(VOVWORLD) - ຫາຍຟ່ອງ ສວມບົດບາດຍຸດທະສາດສຳລັບພື້ນຖານເສດຖະກິດແຫ່ງຊາດ, ແມ່ນ 1 ໃນ 3 ຂົ້ວ ຂະຫຍາຍຕົວຫຼັກຂອງທົ່ວປະເທດ, ການໂຮມເຂົ້າກັບ ຫາຍເຢືອງ ໄດ້ເປີດພື້ນທີ່ ແລະ ຄວາມສາມາດບົ່ມຊ້ອນໃນການພັດທະນາຢ່າງກ້າວກະໂດດ, ສ້າງປັດໄຈເພື່ອ ໃຫ້ນະຄອນ ສືບຕໍ່ບຸກທະລຸ, ປະຕິບັດສຳເລັດບັນດາເປົ້າໝາຍເສດຖະກິດ-ສັງຄົມ ທີ່ສຳຄັນຕ່າງໆ.
ທ່ານຮອງນາຍົກລັດຖະມົນຕີ ຫວຽດນາມ ໂຮ່ດຶກເຟີກ ຢັ້ງຢືນຄືດັ່ງກ່າວ ທີ່ການເຮັດວຽກກັບນະຄອນຫາຍຟ່ອງ, ໃນຕອນບ່າຍວັນທີ 11/09 ຢູ່ສູປະຊຸມ - ການສະແດງນະຄອນ.
 ທ່ານຮອງນາຍົກລັດຖະມົນຕີ ຫວຽດນາມ ໂຮ່ດຶກເຟີກ |
ບົດລາຍງານຂອງນະຄອນໄດ້ສະແດງໃຫ້ເຫັນວ່າ ບັນດາຕົວເລກເສດຖະກິດ-ສັງຄົມໃນ 8 ເດືອນ ທີ່ຜ່ານມາ ລ້ວນແຕ່ບັນລຸໄດ້ລະດັບສູງ ເມື່ອທຽບກັບ ມາດຖານລວມ ທົ່ວປະເທດ. GRDP 6 ເດືອນ ຕົ້ນປີ ເພີ່ມຂຶ້ນ 11,2 % ເມື່ອທຽບກັບໄລຍະດຽວກັນ. ດັດຊະນີການຜະລິດອຸດສາຫະກຳ (IIP) 8 ເດືອນ ເພີ່ມຂຶ້ນ 11,51 %. ຍອດວົງເງິນສົ່ງອອກ ບັນລຸໄດ້ 31,8 ຕື້ ໂດລາສະຫະລັດ, ເພີ່ມຂຶ້ນ 6,25 %
ກ່ຽວກັບທິດທາງພັດທະນາໃນໄລຍະຈະມາເຖິງ, ທ່ານຮອງນາຍົກ ຮຽກຮ້ອງໃຫ້ນະຄອນຕ້ອງພັດທະນາຕິດພັນກັບບັນດາເສົາຄໍ້າຫຼັກ, ເຊັ່ນ: ອຸດສາຫະກຳທ່າກຳປັ່ນທະເລ, ການຂົນສົ່ງ, ທາງນ້ຳພາຍໃນປະເທດ; ຍູ້ແຮງການພັດທະນາອຸດສາຫະກຳປຸງແຕ່ງ, ປະດິດ, ພະລັງງານທົດແທນ, ກະສິກຳເຕັກໂນໂລຊີສູງ, ເສດຖະກິດທາງທະເລ; ພັດທະນາການບໍລິການ, ການຄ້າ, ການທ່ອງທ່ຽວ, ການຫັນເປັນດິຈິຕອນ, ນະວັດຕະກຳ.