(vovworld) - ໃນຊຸມມື້ທ້າຍເດືອນ 4/2012 ຢູ່ ຮ່າໂນ້ຍ, ທະນາຄານລົງທຶນ ແລະ ພັດທະນາ ຫວຽດນາມ (BIDV) ໄດ້ຈັດຕັ້ງພິທີລະນຶກ 55 ປີແຫ່ງວັນສ້າງຕັ້ງ ແລະ ຮັບຫລຽນໄຊເອກະລາດຊັ້ນຫນຶ່ງ ຄັ້ງທີສອງ ຂອງລັດ ສສ ຫວຽດນາມ, ຫລຽນໄຊອິດສະຫລະຂອງລັດ ສປປ ລາວ ແລະ ຫລຽນໄຊລາຊະວົງ ອັນສູງສົ່ງຂອງລາຊະອານາຈັກ ກຳປູເຈຍ. ນີ້ແມ່ນລາງວັນອັນສູງສົ່ງ, ຮັບຮູ້ການປະກອບສ່ວນຂອງ BIDV ໃຫ້ແກ່ການພັດທະນາເສດຖະກິດຂອງທັງ ຫວຽດນາມ, ລາວ ແລະ ກຳປູເຈຍ.
ທ່ານຮອງນາຍົກລັດຖະມົນຕີ ສປປ ລາວ ສົມສະຫວາດເລັ່ງສະຫວັດ ມອບຫລຽນໄຊໃຫ້ແກ່ ທ່ານ Tran Bac Ha ປະທານສະພາບໍລິຫານ BIDV
ພາບ: chinhphu.vn
|
ໃນໄລຍະທາງ 55 ປີແຫ່ງການສ້າງຕັ້ງ ແລະ ເຕີບໃຫຍ່ (26/4/1957 - 26/4/2012), BIDV ຍາມໃດກໍມານະພະຍາຍາມຜ່ານຜ່າທຸກຄວາມຫຍຸ້ງຍາກ, ສິ່ງທ້າທາຍເພື່ອເຮັດຫລ້ອນຫນ້າທີ່ ຊຶ່ງພັກ ແລະ ລັດໄດ້ມອບໝາຍໃຫ້, ຍາມໃດກໍນຳຫນ້າປະຕິບັດບັນດານະໂຍບາຍການເງິນເງິນຕາ ແລະ ປະຕິບັດວຽກງານຮັບປະກັນຊີວິດສັງຄົມ, ປະກອບສ່ວນເຂົ້າໃນການພັດທະນາຂອງປະເທດຊາດ. ໃນຊຸມປີມໍ່ໆມານີ້, BIDV ໄດ້ພ້ອມກັບບັນດາວິສາຫະກິດ ຫວຽດນາມ ຕັ້ງຫນ້າເປີດກວ້າງ ແລະ ເຂົ້າຮ່ວມບັນດາການເຄື່ອນໄຫວລົງທຶນດຳເນີນທຸລະກິດຢູ່ບັນດາຕະຫລາດຕ່າງປະເທດຄື: ບັນດາປະເທດ ອາຊຽນ, ລັດເຊຍ, ເຊັກ... ປະກອບສ່ວນພັດທະນາການພົວພັນຮ່ວມມືມິດຕະພາບລະຫວ່າງ ຫວຽດນາມ ແລະ ບັນດາປະເທດໃນໂລກ. ໃນພິທີຮັບນາມມະຍົດອັນສູງສົ່ງຂອງພັກ, ລັດ ຫວຽດນາມ, ຂອງລັດ ສປປ ລາວ ແລະ ລາຊະອານາຈັກກຳປູເຈຍ ມອບໃຫ້, ທ່ານ Tran Bac Ha, ປະທານສະພາບໍລິຫານທະນາຄານ BIDV ໃຫ້ຮູ້ວ່າ:
“ໃນໂອກາດລະນຶກ 55 ປີ ແຫ່ງວັນມູນເຊື້ອ, BIDV ມີຄວາມເປັນກຽດ ແລະ ເອກອ້າງທະນົງໃຈທີ່ໄດ້ຮັບນາມມະຍົດອັນສູງສົ່ງຂອງພັກ, ລັດ, ລັດຖະບານ ຫວຽດນາມ, ຂອງລັດແຫ່ງ ສປປ ລາວ ແລະ ລັດກຳປູເຈຍມອບໃຫ້. ນັ້ນບໍ່ພຽງແຕ່ແມ່ນການຮັບຮູ້, ຍ້ອງຍໍສັນລະເສີນເທົ່ານັ້ນ ຫາກຍັງແມ່ນການລະດົມກຳລັງໃຈເພື່ອໃຫ້ BIDV ບືນຕົວຂຶ້ນ ອຸທິດສ່ວນໃຫ້ແກ່ການພັດທະນາຂອງຫວຽດນາມ ແລະ ບັນດາປະເທດພາຍໃນພາກພື້ນອີກດ້ວຍ.”
