ວິກິດການການເມືອງຢູ່ ຢູແກຼນ ສືບຕໍ່ມີການຜັນແປທີ່ເຄັ່ງຕຶງດ້ວຍບັນດາຄຳກ່າວຫາລະເມີດຂໍ້ຕົກລົງຢຸດຍິງຂອງຝ່າຍຕ່າງໆ. ພ້ອມກັນນັ້ນ ແມ່ນບັນດາມາດຕະການໂຕ້ຕອບກັນລະຫວ່າງລັດເຊຍ ແລະ ສະຫະພາບເອີລົບ EU. ການຂັດແຍ້ງກັນລະຫວ່າງ ລັດເຊຍ ແລະ ສະຫະພາບເອີລົບ EU ບໍ່ພຽງແຕ່ພວມຍູ້ການພົວພັນ 2 ຝ່າຍຕົກຢູ່ໃນສະພາບບໍ່ມີທາງອອກເທົ່ານັ້ນ, ຫາກຍັງເຮັດໃຫ້ສະພາບການຢູ່ ຢູແກຼນ ຍິ່ງຮ້າຍແຮງກວ່າອີກ.
ເຂດຕະຫຼາດແຫ່ງໜຶ່ງຢູ່ Donetsk ຖືກຍິງທຳລາຍເມື່ອວັນທີ 3/6
(ພາບ: Reuters) |
ຕາມການຜັນແປຄັ້ງຫຼ້າສຸດ, ການພົບປະຂອງຈຸປະຕິບັດງານໃນໜ່ວຍງານແກ້ໄຂສະພາບການຢູ່ພາກຕາເວັນອອກສ່ຽງໃຕ້ ຢູແກຼນ ຊຶ່ງຫາກໍສິ້ນສຸດລົງຢູ່ນະຄອນຫຼວງ Minsk ຂອງປະເທດເບລາຣຸດ, ແຕ່ບໍ່ບັນລຸໄດ້ໝາກຜົນລະອຽດໃດໆ. ເຖິງວ່າ ການພົບປະໄດ້ຮັບການຕີລາຄາຈາກບັນດາຝ່າຍວ່າ ແມ່ນມີລັກສະນະສ້າງສາ ແຕ່ມີຫຼາຍບັນຫາໃນໂຄງການດຳເນີນງານຄື : ຄຳສັ່ງຢຸດຍິງ ຫຼຶຖອນອາວຸດປະເພດໜັກ ກໍລ້ວນແຕ່ບໍ່ບັນລຸຄວາມເຫັນດີເຫັນພ້ອມ. ເປັນອັນວ່າ ວິວັດການສົນທະນາເພື່ອຊອກຫາວິທີການແກ້ໄຂຢຸດຕິການປະທະກັນຢູ່ພາກຕາເວັນອອກ ແນ່ນອນວ່າຍັງຈະແກ່ຍາວຫຼາຍໄລຍະອີກ.
ບັນດາຝ່າຍລະເມີດຂໍ້ຕົກລົງຢຸດຍິງ
ພາຍຫຼັງທີ່ການພົບປະສິ້ນສຸດລົງພຽງ 2-3 ຊົ່ວໂມງ, ມີມືປືນຂອງກຳລັງແຍກຕົວ ແລະ ສາມັນຊົນຈຳນວນ 15 ຄົນໄດ້ຖືກເສຍຊີວິດໃນການປະທະກັນຄັ້ງຕ່າງໆລະຫວ່າງບັນດາກຳລັງຂອງອຳນາດການປົກຄອງ ຢູແກຼນ ແລະ ຝ່າຍລຸກຮື້ຂຶ້ນຢູ່ບໍລິເວນໃກ້ກັບ Donetsk. ອຳນາດການປົກຄອງ ຢູແກຼນ ກ່າວຫາວ່າ ກຳລັງລຸກຮື້ຂຶ້ນໄດ້ເລີ່ມດຳເນີນບັ້ນຮົບບຸກໂຈມຕີດ້ວຍຂອບຂະໜາດໃຫຍ່ແນໃສ່ສະຖານທີ່ຕ່າງໆຂອງຢູແກຼນ ໃກ້ກັບ Donetsk ແລະ ບຸກໂຈມຕີນະຄອນ Marinka ຫ່າງຈາກ Donetsk ປະມານ 30 ກິໂລແມັດ. ໃນຂະນະນັ້ນ, ການນຳກຳລັງທະຫານຂອງ ສ. ປະຊາຊົນ Donetsk ໂດຍຂະໜາມນາມເອງ ພັດຢືນຢັນວ່າ : ບໍ່ໄດ້ດຳເນີນການບຸກໂຈມຕີດ້ວຍຂອບຂະໜາດໃຫຍ່ຄັ້ງໃດທີ່ແນໃສ່ສະຖານທີ່ຕ່າງໆຂອງກອງທັບຢູແກຼນ ຊຶ່ງກອງທັບກີແອບໄດ້ນຳໃຊ້ອາວຸດເຄມີໃນການສູ້ຮົບ. ຕາມການກ່າວຫາຈາກກະຊວງປ້ອງກັນປະເທດຂອງລັດແຫ່ງ ສ. ປະຊາຊົນ Donetsk ໂດຍຂະໜາມນາມເອງ, ກອງທັບກີແອບໃນຊຸມມື້ມໍ່ໆມານີ້ໄດ້ມີການກະທຳຢ່າງລຽນຕິດທີ່ເປັນໜ້າລະແວງສົງໄສ. ນອກຈາກນັ້ນ, ຍັງມີບາງສັນຍານສະແດງໃຫ້ເຫັນວ່າ ອາເມລິກາໄດ້ຍື່ນມືເຂົ້າແຜນການນຳໃຊ້ອາວຸດເຄມີຂອງລັດຖະບານ ຢູແກຼນ.
ຕາມບົດລາຍງານສະບັບຫຼ້າສຸດຂອງຫ້ອງການຂ້າຫຼວງໃຫຍ່ ສ.ປ.ຊ ກ່ຽວກັບສິດທິມະນຸດທີ່ປະກາດເມື່ອວັນທີ 2/6, ນັບແຕ່ເວລາເກີດການປະທະກັນຢູ່ພາກຕາເວັນອອກ ຢູແກຼນ ມາຮອດປະຈຸບັນ, ຈຳນວນຜູ້ເສຍຊີວິດໄດ້ຂຶ້ນເຖິງ 6.400 ຄົນ, ເກືອບ 16.000 ຄົນໄດ້ຮັບບາດເຈັບ ແລະ ປະມານ 2,2 ລ້ານຄົນຕ້ອງໄປຫຼົບໄພ.
ການຂັດແຍ້ງກັນລະຫວ່າງລັດເຊຍ ແລະ ຝ່າຍຕາເວັນຕົກບໍ່ຢຸດຢູ່ໃນບັນດາວິທີການແກ້ໄຂດ້ານການເມືອງ
ໃນຈຸດເວລານີ້, ການສູ້ຮົບເພື່ອລົງໂທດລະຫວ່າງລັດເຊຍ ແລະ ຝ່າຍຕາເວັນຕົກພັດມີສັນຍານປີນຂັ້ນໄດ. ໃນມາດຕະການໂຕ້ຕອບທຳອິດ ພາຍຫຼັງທີ່ລັດເຊຍປະກາດບັນຊີລາຍຊື່ດຳ ກ່ຽວກັບ 89 ບຸກຄົນການເມືອງ ແລະ ການທູດເອີລົບ ບໍ່ໄດ້ເຂົ້າເມືອງລັດເຊຍ. ວັນທີ 2/6, ສະຫະພາບເອີລົບ EU ໄດ້ປະກາດວ່າ ເອກອັກຄະລັດຖະທູດລັດເຊຍປະຈຳ EU Vladimir Tchijov ພ້ອມກັບ ນັກການເມືອງອີກຄົນໜຶ່ງຂອງລັດເຊຍໂດຍບໍ່ເຜີຍຊື່ນັ້ນ, ໄດ້ຖືກຫ້າມເຂົ້າເມືອງບັນດາປະເທດ EU . ພ້ອມກັນນັ້ນ, ອົງການນິຕິບັນຍັດຂອງ ສະຫະພາບເອີລົບ EU ກໍໄດ້ຕັດສິນໂຈະການຮ່ວມມືກັບຄະນະກຳມາທິການຮ່ວມມືລັດຖະສະພາລັດເຊຍ -EU ແລະ ຕີລາຄາສິດສຳພັດຂອງບັນດາ ສ.ສ.ຊ ລັດເຊຍ. ໃນທັນທີ່, ລັດເຊຍໄດ້ປະຕິເສດບັນດາຄຳຕຳໜິຕິຕຽນຂອງ EU ພ້ອມທັງຢືນຢັນຄຳຕັດສິນຂອງປະເທດນີ້ ແມ່ນສອດຄ່ອງ ແລະ ພຽງແຕ່ຖືກຍົກອອກມາພາຍຫຼັງທີ່ຝ່າຍຕາເວັນຕົກ ມີມາດຕະການລົງໂທດລັດເຊຍ ເທົ່ານັ້ນ.
