ປະທານາທິບໍດີ Barak Obama ກ່າວຄຳເຫັນຢູ່ທຳນຽບຂາວ ຢືນຢັນຊາວອາເມລິກາຈະຮັບຜົນປະໂຫຍດຈາກການປະຕິຮູບ
ການປະກັນສຸຂະພາບ
(ພາບ : AFP)
|
ຊາວອາເມລິກາກ່ວາ 315 ລ້ານຄົນໄດ້ເລີ່ມພັກການເພື່ອຕ້ອນຮັບວັນບຸນຄິຼດສະມາດ ແລະ ຕ້ອນຮັບປີໃໝ່ 2014. ໃນທ່າມກາງຄວາມເບີກບານ ມ່ວນຊື່ນຕ້ອນຮັບປີໃໝ່ 2014, ພ້ອມກັບ ຄວາມປະເອີບໃຈ ຕໍ່ປີໃໝ່ຈະຈົບງາມ ກ່ວານັ້ນ, ຊາວອາເມລິກາແຕ່ລະຄົນຕ່າງກໍມີອະນຸສອນທີ່ຍາກຈະຫຼົງລືມໄດ້ກ່ຽວກັບປີໜຶ່ງທີ່ເຕັມໄປດ້ວຍຄວາມຫຍຸ້ງຍາກລວມທັງຄວາມເປັນຫ່ວງໄຍຢູ່ພາຍໃນປະເທດ ແລະ ຄວາມສັບສົນໃນການພົວພັນສາກົນ. ປີເກົ່າໃກ້ຈະຜ່ານພົ້ນໄປແລ້ວ, ນີ້ກໍແມ່ນຈຸດເວລາທີ່ຜູ້ຄົນທັງຫຼາຍສຸມໃສ່ປຶກສາເຖິງຄວາມປິຊາສາມາດຂອງຜູ້ນຳທຳນຽບຂາວໃນປີທຳອິດຂອງອາຍຸການທີ 2.
ປະເທດອາເມລິກາໄດ້ເລີ່ມຕົ້ນປີ 2013 ດ້ວຍຄວາມເຊື່ອໝັ້ນຈາກການໄດ້ຮັບການເລືອກຕັ້ງຄືນໃໝ່ເຂົ້າອາຍຸການທີ 2 ຂອງປະທານາທິບໍດີ Barak Obama. ຊາວອາເມລິກາປາດຖະໜາວ່າ ໃນ 4 ປີທີ່ຈະເຖິງ,ປະເທດອາເມລິິກາ ຈະມີຄວາມສະຫວ່າງສະໄຫວໃນການພັດທະນາເສດຖະກິດ, ອັດຕາໄພວ່າງງານຫຼຸດລົງ, ລາຍຮັບຂອງປະຊາຊົນເພີ່ມຂຶ້ນພ້ອມກັບບັນດາສະຫວັດດີການສັງຄົມທີ່ສ້າງເງື່ອນໄຂທີ່ດີກ່ວາໃຫ້ແກ່ເຂົາເຈົ້າ. ແລະ ໃນຕົວຈິງ, ໃນປີທຳອິດຂອງອາຍຸການທີ 2, ປະທານາທິບໍດີ Barak Obama ຍາມໃດກໍຮັກສາຄຳໝັ້ນໝາຍກັບຜູ້ມີສິດເລືອກຕັ້ງເມື່ອກຳນົດວ່າ ເສດຖະກິດຍັງຄົງແມ່ນຈຸດສຸມ, ພ້ອມທັງມີຄວາມມານະພະຍາຍາຍຮັດແຄບຄວາມບໍ່ລົງລອຍກັນລະຫວ່າງບັນດາ ສ.ສ.ຊ ເພື່ອແກ້ໄຂບັນດາບັນຫາທີ່ຮີບດ່ວນທີ່ພວມວາງອອກໃຫ້ແກ່ ປະເທດອາເມລິິກາ. ແຕ່ອາດຈະເຫັນວ່າ ໃນຕະຫຼອດ 12 ເດືອນທີ່ຜ່ານມາ, ຄວາມມານະພະຍາຍາຍຂອງ ປະທານາທິບໍດີ Barak Obama ຍັງບໍ່ທັນບັນລຸໄດ້ຕາມຄວາມຫວັງ. ບັນດາການໂຕ້ຖຽງກັນຢູ່ພາຍໃນ 2 ພັກ ໄດ້ພາໄປເຖິງສະພາບບໍ່ມີທາງອອກໃນບັນດາລັດຖະນະໂຍບາຍສຳລັບພາຍໃນກໍຄືການພົວພັນຕ່າງປະເທດເກືອບທັງໝົດຂອງ ປະເທດອາເມລິິກາ.