ດ້ວຍທີ່ຕັ້ງບົດບາດ ອິດທິພົນຊື່ສຽງໃນການພົວພັນຮ່ວມມືສາກົນ, ພິເສດ ດ້ວຍບົດບາດແມ່ນປະທານສະຫະສະມາຄົມບັນດານັກລົງທຶນ ຫວຽດນາມ ໄປຍັງ ລາວ (AVIL) ກຳປູເຈຍ (AVIC) ແລະ ມ້ຽນມາ (AVIM), BIDV ໄດ້ພ້ອມກັບບັນດານັກລົງທຶນ ຫວຽດນາມ ຍູ້ແຮງການເຄື່ອນໄຫວສົ່ງເສີມການລົງທຶນຂອງ ຫວຽດນາມ ອອກສູ່ຕ່າງປະເທດ, ປະກອບສ່ວນນຳການລົງທຶນ FDI ຂອງຫວຽດນາມ ຢືນອັນດັບ 2 ຢູ່ ລາວ, ຢືນອັນດັບ 3 ຢູ່ ກຳປູເຈຍ. ທ່ານນາງ Men Som On ຮອງນາຍົກລັດຖະມົນຕີ ຜູ້ປະຈຳການລາຊະອານາຈັກກຳປູເຈຍ ໃຫ້ຮູ້ວ່າ: ແຕ່ປີ 2009 BIDV ໄດ້ມີຫນ້າຢູ່ກຳປູເຈຍ ແລະ ບັນດາສາຂາຂອງທະນາຄານຂອງ BIDV ຢູ່ ກຳປູເຈຍ ເຄື່ອນໄຫວຢ່າງມີປະສິດທິຜົນ. ທ່ານນາງ Men Som On ເວົ້າວ່າ:
“ ການມີຫນ້າຂອງ BIDV ຢູ່ ກຳປູເຈຍ ແມ່ນມີຄວາມໝາຍສຳຄັນທີ່ສຸດໃນການພັດທະນາພື້ນຖານເສດຖະກິດ ກຳປູເຈຍ ແລະ ຢັ້ງຢືນອິດທິພົນຊຶ່ສຽງຂອງບັນດານັກລົງທຶນຕ່າງປະເທດ, ພິເສດແມ່ນບັນດານັກລົງທຶນ ຫວຽດນາມ ຢູ່ ກຳປູເຈຍ. BIDV ໄດ້ປະກອບສ່ວນເຂົ້າໃນການຊຸກຍູ້ການພັດທະນາຂອງຕະຫລາດການເງິນ, ທະນາຄານ ແລະ ຍົກສູງຊີວິດການເປັນຢູ່ຂອງປະຊາຊົນກຳປູເຈຍ.”
