ທ່ານເລຂາທິການໃຫຍ່ ຫງວຽນຟູຈ້ອງ ຕ້ອນຮັບ
ທ່ານປະທານາທິບໍດີ Nicolas Maduro Moros
(ພາບ: TTXVN)
(vovworld) – ຕອນເຊົ້າວັນທີ 1/9, ປະທານາທິບໍດີ ເວເນຊູເອລາ Nicolas Maduro Moros ພ້ອມພັນລະຍາ ແລະ ຄະນະຜູ້ແທນຂັ້ນສູງລັດຖະບານ ເວເນຊູເອລາ ໄດ້ອອກຈາກຮ່າໂນ້ຍ. ສິ້ນສຸດການຢ້ຽມຢາມ ຫວຽດນາມ ເປັນທາງການໃນລະຫວ່າງວັນທີ 30/8 – 1/9/2015 ຕາມຄຳເຊີນຂອງທ່ານປະທານປະເທດ ຫວຽດນາມ ເຈືອງເຕີ໋ນຊາງ ຢ່າງຈົບງາມ.
ກ່ອນໜ້ານັ້ນ, ໃນຕອນບ່າຍວັນທີ 31/8, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູຈ້ອງ ໄດ້ໃຫ້ການຕ້ອນຮັບທ່ານປະທານາທິບໍດີ Nicolas Maduro Moros. ນະທີ່ນີ້, ທ່ານປະທານາທິບໍດີ Nicolas Maduro Moros ຢືນຢັນເຖິງການພົວພັນສາມັກຄີ, ມິດຕິພາບກັບ ຫວຽດນາມ. ພ້ອມທັງສະແດງຄວາມປາດຖະໜາຢາກຊຸກຍູ້ການພົວພັນມິດຕະພາບ ແລະ ການຮ່ວມມືຫລາຍດ້ານກັບ ຫວຽດນາມ, ໃນນັ້ນ ມີການເພີ່ມທະວີແລກປ່ຽນຄະນະຜູ້ແທນທຸກຂັ້ນ, ເພີ່ມທະວີການພົວພັນລະຫວ່າງ 2 ພັກ, ຊຸກຍູ້ການຮ່ວມມືດ້ານເສດຖະກິດ, ການຄ້າ, ພິເສດ ແມ່ນໃນຂົງເຂດ ເຊິ່ງ 2 ຝ່າຍມີຄວາມສາມາດບົ່ມຊ້ອນ ແລະ ອາດສາມາດໜູນຊ່ວຍໃຫ້ກັນໄດ້. ການນຳ 2 ທ່ານເນັ້ນໜັກວ່າ: ຄວາມຈຳເປັນຕ້ອງສືບຕໍ່ສົມທົບກັນ, ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສໃນພາກພື້ນ ແລະ ສາກົນ, ໃນນັ້ນ ມີສະຫະປະຊາຊາດ. ສ່ວນທ່ານເລຂາທິການໃຫຍ່ ຫງວຽນຟູຈ້ອງ ຢືນຢັນວ່າ: ທິດທາງການຕ່າງປະເທດສະເໝີຕົ້ນສະເໝີປາຍຂອງພັກ ແລະ ລັດ ຫວຽດນາມ ຍາມໃດກໍຖືເປັນສຳຄັນການພົວພັນຮ່ວມມືກັບບັນດາປະເທດເພື່ອນມິດທີ່ເປັນມູນເຊື້ອ, ໃນນັ້ນມີ ເວເນຊູເອລາ. ທ່ານເລຂາທິການໃຫຍ່ ສະເໜີ ໃນໄລຍະຈະມາເຖິງ 2 ຝ່າຍເພີ່ມທະວີການພົວພັນສາມັກຄີ, ມິດຕະພາບ ແລະ ການຮ່ວມມືອັນດີງາມລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດກ່ວາອິກ. ທ່ານເລຂາທິການໃຫຍ່ ສະແດງຄວາມເຊື່ອໝັ້ນວ່າ: ພາຍຫລັງການຢ້ຍມຢາມ ຫວຽດນາມ ຂອງທ່ານປະທານາທິບໍດີ Nicolas Maduro Moros, ການພົວພັນມິດຕະພາບ, ການຮ່ວມມືຫລາຍດ້ານລະຫວ່າງ 2 ປະເທດ ຫວຽດນາມ - ເວເນຊູເອລາ ຈະມີບາດກ້າວພັດທະນາໃໝ່, ມີປະສິດທິຜົນ, ແທ້ຈິງກ່ວາ, ເພື່ອຜົນປະໂຫຍດຂອງປະຊາຊົນ 2 ປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ.