ຄວາມບໍ່ລົງລອຍກັນຢ່າງເລິກເຊິ່ງທາງດ້ານການເມືອງ ແລະ ການເງິນ
ບັນດາບັນຫາພາຍໃນໃຫຍ່ຂອງ ປະເທດອາເມລິິກາປີ 2013 ຄື ຫຼຸດຜ່ອນການຂາດດຸນງົບປະມານ, ປະຕິຮູບລະບົບສ່ວຍສາອາກອນ, ປະຕິຮູບລະບົບປະກັນສຸຂະພາບ, ຄວບຄຸມການຄ້າຂາຍອາວຸດ, ປະຕິຮູບລະບົບເຂົ້າເມືອງ... ກໍລ້ວຍແຕ່ແມ່ນບັນຫາທີ່ມີລັກສະນະຮີບດ່ວນ, ແຕ່ໃນປີຜ່ານມາບໍ່ຮັບຮູ້ການຫັນປ່ຽນທີ່ຕັ້ງໜ້າໃດໆ. ໃນນັ້ນ, ພົ້ນເດັ່ນຂຶ້ນແມ່ນໂຄງການປະຕິຮູບລະບອບ ປະກັນໄພ ແລະ ເບິ່ງແຍງດູແລສຸຂະພາບ ຫຼືເອີ້ນວ່າ Obamacare. ເບິ່ງຄືວ່າ ນີ້ແມ່ນບາດກ້າວທີ່ຫຍຸ້ງຍາກທີ່ສຸດ ແລະ ສິ້ນເປືອງເຫື່ອແຮງຫຼາຍທີ່ສຸດຂອງປະທານາທິບໍດີ Barak Obama ເມືອ່ກົດໝາຍນີ້ຖືກນຳເຂົ້າປະຕິບັດໃນທ່າມກາງຄວາມໂຕ້ຖຽງກັນຢ່າງຮຸນແຮງ. ຜູ້ຄົນທັງຫຼາຍຍັງຮູ້ດີວ່າ ຄວາມເຄັ່ງຕຶງລະຫວ່າງພັກຝ່າຍໃນສະພາແຫ່ງຊາດອາເມລິກາ ໄດ້ກາຍເປັນບັນຫາທີ່ມີລັກສະນະເປັນລະບົບແນວຄິດ, ການສູ້ຢັນກັນລະຫວ່າງ 2 ພັກເມື່ອປີ 2013 ໄດ້ພາໄປເຖິງຜົນຮ້າຍຢ່ອນຫຼັງທີ່ຮ້າຍແຮງ. ເປັນຄັ້ງທຳອິດໃນຮອບເວລາ 17 ປີ, ພາກສ່ວນໜຶ່ງໃນສະຫະລັດອາເມລິກາ ຕ້ອງປິດປະຕູ, ຢຸດການເຄື່ອນໄຫວ, ພະນັກງານ ພາລະກອນນັບແສນຄົນຕ້ອງພັກການໂດຍບໍ່ຮັບເງິນເດືອນ, ໃນຂະນະທີ່ປະເທດອາເມລິິກາຖືກຍູ້ໄປເຖິງຂັ້ນຂ້ອນຂ້າງລົ້ມລະລາຍ. ພ້ອມກັນນັ້ນ, ບັນດາປັດໄຈທີ່ເຄັ່ງຕຶງໃນສັງຄົມ ກໍແມ່ນບັນຫາເຈັບຫົວຂອງອຳນາດການປົກຄອງອາເມລິິກາໃນປີ 2013 ຂະນະທີ່ໄດ້ເກີດເຫດຍິງຄາດຕະກຳກັນຫຼາຍຄັ້ງໃນໂຮງຮຽນ ຫຼືກໍລະນີທະຫານຜ່ານເສິກຄົນໜຶ່ງຂອງອາເມລິກາ ໄດ້ຍິງປືນແບບປ່ວງບ້າໃນຖານທີ່ໝັ້ນກອງທັບເຮືອຊຶ່ງຫ່າງຈາກສຳນັກງານສະພາແຫ່ງຊາດພຽງ 2-3 ກິໂລແມດ.
