(vovworld) – ພາຍຫຼັງ 3 ປີ ແຫ່ງການຜັນຂະຫຍາຍການປະຕິບັດໂຄງການກໍ່ສ້າງຊົນນະບົດໃໝ່ຢູ່ 6 ຕາແສງ, ມາຮອດປະຈຸບັນ, ນະຄອນໂຮ່ຈີມິນ ມີ 2 ຕາແສງ ເຕິນທົງໂຫ້ຍ ແລະ ທ໋າຍມີ້ - ເມືອງກູຈີ, ບັນລຸໄດ້ 19/19 ມາດຖານກ່ຽວກັບການກໍ່ສ້າງຊົນນະບົດໃໝ່. ເຂດດິນ ກູຈີ ກ່ອນນີ້ເຄີຍຖືກຜົນສະທ້ອນຫຼາຍຈາກລະເບີດໝາກໝີ່ນໃນສົງຄາມ, ແຕ່ປະຈຸບັນໄດ້ກາຍເປັນຕາແສງທີ່ພົ້ນເດັ່ນໃນການກໍ່ສ້າງຊົນນະບົດໃໝ່ຢູ່ຊານນະຄອນໂຮ່ຈີມິນ ຍ້ອນບັນດາຮູບແບບເສດຖະກິດທີ່ມີປະສິດທິຜົນ.
ຖອດຖອນບົດຮຽນກ່ຽວກັບການກໍ່ສ້າງຊົນນະບົດໃໝ່ຢູ່ ຕາແສງເຕິນທົງໂຫ້ຍ, ເມືອງກູຈີ
(ພາບອິນເຕີແນດ)
ບົນເສັ້ນທາງປູຢາງທີ່ສະອາດລະຫວ່າງບ້ານຂອງຕາແສງເຕິນທົງໂຫ້ຍ, ເມືອງກູຈີ, ຊາວກະສີກອນພວມຂົນສົ່ງກະຖຸ້ງດອກໄມ້ເຖິງຕະຫຼາດ ຫຼືບ່ອນຂາຍດອກໄມ້. ລະດູການປູກດອກໄມ້ປີນີ້, ຊາວກະສີກອນຕາແສງເຕິນທົງໂຫ້ຍ ໄດ້ຮັບຜົນດີ ຍ້ອນກ່ອນນັ້ນເຂົາເຈົ້າໄດ້ທຳການຄົ້ນຄ້ວາຕະຫຼາດ ແລ້ວສຸມໃສ່ປູກດອກກ້ວຍໄມ້ Mokara, ເຊິ່ງແມ່ນດອກໄມ້ທີ່ມີລາຄາຕ່ຳ ແລະ ເໝາະສົມກັບຄວາມຕ້ອງການຫຼິ້ນດອກໄມ້ຂອງປະຊາຊົນເປັນຈຳນວນຫຼວງຫຼາຍ. ນອກຈາກມີຄວາມສະດວກໃນວຽກງານແລ້ວ, ປະຊາຊົນໃນຕາແສງກໍ່ຮູ້ສຶກເບີກບານມ່ວນຊື່ນກວ່າອີກ ເມື່ອຕາແສງບັນລຸໄດ້ 19/19 ມາດຖານກ່ຽວກັບການກໍ່ສ້າງຊົນນະບົດໃໝ່. ທ່ານ ຫງວຽນລິງ, ຢູ່ບ້ານເຕິນເລິບ, ຕາແສງເຕິນທົງໂຫ້ຍ, ເມືອງກູຈີ, ໃຫ້ຮູ້ວ່າ:
“ນັບແຕ່ຕາແສງເຕິນທົງໂຫ້ຍ ໄດ້ຮັບການເລືອກເຟັ້ນເປັນຕາແສງປະຕິບັດທົດລອງການກໍ່ສ້າງຊົນນະບົດໃໝ່ ປະຊາຊົນດີໃຈຫຼາຍ. ປະຊາຊົນທຸກຄົນລ້ວນແຕ່ກຳໄດ້ທຸກແຜນນະໂຍບາຍ ແລະ ຮ່ວມແຮງຮ່ວມໃຈປະຕິບັດ. ກ່ອນອື່ນໝົດແມ່ນກໍ່ສ້າງລະບົບຄົມມະນາຄົມ, ຊົນລະປະທານ, ການຜະລິດເສດຖະກິດກໍ່ນັບມື້ນັບພັດທະນານ”.
