ຊາວບ້ານຂາຈັດງານບຸນໃນປ່າ

    ບ້ານ ຂາ ຫ່ງຈາກເທດສະບານ ອຽນເຈົາ ເມືອງ ອຽນເຈົາ ແຂວງ ເຊີນລາ ເກືອບ 10 ກິໂລແມັດ. ບ້ານມີຫຼາຍກວ່າ 90 ຄອບຄົວ ດຳລົງຊີວິດດ້ວຍຈຳນວນພົນລະເມືອງຫຼາຍກວ່າ 420 ຄົນ ເຊິ່ງເປັນຊາວເຜົ່າຜູ້ໄທ. ມານີ້ແຂກທ່ອງທ່ຽວສາມາດຮູ້ສຶກໄດ້ເຖິງບັນຍາກາດສະຫງົບສຸກຂອງບ້ານເຜົ່າຜູ້ໄທ ບູຮານ. ຢູ່ແຫ່ງນີ້ມີທິວທັດທຳມະຊາດພູຜາປ່າໄມ້ ແມ່ນ້ຳລຳເຊທີ່ເປັນໜ້າຈັບໃຈ ດ້ວຍບັນດາຕົ້ນໝາກມ່ວງ, ຕົ້ນໝາກຂາມໃຫຍ່ ມີອາຍຸຫຼາຍປີ ລຽບຕາມຫ້ວຍ ຫວາດ ທີ່ຄົດງໍ ກໍ່ແມ່ນບັນດາທົ່ງໄຮ່ທົ່ງນາຍາວຢຽດຈົນສຸດສາຍຕາ. ປັດຈຸບັນຢູ່ບ້ານຂາມີເຮືອຮ້ານເປັນປະເພນີຫຼາຍຫຼັງຂອງຊາວເຜົ່າຜູ້ໄທ ຖືກອ້ອມຮອບໄປດ້ວຍສວນຕົ້ນໝາກມ່ວງ, ຕົ້ນໝາກຂາມໃຫຍ່. ປັດຈຸບັນປະຊາຊົນໃນບ້ານຍັງເກັບຮັກສາ ແລະ ເສີມຂະຫຍາຍບັນດາຈຸດວັດທະນະທຳທີ່ເປັນເອກະລັກຂອງຊາວເຜົ່າຜູ້ໄທຄືຂັບລຳທຳເພງພື້ນເມືອງ, ການສະແດງດົນຕີພື້ນເມືອງ, ບັນດາອາຊີບຫັດຖະກຳຄື ຕ່ຳແຜ່ນແພ, ເຮັດເຄື່ອງຈັກສານຮັບໃຊ້ຊີວິດປະຈຳວັນ ພ້ອມກັບບັນດາງານບຸນຕ່າງໆ. ລຸງ ກວ່າງວັນແຟັງ ອາຍຸ 80ປີ ຢູ່ບ້ານ ຂາໃຫ້ຮູ້ວ່າ:

   “ແຕ່ລະປີ ພວກຂ້າພະເຈົ້າກໍ່ໄດ້ທຳພິທີໄຫວ້ບູຊາເທື່ອໜຶ່ງ. ໄຫວ້ບູຊາເພື່ອໃຫ້ຊາວບ້ານມີສຸຂະພາບແຂງແຮງ, ການທຳມາຫາກິນໄດ້ຮັບຜົນດີ, ລະດູການຜະລິດໄດ້ຮັບຜົນດີ, ງົວຄວາຍແຂງແຮງບໍ່ເກີດໂລກລະບາດ.”

