ທ່ານເລຂາທິການໃຫຍ່ ໂຕເລິມື ກ່າວຄຳເຫັນຊີ້ນຳກອງປະຊຸມ. (ພາບ: VGP/Nhật Bắc)

ປີ 2025  ຫວຽດນາມ ຕ້ອງເປັນເຈົ້າການໃນການຮັບມືກັບທຸກກໍລະນີເກີດຂຶ້ນ ພິເສດ ໃນພາວະການຄາດຄະເນສະພາບການໂລກ ແລະ ພາກພື້ນຍັງສືບຕໍ່ສັບສົນ,ຍາກທີ່ຈະຄາດຄະເນລ່ວງຫນ້າໄດ້ເຖິງຄວາມຫຍຸ້ງຍາກ, ສິ່ງທ້າທາຍທີ່ຫລາຍກວ່າຄວາມສະດວກ, ກາລະໂອກາດ.

ບັນດາຕົວເລກປະທັບໃຈຂອງປີ 2024

ປີ 2024, 15/15 ຄາດໝາຍໄດ້ປະຕິບັດສຳເລັດ ແລະ ລື່ນກາຍແຜນການ. ພົ້ນເດັ່ນແມ່ນການຟື້ນຕົວຢ່າງຕັ້ງຫນ້າຂອງພື້ນຖານເສດຖະກິດ ດ້ວຍລະດັບການເຕີບໂຕສູງ; ເສດຖະກິດມະຫາພາກມີສະຖຽນລະພາບ, ໄພເງິນເຟີ້ໄດ້ຮັບການຄວບຄຸມຢ່າງມີປະສິດທິຜົນ; ບັນດາຄວາມດຸ່ນດ່ຽງໃຫຍ່ຂອງພື້ນຖານເສດຖະກິດໄດ້ຮັບປະກັນຢ່່າງໝັ້ນແກ່ນ. ການຮັບປະກັນຊີວິດສັງຄົມ ໄດ້ຮັບການປົວແປງຢ່າງເຫັນໄດ້ຊັດ, ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການຍົກສູງຂຶ້ນ, ການເຕີບໂຕເສດຖະກິດບັນລຸກວ່າ 7%, ແມ່ນລະດັບສູງສຸດໃນພາກພື້ນ ແລະ ໂລກໃນສະພາບຄວາມຫຍຸ້ງຍາກຂອງທົ່ວໂລກ.

ທີ່ກອງປະຊຸມຢູ່ ຮ່າໂນ້ຍ, ທ່ານເລຂາທິການໃຫຍ່ ໂຕເລີມ ຍ້ອງຍໍບັນດານະຄອນໃຫຍ່ ທີ່ຍາມໃດກໍ່ຮັກສາທີ່ຕັ້ງແມ່ນ Top ນຳຫນ້າໃນການປະກອບສ່ວນເຂົ້າໃນການເຕີບໂຕຄື: ນະຄອນ ໂຮ່ຈິມິນ, ຮ່າໂນ້ຍ... ແລະ ບັນດາທ້ອງຖິ່ນທີ່ເຖິງວ່າຍັງປະສົບກັບຄວາມຫຍຸ້ງຍາກ ແຕ່ບັນດາແຂວງກໍ່ມີດັດຊະນີການເຕີບໂຕສູງ, ການປ່ອຍເງິນລົງທຶນພາກລັດ, ການເກັບລາຍຮັບງົບປະມານສູງຄື: ບັກຢາງ, ຮວ່າບິ່ງ, ລາວກາຍ, ຕວຽນກວາງ, ຝູເຖາະ, ນາມດິ້ງ, ແທັງຮວ໋າ, ເຫງ້ອານ, ນິງທ້ວນ, ບິ່ງດິ້ງ, ດັກລັກ, ຢາລາຍ, ກອນຕູມ, ໄຕນິງ, ດົ່ງນາຍ, ລອງອານ, ຈ່າວິງ ແລະ ກຽນຢາງ.             