ຊາວກະສີກອນຕາແສງເຕິນທົງໂຫ້ຍ, ເມືອງກູຈີປູກດອກກ້ວຍໄມ້ Mokara
(ພາບ: SGGP)
ພ້ອມກັບຄວາມພາກພູມໃຈຂອງຕາແສງເຕິນທົງໂຫ້ຍ, ຕາແສງທ໋າຍມີ້ ກໍ່ບັນລຸໄດ້ 19 ມາດຖານກ່ຽວກັບການກໍ່ສ້າງຊົນນະບົດໃໝ່. ໂດຍເລີ່ມມາຈາກຕາແສງຫຍຸ້ງຍາກທີ່ສຸດຂອງນະຄອນ, ແຕ່ປະຈຸບັນ, ໂສມໜ້າຂອງທ໋າຍມີ້ ໄດ້ມີການປ່ຽນແປງພໍສົມຄວນ. ເສັ້ນທາງທັງໝົດໃນບ້ານ, ໃນເຂດທົ່ງນາໄດ້ຮັບການປູຢາງທັງຮາບພຽງ ແລະ ສະອາດສວຍງາມ. ກ່ອນທີ່ຜັນຂະຫຍາຍໂຄງການກໍ່ສ້າງຊົນນະບົດໃໝ່, ລາຍຮັບສະເລ່ຍໃສ່ຫົວຄົນຢູ່ທ໋າຍມີ້ ແມ່ນ 17ລ້ານດົ່ງ/ຄົນ/ປີ. ປະຈຸບັນໄດ້ເພີ່ມຂຶ້ນທົບ 1,8 ເທົ່າ. ຜູ້ທີ່ເຮັດວຽກງານກະສີກອນ 2.400 ກວ່າຄົນ ໄດ້ຫັນໄປເຮັດວຽກງານອຸດສາຫະກຳ, ການຄ້າ, ການບໍລິການ. ໃນວິວັດແຫ່ງການປະຕິບັດ, ແຕ່ລະເນື້ອໃນລ້ວນແຕ່ຖືກຍົກອອກມາເພື່ອໃຫ້ປະຊາຊົນພິຈາລະນາ, ປະກອບຄຳເຫັນ ແລະ ເຂົ້າຮ່ວມການຕິດຕາມກວດກາ, ດັ່ງນັ້ນຈຶ່ງສ້າງຄວາມຕິດພັນລະຫວ່າງປະຊາຊົນກັບອຳນາດການປົກຄອງ. ທ່ານ ເຈິ່ນແທງຢຸງ, ຊາວກະສີກອນບ້ານມີ້ແຄ໋ງບີ, ຕາແສງທ໋າຍມີ້, ເມືອງກູຈີ, ແບ່ງປັນວ່າ:
“ນັບແຕ່ມື້ປະຕິບັດຮູບແບບຊົນນະບົດໃໝ່, ຊີວິດຂອງຂ້າພະເຈົ້າເປັນປົກກະຕິກວ່າ. ຂ້າພະເຈົ້າຢູ່ທີ່ນີ້ເມື່ອປີ 1982, ເວລານັ້ນເມື່ອຝົນຕົກທາງຄົມມະນາຄົມເປັນບວກເປັນຕົມ, ນັກຮຽນໄປມາຍາກຫຼາຍ. ປະຈຸບັນໂດຍມີການຊ່ວຍເຫຼືອຂອງລັດ, ເສັ້ນທາງປູຢາງໄດ້ຮັບການກໍ່ສ້າງ, ການໄປມາກໍ່ສະດວກສະບາຍກວ່າ. ນອກນັ້ນຊາວກະສີກອນຍັງໄດ້ຮັບການແນະນຳກ່ຽວກັບວິທີປູກຜັກ, ປູກເຂົ້າ ແລະ ນຳໃຊ້ວິທະຍາສາດເຕັກນິກ. ຊາວກະສີກອນກໍ່ມີຜະລິດຕະພັນກະເສດຂາຍໃຫ້ສະຫະກອນເປັນປົກກະຕິກວ່າ. ເວົ້າລວມແລ້ວການກໍ່ສ້າງຊົນນະບົດໃໝ່ມີຜົນປະໂຫຍດທີ່ສຸດ”.