 ດ້ວຍບັນດາຄວາມສາມາດບົ່ມຊ້ອນທ່າໄດ້ປຽບທີ່ມີຢູ່ແລ້ວ ເພື່ອພັດທະນາຊຸມຊົນ, ບ້ານ ຂາ ໄດ້ຮັບການລົງທຶນກໍ່ສ້າງບັນດາກິດຈະກຳຄື ປະຕູໂຂງຂອງບ້ານ, ສະຖານທີ່ຈອດລົດ, ສະຖານທີ່ຕ້ອນຮັບແຂກຢູ່ຕາມບ່ອນຈອດລົດ ແລະ ລະບົບລົດໄຟຟ້າສົ່ງແຂກທ່ອງທ່ຽວໄປທ່ຽວຊົມຈຸດຕ່າງໆໃນບ້ານ. ປັດຈຸບັນມີຫຼາຍຄອບຄົວຢູ່ບ້ານຂາ ໄດ້ເຂົ້າຮ່ວມຊຸດອົບຮົມ ລະດັບຄວາມຮູ້ເຮັດທ່ອງທ່ຽວຊຸມຊົນ. ທາງບ້ານກໍ່ໄດ້ເລືອກເອົາບັນດາຄອບຄົວທີ່ມີຄວາມສາມາດບົ່ມຊ້ອນ ເພື່ອເຮັດໂຮມສະເຕ, ພັດຕະຄານດ້ວຍບັນດາເຍື່ອງອາຫານທ້ອງຖິ່ນ, ຕ່ຳແຜ່ນແພ, ຫຍິບປັກທັກແສ່ວ ເຮັດເຄື່ອງຈັກສານເພື່ອຮັບໃຊ້ແຂກທ່ອງທ່ຽວ. ບ້ານ ຂາ ຍັງສ້າງຕັ້ງກອງສິລະປະພື້ນເມືອງສອງກອງ ແລະ ໄດ້ຝຶກແອບຢ່າງເປັນປະຈຳ ເພື່ອຮັບໃຊ້ແຂກທ່ອງທ່ຽວ. ນາງ ວູ້ທິແທັງ ຢູ່ບ້ານ ຂາ ແບ່ງປັນວ່າ:

    “ຄອບຄົວຂ້າພະເຈົ້າໄດ້ຈົດທະບຽນເຂົ້າຮ່ວມເຮັດທ່ອງທ່ຽວ. ຄອບຄົວຂ້າພະເຈົ້າໄດ້ຊື້ຜ້າຫົ່ມ, ຜ້າປູຕຽງເພື່ອກຽມພ້ອມຕ້ອນຮັບແຂກ. ເມື່ອແຂກມາພັກເຊົາພວກຂ້າພະເຈົ້າ ກໍ່ປຸ່ງແຕ່ງເຍື່ອງອາຫານຂອງຊາວເຜົ່າຜູ້ໄທ ເພື່ອຮັບໃຊ້ແຂກທ່ອງທ່ຽວ”.

ທ່ານ ກວ່າງວັນຈ໊ຽນ ຮອງປະທານຄະນະກຳມະການປະຊາຊົນຕາແສງ ສັບຫວາດ ໃຫ້ຮູ້ວ່າ:

“ພວກຂ້າພະເຈົ້າ ພ້ອມກັບເມືອງ ແລະ ຫົວໜ່ວຍທີ່ປຶກສາເຮັດວຽກງານສຳຫຼວດວາງແຜນຜັງ ບັນດາກິດຈະກຳກໍ່ສ້າງທາງໃນບ້ານ, ສ້າງຕັ້ງສະຫະກອນທ່ອງທ່ຽວ ເພື່ອໃຫ້ພໍ່ແມ່ພີ່ນ້ອງ ພ້ອມກັນເຮັດ ແລະ ວິທີທ່ອງທ່ຽວ”.

ທ່ານ ລູ່ວັນເກື່ອງ ປະທານຄະນະກຳມະການປະຊາຊົນເມືອງ ອຽນເຈົາ ໃຫ້ຮູ້ວ່າ ເພື່ອໃຫ້ບ້ານ ຂາ ກາຍເປັນບ້ານທ່ອງທ່ຽວຊຸມຊົນ ຕິດພັນກັບການກໍ່ສ້າງຊົນນະບົນໃໝ່, ທາງເມືອງ ອຽນເຈົາພວມກໍ່ສ້າງ ແລະ ແນະນຳການນຳໃຊ້ປະມວນມາດຖານກ່ຽວກັບສະພາບແວດລ້ອມດ້ານວັດທະນະທຳຢູ່ສະຖານທີ່ທ່ອງທ່ຽວຊຸມຊົນໃນບ້ານ ຂາ. ທ່ານ ລູ່ວັນເກື່ອງ ໃຫ້ຮູ້ວ່າ:

   “ປັດຈຸບັນ ພວກຂ້າພະເຈົ້າໄດ້ສ້າງແຜນການນຳບັນດາຄອບຄົວໄປຢ້ຽມຊົມ ທັດສະນະສຶກສາຮຽນຮູ້ຢູ່ຕາມເຂດທ່ອງທ່ຽວທີ່ມີຈຸດຄ້າຍຄືກັນ ດ້ວຍເງື່ອນໄຂຕົວຈິງຢູ່ບ້ານ ຂາ”.