ທ່ານນາງ ຫງວຽນທິຫງອກແທງ ສັງກັດຄະນະສະມາຊິກສະພາແຫ່ງຊາດນະຄອນຮ່າໂນ້ຍປະກອບຄຳເຫັນທີ່ການປຶກສາຫາລືຢູ່ຕາມໜ່ວຍ
ເມື່ອຕອນເຊົ້າວັນທີ 28/5 (ພາບ: baonguoidaibieu )
|
Vovworld- ໂດຍສືບຕໍ່ດຳເນີນກອງປະຊຸມສະໄໝສາມັນເທື່ອທີ 5 ສະພາແຫ່ງຊາດຫວຽດນາມຊຸດທີ 13, ຕອນບ່າຍວັນທີ 28/5, ບັນດາສະມາຊິກສະພາແຫ່ງຊາດໄດ້ປຶກສາຫາລືກ່ຽວກັບຮ່າງກົດໝາຍສະບັບປັບປຸງເພີ່ມເຕີມບາງຂໍ້ມາດຕາ ຂອງ ກົດໝາຍວ່າດ້ວຍອາກອນມູນຄ່າເພີ່ມ. ບັນດາສະມາຊິກສະພາແຫ່ງຊາດໄດ້ຮັບຮູ້ວ່າ ກົດໝາຍວ່າດ້ວຍອາກອນມູນຄ່າເພີ່ມໄດ້ຮັບການຮັບຮອງເອົາເມື່ອປີ 1997, ພາຍຫຼັງປັບປຸງເພີ່ມເຕີມ 3 ຄັ້ງ, ໄດ້ລົງເລິກເຂົ້າສູ່ຊີວິດຕົວຈິງ. ເລື່ອງປະກາດໃຊ້ກົດໝາຍສະບັບປັບປຸງເພີ່ມເຕີມບາງຂໍ້ມາດຕາຂອງກົດໝາຍ ວ່າດ້ວຍອາກອນມູນຄ່າເພີ່ມ ແມ່ນເພື່ອແນໃສ່ສ້າງລະບົບກົດໝາຍວ່າດ້ວຍສ່ວຍສາອາກອນໃຫ້ສົມບູນແບບ, ເພີ່ມຄວາວມສາມາດແກ່ງແຍ້ງໃຫ້ແກ່ວິສາຫະກິດ, ດຶງດູດການລົງທຶນ. ທ່ານ ເຢືອງກວາງເຊີນ , ສະມາຊິກສະພາແຫ່ງຊາດແຂວງ ບັກກ້ານ ມີຄຳເຫັນວ່າ :
“ ຮ່າງກົດໝາຍຄວນກຳນົດລະອຽດບັນດາມາດຖານຂອງບັນດາກຸ່ມເປົ້າໝາຍເສຍອາກອນ, ພ້ອມກັນນັ້ນ, ກໍໄດ້ກຳນົດຕາມທິດຫຼຸດຜ່ອນສິນຄ້າບໍລິການ ບໍ່ຖືກເສຍອາກອນ, ແລະ ໝວດສິນຄ້າບໍລິການເສຍພາສີອາກອນ 5%. ເພາະວ່າ ຕາມຍຸດທະສາດປະຕິຮູບພາສີອາກອນໄລຍະ 2011-2020, ຈະຫຼຸດຜ່ອນ ຈຳນວນໝວດສິນຄ້າບໍ່ຖືກເສຍອາກອນມູນຄ່າເພີ່ມ ແລະ ຫຼຸດຜ່ອນ ໝວດສິນຄ້າບໍລິການເສຍພາສີອາກອນ 5%, ພ້ອມກັນນັ້ນ, ຮ່າງກົດໝາຍຍັງກຳນົດວ່າ ກົດໝາຍຈະມີຜົນສັກສິດນັບແຕ່ວັນທີ 1/1/2014 ເປັນຕົ້ນໄປ ແລະ ຮອດປີ 2020 ຈະປະຕິບັດການນຳໃຊ້ອັດຕາພາສີອາກອນດຽວ”
