ປະທານໄກສອນ ພົມວິຫານ ແລະ ປະທານ ໂຮ່ຈິມີນ
(vovworld)- ພະນະທ່ານປະທານໄກສອນ ພົມວິຫານ ແມ່ນສະຫາຍ, ເພື່ອນມິດທີ່ສະຫນິດສະໜົມຂອງປະຊາຊົນຫວຽດນາມ, ຜູ້ທີ່ມີຄຸນງາມຄວາມດີອັນໃຫຍ່ຫລວງໃນການສ້າງພື້ນຖານແຫ່ງການສ້າງສາ ແລະ ພັດທະນາສາຍພົວພັນມິດຕະພາບອັນຍິ່ງໃຫຍ່, ບໍລິສຸດຜຸດຜ່ອງ ລະຫວ່າງສອງປະເທດ ຫວຽດນາມ ແລະ ລາວ. ເພື່ອອາໄລຫາ ແລະ ສະແດງຄວາມຮູ້ບຸນຄຸນຕໍ່ປະທານໄກສອນ ພົມວິຫານ, ພະແນກວັດທະນະທຳ ກິລາ ແລະ ທ່ອງທ່ຽວແຂວງ ເຫງ້ອານ ໄດ້ສົມທົບກັບຄະນະຄຸ້ມຄອງຫໍພິພິດທະພັນໄກສອນ ພົມວິຫານ ສປປ ລາວ ຜັນຂະຫຍາຍແຜນຮ່າງກໍ່ສ້າງຫ້ອງວາງສະແດງກ່ຽວກັບປະທານໄກສອນ ພົມວິຫານ ຢູ່ ຫໍພິພິດທະພັນ ໂຊວຽດ ເຫງ້ຕີ້ນ ຂອງຫວຽດນາມ.
ແຜນຮ່າງກໍ່ສ້າງຫ້ອງວາງສະແດງກ່ຽວກັບປະທານ ໄກສອນ ພົມວິຫານ ແມ່ນຫນຶ່ງໃນບັນດາການເຄື່ອນໄຫວຂ່ຳນັບຮັບຕ້ອນປີແຫ່ງມິດຕະພາບ ຫວຽດນາມ ລາວ 2012 ແລະ ສະເຫລີມສະຫລອງບັນດາວັນບຸນໃຫຍ່ຂອງສອງປະເທດ, ເພື່ອປະກອບສ່ວນສຶກສາອົບຮົມລຸ້ນຫນຸ່ມສອງປະເທດ ກ່ຽວກັບສາຍພົວພັນສາມັກຄີມິດຕະພາບແບບພິເສດ, ບໍລິສຸດຜຸດຜ່ອງຂອງສອງພັກ ແລະ ປະຊາຊົນສອງປະເທດ ແລະ ເພື່ອໃຫ້ປະຊາຊົນສອງປະເທດນັບມື້ນັບມີຄວາມເຂົ້າອົກເຂົ້າໃຈກວ່າກ່ຽວກັບແບບຢ່າງອັນຍິ່ງໃຫຍ່ ແລະ ລຽບງ່າຍຂອງຜູ້ນຳລາວ.
ບົນພື້ນຖານນັ້ນ, ໃນການຢ້ຽມຢາມ ແລະ ເຮັດວຽກຢູ່ນະຄອນຫລວງ ວຽງຈັນ, ຄະນະປະຕິບັດງານຂອງພະແນກວັດທະນະທຳ ກິລາ ແລະ ທ່ອງທ່ຽວ ແຂວງເຫງ້ອານ ແລະ ຄະນະຄຸ້ມຄອງຫໍພິພິດທະພັນ ປະທານໄກສອນ ພົມວິຫານ ໄດ້ເປັນເອກະພາບບັນດາເນື້ອໃນ ແລະ ວິທີການເພື່ອຍື່ນສະເຫນີຕໍ່ການນຳສອງປະເທດ ຫວຽດນາມ ແລະ ລາວ ກໍ່ສ້າງຫ້ອງວາງສະແດງກ່ຽວກັບຊີວິດ ແລະ ພາລະກິດການ ຂອງພະນະທ່ານປະທານໄກສອນ ພົມວິຫານ ທີ່ມີຕໍ່ພາລະກິດການປະຕິວັດ ແລະ ມູນເຊື້ອແຫ່ງການຕໍ່ສູ້ ສ້າງສາ ແລະ ປົກປັກຮັກສາປະເທດ ສປປ ລາວ ຢູ່ ຫໍພິພິດທະພັນ ໂຊວຽດ ເຫງ້ຕີ້ນ ຂອງຫວຽດນາມ.
ທ່ານ ສຸວັນດີ ສີສະຫວາດ ຮອງຫົວຫນ້າຫ້ອງວ່າການສູນກາງພັກ ປະຊາຊົນ ປະຕິວັດລາວ, ຫົວຫນ້າຄະນະຄຸ້ມຄອງຫໍພິພິດທະພັນ ໄກສອນ ພົມວິຫານ ຈະສະຫນອງວັດຖະພັນ ແລະ ເອກະສານ 50 ຊິ້ນ ທີ່ກ່ຽວຂ້ອງເຖິງປະທານໄກສອນ ພົມວິຫານ ໃຫ້ແກ່ ຫໍພິພິດທະພັນ ໂຊວຽດ ເຫງ້ຕີ້ນ.
