“នៅពេលដែលនាងខ្ញុំនិងក្រុមវិស្វករ   ត្រូវបានចាត់តាំងឱ្យស្រាវជ្រាវ និងអភិវឌ្ឍន៍បច្ចេកវិទ្យាមីស៊ីល ស្នូល យើងត្រូវប្រឈមមុខនឹងបញ្ហាជាច្រើន ដែលហាក់ដូចជាមិនអាចជំនះពុះពារបានដែរ។ ជាពិសេស ក្នុងនាមជាស្ត្រី សម្រាប់រូបខ្ញុំ បញ្ហាប្រឈមកាន់តែធំ នៅពេលដែលខ្ញុំត្រូវបំពេញតួនាទីជាម្តាយដែលមានកូនតូចៗ ពីរនាក់ និងការទទួលខុសត្រូវរបស់ស្ត្រីក្នុងគ្រួសារផង”។

នេះជាការសំណេះសំណាលរបស់វរសេនីយ៍ទោ Le Thi Hang ដែលជាវិស្វករយោធាស្ត្រីដ៏កម្រម្នាក់ ដែលស្រាវជ្រាវវិទ្យាសាស្ត្របច្ចេកវិទ្យាខ្ពស់ក្នុងវិស័យកាំជ្រួច ដែលជាវិស័យសម្រាប់តែបុរស។ មិនត្រឹមតែទទួលតួនាទីគ្រប់គ្រងប៉ុណ្ណោះទេ នាងក៏បានចូលរួមដោយផ្ទាល់នៅក្នុងកិច្ចការយុទ្ធសាស្ត្រ រួមទាំងការស្រាវជ្រាវ និងផលិតក្បាលនាំផ្លូវមីស៊ីលផងដែរ។ ដោយរំលឹកឡើងវិញពីពេលវេលាដែលនាងចាប់ផ្តើមដំណើរការស្រាវជ្រាវរបស់ខ្លួន វរសេនីយ៍ទោ Le Thi Hang បាននិយាយថា៖ “មានពេលខ្លះដែលសម្ពាធទាំងអស់កើតឡើងក្នុងពេលតែមួយ ធ្វើឱ្យខ្ញុំឆ្ងល់ថា តើខ្ញុំមានកម្លាំងដើម្បីបន្តដែរឬទេ? ប៉ុន្តែខ្ញុំក៏ប្រាប់ខ្លួនឯងថា បើខ្ញុំដើរថយក្រោយ តើនរណានឹងបោះជំហានទៅមុខ? បើខ្ញុំបោះបង់ តើការលំបាកនេះនឹងផ្ទេរឲ្យអ្នកណា”?

ជាមួយនឹងចំណង់ចំណូលចិត្ត ការតស៊ូ ការច្នៃប្រឌិត និងស្មារតី "ដរាបណាមានការងារ និងកម្លាំង នោះហើយយើងនឹងបំពេញឲ្យទាល់តែបាន" នាងនិងសហការីបានដោះស្រាយបញ្ហាស្មុគស្មាញបំផុតនៃឧស្សាហកម្មបច្ចេកវិទ្យាការពារជាតិបន្តិចម្តងៗ។ ក្រុមស្រាវជ្រាវបានកាត់បន្ថយពេលវេលាផលិត និងសាកល្បងយ៉ាងសំខាន់ ដោយជួយសន្សំប្រាក់រាប់រយពាន់លានដុងសម្រាប់ថវិកាការពារជាតិ។ នៅឆ្នាំ ២០២០ ផលិតផលក្បាលគ្រាប់មីស៊ីលនាំផ្លូវដោយក្រុមស្រាវជ្រាវបង្កើតឡើង ត្រូវបានក្រសួងការពារប្រទេសទទួលស្គាល់ ដែលជាព្រឹត្តិការណ៍ដ៏សំខាន់មួយនៅពេលដែលវៀតណាមជាលើកដំបូងដែលមានភាពគ្រប់គ្រាន់ក្នុងការស្រាវជ្រាវ រចនា និងផលិតក្បាលគ្រាប់នាំផ្លូវដោយជោគជ័យ ដែលជាផ្នែកសំខាន់បំផុតនៃប្រព័ន្ធមីស៊ីល។

