ ຄວນສ້າງຕັ້ງສະພາເລືອກຕັ້ງຕາມແຕ່ລະອາຍຸການ. ຖ້າຫາກຈຳເປັນຕ້ອງເລືອກຕັ້ງເພີ່ມເຕີມ, ພວກເຮົາປະຕິບັດຕາມວິວັດທະນາການຄືດັ່ງລັດຖະທຳມະນູນ, ນັ້ນແມ່ນການສ້າງຕັ້ງສະພາເລືອກຕັ້ງແຫ່ງຊາດ ແລະ ສະພານີ້ຈະຈັດຕັ້ງການເລືອກຕັ້ງ ສສຊ. ຂ້າພະເຈົ້າຄິດວ່າວຽກງານນີ້ກໍ່ບໍ່ຍາກປານໃດ.”
ສ່ວນທ່ານ ຟູ່ງກວກຫຽນ, ຫົວໜ້າກຳມາທິການການເງິນ - ງົບປະມານຂອງສະພາແຫ່ງຊາດ, ຊີ້ແຈ້ງວ່າ:
“ຍົກຕົວຢ່າງຄື: ອາຍຸການຜ່ານມາ ພວກເຮົາກຳນົດອັດຕາ ສສຊ ຍິງແມ່ນ 30 – 35% ແຕ່ໃນຕົວຈິງບໍ່ບັນລຸໄດ້ອັດຕານີ້ ເຊິ່ງກົດໝາຍກຳນົດແມ່ນກ່ວາ 30%. ຖ້າຫາກບໍ່ບັນລຸໄດ້ອັດຕາດັ່ງກ່າວ, ການເລືອກຕັ້ງຈະໄດ້ຮັບການຮັບຮູ້ບໍ່? ດັ່ງນັ້ນ ຕາມຂ້າພະເຈົ້າແລ້ວຄວນກຳນົດວ່າໃນແຕ່ລະອາຍຸການຄວນກຳນົດອັດຕາເໝາະສົມ ແຕ່ອັດຕານັ້ນຍັງອີງໃສ່ລະດັບຄວາມໄວ້ວາງໃຈຂອງສະມາຊິກສະພາແຫ່ງຊາດແຕ່ລະທ່ານນັ້ນຢູ່ບ່ອນສະໝັກຮັບເລືອກຕັ້ງ.”