ໝູ່ບ້ານອາຊີບຕີເງິນ ເວ້ລາຍ ຢູ່ ແຂວງ ຮຶງອຽນ (ພາບ: VOV ທ່ອງທ່ຽວ)

   ຕາມບັນດາຜູ້ອາຍຸສູງໃນໝູ່ບ້ານ ເວ້ລາຍ, ອາຊີບຕີເງິນບໍ່ແມ່ນອາຊີບດັ້ງເດີມຂອງໝູ່ບ້ານອາຊີບ ເວ້ລາຍ. ໃນຊຸມປີ 90 ຕົ້ນສັດຕະວັດທີ 20, ປຊຊ ຈຳນວນໜຶ່ງຢູ່ບ້ານ ເວ້ລາຍ ໄປຮຽນອາຊີບຕີເງິນຄຳຢູ່ໝູ່ບ້ານ ເຈົາເຄ, ຕາແສງ ທຸກຄາງ, ເມືອງ ບິນຢາງ, ແຂວງ ຫາຍເຢືອງ ແລະ ນຳອາຊີບຕີເງິນມາໃຫ້ໝູ່ບ້ານ. ຈາກນັ້ນ, ຊາວບ້ານ ເວ້ລາຍ ໄດ້ຮູ້ເຖິງອາຊີບທີ່ຕ້ອງການຄວາມລະອຽດລະອໍ, ດຸໝັ່ນ ແລະ ສີມືທີ່ຄ່ອງແຄ້ວນີ້. ທ່ານ ໂດ້ຊວ້ນຈ່ວຽນ ປະທານສະຫະກອນເງິນຄຳ ຝູອູງ ໃຫ້ຮູ້ວ່າ:

     ກ່ອນນີ້ ຂ້າພະເຈົ້າໄດ້ໄປຮຽນອາຊີບຢູ່ໝູ່ບ້ານ ເຈົາເຄ, ເມືອງ ບິນຢາງ, ແຂວງ ຫາຍເຢືອງ, ເວລານັ້ນໃນໝູ່ບ້ານມີພຽງ 2,3 ຄົນເຮັດອາຊີບນີ້ເທົ່ານັ້ນ. ຫຼັງຈາກນັ້ນ ໄດ້ກັບເມືອບ້ານກໍ່ເຫັນວ່າ ອາຊີບນີ້ສາມາດເສີມຂະຫຍາຍໄດ້ ແລ້ວພວກຂ້າພະເຈົ້າໄດ້ສ້າງຕັ້ງສະຫະກອນເງິນຄຳ ຝູອູງ ແລະ ຂໍຄຳເຫັນຈາກແຂວງ ໃຫ້ອະນຸຍາດສ້າງຕັ້ງໝູ່ບ້ານອາຊີບເງິນຄຳ ເວ້ລາຍ. ຊາວບ້ານ ເວ້ລາຍ ໄດ້ໄປເປີດຮ້ານຂາຍເງິນຄຳໃນທົ່ວປະເທດເພື່ອຈຳໜ່າຍຜະລິດຕະພັນຂອງໝູ່ບ້ານ. ປີ 2004 ໝູ່ບ້ານ ເວ້ລາຍ ໄດ້ຮັບຮູ້ວ່າໝູ່ບ້ານອາຊີບ.

