(vovworld) - ໂດຍຕັ້ງຢູ່ທາງທິດຕາເວັນອອກສ່ຽງເໜືອຂອງ ຫວຽດນາມ, ເຊິ່ງປະກອບມີ 6 ແຂວງຄື: ກາວບັ່ງ, ບັກກ້ານ, ລ້າງເຊີນ, ທ໋າຍງວຽນ, ຕວຽນກວາງ ແລະ ຮ່າຢາງ, ຫວຽດບັກ ແມ່ນແຜ່ນດິນທີ່ໃຫຍ່ໂຕມະໂຫຖານ, ເຊິ່ງທຳມະຊາດໄດ້ດົນບັນດານໃຫ້ມີທັດສະນີຍະພາບທີ່ສວຍງາມຫຼາຍຢ່າງ. ພາຍຫຼັງ 8 ປີ ແຫ່ງການຜັນຂະຫຍາຍ, ລາຍການຮ່ວມມືພັດທະນາການທ່ອງທ່ຽວ “ຜ່ານບັນດາມໍລະດົກເຂດ ຫວຽດບັກ“. ໄດ້ນຳມາເຊິ່ງຜົນງານຫຼາຍຢ່າງ, ສ້າງກຳລັງໜູນຢ່າງແຮງເພື່ອພັດທະນາການທ່ອງທ່ຽວຂອງເຂດ.
ສະຖານທີ່ທ່ອງທ່ຽວ ດອກບັກວິດ
ໃນໄລຍະ 2009-2015, ຍອດຈຳນວນແຂກທ່ອງທ່ຽວມາຢ້ຽມຢາມ 6 ແຂວງຢູ່ ຫວຽດບັກ ແມ່ນເກືອບ 33 ລ້ານເທື່ອຄົນ, ລະດັບເຕີບໂຕບັນລຸກວ່າ 16%/ປີ. ໄລ່ຮອດໝົດເດືອນ 7/2016, ຍອດຈຳນວນເງິນລົງທຶນເຂົ້າຂົງເຂດທ່ອງທ່ຽວຂອງ 6 ແຂວງນີ້ຄາດວ່າບັນລຸກວ່າ 35.000 ຕື້ດົ່ງ. ທ່ານ ໂງຮ່ວາຍຈູງ, ຮອງຫົວໜ້າກົມໃຫຍ່ທ່ອງທ່ຽວ ຫວຽດນາມ, ໃຫ້ຮູ້ວ່າ:
“ພູມສາດພັດທະນາການທ່ອງທ່ຽວ ແລະ ຄວາມຕ້ອງການພັດທະນາການທ່ອງທ່ຽວຢູ່ 6 ແຂວງ ຫວຽດບັກແມ່ນໃຫຍ່ຫຼວງທີ່ສຸດ. ກ່ອນອື່ນໝົດພວກເຮົາຕ້ອງກຳນົດບົດບາດຄຸ້ມຄອງລັດ, ບົດບາດອຳນາດການປົກຄອງໃນການພັດທະນາການທ່ອງທ່ຽວ. ບັນດາທ້ອງຖີ່ນຢາກໃຫ້ວິສາຫະກິດພັດທະນາ, ຢາກມີຜະລິດຕະພັນການທ່ອງທ່ຽວ ແມ່ນຕ້ອງມີກົນໄກຢ່າງເໝາະສົມ, ດຶງດູດບັນດາໂຄງການ, ແຫຼ່ງທຶນເຂົ້າທ້ອງຖີ່ນຂອງຕົນ. ທ້ອງຖີ່ນໃດມີນະໂຍບາຍດູດດື່ມ,ຈະມີບັນດານັກລົງທຶນຍຸດທະສາດ, ຂະແໜງການທ່ອງທ່ຽວຂອງທ້ອງຖີ່ນນັ້ນຈະພັດທະນາ “.
