(vovworld) – ຕອນບ່າຍວັນທີ 25/2, ໃນການຕ້ອນຮັບທ່ານ Robert S. Zeigler, ຜູ້ອຳນວຍການໃຫຍ່ສະຖາບັນຄົ້ນຄ້ວາ ເຂົ້າສາກົນ (ຫຼື IRRI) ທີ່ພວມຢູ່ຢ້ຽມຢາມ ຫວຽດນາມ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ຕີລາຄາສູງ ການຮ່ວມມື, ຊ່ວຍເຫຼືອ ແລະ ໜູນຊ່ວຍຢ່າງມີປະສິດທິຜົນຂອງສະຖາບັນຄົ້ນຄ້ວາເຂົ້າເປືອກ ສາກົນ IRRI ກັບ ຫວຽດນາມ ໃນໄລຍະຜ່ານມາ. ທ່ານນາຍົກລັດຖະມົນຕີ ສະແດງຄວາມຫວັງວ່າ: IRRI ຈະໃຫ້ການຮ່ວມມື ກັບ ຫວຽດນາມ ໃນການຄົ້ນຄ້ວາຊອກຫາບັນດາແນວພັນເຂົ້າ, ບັນດາຂັ້ນຕອນການປູກຝັງ ຕອບສະໜອງບັນດາຄວາມຮຽກຮ້ອງຕ້ອງການ ເນື່ອງຈາກຜົນສະທ້ອນຂອງການປ່ຽນແປງຂອງດິນຟ້າອາກາດ ແລະ ນ້ຳທະເລຂຶ້ນສູງ, ສ້າງເງື່ອນໄຂເພື່ອໃຫ້ບັນດານັກຊ່ຽວຊານກະສິກຳຂອງ ຫວຽດນາມ ເຮັດວຽກຢູ່ IRRI ກໍຄືເພີ່ມທະວີການຮ່ວມມືກັບ ຫວຽດນາມ ໃນຂົງເຂດບຳລຸງສ້າງ ກ່ຽວກັບການປູກເຂົ້າ.