ໃນ 2 – 3 ປີ ມໍ່ໆມານີ້, ລະບົບສື່ເອເລັກໂຕນິກ ຢູ່ລາວ ໄດ້ກ້າວເຂົ້າສູ່ໄລຍະພັດທະນາ ດ້ວຍປະລິມານຂໍ້ມູນຂ່າວຢ່າງຫຼວງຫຼາຍໃນແຕ່ລະວັນ. ເຖິງຢ່າງໃດກໍຕາມ, ຍ້ອນຄຸນນະພາບໄປບໍ່ທັນກັບປະລິມານ ສະນັ້ນ ໄດ້ເຮັດໃຫ້ເກີດຂໍ້ຂາດຕົກບົກພ່ອງຫຼາຍຢ່າງໃນວຽກງານໂຄສະນາເຜີຍແຜ່ ກໍຄືການຄຸ້ມຄອງໜັງສືພິມເອເລັກໂຕນິກ ຫຼື ຢູ່ບັນດາເວັບໄຊ. ເນື່ອງຈາກນັ້ນ, ການຢ້ຽມຢາມ ແລະ ເຮັດວຽກ ຢູ່ອົງການ, ສູນສື່ມວນຊົນບາງແຫ່ງ ຢູ່ຫວຽດນາມ ຄື: ໜັງສືພິມ Vietnamnet, ໜັງສືພິມ VnExpress, ໜັງສືພິມ ຍ່າບ໊າວ ແລະ ກົງລ້ວນ (ໜັງສືພິມ ນັກຂ່າວ ແລະ ຫາງສຽງມະຫາຊົນ), ໜັງສືພິມ ຢູລິກ (ທ່ອງທ່ຽວ), ໜັງສືພິມ ເຊີຍຢື້ງ (ກໍ່ສ້າງ), ກົມຮັກສາຄວາມປອດໄພຂໍ້ມູນຂ່າວສານ, ສູນມອບ-ຮັບຂໍ້ມູນເອເລັກໂຕນິກ ແລະ ໜູນຊ່ວຍສື່ມວນຊົນ… ເພື່ອແນໃສ່ແບ່ງປັນບົດຮຽນ, ໜູນຊ່ວຍ ລາວ ໃນວຽກງານຄຸ້ມຄອງ ກໍຄື ກຳນົດທິດທາງພັດທະນາສື່ເອເລັກໂຕນິກໃນອະນາຄົດ. ທ່ານ ຫງວຽນຖ໊າຍຟຽນ, ຮອງຫົວໜ້າກົມສື່ມວນຊົນ ໃຫ້ຮູ້ວ່າ:

        “ໃນຫຼາຍປີຜ່ານມາ, ກົມສື່ມວນຊົນ ໄດ້ຈັດຕັ້ງການຢ້ຽມຢາມ, ຊອກຮູ້ ແລະ ບຳລຸງສ້າງທັກສະ, ວິຊາສະເພາະໃຫ້ທາງຝ່າຍ ລາວ ຫຼາຍພໍສົມຄວນຄື: ການຂຽນບົດສາລະຄະດີ, ການນໍາສະເໜີຂ່າວກ່ຽວກັບບັນດາເຫດການສຳຄັນ, ເຫດການເກີດຂຶ້ນດ່ວນ... ແຕ່ສະເພາະຂົງເຂດສື່ເອເລັກໂຕນິກ, ຂ້າພະເຈົ້າຄິດວ່າ ແມ່ນສິ່ງທີ່ໃໝ່ ແລະ ສຳຄັນສຳລັບ ລາວ ໃນປັດຈຸບັນ. ໃນໄລຍະເວລາບໍ່ຫຼາຍ ດ້ວຍຂໍ້ມູນຂ່າວທີ່ນໍາມາປຶກສາຫາລືເປັນຈໍານວນຫຼວງຫຼາຍນັ້ນ ສອງຝ່າຍຖອດຖອນບົດຮຽນໄດ້ຫຼາຍບັນຫາ ເຊິ່ງຕົວຈິງ ກໍຄືບັນດາຫຼັກສູດການສອນບໍ່ໄດ້ເຕື້ອງເຖິງ”.

ຄະນະນັກຂ່າວລາວເຮັດວຽກກັບໜັງສືພິມ ເຊີຍຢື້ງ (ກໍ່ສ້າງ) ຫວຽດນາມ

        ເຂົ້າຮ່ວມການຢ້ຽມຢາມ, ຊອກຮູ້ກ່ຽວກັບສື່ເອເລັກໂຕນິກ ຢູ່ຫວຽດນາມ ຄັ້ງນີ້, ລວມມີ ພະນັກງານ, ນັກຂ່າວ 10 ຄົນທີ່ມາຈາກ 6 ອົງການສື່ມວນຊົນຂອງລາວຄື: ກົມສື່ມວນຊົນ; ສຳນັກຂ່າວສານ; ໂທລະພາບແຫ່ງຊາດ;  ວິທະຍຸກະຈາຍສຽງແຫ່ງຊາດ; ໜັງສືພິມ Vientiane Times; ໜັງສືພິມ Lao News Agency. ທ່ານ ສົມສະຫວາດ ພົງສາ - ຮອງຫົວໜ້າກົມສື່ມວນຊົນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ລາວ, ຫົວໜ້າຄະນະນັກຂ່າວລາວ ໃຫ້ຮູ້ວ່າ:

