ທ່ານ ເຈືອງມີງຕ໋ວນ, ລັດຖະມົນຕີກະຊວງຖະແຫຼງຂ່າວ ແລະ ສື່ສານ, ປະທານສະມາຄົມມິດຕະພາບ ຫວຽດນາມ - ອິນເດຍ
|
(vovworld) - ພິທີສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ອິນເດຍ (7/1/1972 – 7/1/2017) ໂດຍສະມາຄົມມິດຕະພາບ ຫວຽດນາມ - ອິນເດຍ ຈັດຕັ້ງຢູ່ ຮ່າໂນ້ຍ. ໃນຈົດໝາຍອວຍພອນຝາກເຖິງສະມາຄົມມິດຕະພາບ ຫວຽດນາມ - ອິນເດຍ ເນື່ອງໃນໂອກາດນີ້. ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ໄດ້ເນັ້ນໜັກວ່າ 45 ປີທີ່ຜ່ານມາ, ການພົວພັນ ຫວຽດນາມ - ອິນເດຍ ນັບມື້ນັບໄດ້ຮັບການປັບປຸງ ແລະ ພັດທະນາຢ່າງເລິກເຊິ່ງ, ກ້ວາງຂວາງ, ເຂັ້ມແຂງໃນທຸກດ້ານ. ນີ້ແມ່ນຊັບສົມບັດອັນລ້ຳຄ່າເຊິ່ງລຸ້ນຄົນຕ່າງໆຂອງ 2 ຊາດ ຫວຽດນາມ - ອິນເດຍ ຕ້ອງເຄົາລົບ, ຮັກສາ ແລະ ເສີມຂະຫຍາຍ.
ກ່າວຄຳເຫັນທີ່ພິທີ, ທ່ານ ເຈືອງມີງຕ໋ວນ, ລັດຖະມົນຕີກະຊວງຖະແຫຼງຂ່າວ ແລະ ສື່ສານ, ປະທານສະມາຄົມມິດຕະພາບ ຫວຽດນາມ - ອິນເດຍ ໄດ້ຢັ້ງຢືນວ່າ:
“ອິນເດຍແມ່ນປະເທດມະຫາອຳນາດໃນໂລກກ່ຽວກັບເຕັກໂນໂລຢີ ແລະ ອຸດສາຫະກຳສອບແວ. ດັ່ງນັ້ນ, ນີ້ແມ່ນຂົງເຂດທີ່ພວກເຮົາຕ້ອງເພີ່ມທະວີການຮ່ວມມືໃນອະນາຄົດ. ບົດບັນທຶກຊ່ວຍຈຳກ່ຽວກັບການເພີ່ມທະວີການຮ່ວມມືໃນຂົງເຂດເຕັກໂນໂລຢີຂໍ້ມູນຂ່າວສານ, ລັດຖະບານເອເລັກໂຕນິກ ທີ່ 2 ປະເທດຫາກໍ່ລົງນາມເນື່ອງໃນໂອກາດການຢ້ຽມຢາມຂອງທ່ານນາຍົກລັດຖະມົນຕີ ອິນເດຍ ຢູ່ ຫວຽດນາມ ຫວ່າງມໍ່ໆມານີ້ ຈະແມ່ນພື້ນຖານດ້ານກົດໝາຍເພື່ອໃຫ້ 2 ປະເທດຫັນແງ່ຫວັງການຮ່ວມມືອັນໃຫຍ່ຫຼວງໃນຂົງເຂດເຕັກໂນໂລຢີເວົ້າລວມ ແລະ ເຕັກໂນໂລຢີຂໍ້ມູນຂ່າວສານ, ສອບແວເວົ້າສະເພາະປະກົດຜົນເປັນຈິງ.”
ສ່ວນທ່ານ Parvathaneni Harish, ເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສ ອິນເດຍປະຈຳ ຫວຽດນາມ ຖືວ່າ ເລື່ອງຍົກການພົວພັນ 2 ປະເທດຈາກລະດັບຄູ່ຮ່ວມມືຍຸດທະສາດ ຂຶ້ນລະດັບຄູ່ຮ່ວມມືຍຸດທະສາດຮອບດ້ານ ແມ່ນການສະແດງໃຫ້ເຫັນຄວາມໄວ້ເນື້ອເຊື່ອໃຈ, ຄວາມເຊື່ອໝັ້ນ ແລະ ຄວາມສຳຄັນຂອງການພົວພັນຮ່ວມມືລະຫວ່າງ 2 ປະເທດ. ຕາມທ່ານເອກອັກຄະລັດຖະທູດແລ້ວ, ໄລຍະຈະມາເຖິງ, 2 ປະເທດຕ້ອງເພີ່ມທະວີການພົວພັນແລກປ່ຽນປະຊາຊົນເພື່ອແນໃສ່ຊຸກຍູ້ຂົງເຂດທ່ອງທ່ຽວ ແລະ ແລກປ່ຽນວັດທະນະທຳໃຫ້ດີກ່ວາອີກ.