(vovworld) - ໂດຍໄດ້ຮັບຄຳເຊື້ອເຊີນຂອງທ່ານປະທານປະເທດ ເຈືອງເຕີນຊາງ, ທ່ານນາງປະທານາທິບໍດີ ສາທາລະນະລັດ ອັກຊັງຕີນ Cristina Fernandez de Kirchner ໄດ້ຢ້ຽມຢາມ ຫວຽດນາມ ຢ່າງເປັນທາງການແຕ່ວັນທີ 18 -21/1. ຕອນເຊົ້າວັນທີ 21/1, ພາຍຫຼັງພິທີຕ້ອນຮັບຢ່າງເປັນທາງການ, ການນຳ 2 ປະເທດໄດ້ດຳເນີນການເຈລະຈາ.
ທ່ານປະທານປະເທດ ເຈືອງເຕີນຊາງ ຢືນຢັນວ່າ: ຍາມໃດ ຫວຽດນາມ ກໍ່ຖືເປັນສຳຄັນ ແລະ ປາຖະໜາຢາກເຮັດໃຫ້ການພົວພັນຄູ່ຮ່ວມມືຮອບດ້ານມີລັກສະນະຍຸດທະສາດ ກັບ ອັກຊັງຕີນ ເລີກເຊິ່ງກ່ວາອີກ. ທ່ານນາງປະທານາທິບໍດີ Cristina Fernandez de Kirchner ຢືນຢັນວ່າ: ອັກຊັງຕີນ ຖືເປັນສຳຄັນການປັບປຸງ ແລະ ເພີ່ມທະວີສາຍພົວພັນມິດຕະພາບ ແລະ ການຮ່ວມມືກັບຫວຽດນາມ ໃນນະໂຍບາຍມຸ້ງໄປສູ່ ອາຊີ - ປາຊີຟີກ, ພິເສດແມ່ນໃນບັນດາບັນຫາການຄ້າ ແລະ ການລົງທຶນ, ພະລັງງານ, ເຕັກໂນໂລຢີ ຊີວະພາບ....
ພາຍຫຼັງການເຈລະຈາ, ທ່ານປະທານປະເທດ ເຈືອງເຕີນຊາງ ແລະ ທ່ານນາງປະທານາທິບໍດີ ອັກຊັງຕີນ Cristina Fernandez de Kirchner ມີການພົບປະກັບວົງການນັກຂ່າວ. ທ່ານປະທານປະເທດ ເຈືອງເຕີນຊາງ ເນັ້ນໜັກວ່າ: ການຢ້ຽມຢາມ ຫວຽດນາມ ຂອງທ່ານນາງປະທານາທິບໍດີ ອັກຊັງຕີນ ຄັ້ງນີ້ ຈະເປີດກາລະໂອກາດໃໝ່ໃນການຮ່ວມມືລະຫວ່າງ 2 ປະເທດ. ທ່ານກ່າວວ່າ:
“ຮ່ວມເດີນທາງມາ ຫວຽດນາມ ກັບທ່ານນາງປະທານາທິບໍດີ ມີຜູ້ແທນຂັ້ນສູງຫຼາຍທ່ານຂອງ ລັດຖະບານ ອັກຊັງຕີນ ແລະ ວິສາຫະກິດອັນດັບໜຶ່ງ ກ່ວາ 200 ແຫ່ງ ອັນໄດ້ສະແດງໃຫ້ເຫັນຄວາມເອົາໃຈໃສ່ຢ່າງເລີກເຊິ່ງຂອງ ອັກຊັງຕີນ ກ່ຽວກັບການຊຸກຍູ້ການພົວພັນດ້ານເສດຖະກິດທີ່ມີຕໍ່ ຫວຽດນາມ ຢ່າງແທ້ຈິງ. ການຢ້ຽມຢາມຂອງ ທ່ານນາງປະທານາທິບໍດີ ບໍ່ພຽງແຕ່ນຳມາເຊິ່ງນ້ຳໃຈມິດຕະພາບຂອງປະເທດຊາດ ແລະ ປະຊາຊົນ ອັກຊັງຕີນ ເທົ່ານັ້ນ ຫາກຍັງສ້າງກາລະໂອກາດເພື່ອເປີດກ້ວາງການພົວພັນຮ່ວມມືດ້ານເສດຖະກິດ - ການຄ້າ - ການລົງທຶນລະຫວ່າງ 2 ປະເທດໃນໄລຍະຈະມາເຖິງ ອີກດ້ວຍ.”