(vovworld)-ບົນເສັ້ນທາງແຕ່ເໜືອຮອດໃຕ້, ເມື່ອໄປຜ່ານແຂວງ ເທື່ອທຽນເຫວ໋, ເຊິ່ງແມ່ນທ້ອງຖີ່ນທີ່ມີປູສະນີຍະສະຖານປະຫວັດສາດ, ທັດສະນີຍະພາບທີ່ສວຍງາມອັນດັບໜຶ່ງຢູ່ຫວຽດນາມ ຫຼາຍແຫ່ງ, ມີສະຖານທີ່ແຫ່ງໜຶ່ງເຊິ່ງນັກທ່ອງທ່ຽວຜູ້ໃດກໍ່ຢາກແວ່ຢາມ, ນັ້ນແມ່ນປ່າສະຫງວນແຫ່ງຊາດ ແບກມ້າ. ບໍ່ພຽງແຕ່ແມ່ນທັດສະນີຍະພາບທີ່ສວຍງາມເທົ່ານັ້ນ, ປ່າສະຫງວນແຫ່ງຊາດແບກມ້າ ຍັງແມ່ນມໍລະດົກທຳມະຊາດທີ່ຄວນໄດ້ຮັບການອະນຸລັກຮັກສາໄວ້ອີກດ້ວຍ.
ຕາດນ້ຳ Do Quyen ໃນປ່າສະຫງວນ Bach Ma
(ພາບ: google.com.vn)
ພູແບກມ້າ ແມ່ນສາຍພູທີ່ສວຍງາມຕັ້ງຢູ່ລະຫວ່າງແຂວງເທື່ອທຽນເຫວ໋ ແລະ ນະຄອນດ່ານັ້ງ ຢູ່ພາກກາງຫວຽດນາມ. ແບກມ້າ ແມ່ນພາກສ່ວນໜຶ່ງຂອງສາຍພູຫຼວງ. ຈອມພູແບກມ້າ ສູງ 1.450 ແມັດ ເມື່ອທຽບໃສ່ໜ້ານ້ຳທະເລ, ເມກເຝື້ອຂາວກະຈະປົກຄຸມຕະຫຼອດປີ. ຫຼຽວມອງໄປແຕ່ໄກໆເຫັນວ່າ, ແບກມ້າປຽບເໝືອນມ້າໂຕໜຶ່ງທີ່ພວມຄູກສະເດັນອວດອົ່ງທາມກາງນ່ານຟ້າ. ຍ້ອນເຫດນັ້ນ, ເຂົາເຈົ້າຈຶ່ງຕັ້ງຊື່ໃຫ້ພູແຫ່ງນີ້ວ່າ ”ແບກມ້າ” (ມ້າຂາວ). ຈອມພູແບກມ້າ ຫ່າງຈາກທະເລປະມານ 10 ກມ ເທົ່ານັ້ນ, ດັ່ງນັ້ນອຸນຫະພູມສະເລ່ຍໃນແຕ່ລະປີປະມານແຕ່ 18 - 23 ອົງສາ. ຈອມພູແບກມ້າໃຫຍ່ໂຕມະໂຫຖານ, ຂຽວອຸ່ມທູ່ມທັງສີ່ລະດູ, ທັງມີນ້ຳຕົກຕາດ, ຫ້ວຍນ້ຳທີ່ໃສເຢັນ, ດັ່ງນັ້ນນັບແຕ່ດົນນານມາແລ້ວ, ແບກມ້າ ໄດ້ກາຍເປັນບ່ອນພັກຜ່ອນຢ່ອນອາລົມດີທີ່ສຸດ, ປ່າສະຫງວນແຫ່ງຊາດແບກມ້າ ພຽງແຕ່ຫ່າງຈາກນະຄອນເຫວ໋ ໄປທາງທິດໃຕ້ເກືອບ 50 ກມ ເທົ່ານັ້ນ, ທາງຄົມມະນາຄົມໄປມາສະດວກສະບາຍພໍສົມຄວນ, ດັ່ງນັ້ນນີ້ກໍ່ແມ່ນສະຖານທີ່ເພື່ອໃຫ້ນັກທ່ອງທ່ຽວມາຢາມ ເມື່ອເຂົາເຈົ້າມາຢ້ຽມຢາມກຸງເກົ່າເຫວ໋ - ນະຄອນ Festival ວັດທະນະທຳທີ່ມີຊື່ສຽງຂອງຫວຽດນາມ. ມາຢ້ຽມຢາມປ່າແບກມ້າ, ນັກທ່ອງທ່ຽວຈະໄດ້ສຳພັດກັບທຳມະຊາດທີ່ຮົກເຮື້ອວ່າງເປົ່າ, ແລະ ໄດ້ເຈືອຈານໃນທັດສະນີຍະພາບທີ່ສວຍງາມຂອງພູຜາປ່າໄມ້ ແລະ ຫ້ວຍນ້ຳລຳເຊຢູ່ແຫ່ງນີ້. ເອື້ອຍ Thu Thuy, ນັກທ່ອງທ່ຽວທີ່ມາຈາກຮ່າໂນ້ຍ, ເວົ້າວ່າ:
”ປ່າສະຫງວນແບກມ້າ ງາມຫຼາຍ, ທຸກສິ່ງທຸກຢ່າງຍັງຄົງຮົກເຮື້ອວ່າງເປົ່າ, ອາກາດປອດໂປ່ງ. ຢູ່ເຫວ໋ ອາກາດຮ້ອນເອົ້າ, ແຕ່ມາຮອດແຫ່ງນີ້, ອາກາດພັດເຢັນສະບາຍ. ນີ້ແມ່ນສະຖານທີ່ທ່ອງທ່ຽວດີທີ່ສຸດ.”
ປ່າດົງດິບ Bach Ma
(ພາບ: google.com.vn)
ມາຮອດປະຈຸບັນ, ບັນດານັກວິທະຍາສາດໄດ້ຮັບຮູ້ວ່າຢູ່ປ່າສະຫງວນແບກມ້າ ມີສັດເກືອບ 1.500 ປະເພດ, ໃນນັ້ນນົກມີ 360 ປະເພດ, ສັດເລືອຄານ 30 ປະເພດ... ສັດທີ່ຖືກນຳເຂົ້າປື້ມປົກແດງຂອງຫວຽດນາມ ມີ 68 ປະເພດ, ຕົວຢ່າງຄືໄກ່ຟ້າຫ່ອນສີຂາວ. ໄປລຽບຕາມເສັ້ນທາງຄົດລ້ຽວໃນປ່າ, ທ່ານຈະໄປຜ່ານສະຖານທີ່, ທັດສະນີຍະພາບທີ່ມີຊື່ສຽງຕ່າງໆຂອງປ່າຄື: ທາງ ປ່າ ຈີ້ຊາວ, ຕາດນ້ຳຕົກ ໂດກວຽນ, ງູ້ໂຫ ຫຼືທາງໄປ ຫາຍວ້ອງດ່າຍ ຢູ່ເທິງຈອມພູແບກມ້າ…, ນັກທ່ອງທ່ຽວບໍ່ພຽງແຕ່ໄດ້ຮັບຟັງການແນະນຳກ່ຽວກັບຄວາມງາມ, ຄວາມຮັ່ງມີຂອງປ່າເທົ່ານັ້ນ, ຫາກຍັງໄດ້ຮັບສານກ່ຽວກັບການປົກປັກຮັກສາປ່າ, ສິ່ງແວດລ້ອມຊີວະພາບຢູ່ປ່າສະຫງວນແຫ່ງຊາດແບກມ້າ ອີກດ້ວຍ. ອ້າຍ Truong Cam , ພະນັກງານຄຸ້ມຄອງປ່າໄດ້ແນະນຳກ່ຽວກັບຈຸດພິເສດສະເພາະຂອງປ່າສະຫງວນແບກມ້າ ວ່າ:
”ໄມ້ຢູ່ໃນປ່າສ່ວນຫຼາຍແມ່ນໄມ້ແກ່, ແຕ່ມີຫຼາຍຕົ້ນຍັງນ້ອຍຢູ່, ຍ້ອນມີຫຼາຍປັດໃຈກະທົບໃສ່ຕົ້ນໄມ້, ທີໜຶ່ງແມ່ນຍ້ອນບັນຫາທາດດິນ, ທີສອງແມ່ນປະລິມານນ້ຳຝົນ, ທີສາມແມ່ນແຮງລົມ. ສ່ວນສັດຢູ່ທີ່ນີ້, ເຄີຍພົບເຫັນໝູປ່າ, ບາງເທື່ອກໍ່ພົບເຫັນກວາງ,ໂຕໝີ (ໝີມ້າ, ໝີໝາ)…ພິເສດມີຕົ້ນໄມ້ປະເພດໜຶ່ງ, ໃນຕົ້ນດຽວມີໃບໄມ້ເຖິງ 2 ຊະນິດເຊິ່ງນັກທ່ອງທ່ຽວມັກເອີ້ນວ່າຕົ້ນໄມ້ hiji..”