ໃນຂະນະນັ້ນ, ຢູແກຼນ ກໍປະກາດວ່າ ພວມມີແຜນການກັກຊັບສົມບັດຂອງຕ່າງປະເທດໂດຍຊົ່ວຄາວເພື່ອຖົມຂຸມແກ່ເລື່ອງຖືກສູນເສຍ Crimea ໃຫ້ລັດເຊຍ.
ຍາກທີ່ຈະຊອກຫາໄດ້ວິທີການແກ້ໄຂຢ່າງຮອບດ້ານ ແລະ ກົມກ່ຽວລະຫວ່າງສິດຜົນປະໂຫຍດຂອງແຕ່ລະຝ່າຍ
ບັນດາການເຈລະຈາສັນຕິພາບກ່ຽວກັບຢູແກຼນ ໄດ້ຮັບການເຊື່ອມຕໍ່ຄືນໃໝ່ແຕ່ວັນທີ 6/5 ຢູ່ ນະຄອນຫຼວງ Minsk ຂອງປະເທດເບລາຣຸດໃນສະພາວະທີ່ຄວາມເຄັ່ງຕຶງພັດລະເບີດຄືນຢູ່ພາກພື້ນພາຍຫຼັງຖືກຜ່ອນຄາຍລົງເປັນໄລຍະໜຶ່ງຍ້ອນຄຳສັ່ງຢຸດຍິງທີ່ບັນລຸໄດ້ເມື່ອເດືອນ 2. ໜ່ວຍງານກ່ຽວກັບ ຢູແກຼນໄດ້ພົບປະກັນຫຼາຍຄັ້ງເພື່ອຊອກຫາວິທີແກ້ໄຂຢ່າງຮອບດ້ານຄັ້ງສຸດທ້າຍໃຫ້ແກ່ວິກິດການ ກໍຄືຊຸກຍູ້ການປະຕິບັດຂໍ້ຕົກລົງຢຸດຍິງທີ່ບັນລຸໄດ້ຢ່າງເຕັມສ່ວນ. ແຕ່ເປັນທີ່ຈະແຈ້ງແລ້ວວ່າ : ຄວາມຈິງໄດ້ສະແດງໃຫ້ເຫັນວ່າ ທຸກໆຄວາມມານະພະຍາຍາມນີ້ ພຽງແຕ່ມີລັກສະນະເປັນຮູບການ.
ຄາດຄະເນວ່າ ໃນເດືອນ 6 ນີ້, ສະຫະພາບເອີລົບ EU ສືບຕໍ່ໂຮມປະຊຸມກ່ຽວກັບນະໂຍບາຍລົງໂທດລັດເຊຍເພາະບັນດາຄຳສັ່ງລົງໂທດຈະໝົດກຳນົດໃນເດືອນ 7 ທີ່ຈະມາເຖິງ. ຕາມວົງການນັກສັງເກດການແລ້ວ, ກໍລະນີທີ່ສະຫະພາບເອີລົບ EU ເພີ່ມການລົງໂທດໃໝ່ຕ້ານລັດເຊຍ ແມ່ນເບິ່ງຄືວ່າ ບໍ່ອາດປະຕິບັດໄດ້ ຍ້ອນປະສົບກັບການຄັດຄ້ານຈາກຫຼາຍປະເທດພາຄີ, ພວມຮັບຜົນກະທົບກົງກັນຂ້າມຈາກບັນດາຄຳສັ່ງລົງໂທດ. ແຕ່ກໍລະນີແກ່ຍາວເວລານຳໃຊ້ບັນດາມາດຕະການລົງໂທດໃນປະຈຸບັນ ແມ່ນອາດຈະເກີດຂຶ້ນ ຂະນະທີ່ວິກິດການຢູ່ ຢູແກຼນ ມາຮອດປະຈຸບັນ ຍັງບໍ່ທັນມີທາງອອກ. ເລື່ອງຊອກຫາວິທີການແກ້ໄຂຮອບດ້ານສຸດທ້າຍໃຫ້ແກ່ວິກິດການການເມືອງຢູ່ ຢູແກຼນ ແມ່ນນັບມື້ນັບຖືກຈົນຕາແຈ.