ທ່ານນາຍົກລັດຖະມົນຕີສະຫະພັນ ລັດເຊຍ Mikhail Mishustin ຢ້ຽມຢາມ ຫວຽດນາມ (ແຕ່ວັນທີ 14 – 15 ມັງກອນ) ຕາມຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ (ພາບ: TTXVN)

        ການຢ້ຽມຢາມ ຫວຽດນາມ ຂອງທ່ານນາຍົກລັດຖະມົນຕີສະຫະພັນ ລັດເຊຍ Mikhail Mishustin ຕາມຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ (ແຕ່ວັນທີ 14 – 15 ມັງກອນ), ແມ່ນການເຄື່ອນໄຫວສຳຄັນໃນການພົວພັນລະຫວ່າງ 2 ປະເທດ, ກ່ອນພິທີສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ລັດເຊຍ (1950 – 2025). ການຢ້ຽມຢາມຍິ່ງມີຄວາມໝາຍກວ່າໃນສະພາບທີ່ ຫວຽດນາມ ພວມຢືນຢູ່ຕໍ່ໜ້າສັງກາດໃໝ່, ປາດຖະໜາຢາກຍູ້ແຮງການພົວພັນຮ່ວມມືກັບບັນດາຄູ່ຮ່ວມມືຍຸດທະສາດ ເພື່ອຮັບໃຊ້ໃຫ້ແກ່ເປົ້າໝາຍພັດທະນາ.

        ການຢ້ຽມຢາມຂອງທ່ານນາຍົກລັດຖະມົນຕີ ລັດເຊຍ Mikhail Mishustin ແມ່ນສືບຕໍ່ທ່າແຮງພັດທະນາຢ່າງຕັ້ງໜ້າໃນການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສະຫະພັນ ລັດເຊຍ, ສະແດງໃຫ້ເຫັນຄວາມຕັດສິນໃຈໃນການປັບປຸງ ແລະ ເພີ່ມທະວີການຊຸກຍູ້ການພົວພັນຂອງ 2 ປະເທດໃນໄລຍະຈະມາເຖິງ.

        ນີ້ກໍ່ແມ່ນໂອກາດເພື່ອໃຫ້ການນຳ 2 ປະເທດພົບປະ, ປຶກສາຫາລື, ເປັນເອກະພາບບັນດາບັນຫາສຳຄັນ ແລະ ກຳນົດທິດຍຸດທະສາດໃຫ້ແກ່ອະນາຄົດ, ກຳນົດແຈ້ງບັນດາຂົງເຂດຮ່ວມມືຈຸດສຸມ, ນັບແຕ່ເສດຖະກິດ, ການຄ້າ, ພະລັງງານ, ວິທະຍາສາດເຕັກໂນໂລຊີ ຕະຫຼອດຮອດການສຶກສາ, ວັດທະນະທຳ ແລະ ການປ້ອງກັນຊາດ ປ້ອງກັນຄວາມສະຫງົບ.

ຍາມໃດກໍ່ຮັກສາຄວາມໄວ້ເນື້ອເຊື່ອໃຈດ້ານການເມືອງ

        ໃນປະຫວັດສາດ 75 ປີແຫ່ງການພັດທະນາຂອງການພົວພັນ ຫວຽດນາມ - ສະຫະພັນ ລັດເຊຍ, ໂດຍສັງເຂບລວມ, ການແລກປ່ຽນຄະນະຜູ້ແທນຂັ້ນສູງຂອງ 2  ປະເທດໄດ້ສວມບົດບາດສຳຄັນທີ່ສຸດ, ບໍ່ພຽງແຕ່ແມ່ນໂອກາດເພື່ອໃຫ້ 2 ຝ່າຍປຶກສາຫາລືກ່ຽວກັບການກຳນົດທິດ ແລະ ເປົ້າໝາຍຍຸດທະສາດໃຫຍ່ຂອງການພົວພັນລະຫວ່າງ 2 ປະເທດເທົ່ານັ້ນ, ຫາກຍັງແກ້ໄຂສິ່ງທີ່ຍັງຄົງຄ້າງໃນການພົວພັນ 2 ຝ່າຍ ຜ່ານຄວາມຕັດສິນໃຈດ້ານການເມືອງ ແລະ ການຊີ້ນຳຢ່າງຂ້ຽວຂາດຂອງການນຳຂັ້ນສູງ 2 ປະເທດຜ່ານບັນດາການຢ້ຽມຢາມອີກດ້ວຍ.