“ផលិតផលមានគុណភាពដូចផលិតផលបរទេស មានសារៈសំខាន់ខ្លាំងខាងនយោបាយ យោធា និងសេដ្ឋកិច្ច... ជាពិសេសរួមចំណែកដល់សន្តិសុខ និងប្រតិបត្តិការប្រកបដោយជោគជ័យ ពង្រឹងកម្លាំង និងការត្រៀមប្រយុទ្ធរបស់កងទ័ពវៀតណាម"។

មិនឈប់ត្រឹមនេះទេ ក្នុងរយៈពេល ៨ ឆ្នាំកន្លងមកនេះ នាងនិងមិត្តរួមក្រុមបានបង្កើតដោយជោគជ័យនូវ ផលិតផលចំនួន ៣ដែលជា ក្បាលម៉ាស៊ីននាំផ្លូវស្វ័យប្រវត្តិ និងរ៉ាដាសម្រាប់កាំជ្រួចប្រឆាំងនាវា ជាមួយនឹងលក្ខណៈពិសេសល្អលើសគេ ដោយហេតុនេះរួមចំណែកដល់ការកែលម្អសមត្ថភាពការពារជាតិ សន្សំថវិកាការពារជាតិ និងកសាងមូលដ្ឋានគ្រឹះសម្រាប់អាវុធទំនើបជំនាន់ក្រោយ។

ជាមួយនឹងការរួមវិភាគទានដ៏ឆ្នើម ខែសីហា ឆ្នាំ ២០២៥ វរសេនីយ៍ទោ Le Thi Hang បានទទួលកិត្តនាមជាវីរៈនារីនៃកងកម្លាំងប្រដាប់អាវុធប្រជាជនក្នុងដំណាក់កាលផ្លាស់ប្តូរថ្មី។  នេះគឺជារង្វាន់ដ៏សក្តិសមសម្រាប់ដំណើរនៃការខិតខំប្រឹងប្រែងឥតឈប់ឈរសម្រាប់បុព្វហេតុទំនើបកម្មយោធា។

ប្រសិនបើ វរសេនីយ៍ទោ Le Thi Hang ជារូបភាពនៃភាពវៃឆ្លាត និងភាពតស៊ូក្នុងការស្រាវជ្រាវបច្ចេកវិទ្យាការពារជាតិនោះ គឺវរសេនីយ៍ត្រី Vu Nhat Huong ជំនួយការនាយកដ្ឋានសហប្រតិបត្តិការអន្តរជាតិ នាយកដ្ឋានរក្សាសន្តិភាពវៀតណាម គឺជាគំរូឆ្នើមក្នុងការងារអន្តរជាតិ នៅពេលនាំយករូបភាពរបស់យុទ្ធជនលោកអ៊ំហូ ទៅកាន់មិត្តអន្តរជាតិក្នុងតួនាទីជាមន្ត្រីរក្សាសន្តិភាពនៅសាធារណរដ្ឋអាហ្វ្រិកកណ្តាល។ អ្នកស្រី Vu Nhat Huong រំលឹកឡើងវិញ៖ “ក្នុងខែវិច្ឆិកា ឆ្នាំ ២០២១ ខ្ញុំមានកិត្តិយសជាយុទ្ធនារីទី ៧ ដែលត្រូវបានបញ្ជូនទៅបំពេញបេសកកម្មនៅបេសកកម្មសាធារណៈរដ្ឋអាហ្រ្វិកកណ្តាលក្នុងនាមជាបុគ្គលម្នាក់ ដោយទទួលបានមុខតំណែងជាមន្ត្រីទំនាក់ទំនងដំបូងរបស់វៀតណាមនៅក្នុងបេសកកម្ម។ ទទួលបានកិច្ចការនេះ ខ្ញុំសប្បាយចិត្តផងទាំងបារម្ភផង។ រីករាយដែលអាចបំពេញក្តីស្រមៃបានស្លៀកឯកសណ្ឋានទាហានមួកខៀវវៀតណាម។ សាធារណរដ្ឋអាហ្រ្វិកកណ្តាលមានអាកាសធាតុអាក្រក់ អសន្តិសុខ សង្គ្រាម ជម្លោះ  ភាពខុសគ្នានៃភាសា និងវប្បធម៌ក៏ជាឧបសគ្គមើលមិនឃើញផងដែរ។ ជាពិសេសសម្រាប់ស្ត្រីយើង ការលំបាកទាំងអស់គឺកើនឡើងទ្វេដង”។

