ທ່ານປະທານສະພາແຫ່ງຊາດ ເຈີ່ນແທງເໝີນ ແລະ ພັນລະຍາ ເລີ່ມຕົ້ນການຢ້ຽມຢາມຍີ່ປຸ່ນຢ່າງເປັນທາງການ

     ໃນໄລຍະຢ້ຽມຢາມຍີ່ປຸ່ນຢ່າງເປັນທາງການແຕ່ວັນທີ 3-7 ທັນວາ, ທ່ານປະທານສະພາແຫ່ງຊາດ ເຈີ່ນແທງເໝີນຈະມີການພົບປະ ແລະ ເຈລະຈາກັບການນຳຂັ້ນສູງຂອງຍີປຸ່ນ, ໃນນັ້ນມີການເຈລະຈາກັບປະທານສະພາສູງ ແລະ ສະພາຕ່ຳຍີ່ປຸ່ນ, ລົງນາມໃນສັນຍາຮ່ວມມືກັບສະພາສູງຍີ່ປຸ່ນ, ພົບປະກັບນາຍົກລັດຖະມົນຕີ, ເຂົ້າຢ້ຽມຄຳນັບເຈົ້າຈັກກະພັດຍີປຸ່ນ ແລະ ພະມະເຫສີ, ຕ້ອນຮັບການນຳພັກການເມືອງຍີ່ປຸ່ນຈຳນວນໜຶ່ງ. ໃນການຢ້ຽມຢາມຄັ້ງນີ້, ທ່ານປະທານສະພາແຫ່ງຊາດ ເຈີ່ນແທງເໝີນ ພ້ອມດ້ວຍພັນລະຍາ  ແລະ ຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ຈະຢ້ຽມຢາມເຮັດວຽກຢູ່ແຂວງ Nagasaki.

ທ່ານປະທານສະພາແຫ່ງຊາດ ຫວຽດນາມ ເຈິ່ນແທັງເໝິນ ແລະ ທ່ານປະທານາທິບໍດີ ສິງກະໂປ Tharman Shanmugaratnam (ພາບ:VOV)

ກ່ອນໜ້ານັ້ນ, ຕອນເຊົ້າວັນທີ 3 ທັນວາ, ໃນຂອບເຂດການຢ້ຽມຢາມ ສິງກະໂປ ຢ່າງເປັນທາງການ, ທ່ານປະທານສະພາແຫ່ງຊາດ ຫວຽດນາມ ເຈິ່ນແທັງເໝິນ ໄດ້ມີການພົບປະກັບທ່ານປະທານາທິບໍດີ ສິງກະໂປ Tharman Shanmugaratnam. ທີ່ການພົບປະ, ທ່ານປະທານສະພາແຫ່ງຊາດ ເຈິ່ນແທັງເໝິນ ສະເໜີໃຫ້ທ່ານປະທານາທິບໍດີ Tharman Shanmugaratnam ສະໜັບສະໜູນການຜັນຂະຫຍາຍຂໍ້ຕົກລົງຮ່ວມມືລະຫວ່າງສອງສະພາແຫ່ງຊາດ ປີ 2022 ຢ່າງມີປະສິດທິຜົນ, ປະກອບສ່ວນນຳການຮ່ວມມືລະຫວ່າງອົງການສ້າງກົດໝາຍສອງປະເທດກາຍເປັນຊ່ອງທາງຮ່ວມມືສຳຄັນຂອງການພົວພັນຄູ່ຮ່ວມມືຍຸດທະສາດ ຫວຽດນາມ - ສິງກະໂປ, ສ້າງປະຖົມປັດໄຈຍົກສູງການພົວພັນໃນໄລຍະຈະມາເຖິງ.

        ທ່ານປະທານສະພາແຫ່ງຊາດ ເຈິ່ນແທັງເໝິນ ກໍສະເໜີໃຫ້ ສິງກະໂປ ແລະ ທ່ານປະທານາທິບໍດີ ໃນນາມສ່ວນຕົວ ຈົ່ງເອົາໃຈໃສ່ເຖິງການຊຸກຍູ້ການຜັນຂະຫຍາຍຂໍ້ຕົກລົງກ່ຽວກັບໂຄງການກໍ່ສ້າງພະນັກງານຊັ້ນກາງ, ຂັ້ນສູງຂອງ ພັກຄອມມູນິດ ຫວຽດນາມ ຢູ່ ສິງກະໂປ ໄລຍະ 2024 – 2026; ເພີ່ມຈຳນວນທຶນການສຶກສາທຸກຂັ້ນໃຫ້ແກ່ ຫວຽດນາມ; ເປີດກວ້າງບັນດາໂຄງການຄື ບໍລິຫານສຳລັບການນຳ, ການນຳທີ່ມີຄວາມສາມາດບົ່ມຊ້ອນ ຕະຫຼອດຮອດພະນັກງານທຸກຂັ້ນຂອງ ຫວຽດນາມ.