        ປັດຈຸບັນ, ນັບມື້ນັບປະກົດມີບັນດາແຫຼ່ງຂ່າວບໍ່ມີມູນຄວາມຈິງ ໃນສື່ສັງຄົມອອນລາຍຫຼາຍ, ອັນໄດ້ກໍ່ຄວາມສັບສົນໃຫ້ແກ່ທົ່ວໂລກເວົ້າລວມ ແລະ ຫວຽດນາມ ເວົ້າສະເພາະ. ເພາະສະນັ້ນ, ກະຊວງຖະແຫຼງຂ່າວ ແລະ ສື່ສານຫວຽດນາມ ໄດ້ສ້າງຕັ້ງສູນມອບ-ຮັບຂໍ້ມູນຂ່າວສານເອເລັກໂຕນິກ ແລະ ໜູນຊ່ວຍສື່ມວນຊົນ ດ້ວຍຈຸດປະສົງ ນຳໃຊ້ເຕັກໂນໂລຢີເພື່ອແກ້ໄຂສະພາບຂໍ້ມູນຂ່າວບໍ່ມີມູນຄວາມຈິງ, ຕິດຕາມກວດກາອິນເຕີແນັດ, ຄືດັ່ງຄຳແບ່ງປັນຂອງທ່ານລັດຖະມົນຕີ ກະຊວງຖະແຫຼງຂ່າວ ແລະ ສື່ສານຫວຽດນາມ ຫງວຽນແມ້ງຫຸ່ງທີ່ວ່າ:

        “ແຕ່ລະມື້, ອິນເຕີແນັດຂອງ ຫວຽດນາມ ມີຂ່າວປະມານ 100 ລ້ານຂ່າວ, ເຊິ່ງ ພຽງມີແຕ່ເຕັກໂນໂລຢີ ຈິ່ງຕິດຕາມກວດກາໄດ້. ບັນດາສື່ສັງຄົມອອນລາຍຕ້ອງປະຕິບັດຕາມກົດໝາຍໃນການລົບລ້າງບັນດາຂໍ້ມູນຂ່າວບໍ່ມີມູນຄວາມຈິງ, ສ້າງບັນດາເອກະສານທາງດ້ານນິຕິກຳໃຫ້ສົມບູນແບບ ແລະ ພິເສດແມ່ນໃຊ້ລະບຽບວິໄນຢ່າງເຂັ້ມງວດສຳລັບກໍລະນີລະເມີຕ່າງໆ”.

ຄະນະນັກຂ່າວລາວເຮັດວຽກກັບໜັງສືພິມ ຢູລິກ (ທ່ອງທ່ຽວ) ຫວຽດນາມ

        ໃນຂອບເຂດການຢ້ຽມຢາມ ແລະ ເຮັດວຽກ, ນັກຂ່າວລາວ ໄດ້ໄປຢ້ຽມຢາມສູນດັ່ງກ່າວ. ເຖິງວ່າ ຫາກໍໄດ້ສ້າງຕັ້ງເມື່ອປີ 2018 ແລະ ຫາກໍນຳເຂົ້າເຄື່ອນໄຫວຢ່າງເປັນທາງການໃນຕົ້ນປີ 2019 ກໍຕາມ ແຕ່ສູນມອບ-ຮັບຂໍ້ມູນຂ່າວສານ ເອເລັກໂຕນິກ ແລະ ໜູນຊ່ວຍສື່ມວນຊົນ ໄດ້ສ້າງຄວາມສົນໃຈ ແລະ ຄວາມເອົາໃຈໃສ່ເປັນຢ່າງຍິ່ງຈາກນັກຂ່າວ ລາວ, ໂດຍສະເພາະແມ່ນອຸປະກອນທີ່ທັນສະໄໝ, ເຕັກໂນໂລຢີກ້າວໜ້າໃນການແກ້ໄຂ, ຕິດຕາມກວດກາອິນເຕີແນັດ. ພາຍຫຼັງການຢ້ຽມຢາມ, ທ່ານ ສົມສະຫວາດ ພົງສາ, ຮອງຫົວໜ້າກົມສື່ມວນຊົນ ຕີລາຄາວ່າ:

        ໃນຂອບເຂດການຢ້ຽມຢາມ ແລະ ເຮັດວຽກລະຫວ່າງວັນທີ 24 – 31 ມີນາ 2019, ຄະນະນັກຂ່າວ ລາວ ໄດ້ມີການຊົມທັດສະນະສຶກສາຢູ່ບາງຈຸດທ່ອງທ່ຽວ, ທັດສະນີຍະພາບ, ມໍລະດົກຢູ່ຮ່າໂນ້ຍ ແລະ ກວາງນິງ. ໃນໄລຍະຈະມາເຖິງ, ກົມສື່ມວນຊົນ ຈະຈັດຕັ້ງບັນດາຊຸດຝຶກອົບຮົມ, ບຳລຸງສ້າງທັກສະເຮັດສື່ເອເລັກໂຕນິກ ກໍຄືວຽກງານຄຸ້ມຄອງໜັງສືພິມເອເລັກໂຕນິກໃຫ້ບັນດານັກຂ່າວລາວ, ເພື່ອຊ່ວຍບັນດານັກຂ່າວລາວ ຍົກສູງວິຊາສະເພາະໃນການເຮັດສື່ເອເລັກໂຕນິກໃຫ້ດີກວ່າອີກ, ໄປທັນກັບການປະຕິວັດອຸດສາຫະກຳ 4.0./.