ກ່ອນໜ້ານັ້ນ ຄືຕອນເຊົ້າວັນດຽວກັນ, ບັນດາສະມາຊິກສະພາແຫ່ງຊາດໄດ້ປຶກສາຫາລືຢູ່ຕາມໜ່ວຍກ່ຽວກັບຮ່າງກົດໝາຍສະບັບປັບປຸງເພີ່ມເຕີມບາງ ຂໍ້ມາດຕາຂອງກົດໝາຍ ວ່າດ້ວຍການປ້ອງກັນ ແລະ ດັບເພິງ, ຮ່າງກົດໝາຍສະບັບປັບປຸງເພີ່ມເຕີມ ຂໍ້ມາດຕາ 170 ຂອງກົດໝາຍວ່າດ້ວຍວິສາຫະກິດ. ຂໍ້ມາດຕາ 170 ຂອງກົດໝາຍວ່າດ້ວຍວິສາຫະກິດໄດ້ກຳນົດວ່າ ວິສາຫະກິດທີ່ມີເງິນລົງທຶນຂອງຕ່າງປະເທດໄດ້ຮັບການສ້າງຕັ້ງກ່ອນທີ່ກົດໝາຍສະບັບນີ້ມີຜົນສັກສິດ ແມ່ນໄດ້ຮັບການຈົດທະບຽນຄືນໃໝ່ເພື່ອຈັດຕັ້ງການເຄື່ອນໄຫວຕາມຂໍ້ກຳນົດ ຂອງກົດໝາຍວ່າດ້ວຍວິສາຫະກິດ ແລະ ກົດໝາຍອື່ນໆທີ່ມີສ່ວນກ່ຽວຂ້ອງ ຫຼືຖ້າຫາກບໍ່ ຈົດທະບຽນຄືນໃໝ່ ແມ່ນຈະເຄື່ອນໄຫວຕາມໜັງສືອະນຸຍາດລົງທຶນ, ກົດລະບຽບຂອງວິສາຫະກິດ ແລະ ບັນດາຂໍ້ກຳນົດອື່ນໆຂອງກົດໝາຍ. ເມື່ອປະກອບຄຳເຫັນໃສ່ ຮ່າງກົດໝາຍສະບັບນີ້, ສສຊ ຫຼາຍທ່ານຖຶວ່າ ໃນສະພາບການຄືປະຈຸບັນ, ການປັບປຸງເພີ່ມເຕີມ ຂໍ້ມາດຕາ 170 ຂອງກົດໝາຍວ່າດ້ວຍວິສາຫະກິດ ແມ່ນຈຳເປັນທີ່ສຸດ, ນີ້ແມ່ນບັນຫາທີ່ສາມາດແກ້ໄຂ ແລະ ນຳມາເຊິ່ງປະສິດທິຜົນໃຫ້ແກ່ບັນດາ ວິສາຫະກິດທີ່ມີເງິນລົງທຶນຂອງຕ່າງປະເທດ.
ເມື່ອປຶກສາຫາລືກ່ຽວກັບຮ່າງກົດໝາຍສະບັບປັບປຸງເພີ່ມເຕີມບາງຂໍ້ມາດຕາ ຂອງກົດໝາຍວ່າດ້ວຍການປ້ອງກັນ ແລະ ດັບເພີງ, ມີຫຼາຍຄຳຄິດຄຳເຫັນໄດ້ສະເໜີວ່າ ຄວນກຳນົດຢ່າງຈະແຈ້ງກ່ຽວກັບຄວາມຮັບຜິດຊອບຂອງຜູ້ເປັນຫົວໜ້າຄອບຄົວ ພ້ອມທັງກຳນົດລະອຽດກ່ຽວກັບຄວາມຮັບຜິດຊອບຕໍ່ການທົດແທນຄວາມເສຍຫາຍຖ້າຫາກ ສ່ວນບຸກຄົນ, ອົງການສຳນັກງານກໍ່ໃຫ້ເກີດເຫດອັກຄີໄພຍ້ອນຂາດຄວາມຮັບຜິດຊອບ.