បើកចេញដំណាក់កាលថ្មីនៃកិច្ចសហប្រតិបត្តិការកាន់តែស៊ីជម្រៅនិងមានប្រសិទ្ធភាពជាងរវាងវៀតណាមនិងអង់ហ្គោឡា
Viet Cuong -
(VOVWORLD) - ទំនាក់ទំនងជិតស្និទ្ធរវាងវៀតណាមនិងអង់ហ្គោឡា គឺជាមូលដ្ឋានគ្រឹះដ៏រឹងមាំសម្រាប់ប្រទេសទាំងពីរបើកចេញដំណាក់កាលអភិវឌ្ឍន៍ថ្មី។ នោះគឺជាការអះអាងរបស់ប្រធានរដ្ឋ វៀតណាម លោក លឿង គឿង ក្នុងជំនួបពិភាក្សាជាមួយប្រធានាធិបតីអង់ហ្គោឡា លោក João Manuel Gonçalves Lourenço ដែលប្រព្រឹត្តទៅនាថ្ងៃទី ៧ ខែសីហា (ម៉ោងក្នុងស្រុក) នៅរដ្ឋធានី Luanda ក្នុងក្របខ័ណ្ឌនៃដំណើរទស្សនកិច្ចផ្លូវរដ្ឋរបស់ប្រធានរដ្ឋ លោក លឿងគឿង និងភរិយាទៅកាន់សាធារណរដ្ឋអង់ហ្គោឡា។
ប្រធានរដ្ឋ លោក លឿង គឿង បានចាត់ទុកថា ប្រទេសទាំងពីរនៅមានសក្កានុពលជាច្រើនដើម្បីរួមគ្នា កសាង “ភាពជាដៃគូសហប្រតិបត្តិការសម្រាប់ការអភិវឌ្ឍទៅវិញទៅមក” រវាងវៀតណាម និងអង់ហ្គោឡា ដើម្បីក្លាយជាគំរូសម្រាប់កិច្ចសហប្រតិបត្តិការខាងត្បូង-ខាងត្បូង។ ដូច្នេះ ភាគីទាំងពីរត្រូវពង្រឹងកិច្ចសហប្រតិបត្តិការលើវិស័យការពារជាតិ សន្តិសុខ សុខាភិបាល អប់រំ និងកសិកម្ម។ ប្រធានរដ្ឋ លោក លឿង គឿង បានស្នើឲ្យភ្នាក់ងារនានារបស់អង់ហ្គោឡា បង្កើតលក្ខណៈងាយស្រួល និងផ្តល់ការលើកទឹកចិត្តសម្រាប់សហគ្រាសវៀតណាមឆាប់ដាក់ពង្រាយការវិនិយោគលើវិស័យប្រេង ឧស្ម័ន ថាមពល ការជីកយករ៉ែ កែច្នៃរ៉ែ លោហធាតុ ជាដើម។ លោកប្រធានរដ្ឋក៏បានស្នើឲ្យភាគីទាំងពីរ បង្កើនសកម្មភាពជំរុញពាណិជ្ជកម្មនិងការតភ្ជាប់ពាណិជ្ជកម្ម សំដៅនាំទំហំពាណិជ្ជកម្មទ្វេភាគីឡើងដល់ ១ ពាន់លានដុល្លារនាពេលខាងមុខ។
 ប្រធានរដ្ឋវៀតណាម លោក លឿង គឿង និងប្រធានាធិបតីអង់ហ្គោឡា លោក João Manuel Gonçalves Lourenço បានជួបជាមួយសារព័ត៌មានដើម្បីប្រកាសលទ្ធផលនៃកិច្ចសន្ទនា។ រូបថត៖ Viet Cuong/VOV |
ទាក់ទិននឹងបញ្ហាក្នុងតំបន់និងអន្តរជាតិ ដែលមានការយកចិត្តទុកដាក់គ្នាទៅវិញទៅមក លោកប្រធានរដ្ឋវៀតណាមស្នើឲ្យអង់ហ្គោឡា គាំទ្រវៀតណាមក្នុងការបង្កើនវត្តមាន ពង្រីកកិច្ចសហប្រតិបត្តិការដ៏សំខាន់ជាមួយសហភាពអាហ្វ្រិក និងគាំទ្របេក្ខភាពវៀតណាមសម្រាប់អង្គការអន្តរជាតិ។
ចំណែកឯលោកប្រធានាធិបតី លោក João Manuel Gonçalves Lourenço បានស្នើឲ្យវៀតណាមជួយអង់ហ្គោឡាក្នុងការអភិវឌ្ឍវិស័យកសិកម្ម ជាពិសេសលើការដាំដុះស្រូវ និងដើមឈើហូបផ្លែ; សង្ឃឹមថា នឹងមានផលិតផលវៀតណាមច្រើនទៀតដែលមានវត្តមានក្នុងទីផ្សារអង់ហ្គោឡា។
 ប្រធានាធិបតីអង់ហ្គោឡា លោក João Manuel Gonçalves Lourenço។ រូបថត៖ Viet Cuong/VOV |
នៅចុងបញ្ចប់កិច្ចពិភាក្សា ប្រធានរដ្ឋ លោក លឿង គឿង និងប្រធានាធិបតីលោក João Manuel Gonçalves Lourenço បានចេញសេចក្តីថ្លែងការណ៍រួមរវាងវៀតណាម និងអង់ហ្គោឡា បង្ហាញពីការប្តេជ្ញាចិត្តរបស់ភាគីទាំងពីរ ក្នុងការបើកដំណាក់កាលថ្មីក្នុងទំនាក់ទំនងទ្វេភាគី; ធ្វើជាសាក្សីក្នុងពិធីចុះហត្ថលេខាលើឯកសារកិច្ចសហប្រតិបត្តិការសំខាន់ៗ។