(ທ່ານເອກອັກຄະລັດຖະທູດ ຫວຽດນາມ ປະຈຳ ສະຫະພັນ ລັດເຊຍ ດັ້ງມິງຄອຍ)

        ປີ 2024 ຜ່ານມາ, ການແລກປ່ຽນຄະນະຜູ້ແທນຂັ້ນສູງລະຫວ່າງ 2 ປະເທດໄດ້ຈັດຂຶ້ນເປັນປະຈຳ, ດ້ວຍການຢ້ຽມຢາມ ຫວຽດນາມ ຂອງທ່ານປະທານາທິບໍດີ ລັດເຊຍ V. Putin (ເດືອນ ມິຖຸນາ), ທ່ານນາຍົກລັດຖະມົນຕີ ຟ້າມມິງຈິງ ຢ້ຽມຢາມ ລັດເຊຍ ເຂົ້າຮ່ວມກອງປະຊຸມສຸດຍອດ BRICS ເປີດກວ້າງ (ເດືອນ ຕຸລາ), ທ່ານປະທານສະພາແຫ່ງຊາດ ເຈິ່ນແທັງເໝີ້ນ ຢ້ຽມຢາມ ລັດເຊຍ ຢ່າງເປັນທາງການ (ເດືອນ ກັນຍາ), ແລະ ບັນດາການໂອ້ສົມທາງໂທລະສັບລະຫວ່າງການນຳຂັ້ນສູງ 2 ຝ່າຍ. ທ່ານເອກອັກຄະລັດຖະທູດ ຫວຽດນາມ ປະຈຳ ສະຫະພັນ ລັດເຊຍ ດັ້ງມິງຄອຍ, ຢືນຢັນວ່າ:

        “ການຢ້ຽມຢາມດຳເນີນໄປກົງກັບໂອກາດ ຫວຽດນາມ ແລະ ສະຫະພັນ ລັດເຊຍ ຈະຈັດພິທີສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດ. ນີ້ແມ່ນໂອກາດເພື່ອໃຫ້ 2 ຝ່າຍຫວນຄືນໄລຍະ 75 ປີຜ່ານມາ, ແລກປ່ຽນກ່ຽວກັບບັນດາມາດຕະການ ແລະ ວິທີການ, ຊຸກຍູ້ການພົວພັນຮ່ວມມືໃນສະພາບການໃໝ່ປະຈຸບັນ. ການຢ້ຽມຢາມຄັ້ງນີ້ກໍ່ເປີດສາກໃຫ້ປີໃໝ່ດ້ວຍການເຄື່ອນໄຫວຫຼາຍຢ່າງໃນປີ 2025 ນີ້”.

ສານກ່ຽວກັບການສືບທອດຢ່າງຕັ້ງໜ້າໃນການພົວພັນ 2 ຝ່າຍ

        ພື້ນຖານທີ່ມີຢູ່ແລ້ວໃນເວລາ 75 ປີແຫ່ງການຮ່ວມມືລະຫວ່າງ ຫວຽດນາມ - ສະຫະພັນ ລັດເຊຍ ແມ່ນນ້ຳໃຈມິດຕະພາບທີ່ເປັນມູນເຊື້ອແບບຍືນຍົງ ແລະ ຄວາມໄວ້ເນື້ອເຊື່ອໃຈດ້ານການເມືອງສູງ. ນີ້ຈະແມ່ນພື້ນຖານເພື່ອໃຫ້ 2 ປະເທດພ້ອມກັນກ້າວເດີນຕໍ່ເສັ້ນທາງໃໝ່.