ໃນຂອບເຂດການຢ້ຽມຢາມ, ທ່ານປະທານາທິບໍດີ Nicolas Maduro Moros ໄດ້ພົບປະເຈລະຈາກັບທ່ານປະທານປະເທດ ຫວຽດນາມ ເຈືອງເຕີ໋ນຊາງ; ເຂົ້າຢ້ຽມຂ່ຳນັບທ່ານນາຍົກລັດຖະມົນຕີ ຫງວຽນເຕີ໋ນຢຸງ ຕາມພິທີການທູດ. ທີ່ການ ເຈລະຈາ, ທ່ານປະທານປະເທດ ເຈືອງເຕີ໋ນຊາງ ແລະ ທ່ານປະທານາທິບໍດີ Nicolas Maduro Moros ເຫັນດີຮັກສາ ແລະ ສືບຕໍ່ຍົກສູງບັນດາກົນໄກຮ່ວມມື 2 ຝ່າຍທີ່ໄດ້ສ້າງຕັ້ງຢ່າງມີປະສິດທິຜົນ. ພ້ອມທັງ, ເອົາໃຈໃສ່ຊີ້ນຳ, ສ້າງຄວາມສະດວກໃຫ້ບັນດາຮ່ວມທຸລະກິດ, ວິສາຫະກິດ 2 ຝ່າຍຜັນຂະຫຍາຍໂຄງການຮ່ວມມືຕ່າງໆ, ພິເສດແມ່ນໃນບັນດາຂົງເຂດຮ່ວມມືຍຸດທະສາດລະຫວ່າງ 2 ປະເທດກ່ຽວກັບດ້ານພະລັງງານ - ນ້ຳມັນອາຍແກສດ, ກະສິກຳ ແລະ ສິນທະເລ. 2 ຝ່າຍເຫັນດີເພີ່ມທະວີການແລກປ່ຽນດ້ານການຄ້າ 2 ຝ່າຍ; ຊຸກຍູ້ການຮ່ວມມືລະຫວ່າງ 2 ປະເທດໃນບັນດາຂົງເຂດຄື: ປ້ອງກັນຊາດ - ປ້ອງກັນຄວາມສະຫງົບ, ຕຸລາການ. ທ່ານປະທານປະເທດ ເຈືອງເຕີ໋ນຊາງ ຢືນຢັນວ່າ: ຫວຽດນາມ ຈະສົມທົບ, ຮ່ວມມືຢ່າງແໜ້ນແຟ້ນກັບ ເວເນຊູເອລາ ແລະ ບັນດາປະເທດສະມາຊິກອື່ນໆ ເພື່ອແນໃສ່ຮັບປະກັນໃຫ້ກອງປະຊຸມຂັ້ນສູງຂະບວນການບໍ່ຮ່ວມກຸ່ມໂດຍ ເວເນຊູເອລາ ເປັນເຈົ້າພາບ ເຊິ່ງຄາດວ່າຈະຈັດຕັ້ງ ໃນເຄິ່ງຕົ້ນປີ 2016 ໃຫ້ສຳເລັດຜົນ. ເມື່ອແລກປ່ຽນກ່ຽວກັບສະຖານະການສາກົນ ແລະ ພາກພື້ນເຊິ່ງທັງສອງຝ່າຍຕ່າງມີຄວາມສົນໃຈ, 2 ຝ່າຍເຫັນດີຖືວ່າ: ບັນດາຄວາມຂັດແຍ້ງກັນກ່ຽວກັບອະທິປະໄຕ ແລະ ຜືນແຜ່ນດິນ ຕ້ອງໄດ້ຮັບການແກ້ໄຂ ໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ, ພິເສດແມ່ນກົດບັດ ແລະ ສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 (UNCLOS 1982).
ທີ່ການຕ້ອນຮັບທ່ານປະທານາທິບໍດີ ເວເນຊູເອລາ ໃນວັນທີ 31/8, ທ່ານນາງຮອງປະທານສະພາແຫ່ງຊາດ ຕ່ອງທິຟ໋ອງ ເຊື່ອໝັ້ນວ່າ: ການຢ້ຽມຢາມຂອງຄະນະຈະປະກອບສ່ວນການຊຸກຍູ້, ເຮັດໃຫ້ການພົວພັນມິດຕະພາບລະຫວ່າງສະພາແຫ່ງຊາດ ແລະ ປະຊາຊົນ 2 ປະເທດເລິກເຊິ່ງກ່ວາອິກ, ພ້ອມທັງເປີດແງ່ຫວັງໃໝ່ໃນການພົວພັນຮ່ວມມື 2 ຝ່າຍ ກໍຄືໃນການຮ່ວມມືລະຫວ່າງພາກພື້ນ ແລະ ສາກົນ. ທ່ານປະທານາທິບໍດີ ເວເນຊູເອລາ ປາດຖະໜາວ່າ: ໃນໄລຍະຈະມາເຖິງ, 2 ກຸ່ມສະມາຊິກລັດຖະສະພາມິດຕະພາບຕ້ອງຊຸກຍູ້ການຮ່ວມມື ເພື່ອແນໃສ່ປະກອບສ່ວນເພີ່ມທະວິຄວາມເຂົ້າອົກເຂົ້າໃຈ, ຍູ້ແຮງການພົວພັນລະຫວ່າງ 2 ປະເທດ, 2 ສະພາແຫ່ງຊາດກ່ວາອິກ.
ໃນຂອບເຂດການຢ້ຽມຢາມ ຫວຽດນາມ ຢ່າງເປັນທາງການ, ທ່ານປະທານາທິບໍດີ Nicolas Maduro Moros ໄດ້ມາວາງພວງມາລາຢູ່ອະນຸສາວະລີບັນດາວິລະຊົນນັກຮົບທີ່ເສຍສະຫຼະຊີວິດເພື່ອຊາດ, ສຸສານປະທານ ໂຮ່ຈີມິນ ແລະ ພົບປະກັບວິສາຫະກິດ ຫວຽດນາມ; ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຟ້າມບິ່ງມິງ ໄດ້ໃຫ້ການຕ້ອນຮັບ ແລະ ເຮັດວຽກກັບທ່ານລັດຖະມົນຕີວ່າການກະຊວງການຕ່າງປະເທດ ເວເນຊູເອລາ Delcy Rodriguez.