“ບັນດາຕົວເລກແມ່ນເຕັມໄປດ້ວຍຄວາມປະທັບໃຈຊື່ງໄດ້ຍົກໃຫ້ເຫັນໃນບົດລາຍງານຂອງລັດຖະບານ ແລະ ຄຳເຫັນຂອງບັນດາກະຊວງ, ຂະແຫນງການ, ທ້ອງຖິ່ນ, ອາດຢັ້ງຢືນໄດ້ບັນດາຄາດໝາຍການພັດທະນາເສດຖະກິດສັງຄົມປີ 2024 ໄດ້ສຳເລັດໃນສະພາບການຫຍຸ້ງຍາກສົມຄວນ, ຊ້ຳບໍ່ໜຳມີບາງຊ່ວງເວລາແມ່ນຫຍຸ້ງຍາກສັບສົນທັງຢູ່ພາຍໃນປະເທດ, ພາກພື້ນ ແລະ ສາກົນ”.

ຄຳໝັ້ນສັນຍາປະຕິບັດບັນດາບັນດາຫນ້າທີ່ໄດ້ວາງອອກຢ່າງມີໄຊ

ທີ່ກອງປະຊຸມ, ບັນດາຜູ້ແທນໄດ້ເຫັນດີ ປີ 2025 ແມ່ນມີຄວາມໝາຍສຳຄັນພິເສດໃນວິວັດການພັດທະນາຂອງ ຫວຽດນາມ, ສ້າງຂີດໝາຍຈຸດເວລາທີ່ປະເທດຊາດກ້າວເຂົ້າສູ່ສັງກາດໃຫມ່, ສັງກາດບືນຕົວຂຶ້ນ, ພັດທະນາສ້າງຄວາມຮັ່ງມີ, ຈະເລີນຮຸ່ງເຮືອງວັດທະນາຖາວອນຂອງຊາດ. ຕາມນັ້ນແລ້ວ ການໃຫ້ບຸລິມະສິດແຖວຫນ້າປະຈຸບັນ ແມ່ນສ້າງກົງຈັກຂອງລະບົບການເມືອງຕາມທິດ “ກະທັດລັດ, ມີຄຸນນະພາບ, ເຂັ້ມແຂງ, ມີປະສິດທິພາບ, ປະສິດທິຜົນ”                            

“ສິ່ງດັ່ງກ່າວ ບໍ່ພຽງແຕ່ຫລຸດຜ່ອນເທົ່ານັ້ນ ຫາກຍັງຮຽກຮ້ອງຕ້ອງມີການປະຕິຮູບຢ່າງເລິກເຊິ່ງກວ້າງຂວາງການຄຸ້ມຄອງລັດ, ຫັນເປັນໂປ່ງໃສ, ຍູ້ແຮງການຈັດແບ່ງສິດອຳນາດໃນການບໍລິຫານ, ເສດຖະກິດ, ການເງິນ, ງົບປະມານ, ການຄຸ້ມຄອງຊັບພະຍາກອນ.         

ທ່ານເລຂາທິການໃຫຍ່ ກໍ່ຮຽກຮ້ອງຄວາມເປັນເອກະພາບໃນຄວາມຮັບຮູ້ ແລະ ການກະທຳ ກ່ຽວກັບຄວາມຮີບດ່ວນຕ້ອງສືບຕໍ່ປະຕິບັດພາລະກິດແຫ່ງການປ່ຽນແປງໃຫມ່ກ່ຽວກັບດ້ານເສດຖະກິດ. ຈິນຕະນາການປ່ຽນແປງໃຫມ່ ຕ້ອງປຸກລຸກຄວາມຂະຫຍັນຂັນເຄື່ອນ, ປະດິດຄິດສ້າງກໍ່ຄືຈິດໃຈກ້າຄິດ, ກ້າເຮັດ ຂອງພະນັກງານຄຸ້ມຄອງທຸກຂັ້ນ.

ຕາມທ່ານເລຂາທິການໃຫຍ່ ໂຕເລິມ ແລ້ວ ແມ່ນຕ້ອງປະຕິຮູບລະບົບການເງິນ, ທະນາຄານ ແລະ ເງິນຕາຢ່າງເຂັ້ມແຂງ. ລະບົບກົດໝາຍຕ້ອງສ້າງໃຫ້ສຳເລັດເພື່ອໃຫ້ແຕ່ລະເນື້ອໃນ ກຳນົດຢູ່ພຽງແຕ່ໃນກົດໝາຍດຽວເທົ່ານັ້ນ.                  