ລາຍການຮ່ວມມືພັດທະນາການທ່ອງທ່ຽວ “ຜ່ານບັນດາມໍລະດົກເຂດ ຫວຽດບັກ“ ໄດ້ສ້າງການກະທົບຢ່າງຕັ້ງໜ້າເຖິງຂະແໜງທ່ອງທ່ຽວ 6 ແຂວງ ຫວຽດບັກ. ຍ້ອນມີການຮ່ວມສຳພັນໂຄສະນາ, ຜະລິດຕະພັນການທ່ອງທ່ຽວຂອງທ້ອງຖີ່ນຕ່າງໆຈຶ່ງມາສູ່ນັກທ່ອງທ່ຽວນັບມື້ນັບຫຼາຍ. ຕົວຢ່າງຄື: ຮ່າຢາງ, ຈາກແຂວງໜຶ່ງຢູ່ຫ່າງໄກສອກຫຼີກມີໜ້ອຍຄົນຮູ້ຈັກເຖິງ, ແຕ່ປະຈຸບັນໄດ້ກາຍເປັນສະຖານທີ່ ທີ່ສ້າງຄວາມດຶງດູດນັກທ່ອງທ່ຽວ, ດ້ວຍບັນດາຜະລິດຕະພັນທ່ອງທ່ຽວທີ່ເປັນເອກະລັກສະເພາະເຊັ່ນ: ສະຖານທີ່ທ່ອງທ່ຽວປະຫວັດສາດເສົາທຸງ ຫຼຸງກູ໋, ພູພຽງຫີນ ດົ່ງວັນ, ງານບຸນດອກບັກວິດ, ຕະຫຼາດນັດ ດົ່ງວັນ. ໝູ່ບ້ານວັດທະນະທຳ ນ່າຈ່າວ…ທ່ານ ເລິມຕ໋ຽນແມ້ງ, ຮອງຫົວໜ້າພະແນກວັດທະນະທຳ ກິລາ ແລະ ທ່ອງທ່ຽວແຂວງ ຮ່າຢາງ, ໃຫ້ຮູ້ວ່າ:
“ມໍລະດົກວັດທະນະທຳ ຫວຽດບັກແມ່ນຫຼາຍຮູບຫຼາຍແບບທີ່ສຸດ. ຍ້ອນເຫດນັ້ນ, ບັນດາແຂວງໄດ້ອີງໃສ່ທ່າແຮງນີ້ເພື່ອຂຸດຄົ້ນຢ່າງມີປະສິດທິຜົນ. ພິເສດແມ່ນຂຸດຄົ້ນມໍລະດົກວັດທະນະທຳຂອງບັນດາຊົນເຜົ່າສ່ວນໜ້ອຍ. ສຳລັບ ຮ່າຢາງ, ພວກຂ້າພະເຈົ້າເອົາໃຈໃສ່ເປັນພິເສດເຖິງການຮ່ວມສຳພັນບັນດາແຂວງໃນເຂດ. ກ່ອນອື່ນໝົດແມ່ນສ້າງບັນດາລາຍການທ່ອງທ່ຽວຕາມເຂດພາກລະຫວ່າງແຂວງຕ່າງໆ. ທີສອງແມ່ນ, ພວກເຮົາໄດ້ຮຽກຮ້ອງບັນດາກຸ່ມບໍລິສັດໃຫຍ່ທີ່ມີເຄື່ອງໝາຍການຄ້າລົງທຶນພັດທະນາການທ່ອງທ່ຽວຢູ່ແຂວງ ຮ່າຢາງ ກໍ່ຄືບັນດາແຂວງໃນເຂດ “.
ສົ່ງເສີມການໂຄສະນາການທ່ອງທ່ຽວ ໄດ້ຮັບການກຳນົດວ່າແມ່ນໜຶ່ງໃນບັນດາໜ້າທີ່ຈຸດສຸມໃນການພັດທະນາການທ່ອງທ່ຽວຢູ່ 6 ແຂວງຫວຽດບັກ. ແຕ່ລະປີ, ບັນດາແຂວງດັ່ງກ່າວໄດ້ຜັດປ່ຽນກັນຈັດຕັ້ງລາຍການທ່ອງທ່ຽວ “ຜ່ານບັນດາມໍລະດົກເຂດ ຫວຽດບັກ“ ດ້ວຍການເຄື່ອນໄຫວຟົດຟື້ນ ແລະ ດູດດື່ມຫຼາຍຢ່າງ, ສ້າງຄວາມປະທັບໃຈໃຫ້ນັກທ່ອງທ່ຽວ, ດຶງດູດຄວາມສົນໃຈຈາກບັນດາບໍລິສັດທ່ອງທ່ຽວ, ກໍ່ຄືນັກລົງທຶນດ້ານການທ່ອງທ່ຽວ. ນັ້ນແມ່ນພື້ນຖານເພື່ອໃຫ້ຂະແໜງການທ່ອງທ່ຽວບັນດາແຂວງ ຫວຽດບັກສືບຕໍ່ພັດທະນາໃນໄລຍະຈະມາເຖິງ.