 ប្រធានរដ្ឋវៀតណាម លោក លឿង គឿង ថ្លែងក្នុងសន្និសីទសារព័ត៌មាន។ រូបថត៖ Viet Cuong/VOV |
អញ្ជើញជួបជាមួយសារព័ត៌មានក្រោយកិច្ចពិភាក្សា ប្រធានរដ្ឋ លោក លឿង គឿង បានមានប្រសាសន៍ថា៖ “ទាក់ទងនឹងសេដ្ឋកិច្ច ឈរលើមូលដ្ឋានសក្ដានុពលដ៏ធំធេង ក៏ដូចជាជំហរនិងភាពរឹងមាំរបស់ប្រទេសនីមួយៗ បង្កើតលក្ខខណ្ឌអំណោយផលជាងទៀតសម្រាប់ផលិតផលជាប្រៀបខ្លាំងរបស់ប្រទេសទាំងពីរក្នុងការជ្រាបចូលទីផ្សារគ្នាទៅវិញទៅមក។ ភាគីទាំងពីរក៏បានឯកភាពបង្កើនការចែករំលែកកាលានុវត្តភាពវិនិយោគ បង្កលក្ខណៈងាយស្រួលសម្រាប់ធុរកិច្ចនៃប្រទេសទាំងពីរចូលរួមលើគម្រោងក្នុងវិស័យអាទិភាព ជាពិសេសវិស័យកសិកម្ម ប្រេងនិងឧស្ម័ន ថាមពល បច្ចេកវិទ្យាព័ត៌មាន ...។ ទន្ទឹមនឹងការបន្តជំរុញកិច្ចសហប្រតិបត្តិការលើវិស័យប្រពៃណីដូចជា អប់រំ-បណ្តុះបណ្តាល សុខាភិបាល កសិកម្ម នាពេលខាងមុខ ប្រទេសទាំងពីរនឹងពង្រឹងកិច្ចសហប្រតិបត្តិការលើវិស័យសក្តានុពលដូចជា៖ វិស័យការពារជាតិ បច្ចេកវិទ្យាព័ត៌មាន វិទ្យាសាស្ត្រ-បច្ចេកវិទ្យា ការផ្លាស់ប្តូរឌីជីថល ការផ្លាស់ប្តូរបៃតង..."។
ក្នុងឱកាសនេះ លោកប្រធានរដ្ឋបានស្នើឱ្យអង់ហ្កោឡា បន្តយកចិត្តទុកដាក់ធានាសន្តិសុខ សុវត្ថិភាព និងបង្កលក្ខណៈងាយស្រួលសម្រាប់សហគមន៍ និងអាជីវកម្មវៀតណាមក្នុងការរស់នៅ ធ្វើការ និងប្រតិបត្តិការប្រកបដោយស្ថិរភាពនៅអង់ហ្គោឡា៕
ឯកសារកិច្ចសហប្រតិបត្តិការដែលបានចុះហត្ថលេខាដោយប្រទេសទាំងពីរក្នុងអំឡុងពេលទស្សនកិច្ចនេះរួមមាន៖
(i) កិច្ចព្រមព្រៀងស្តីពីការផ្ទេរអ្នកដែលត្រូវបានកាត់ទោសរវាងសាធារណរដ្ឋសង្គមនិយមវៀតណាមនិងសាធារណរដ្ឋអង់ហ្គោឡា។
(ii) កិច្ចព្រមព្រៀងស្តីពីជំនួយផ្លូវច្បាប់ទៅវិញទៅមកក្នុងបញ្ហាព្រហ្មទណ្ឌរវាងសាធារណរដ្ឋសង្គមនិយមវៀតណាម និងសាធារណរដ្ឋអង់ហ្គោឡា។
(iii) អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការក្នុងការទប់ស្កាត់ឧក្រិដ្ឋកម្មរវាងអយ្យការប្រជាជនកំពូលនៃប្រទេសវៀតណាម និងការិយាល័យអគ្គមេធាវីនៃប្រទេសអង់ហ្គោឡា។
(iv) លិខិតនៃចេតនាស្តីពីកិច្ចសហប្រតិបត្តិការរវាងក្រសួងការពារប្រទេសវៀតណាម និងក្រសួងការពារជាតិនៃប្រទេសអង់ហ្គោឡា។
(v) ផែនការសកម្មភាពស្តីពីកិច្ចសហប្រតិបត្តិការកសិកម្មរវាងក្រសួងកសិកម្ម និងបរិស្ថាននៃប្រទេសវៀតណាមនិងក្រសួងកសិកម្ម និងរុក្ខាប្រមាញ់នៃប្រទេសអង់ហ្គោឡា។
(vi) កិច្ចព្រមព្រៀងសហប្រតិបត្តិការរវាងទូរទស្សន៍វៀតណាម និងទូរទស្សន៍ជាតិអង់ហ្គោឡា។
អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការប្រេង និងឧស្ម័ន រវាងសាជីវកម្មរុករក ផលិតប្រេង និងឧស្ម័នវៀតណាម និងក្រុមហ៊ុនរុករក ផលិតប្រេង និងឧស្ម័នអង់ហ្គោឡា (Sonangol E&P); កំណត់ហេតុនៃកិច្ចសហប្រតិបត្តិការរវាងសហព័ន្ធពាណិជ្ជកម្មនិងឧស្សាហកម្មវៀតណាម និងសភាពាណិជ្ជកម្ម និងឧស្សាហកម្មអង់ហ្គោឡា៕
Viet Cuong