“ຕ້ອງໃຫ້ບຸລິມະສິດສ້າງກອບນິຕິກຳໃຫ້ແກ່ບັນດາຮູບແບບເສດຖະກິດໃຫມ່ ແລະ ປະຕິບັດກົດໝາຍວ່າດ້ວຍຊັບສິນທາງປັນຍາໃຫ້ມີປະສິດທິພາບ, ປະສິດທິຜົນ ເພື່ອສົ່ງເສີມການປະດິດຄິດສ້າງໃນສັງຄົມ, ຄວາມສາມາດບັນລຸການເຕີບໂຕສອງຕົວເລກໃນອະນາຄົດແມ່ນອີງໃສ່ຫລາຍຈາກວິວັດທະນາການປ່ຽນແປງໃຫມ່ພັດທະນາເສດຖະກິດຂອງ ຫວຽດນາມ”.

          ເພື່ອບັນລຸລະດັບເຕີບໂຕເສດຖະກິດ 8% ໃນປີ 2025, ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິງ ຢັ້ງຢືນ: ລັດຖະບານ ຈະສຳຫລວດກວດກາ, ມອບຫນ້າທີ່, ຄາດໝາຍລະອຽດກ່ຽວກັບລະດັບການເຕີບໂຕໃຫ້ແກ່ບັນດາກະຊວງ, ຂະແຫນງການ, ທ້ອງຖິ່ນ, ສຸມໃສ່ເຮັດໃຫມ່ບັນດາກຳລັງຫນູນການເຕີບໂຕເດີມຄື: ການລົງທຶນ, ການບໍລິໂພກ, ການສົ່ງອອກ.

“ໝູ່ຄະນະລັດຖະບານ, ແຕ່ລະສະມາຊິກລັດຖະບານ, ການນຳບັນດາກະຊວງ, ຂະແຫນງການ, ທ້ອງຖິ່ນ ໃຫ້ຄຳໝັ້ນໝາຍຍົກສູງຈິດໃຈສາມັກຄິ, ຮ່ວມແຮງຮ່ວມໃຈເປັນຈິດຫນຶ່ງໃຈດຽວ ແລະ ມີຄວາມຮັບຜິດຊອບຕໍ່ພັກ, ລັດ, ປະຊາຊົນ ພ້ອມກັບທົ່ວປວງຊົນ, ນັກຮົບໃນທົ່ວປະເທດ, ປະຊາຄົມວິສາຫະກິດ ແລະ ທັງໝົດຖັນແຖວພະນັກງານ, ລັດຖະກອນ, ຜູ້ອອກແຮງງານ ຕັດສິນໃຈສູ້ຊົນປະຕິບັດແຜນການປີ 2025 ຢ່າງມີໄຊ, ສ້າງພື້ນຖານໃຫ້ໝັ້ນແກ່ນ ນຳປະເທດຊາດກ້າວເຂົ້າສູ່ສັງກາດໃຫມ່, ສັງກາດບືນຕົວຂຶ້ນພັດທະນາສ້າງຄວາມຮັ່ງມີ, ສິວິໄລ, ຈະເລີນຮຸ່ງເຮືອງວັດທະນາຖາວອນຂອງຊາດ”.

         ຄວາມຈິງໄດ້ພິສູດໃຫ້ເຫັນວ່າ ຍິ່ງປະສົບກັບຄວາມຫຍຸ້ງຍາກ, ຫວຽດນາມ ຍິ່ງມີຄວາມສາມັກຄີ, ຕັດສິນໃຈ, ເປັນຈິດຫນຶ່ງໃຈດຽວ ແລະ ບືນຕົວຂຶ້ນຢ່າງເຂັ້ມແຂງ. ດ້ວຍຄວາມຕັດສິນໃຈ, ດ້ວຍຖານະບົດບາດ ແລະ ກຳລັງແຮງທີ່ມີຢູ່ແລ້ວ, ຫວຽດນາມ ມີຄວາມເຊື່ອໝັ້ນດ້ວຍຕົນເອງເພື່ອກ້າວເຂົ້າສູ່ສັງກາດບືນຕົວຂຶ້ນ, ພັດທະນາສ້າງຄວາມຮັ່ງມີ, ຈະເລີນຮຸ່ງເຮືອງວັດທະນາຖາວອນ.