ຈອມພູ Bach Ma
(ພາບ: google.com.vn)
ທ່ອງທ່ຽວໃນປ່າ, ບາງເທື່ອທ່ານຈະເຫັນໜອງນ້ຳນ້ອຍໆ, ແລະແລະ ບັນດາຫ້ວຍນ້ຳທີ່ສ່ອງໃສ. ນັກທ່ອງທ່ຽວອາດຈະພັກຜ່ອນຢູ່ແຄມຫ້ວຍ ຫຼືພັກຜ່ອນຢູ່ເຮືອນພັກຜ່ອນບຳລຸງສຸຂະພາບຢູ່ຕີນພູ ຫຼືຈອມພູ ເພື່ອສືບຕໍ່ລາຍການທ່ອງທ່ຽວເຮືອນສວນ, ໄປຢ້ຽມຢາມສວນດອກໄມ້ອັນລ້ຳຄ່າຫາຍາກ. ສິ່ງພິເສດນັ້ນແມ່ນ, ຢູ່ປ່າສະຫງວນແຫ່ງຊາດແບກມ້າ, ພື້ນຖານໂຄງລ່າງ, ການບໍລິການ, ພາຫະນະອຸປະກອນໄປມາທັງໝົດໃນປ່າລ້ວນແຕ່ຮັບປະກັນສິ່ງແວດລ້ອມຊີວະພາບສູງສຸດ. ທ່ານ Huynh Van Keo, ຜູ້ອຳນວຍການປ່າສະຫງວນແຫ່ງຊາດແບກມ້າ, ໃຫ້ຮູ້ວ່າ:
”ສຳຫຼັບການພັດທະນາການທ່ອງທ່ຽວແບກມ້າ, ນີ້ແມ່ນຮູບການທ່ອງທ່ຽວພິເສດ, ນັ້ນແມ່ນທ່ອງທ່ຽວຊີວະພາບ, ດັ່ງນັ້ນຕ້ອງເນັ້ນໜັກເຖິງວຽກງານອະນຸລັກຮັກສາເປັນຕົ້ນ. ສຳຫຼັບແບກມ້າ, ນອກຈາກບັນຫາລົງທຶນເພື່ອຮັບໃຊ້ວຽກງານຄຸ້ມຄອງ, ອະນຸລັກຮັກສາຊີວະນາໆພັນແລ້ວ, ແມ່ນຕ້ອງດຳເນີນການລົງທຶນໃຫ້ແກ່ການທ່ອງທ່ຽວຊີວະພາບອີກ… ດັ່ງນັ້ນ, ໃນອະນາຄົດ, ແຂວງເທື່ອທຽນເຫວ໋ ແລະ ກະຊວງກະສີກຳ ແລະ ພັດທະນາຊົນນະບົດຫວຽດນາມ ຈະສົ່ງເສີມບັນດານັກລົງທຶນເຂົ້າຮ່ວມການພັດທະນາຕາມທິດນີ້”.
ທຳມະຊາດສວຍງາມ, ຮົກເຮື້ອວ່າງເປົ່າຂອງແບກມ້າໄດ້ເຮັດໃຫ້ຜູ້ມາຢາມຮູ້ສຶກສະບາຍໃຈ, ແລະ ມີຄວາມໃກ້ສິດສະໜິດສະໜົມກັບທຳມະຊາດ, ຕົ້ນໄມ້ໃບຫຍ້າ, ສັດສາວາສິ່ງຢູ່ທີ່ນີ້ກວ່າ…ແລະ ມີສານໜຶ່ງເຊິ່ງຜູ້ໃດກໍ່ຮັບຮູ້ໄດ້ພາຍຫຼັງການຢ້ຽມຢາມແຫ່ງນີ້, ນັ້ນແມ່ນຄວນຮ່ວມແຮງຮ່ວມໃຈປົກປັກຮັກສາທັດສະນີຍະພາບທຳມະຊາດ ເຊິ່ງດິນຟ້າໄດ້ບັນດານໃຫ້.