ວິກິດການດ້ານການທູດທີ່ກ່ຽວຂ້ອງເຖິງໂຄງການສອດແນມ
ປີ 2013, ເຫດການທີ່ເຮັດໃຫ້ໂລກສັ່ນສະເທື່ອນຊຶ່ງກ່ຽວຂ້ອງເຖິງນະໂຍບາຍການຕ່າງປະເທດຂອງອາເມລິກາ ແມ່ນກໍລະນີອະດີດພາລະກອນອົງການສືບລາຊະການລັບອາເມລິກາ CIA Edward Snowden ໄດ້ໜີໄປຕ່າງປະເທດ ແລະ ໄດ້ເຜີຍຄວາມລັບ ໂຄງການສອດແນມໃນວົງກ້ວາງຂອງອົງການປ້ອງກັນຄວາມສະຫງົບແຫ່ງຊາດອາເມລິກາ NSA . ບັນດາຂໍ້ມູນຂ່າວສານໂດຍ ອະດີດພາລະກອນອົງການສືບລາຊະການລັບອາເມລິກາ CIA Edward Snowden ເປີດເຜີຍນັ້ນ, ໄດ້ເຮັດໃຫ້ອຳນາດການປົກຄອງ ວໍຊິງຕັນ ຖືກຕົກເຂົ້າສູ່ ວິກິດການດ້ານການທູດທີ່ຮ້າຍແຮງ, ໃນນັ້ນລວມທັງບັນດາປະເທດພັດທະມິດທີ່ໃກ້ຊິດທີ່ສຸດຂອງອາເມລິກາ. ເຫດການນີ້ໄດ້ເຮັດໃຫ້ການພົວພັນລະຫວ່າງອາເມລິກາ-ເອີລົບຖືກແຕກແຫງ, ເຮັດໃຫ້ ບັນດາການເຈລະຈາກ່ຽວກັບສັນຍາຄູ່ຮ່ວມມືລົງທຶນ ແລະ ການຄ້າຂ້າມມະຫາສະໝຸດອັດລັງຕິກ TTIPD ຕ້ອງຖືກໂຈະໄວ້. ສຳລັບລັດເຊຍ, ພ້ອມກັບຄວາມເຄັ່ງຕຶ່ງທີ່ກ່ຽວຂ້ອງເຖິງແຜນການປ້ອງກັນລູກສອນໄຟຂອງອາເມລິກາຢູ່ເອີລົບຕາເວັນອອກນັ້ນ, ບັນຫາ ຢູກະແລນ, ເຫດການເຜີຍລັບໂຄງການສອດແນມ ໄດ້ເຮັດໃຫ້ວິວັດທະນາການປັບປຸງສາຍພົວພັນລະຫວ່າງ 2 ປະເທດມະຫາອຳນາດນີ້ ບໍ່ບັນລຸປະສິດທິຜົນ.
ບັນດາຈຸດທີ່ສະຫວ່າງສະໄຫວໃນພາບພົດປະເທດອາເມລິກາ 2013.