   ຜະລິດຕະພັນຂອງໝູ່ບ້ານ ເວ້ລາຍ ແມ່ນມີຫຼາຍຮູບຫຼາຍແບບບຄື: ເຄື່ອງປະດັບເຮັດດ້ວຍເງິນຄຳ, ສາຍຄໍ, ປອກແຂນ, ແຫວນ… ຍ້ອນການຜະລິດສະດວກດີ, ສິນຄ້າເຮັດແລ້ວກໍ່ໄດ້ຈຳໜ່າຍໝົດເລີຍ. ໜຶ່ງໃນບັນດາທ່າໄດ້ປຽບ ສ້າງເປັນອິດທິພົນຊື່ສຽງຂອງໝູ່ບ້ານ ນັ້ນແມ່ນຄຸນນະພາບຜະລິດຕະພັນ ດ້ວຍເງິນຄຳ 100%. ຄຽງຂ້າງນັ້ນ, ບັນດາຮູບແບບຂອງໝູ່ບ້ານ, ບັນດາຜະລິດຕະພັນກໍ່ມີການປະດິດຄິດສ້າງ, ມີຫຼາຍຮູບແບບ, ຂະໜາດທີ່ເໝາະສົມກັບຄວາມນິຍົມຂອງຜູ້ບໍລິໂພກ. ເອື້ອຍ ຟ້າມທິທູຮ່ວຽນ ລູກຄ້າຢູ່ເມືອງ ເອີນທີ ແຂວງ ຮຶງອຽນ ຕີລາຄາວ່າ:

  ຂ້າພະເຈົ້າເຫັນວ່າ ຄຸນນະພາບເງິນຄຳຂອງ ເວ້ລາຍ ແມ່ນດີທີ່ສຸດ, ຮັບປະກັນມາດຖານ. ມີຮູບແບບງາມ, ທັນກັບຍຸກສະໄໝປະຈຸບັນ. ເມື່ອໃຊ້ເຄື່ອງປະດັບເຫັນວ່າເຫຼື້ອມງາມ, ສີບໍ່ເສົ້າ. ຂ້າພະເຈົ້າເຫັນວ່າ ຜະລິດຕະພັນເຮັດດ້ວຍເງິນຄຳຂອງ ເວ້ລາຍ ໄດ້ຕອບສະໜອງຄວາມຕ້ອງການຂອງລູກຄ້າດີທີ່ສຸດ.

ທ່ານ ເຈິ່ນກົງທ້ຽນ, ຮອງປະທານຄະນະກຳມະການ ປຊຊ ຕາແສງ ຝູອູງ (ພາບ: VOV ທ່ອງທ່ຽວ)

   ໃນໄລຍະໜຶ່ງ, ອາຊີບຕີເງິນຢູ່ໝູ່ບ້ານອາຊີບ ເວ້ລາຍ ປະສົບກັບຄວາມຫຍຸ້ງຍາກ, ຫຼາຍຄອບຄົວປະລະອາຊີບ. ແຕ່ເຖິງຢ່າງໃດກໍ່ຕາມ, ໂດຍໄດ້ຮັບການໜູນຊ່ວຍຈາກອຳນາດການປົກຄອງທ້ອງຖິ່ນ, ຕາແສງ ຝູອູງ ໄດ້ຜັນຂະຫຍາຍໂຄງຮ່າງພັດທະນາອຸດສາຫະກຳ, ອຸດສາຫະກຳຂະໜາດນ້ອຍ ປະກອບສ່ວນອະນຸລັກຮັກສາ ແລະ ເສີມຂະຫຍາຍອາຊີບ. ທ່ານ ເຈິ່ນກົງທ້ຽນ, ຮອງປະທານຄະນະກຳມະການ ປຊຊ ຕາແສງ ຝູອູງ ໃຫ້ຮູ້ວ່າ:

  ແຕ່ລະປີ, ໃນໂອກາດລະດູແລ້ງ, ຕາແສງ ໄດ້ຈັດຊຸດຝຶກອົບຮົມໃຫ້ພວກລູກຫຼານ, ສ້າງວຽກເຮັດງານທຳໃຫ້ພວກລູກຫຼານ, ເພີ່ມລາຍຮັບໃຫ້ຄອບຄົວ, ສ້າງຊີວິດການເປັນຢູ່ເປັນປົກກະຕິ. ມີຊາວບ້ານໄປທຳມາຫາກິນຢູ່ນະຄອນຫຼວງ ວຽງຈັນ ຂອງ ລາວ, ບາງຄົນກໍ່ເປີດຮ້ານຂາຍເງິນຄຳຢູ່ຫຼາຍແຂວງ ນະຄອນໃນທົ່ວປະເທດ, ບາງຄອບຄົວກໍ່ເຮັດອາຊີບຢູ່ບ້ານ.