ທ່ານນາງຮອງນາຍົກລັດຖະມົນຕີ ກຳປູເຈຍ
Men Som On ປະດັບຫລຽນໄຊໃຫ້ແກ່ BIDV
ພາບ: chinhphu.vn
|
ໃນຊຸມປີຜ່ານມາ, BIDV ຍາດໄດ້ບັນດາຜົນງານດີເດັ່ນ, ປະກອບສ່ວນຢ່າງຕັ້ງຫນ້າເຂົ້າໃນການພັດທະນາເສດຖະກິດ ສັງຄົມຢູ່ ສປປ ລາວ, ປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຫວຽດນາມ ແລະ ລາວ. ລັດຖະບານລາວ ໄດ້ຕົກລົງມອບຫລຽນໄຊອິດສະຫລະຊັ້ນສອງໃຫ້ແກ່ BIDV ແລະ ໃຫ້ແກ່ທ່ານ Tran Bac Ha ປະທານສະພາບໍລິຫານທະນາຄານ BIDV, ຫລຽນໄຊອິດສະຫລະຊັ້ນສາມໃຫ້ແກ່ໝູ່ຄະນະ, ຫລຽນໄຊແຮງງານຊັ້ນຫນຶ່ງ ແລະ ຊັ້ນສອງໃຫ້ແກ່ 5 ບຸກຄົນ . ທ່ານ Nguyen Van Binh ຜູ້ວ່າການທະນາຄານແຫ່ງລັດ ຫວຽດນາມ ໃຫ້ຮູ້ວ່າ:
“ ສປປ ລາວ ແລະ ລາຊະອານາຈັກກຳປູເຈຍ ໄດ້ໃຫ້ການສະຫນັບສະຫນູນ, ການຊ່ວຍເຫລືອອັນໃຫຍ່ຫລວງ ແລະ ບັນດາອາລົມຈິດອັນລ້ຳຄ່າໃຫ້ແກ່ ຫວຽດນາມ ເວົ້າລວມ ແລະ BIDV ເວົ້າສະເພາະ ເພື່ອໃຫ້ BIDV ຍາດໄດ້ບັນດາຜົນງານຄືວັນນີ້. ພ້ອມທັງປາດຖະຫນາວ່າ ໃນໄລຍະຈະມາເຖິງ, BIDV ຈະເຄື່ອນໄຫວຢ່າງມີປະສິດທິຜົນກວ່າ, ປະກອບສ່ວນເຂົ້າໃນການພັດທະນາເສດຖະກິດຂອງ ລາວ, ກຳປູເຈຍ, ມ້ຽນມາ ກໍຄືບັນດາປະເທດ ອາຊຽນ.”
ການເຊື່ອມໂຍງເຂົ້າກັບໂລກໄດ້ຊ່ວຍໃຫ້ວິສາຫະກິດ ຫວຽດນາມເວົ້າລວມ, BIDV ເວົ້າສະເພາະມີກາລະໂອກາດອອກສູ່ຕ່າງປະເທດ, ແຊກຊືມເຂົ້າບັນດາຕະຫລາດທີ່ມີຄວາມສາມາດບົ່ມຊ້ອນຢ່າງເລິກເຊິ່ງ ແລະ ກວ້າງຂວາງ, ພິເສດ ແມ່ນບັນດາປະເທດພາຍໃນພາກພື້ນອາຊຽນ, ເຊື່ອມຕໍ່ກັບບັນດາຕະຫລາດພາຍໃນປະເທດເພື່ອຍົກສູງກຳລັງແກ້ງແຍ້ງ, ຮ່ວມມືພ້ອມກັບບັນດາປະເທດເພື່ອພັດທະນາ. ໃນຕະຫລອດ 55 ປີຜ່ານມາ, ພິເສດໃນຊຸມປີມໍ່ໆມານີ້ BIDV ໄດ້ຜັນຂະຫຍາຍບັນດາການເຄື່ອນໄຫວລົງທຶນຢູ່ຕ່າງປະເທດຢ່າງມີປະສິດທິຜົນ, ເປັນຕົ້ນຢູ່ພາກພື້ນ ອາຊຽນ, ສະແດງໃຫ້ເຫັນບົດບາດເປີດຊ່ອງທາງ, ຮ່ວມສຳພັນລະຫວ່າງບັນດາວິສາຫະກິດ ຫວຽດນາມ ລົງທຶນເຂົ້າຕະຫລາດໃຫມ່, ປະກອບສ່ວນເສີມຂະຫຍາຍການພົວພັນຮ່ວມມືຮອບດ້ານກັບພາກພື້ນ ແລະ ສາກົນ.
My Binh