រថយន្តដឹកជំនួយមនុស្សធម៌តម្រង់ជួរនៅជិតច្រកព្រំដែន Rafah រវាងប្រទេសអេហ្ស៊ីប និងតំបន់ Gaza ក្នុងទីក្រុង Rafah ប្រទេសអេហ្ស៊ីប កាលពីថ្ងៃទី ៦ ខែសីហា ឆ្នាំ ២០២៥  (រូបថត៖ REUTERS/Amr Abdallah Dalsh)

នេះគឺជាការដឹកជញ្ជូនជំនួយមនុស្សធម៌លើកទី ៨៩ ដែលត្រូវបានអង្គការអឌ្ឍចន្ទក្រហមអេហ្ស៊ីបដឹកជញ្ជូនទៅកាន់តំបន់ហ្គាហ្សា ក្រោមគំនិតផ្តួចផ្តើម "Zad Al-Izza: ពីអេហ្ស៊ីបទៅហ្គាហ្សា" ដែលបានចាប់ផ្តើមនៅចុងខែកក្កដា ឆ្នាំនេះ។ ការដឹកជញ្ជូនបន្ទាប់កំពុងត្រូវបានរៀបចំជាបន្ទាន់ ហើយអាចនឹងមកដល់ហ្គាហ្សាក្នុងរយៈពេលប៉ុន្មានម៉ោងខាងមុខនេះ។

នៅថ្ងៃដដែលនោះ ប្រភពព័ត៌មានប៉ាឡេស្ទីនបានចោទប្រកាន់កងទ័ពអ៊ីស្រាអែលថាបានធ្វើការវាយប្រហារតាមអាកាសយ៉ាងហោចណាស់ពីរលើកបន្ថែមទៀតលើតំបន់ហ្គាហ្សា។ ការវាយប្រហារលើកដំបូងបានកំណត់គោល ដៅលើជំរំជនភៀសខ្លួន Jabalia នៅភាគខាងជើងតំបន់ហ្គាហ្សា ដោយបានសម្លាប់ស្ត្រីម្នាក់ និងមនុស្សរបួសប្រាំមួយនាក់ផ្សេងទៀត។ ការវាយប្រហារលើកទីពីរបានវាយប្រហារតំបន់ Deir al-Balah នៅកណ្តាលតំបន់ហ្គាហ្សា ដោយបណ្តាលឲ្យមនុស្សមួយនាក់ត្រូវស្លាប់។

នៅក្នុងបម្រែបម្រួលពាក់ព័ន្ធមួយ ប៉ូលីសអ៊ីស្រាអែលកាលពីម្សិលមិញបានឆ្មក់ចូលទីស្នាក់ការកណ្តាលរបស់ទីភ្នាក់ងារសង្គ្រោះ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) នៅភាគខាងកើតក្រុងយេរូសាឡឹម និងបានលើកទង់ជាតិអ៊ីស្រាអែល។ អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសយ៉ាងខ្លាំងចំពោះការឆ្មក់ចូលនេះ ដោយអំពាវនាវឱ្យអ៊ីស្រាអែលចាត់វិធានការចាំបាច់ជាបន្ទាន់ដើម្បីស្តារ និងរក្សាភាពមិនអាចរំលោភបានរបស់ទីស្នាក់ការកណ្តាល UNRWA និងជៀសវាងសកម្មភាពស្រដៀងគ្នាណាមួយបន្ថែមទៀត៕