ສະຖານທີ່ທ່ອງທ່ຽວປະຫວັດສາດເສົາທຸງ ຫຼຸງກູ໋
ເມື່ອເຂົ້າຮ່ວມລາຍການຮ່ວມສຳພັນ, ບັນດາທ້ອງຖີ່ນສາມາດຮັບຮູ້ໄດ້ທ່າແຮງກໍ່ຄືສິ່ງທີ່ຍັງຄົງຄ້າງເພື່ອປັບປຸງຍຸດທະສາດພັດທະນາການທ່ອງທ່ຽວຂອງແຂວງຕົນຢ່າງທັນການ, ພ້ອມທັງຂະຫຍາຍບັນດາຮູບແບບສຳເລັດຜົນ, ຮ່ວມແຮງຮ່ວມໃຈກໍ່ສ້າງ ຫວຽດບັກໃຫ້ກາຍເປັນເຂດທ່ອງທ່ຽວທີ່ສ້າງຄວາມດຶງດູດ. ທ່ານ ຟ້າມມິງຮ໋ວນ, ປະທານຄະນະກຳມະການປະຊາຊົນແຂວງ ຕວຽນກວາງ, ໃຫ້ຮູ້ວ່າ:
“ການຮ່ວມສຳພັນ, ສົມທົບກັນຢ່າງແໜ້ນແຟ້ນລະຫວ່າງແຂວງຕ່າງໆແມ່ນສຳຄັນທີ່ສຸດ. ບັນດາຂັ້ນຢູ່ທ້ອງຖີ່ນຮັບຜິດຊອບໜ້າທີ່ຊີ້ນຳຈັດຕັ້ງການປະຕິບັດຄືແນວໃດເພື່ອພັດທະນາເສດຖະກິດທ່ອງທ່ຽວໃຫ້ໄດ້. ຕວຽນກວາງ ໄດ້ຄັດເລືອກທ່ອງທ່ຽວແມ່ນໜຶ່ງໃນສາມຂົງເຂດບຸກທະລຸ, ເຊິ່ງປະກອບມີອຸດສາຫະກຳ, ການພັດທະນາກະສິກຳສິນຄ້າ ແລະ ການທ່ອງທ່ຽວ“.
ການຮ່ວມມື, ຮ່ວມສຳພັນພັດທະນາການທ່ອງທ່ຽວແມ່ນທ່າອ່ຽງຈຳເປັນເພື່ອເສີມຂະຫຍາຍຄວາມສາມາດບົ່ມຊ້ອນ, ທ່າແຮງຂອງແຕ່ລະທ້ອງຖີ່ນ. ບັນດາແຂວງ ຫວຽດບັກ ໄດ້ປະຕິບັດສິ່ງດັ່ງກ່າວເປັນຢ່າງດີ. ໂດຍແມ່ນເຂດທຳມະຊາດທີ່ໃຫຍ່ໂຕມະໂຫຖານ, ດ້ວຍທັດສະນີຍະພາບທີ່ສວຍງາມ ແລະ ປູຊະນີຍະສະຖານປະຫວັດສາດທີ່ມີຊື່ສຽງຄືເຂດພູພຽງຫີນ ດົ່ງວັນ, ໜອງ ບາເບ, ຕາກ ບານຢົກ, ຖານທີ່ໝັ້ນ ຫວຽດບັກ… ປະຈຸບັນ, ບັນດາແຂວງ ຫວຽດນາມ ນັບມື້ນັບດຶງດູດແຂກທ່ອງທ່ຽວຫຼາຍຄົນມາຢ້ຽມຢາມ ແລະ ຄົ້ນຫາ.