ນັກຮຽນຊັ້ນປະຖົມຢູ່ຕາແສງເຕິນທົງໂຫ້ຍ, ເມືອງກູຈີ
ໄປຮຽນບົນເສັ້ນທາງປູຢາງຢ່າງສະອາດ
(ພາບ: Minh Đức)
ດ້ວຍທິດນຳລະດົມກຳລັງແຮງພາຍໃນຢູ່ກັບທີ່ເປັນຕົ້ນຕໍ່, ນຳໃຊ້ກຳລັງແຮງຂອງປະຊາຊົນເພື່ອຮັບໃຊ້ໃຫ້ປະຊາຊົນ. ໂຄງການກໍ່ສ້າງຊົນນະບົດໃໝ່ໄດ້ຮັບຄວາມເຫັນດີເຫັນພ້ອມສູງຈາກປະຊາຊົນບັນດາຕາແສງຢູ່ຊານນະຄອນ. ຢູ່ 6 ຕາແສງມີ 6300 ຄອບຄົວຊາວກະສີກອນສະຫງວນທີ່ດິນເພື່ອເຮັດທາງ ດ້ວຍມູນຄ່າຂຶ້ນເຖິງ 420 ຕື້ກວ່າດົ່ງ. ລາຍຮັບສະເລ່ຍບັນລຸເກືອບ 26 ລ້ານດົ່ງ/ຄົນ/ປີ, ສູງກວ່າທົບ 1,6 ເທົ່າ, ເມື່ອທຽບໃສ່ໄລຍະກ່ອນທີ່ຈະກໍ່ສ້າງຊົນນະບົດໃໝ່, ຈຳນວນຄອບຄົວທຸກຍາກຫຼຸດລົງເກືອບ 66%. ນອກຈາກ 2 ຕາແສງຢູ່ເມືອງກູຈີ ທີ່ບັນລຸໄດ້ 19/19 ມາດຖານແລ້ວ, 4 ຕາແສງທີ່ຍັງເຫຼືອກໍ່ບັນລຸໄດ້ 17/19 ມາດຖານ. ຜ່ານການປະຕິບັດສະແດງໃຫ້ເຫັນວ່າ, ມີຫຼາຍຮູບແບບບັນລຸໄດ້ຜົນງານຢ່າງຕັ້ງໜ້າ, ແຕ່ກໍ່ມີຫຼາຍບັນຫາພວມວາງອອກ ຍັງຮຽກຮ້ອງໃຫ້ມີບັນດາມາດຕະການຄົບຊຸດ ເພື່ອບັນລຸປະສິດທິຜົນໃຫ້ສູງກວ່າ. ສະເພາະກູຈີ ແມ່ນທ້ອງຖີ່ນມີອັດຕາສ່ວນເສດຖະກິດກະສີກຳສູງ, ດັ່ງນັ້ນມາດຖານເພີ່ມລາຍຮັບສະເລ່ຍໃສ່ຫົວຄົນຂຶ້ນທົບ 2 ເທົ່າ ເມື່ອທຽບໃສ່ກ່ອນນັ້ນ ແມ່ນການທ້າທາຍບໍ່ແມ່ນໜ້ອຍ. ທ່ານ ເຈິ່ນວັນຈີ໋, ປະທານຄະນະກຳມະການປະຊາຊົນ, ຫົວໜ້າຄະນະຊີ້ນຳໂຄງການກໍ່ສ້າງຊົນນະບົດໃໝ່ຕາແສງເຕິນທົງໂຫ້ຍ, ໃຫ້ຮູ້ວ່າ:
“ພາຍຫຼັງ 3 ປີ ແຫ່ງການກໍ່ສ້າງຊົນນະບົດໃໝ່, ພວກຂ້າພະເຈົ້າສາມາດບັນລຸໄດ້ 19/19 ມາດຖານ, ໂສມໜ້າຕາແສງໄດ້ມີການປ່ຽນແປງຢ່າງຈະແຈ້ງ, ສ້າງເງື່ອນໄຂເພື່ອພັດທະນາການຜະລິດ. ສິ່ງດັ່ງກ່າວແມ່ນຍ້ອນມີຄວາມຕັດສິນໃຈສູງຂອງອົງຄະນະພັກ ແລະ ປະຊາຊົນຕາແສງໃນການປະຕິບັດໂຄງການ. ແຕ່ປະຈຸບັນຍັງມີບາງມາດຖານເຖິງວ່າບັນລຸໄດ້ຄາດໝາຍແລ້ວ ແຕ່ບໍ່ທັນໝັ້ນຄົງ. ໃນໄລຍະໃກ້ໆນີ້, ພວກຂ້າພະເຈົ້າຕ້ອງມີຄວາມມານະພະຍາຍາມກວ່າອີກ ເພື່ອໃຫ້ບັນດາມາດຖານທີ່ບັນລຸໄດ້ນັ້ນມີຄວາມໝັ້ນຄົງຖາວອນ”.
ຊາວກູຈີ ພວມສ້າງຄວາມຮັ່ງມີໃຫ້ບ້ານເກີດເມືອງນອນໃນໄລຍະໃໝ່ເທື່ອລະກ້າວ. ເຂດດິນຊານນະຄອນທີ່ກວ້າງໃຫຍ່ນີ້ພວມມີການປ່ຽນແປງໃນແຕ່ລະວັນ ເພື່ອພັດທະນາ, ກາຍເປັນຊົນນະບົດໃໝ່ ດ້ວຍໂຄງລ່າງທີ່ທັນສະໄໝ, ສັງຄົມມີສະຖຽນລະພາບ ແລະ ເຂັ້ມຄົ້ນໄປດ້ວຍສີສັນວັດທະນະທຳແຫ່ງຊາດ, ເພື່ອທັດທຽມກັບລະດັບພັດທະນາລວມຂອງນະຄອນທີ່ໃສ່ຊື່ປະທານ ໂຮ່ຈີມິນ.