ເຖິງຢ່າງນັ້ນກໍຕາມ, ບໍ່ອາດປະຕິເສດວ່າ ປີ 2013, ປະທານາທິບໍດີ Barak Obama ໄດ້ສ້າງຂີດໝາຍ ຈຳນວນໜຶ່ງຢ່າງສຳເລັດຜົນ. ກ່ອນອື່ນໝົດ ແມ່ນບັນດາຄວາມຄືບໜ້າທີ່ຕັ້ງໜ້າໃນການຟື້ນຟູ ເສດຖະກິດ. ລະດັບການເຕີບໂຕ GDP ໃນໄຕມາດທີ 3 ປີ 2013 ບັນລຸ 3,6%, ສູງກ່ວາຫຼາຍເມື່ອທຽບໃສ່ລະດັບຄາດຄະເນ 3,1% ຂອງບັນດາຜູ້ຊ່ຽວຊານ. ນີ້ກໍແມ່ນລະດັບເພີ່ມ GDP ສູງທີ່ສຸດຂອງອາເມລິການັບແຕ່ໄຕມາດທີ 1 ປີ 2012. ເສດຖະກິດເຕີບໂຕ ໄດ້ປະກອບສ່ວນແກ້ໄຂຕະຫຼາດແຮງງານ, ອັນໄດ້ເຮັດໃຫ້ອັດຕາການວ່າງງານຢູ່ອາເມລິກາໃນເດືອນ 11 ປີ 2013 ຫຼຸດລົງລະດັບ 7%, ຊຶ່ງແມ່ນລະດັບຕ່ຳສຸດໃນຮອບເວລາ 5 ປີ .
ໃນຂົງເຂດການຕ່າງປະເທດ, ປີ 2013, ໄດ້ຢັ້ງຢືນບາດກ້າວປົວແປງຢ່າງຈະແຈ້ງໃນການພົວພັນລະຫວ່າງອາເມລິກາກັບ ອີຣານ. ຊາວອາເມລິກາມີຄວາມພໍໃຈຕໍ່ເລື່ອງທຳນຽບຂາວ ໄດ້ຍາດແຍ່ງໂອກາດແນວທາງໄກ່ເກ່ຍຂອງປະທານາ ທິບໍດີຄົນໃໝ່ຂອງ ອີຣານ ທ່ານ Hassan Rouhani ເພື່ອຊອກຫາມາດຕະການ ການແກ້ໄຂໂດຍສັນຕິວິທີໃຫ້ແກ່ໂຄງການນິວເຄຼຍຂອງອີຣານ.
ປີ 2014 ດ້ວຍພື້ນຖານເສດຖະກິດທີ່ແຂງແຮງກ່ວາ, ອາດຈະແມ່ນປີມີບາດກ້າວບຸກທະລຸຂອງອາເມລິກາ, ແຕ່ເພື່ອຮັບປະກັນການເຕີບໂຕທີ່ດີກ່ວາໃຫ້ແກ່ປະຊາຊົນນັ້ນ, ແມ່ນຍັງມີວຽກງານຫຼາຍຢ່າງທີ່ຈະຕ້ອງເຮັດ. ພ້ອມກັບການເພີ່ມທະວີກຳລັງແຮງຢູ່ພາຍໃນປະເທດ, ການຊອກຫາຄວາມເຫັນດີເຫັນພ້ອມໃນບັນດາບັນຫາພົວພັນພາຍໃນ, ພົວພັນຕ່າງປະເທດ, ປະເທດອາເມລິກາຄວນສືບຕໍ່ເດີນຕາມເສັ້ນທາງໃໝ່ມຸ່ງໄປສູ່ການສ້າງໂລກທີ່ປອດໄພກ່ວາ. ນີ້ແມ່ນບັນດາສິ່ງທ້າທາຍບໍ່ແມ່ນໜ້ອຍສຳລັບ ປະທານາທິບໍດີ Barak Obama ໃນປີ 2014 .