(vovworld) - ຕອນບ່າຍວັນທີ 28/2, ຢູ່ສຳນັກງານລັດຖະບານ ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ໄດ້ໃຫ້ການຕ້ອນຮັບທ່ານລັດຖະມົນຕີການຕ່າງປະເທດ Serbia Ivan Mrkic ທີ່ພວມຢູ່ຢ້ຽມຢາມ ແລະ ເຮັດວຽກຢູ່ ຫວຽດນາມ. ທ່ານນາຍົກລັດຖະມົນຕີ ຫວຽນເຕີນຢູງ ເນັ້ນໜັກວ່າ: ຍາມໃດ ຫວຽດນາມ ກໍ່ຈົດຈຳການຮ່ວມມື, ການຊ່ວຍເຫຼືອຢ່າງມີປະສິດທິຜົນຂອງ Sirbia ໃນການຕໍ່ສູ້ປົດປ່ອຍຊາດ, ທ້ອນໂຮມປະເທດຊາດເປັນເອກະພາບກ່ອນນີ້ ແລະ ໃນການສ້າງສາ, ພັດທະນາປະເທດຊາດໃນປະຈຸບັນ, ພ້ອມທັງຖືວ່າ: ການຢ້ຽມຢາມຂອງທ່ານ ລັດຖະມົນຕີການຕ່າງປະເທດ Ivan Mrkic ປະກອບສ່ວນຢ່າງແທ້ຈິງເຂົ້າໃນການເພີ່ມທະວີການພົວພັນຮ່ວມມືລະຫວ່າງ 2 ປະເທດໃນບັນດາຂົງເຂດ. ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນວ່າ: ຫວຽດນາມ ຈະມານະພະຍາຍາມຈົນສຸດຄວາມສາມາດຂອງຕົນພ້ອມກັບ Serbia ຊຸກຍູ້ບັນດາການເຄື່ອນໄຫວຮ່ວມມືຫຼາຍດ້ານລະຫວ່າງ 2 ປະເທດ, ພິເສດແມ່ນການຮ່ວມມືກ່ຽວກັບດ້ານເສດຖະກິດ, ການຄ້າ, ການລົງທຶນ..., ສະເໜີໃຫ້ 2 ຝ່າຍເປັນເອກະພາບເຊັນສັນຍາສົ່ງເສີມ ແລະ ອາລັກຂາແກ່ການລົງທຶນ ແລະ ສັນຍາກ່ຽວກັບການຮ່ວມມືເສດຖະກິດ ໂດຍໄວ, ສົມທົບກັນ, ສະໜັບສະໜູນຫຼັກໝັ້ນຂອງກັນໃນບັນດາເວທີປາໄສສາກົນ ແລະ ພາກພື້ນ.
ສ່ວນທ່ານລັດຖະມົນຕີການຕ່າງປະເທດ Ivan Mrkic ຊີ້ແຈ້ງວ່າ: ຍາມໃດ Serbia ກໍ່ຖືເປັນສຳຄັນ ແລະ ປາດຖະໜາຢາກຊຸກຍູ້ການພົວພັນຮ່ວມມືກັບ ຫວຽດນາມ ໃນບັນດາຂົງເຂດ, ພ້ອມທັງຫວັງຢາກສືບຕໍ່ໄດ້ຮັບການສະໜັບສະໜູນຂອງ ຫວຽດນາມ ທີ່ມີຕໍ່ Serbia ໃນບັນດາເ້ວທີປາໄສພາກພື້ນ ແລະ ສາກົນ. ທ່ານລັດຖະມົນຕີການຕ່າງປະເທດ Ivan Mrkic ສະເໜີໃຫ້ 2 ຝ່າຍເຊັນສັນຍາຮ່ວມມືທາງດ້ານການສຶກສາ - ບຳລຸງສ້າງໂດຍໄວ.