        ປະຈຸບັນ, ໝູ່ບ້ານ ເວ້ລາຍ ມີກ່ວາ 200 ຄອບຄົວດ້ວຍຜູ້ອອກແຮງງານກ່ວາ 1000 ຄົນເຮັດອາຊີບ. ທາງເມືອງ ໄດ້ໜູນຊ່ວຍ ປຊຊ ກູ້ຢືມທຶນ ເພື່ອເປີດກ້ວາງການຜະລິດ ດຳເນີນທຸລະກິດ, ຍູ້ແຮງການສົ່ງເສີມການຄ້າ, ໂຄສະນາຜະລິດຕະພັນ. ທ່ານ ຫງວຽນຮ່ວາງວັນທຽນ ຮອງຫົວໜ້າຫ້ອງການເສດຖະກິດພື້ນຖານໂຄງລ່າງເມືອງ ເອີນທີ ໃຫ້ຮູ້ວ່າ:

   ພວກຂ້າພະເຈົ້າໄດ້ຈັດບັນດາງານຕະຫຼາດນັດ, ງານວາງສະແດງ, ການສົ່ງເສີມການຄ້າ, ໂຄສະນາຜະລິດຕະພັນໃນບັນດາພາຫະນະສື່ມວນຊົນ. ພວກຂ້າພະເຈົ້າໄດ້ລະດົມທຸກແຫຼ່ງກຳລັງ ໃຫ້ແກ່ການລົງທຶນພັດທະນາອຸດສາຫະກຳ, ອຸດສາຫະກຳຂະໜາດນ້ອຍຕາມທິດຫັນເປັນຫຼາຍຮູບຫຼາຍແບບ, ເປີດກ້ວາງຕະຫຼາດພາຍໃນປະເທດ ກໍ່ຄືຕ່າງປະເທດ, ທາງເມືອງສົ່ງເສີມບັນດາຮາກຖານອຸດສາຫະກຳ, ໝູ່ບ້ານອາຊີບ ປ່ຽນໃໝ່ເຄື່ອງວັດຖຸອຸປະກອນ ແລະ ນຳໃຊ້ຄວາມກ້າວໜ້າວິທະຍາສາດເຕັກນິກ ເຂົ້າໃນການຜະລິດ ເພື່ອຍົກສູງສະມັດຕະພາບ, ຄຸນນະພາບຂອງຜະລິດຕະພັນ.

   ກົມອຸດສາຫະກຳທ້ອງຖິ່ນ (ກະຊວງອຸດສາຫະກຳການຄ້າ ຫວຽດນາມ) ໄດ້ຄັດເລືອກຜະລິດຕະພັນເຮັດດ້ວຍເງິນຂອງສະຫະກອນເງິນຄຳ ຝູອູງ ແມ່ນໜຶ່ງໃນບັນດາຜະລິດຕະພັນອຸດສາຫະກຳຊົນນະບົດດີເດັ່ນ ຂອງເຂດພາກເໜືອໃນປີ 2014. ຍ້ອນອິດທິພົນຊື່ສຽງ ແລະ ຄຸນນະພາບ, ຜະລິດຕະພັນຂອງໝູ່ບ້ານຕີເງິນ ເວ້ລາຍ ໄດ້ມີໜ້າຢູ່ຫຼາຍແຂວງນະຄອນໃນທົ່ວປະເທດ. ບໍ່ພຽງແຕ່ເທົ່ານັ້ນ, ຜະລິດຕະພັນຂອງໝູ່ບ້ານ ຍັງໄດ້ສົ່ງອອກໄປຍັງບັນດາປະເທດຄື: ຈີນ, ລາວ, ກຳປູເຈຍ…ອີກດ້ວຍ./.