        ໃນອາຍຸການໃໝ່, ທ່ານປະທານາທິບໍດີ V. Putin ໄດ້ມີສານຢ່າງຈະແຈ້ງແມ່ນ ນຳປະເທດ ລັດເຊຍ ບືນຕົວຂຶ້ນຢ່າງແຮງ, ມີບົດບາດ, ທີ່ຕັ້ງທີ່ສົມເປັນຢູ່ພາກພື້ນ ແລະ ໃນໂລກ. ໃນນັ້ນ, ຍາມໃດ ລັດເຊຍ ກໍ່ຢືນຢັນວ່າ ຫວຽດນາມ ແມ່ນຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈ, ແມ່ນບຸລິມະສິດສຳຄັນໃນນະໂຍບາຍມຸ່ງໄປສູ່ທິດຕາເວັນອອກຂອງຕົນ ແລະ ປາດຖະໜາຢາກຍູ້ແຮງການຮ່ວມມືໃນທຸກດ້ານກັບ ຫວຽດນາມ. ສ່ວນ ຫວຽດນາມ ກໍ່ພວມຢືນຢູ່ຕໍ່ໜ້າສັງກາດໃໝ່, ສັງກາດບືນຕົວຂຶ້ນຊອງຊາດ. ຫວຽດນາມ ພວມສູ້ຊົນບືນຕົວຂຶ້ນຢ່າງແຮງ, ຕັດສິນໃຈນຳ ຫວຽດນາມ ກາຍເປັນປະເທດມີລາຍຮັບສູງໃນໂລກ. ທ່ານເອກອັກຄະລັດຖະທູດ ດັ້ງມິງຄອຍ, ໃຫ້ຮູ້ຕື່ມອີກວ່າ:

        “ຄວາມສາມາດບົ່ມຊ້ອນລະຫວ່າງ 2 ປະເທດຍັງມີຫຼາຍຈຸດທີ່ຄ້າຍຄືກັນ, ສາມາດແບ່ງປັນ, ສະໜັບສະໜູນເຊິ່ງກັນແລະກັນ. ສະຫະພັນ ລັດເຊຍ ແມ່ນປະເທດກວ້າງໃຫຍ່, ມີແຫຼ່ງຊັບພະຍາກອນມະນຸດທີ່ມີຄຸນນະພາບສູງ, ການສຶກສາບຳລຸງສ້າງທີ່ດີ. ຫວຽດນາມ ຈະສືບຕໍ່ຍູ້ແຮງການປະຕິບັດແຜນນະໂຍບາຍ “ການສຶກສາແມ່ນລັດຖະນະໂຍບາຍແຖວໜ້າ”, ສະນັ້ນ, ການຮ່ວມມືລະຫວ່າງ 2 ປະເທດໃນຂົງເຂດນີ້ກໍ່ໄດ້ເປີດໂອກາດ ແລະ ຄວາມສາມາດບົ່ມຊ້ອນໃໝ່ຫຼາຍຢ່າງໃນໄລຍະຈະມາເຖິງ”.

        ການຢ້ຽມຢາມກໍ່ແມ່ນໂອກາດເພື່ອໃຫ້ 2 ຝ່າຍກວດກາຄືນ, ປຶກສາຫາລື ແລະ ຊອກຫາມາດຕະການແກ້ໄຂໃຫ້ແກ່ສິ່ງທີ່ຍັງຄົງຄ້າງ, ຕິດຄັດໃນການພົວພັນ 2 ຝ່າຍ, ແລກປ່ຽນກ່ຽວກັບຄວາມຄືບໜ້າການປະຕິບັດບັນດາໂຄງການຮ່ວມມືສຳຄັນລະຫວ່າງ 2 ປະເທດ, ໂດຍສະເພາະແມ່ນໃນຂົງເຂດພະລັງງານ, ອຸດສາຫະກຳ…

        ດ້ວຍເຈດຈຳນົງດ້ານການເມືອງຂອງການນຳຂັ້ນສູງ 2 ປະເທດ, ການຢ້ຽມຢາມ ຫວຽດນາມ ຄັ້ງນີ້ຂອງທ່ານນາຍົກລັດຖະມົນຕີ ລັດເຊຍ Mikhail Mishustin ແມ່ນການສືບທອດທ່ວງທ່າພັດທະນາຂອງການພົວພັນຄູ່ຮ່ວມມືຍຸດທະສາດຢ່າງຮອບດ້ານ ຫວຽດນາມ - ສະຫະພັນ ລັດເຊຍ, ແມ່ນການເລີ່ມຕົ້ນໃຫ້ແກ່ໄລຍະພັດທະນາໃໝ່ຂອງການພົວພັນຮ່ວມມືຮອບດ້ານ ຫວຽດນາມ - ສະຫະພັນ ລັດເຊຍ.