        ທ່ານປະທານາທິບໍດີ ສິງກະໂປ ຢັ້ງຢືນວ່າ ສິງກະໂປ ຈະສືບຕໍ່ໜູນຊ່ວຍ ຫວຽດນາມ ຍົກສູງຄຸນນະພາບແຫຼ່ງຊັບພະຍາກອນມະນຸດ, ພ້ອມທັງສະເໜີໃຫ້ສອງຝ່າຍສືບຕໍ່ເສີມຂະຫຍາຍບັນດາຮູບແບບຮ່ວມມືທີ່ເປັນຕົວແບບຄື ເຂດອຸດສາຫະກຳ ຫວຽດນາມ - ສິງກະໂປ; ຍາດແຍ່ງໂອກາດຮ່ວມມືດ້ານພະລັງງານ, ເຊື່ອມຕໍ່ຕາໜ່າງໄຟຟ້າຫຼາຍກວ່າອີກ, ໃນນັ້ນ ມີຕາໜ່າງໄຟຟ້າ ອາຊຽນ, ຍູ້ໄວໂຄງການຂອງກຸ່ມບໍລິສັດ Sembcorp ກັບກຸ່ມບໍລິສັດຫຸ້ນສ່ວນການບໍລິການເຕັກນິກນ້ຳມັນອາຍແກັດ ຫວຽດນາມ (PTSC); ເພີ່ມທະວີການຮ່ວມມື, ແລກປ່ຽນວັດທະນະທຳ ແລະ ການທ່ອງທ່ຽວ.

ທ່ານປະທານສະພາແຫ່ງຊາດ ຫວຽດນາມ ເຈິ່ນແທັງເໝິນ ພົບປະກັບທ່ານປະທານາທິບໍດີ ສິງກະໂປ Tharman Shanmugaratnam (ພາບ: VOV)

        ການນຳສອງທ່ານຢັ້ງຢືນວ່າ ຈະສືບຕໍ່ສ້າງເງື່ອນໄຂສະດວກໃຫ້ແກ່ສະມາຄົມມິດຕະພາບ ຫວຽດນາມ - ສິງກະໂປ, ປະຊາຊົນສອງປະເທດດຳລົງຊີວິດ ແລະ ເຮັດວຽກ, ປະກອບສ່ວນເຂົ້າໃນຂະບວນວິວັດພັດທະນາເສດຖະກິດ - ສັງຄົມຂອງກັນ, ເສີມຂະຫຍາຍບົດບາດເປັນຂົວເຊື່ອມຕໍ່ໃຫ້ແກ່ການພົວພັນມິດຕະພາບລະຫວ່າງສອງປະເທດ. ການນຳສອງທ່ານກໍໄດ້ເນັ້ນໜັກເຖິງຫຼັກໝັ້ນທີ່ສະເໝີຕົ້ນສະເໝີປາຍຂອງ ອາຊຽນ ກ່ຽວກັບການແກ້ໄຂບັນດາຂໍ້ຂັດແຍ້ງຢູ່ທະເລຕາເວັນອອກ ໂດຍສັນຕິວິທີ, ສອດຄ່ອງກັບກົດໝາຍສາກົນ.

        ຕອນບ່າຍວັນທີ 3 ທັນວາ, ທ່ານປະທານສະພາແຫ່ງຊາດ ເຈິ່ນແທັງເໝິນ ແລະ ພັນລະຍາ ທ່ານນາງ ຫງວຽນທິແທັງງາ ພ້ອມດ້ວຍຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ໄດ້ເດີນທາງອອກຈາກສະໜາມບິນ Changi, ສິງກະໂປ, ສິ້ນສຸດການຢ້ຽມຢາມ ສ.ສິງກະໂປ ຢ່າງຈົບງາມ ແລະ ເດີນທາງໄປຢ້ຽມຢາມ ຍີປຸ່ນ ຢ່າງເປັນທາງການ.