“ການເຄື່ອນໄຫວຈະປະກອບສ່ວນເສີມສ້າງນ້ຳໃຈມິດຕະພາບທີ່ເປັນມູນເຊື້ອ ຄວາມສາມັກຄີແບບພິເສດ ແລະ ການຮ່ວມມືທີ່ດີງາມລະຫວ່າງສອງປະເທດ ລາວ ແລະ ຫວຽດນາມ ໃຫ້ແຕກດອກອອກຜົນ ຈົບງາມຍິ່ງໆຂຶ້ນ.”
ຕາມທ່ານ ຫງວຽນກົງຍ່ວນ ຮອງຫົວຫນ້າພະແນກວັດທະນະທຳ ກິລາ ແລະ ທ່ອງທ່ຽວ ແຂວງ ເຫງ້ອານ ແລ້ວ, ພະນະທ່ານປະທານໄກສອນ ພົມວິຫານ ເປັນເພື່ອນ ສະຫນິດສະຫນົມ, ຜູກພັນ, ບໍລິສຸດຜຸດຜ່ອງ, ເປັນສະຫາຍທີ່ໄວ້ເນື້ອເຊື່ອໃຈຂອງປະທານ ໂຮ່ຈິມີນ, ຂອງພັກ ແລະ ປະຊາຊົນຫວຽດນາມ, ສິ່ງດັ່ງກ່າວຈຳເປັນຕ້ອງກໍ່ສ້າງຫ້ອງວາງສະແດງກ່ຽວກັບປະທານ ໄກສອນ ພົມວິຫານ ຢູ່ ຫໍພິພິດທະພັນໂຊວຽດ ເຫງ້ຕີ້ນ ເພື່ອໃຫ້ປະຊາຊົນຫວຽດນາມ ມີເງື່ອນໄຂຊອກຮູ້ ແລະ ຄົ້ນຄ້ວາກ່ຽວກັບເພີ່ນ, ເພື່ອໃຫ້ ປຊຊ ທຸກຊັ້ນວັນນະນັບມື້ນັບຮັກແພງ ສະຫນິດຕິດພັນກັບປະເທດລາວ ອ້າຍນ້ອງກວ່າອີກ.
“ເລື່ອງກໍ່ສ້າງຫອ້ງວາງສະແດງກ່ຽວກັບປະທານ ໄກສອນ ພົມວິຫານ ຢູ່ ແຂວງເຫງ້ອານ ແມ່ນວຽກງານທີ່ຈຳເປັນ. ນີ້ແມ່ນການສະແດງໃຫ້ເຫັນເຖິງຄວາມມຸ້ງຫວັງຂອງປະຊາຊົນແຂວງ ເຫງ້ອານ ເວົ້າສະເພາະ ແລະ ປະເທດຫວຽດນາມ ເວົ້າລວມ ທີ່ມີຕໍ່ປະເທດລາວ ເວົ້າລວມ ແລະ ປະທານໄກສອນ ພົມວິຫານເວົ້າສະເພາະ, ແມ່ນການສະແດງຄວາມຮູ້ບຸນຄຸນ, ແມ່ນອາລົມຈິດຖານອ້າຍນ້ອງ, ເພື່ອນມິດ, ຍົກສູງບົດບາດທີ່ຕັ້ງຂອງ ປະທານໄກສອນພົມວິຫານ ໃນການປະກອບສ່ວນຂອງການປະຕິວັດປະຊາຊົນລາວ ເຂົ້າໃນການປະຕິວັດໂລກ, ໃນນັ້ນມີຫວຽດນາມ. ພ້ອມກັນນັ້ນ ເພື່ອໃຫ້ລຸ້ນຄົນຕ່າງໆຂອງສອງປະເທດ ຫວຽດນາມ ແລະ ລາວ ຍາມໃດກໍຈາລຶກ ບຸນຄຸນຂອງຜູ້ນຳທີ່ຍິ່ງໃຫຍ່, ນີ້ກໍແມ່ນຈຸດປະສົງ ແມ່ນທິດທາງເພື່ອຮ່ຳຮຽນ ຝຶກຝົນຫລໍ່ຫລອມໃຫ້ເປັນຢ່າງດີກວ່າ, ເພື່ອເພີ່ມທະວີຄວາມສາມັກຄີ ຫວຽດນາມ ລາວ, ລາວ ຫວຽດນາມຍິ່ງຂຶ້ນ.”
ຫໍພິພິດທະພັນ ໂຊວຽດ ເຫງ້ຕິ້ນ ແມ່ນຫໍພິພິດທະພັນນອນໃນລະບົບຫໍພິພິດທະພັນ ປະທານ ໂຮ່ຈິມີນຂອງຫວຽດນາມ. ພາຍຫລັງ ກໍ່ສ້າງຫ້ອງວາງສະແດງກ່ຽວກັບປະທານ ໄກສອນ ພົມວິຫານ ສຳເລັດ ຈະເປັນຂົວເຊື່ອມຕໍ່ທີ່ມີຊີວິດຊີວາ ປະກອບສ່ວນໂຄສະນາກ່ຽວກັບຮູບພາບຜູ້ນຳຂອງສອງປະເທດ ຫວຽດນາມ ແລະ ລາວ, ເຮັດໃຫ້ປະຊາຊົນສອງປະເທດ ນັບມື້ນັບສະຫນິດຕິດພັນນຳກັນກວ່າອີກ ແລະ ພ້ອມກັນຮ່ວມມືພັດທະນາໃນທຸກຂົງເຂດຢ່າງແຂງແຮງກວ່າ./.