ជីវភាពក្រីក្រ អាកាសធាតុអាក្រក់ គ្រុនចាញ់ និងជំងឺអេបូឡា... បានធ្វើឱ្យការងារគ្រាដំបូងរបស់នាងជួបការលំបាកខ្លាំង។ ប៉ុន្តែ ដោយឆន្ទៈនិងការទទួលខុសត្រូវ អ្នកស្រី Huong បានជម្នះគ្រប់យ៉ាង។ ក្រៅពីការងារផ្សព្វផ្សាយ នាងក៏ចូលរួមក្នុងសមយុទ្ធ បង្កើតយុទ្ធសាស្ត្រព័ត៌មាន និងរៀបចំសកម្មភាពស្ម័គ្រចិត្តឆ្ពោះទៅសហគមន៍។ នាងបានចូលរួមដោយផ្ទាល់ក្នុងការគាំទ្រការអប់រំផ្លូវភេទដល់ក្មេងស្រី ការថែរក្សាសុខភាពរបស់ស្ត្រីរាប់រយនាក់ ចែកចាយសម្ភារៈសិក្សា ណែនាំមនុស្សឱ្យបង្កើនផលិតកម្ម... សកម្មភាពនីមួយៗ ត្រូវបានអនុវត្តដោយមោទនភាព និងស្មោះត្រង់។

“ជាពិសេស ក្នុងនាមខ្ញុំជានាយទាហានស្ត្រី ខ្ញុំតែងតែព្យាយាម និងខិតខំប្រឹងប្រែងផ្សព្វផ្សាយរូបភាពរបស់កងទ័ពលោកអ៊ំហូ និងគុណសម្បតិ្តរបស់នារីវៀតណាម ទៅកាន់មេបញ្ជាការបេសកកម្ម សហការីអន្តរជាតិ និងសហគមន៍មូលដ្ឋាន”។

បន្ទាប់ពីបំពេញការងារនៅបេសកកម្មរក្សាសន្តិភាពរបស់អង្គការសហប្រជាជាតិនៅសាធារណរដ្ឋអាហ្រ្វិកកណ្តាល វរសេនីយ៍ត្រី Vu Nhat Huong គឺជានាយទាហានស្រីមួយរូបក្នុងចំណោមនាយទាហានស្រីមួយចំនួនដែលអង្គការសហប្រជាជាតិលើកតម្កើងជាគំរូធ្វើសកម្មភាពដើម្បីអភិវឌ្ឍន៍ប្រកបដោយចេរភាព។ វរសេនីយ៍ទោ Le Thi Hang និងវរសេនីយ៍ត្រី Vu Nhat Huong គឺជានាយទាហានស្រី្តពីរនាក់ក្នុងចំណោមនាយទាហានស្រី្តជាច្រើនដែលបានធ្វើការ និងកំពុងធ្វើការក្នុងជួរកងទ័ព។ ទោះបីជាធ្វើការក្នុងវិស័យផ្សេងៗគ្នាក៏ដោយ ក៏ពួកគេចែករំលែកនូវឧត្តមគតិដូចគ្នា គឺការលះបង់ខ្លួនឯងចំពោះមាតុភូមិដោយទេពកោសល្យ ភាពវៃឆ្លាត និងភាពក្លាហានរបស់ខ្លួន។ អ្នកទាំងពីរបានរួមចំណែកក្នុងការសរសេររឿងដ៏ស្រស់ស្អាតអំពីនាយទាហានស្រី្តនៃយុគសម័យថ្មី៖ រឹងមាំក្នុងការងារ សុភាពរាបសារក្នុងជីវភាពប្រចាំថ្ងៃ ក្លាហានក្នុងគ្រាលំបាករាប់មិនអស់។ នាយទាហានស្រីទាំងនោះគឺជារូបភាពដ៏ស្រស់ស្អាតនៃ "ផ្កាកុលាបដែកថែប" នៅក្នុងជួរកងទ័ពប្រជាជនវៀតណាម៕