(vovworld) – ເວລາ 5 ໂມງແລງຂອງຊຸ່ມວັນທ້າຍສັບປະດາ, ເມື່ອແສງແດດຄ່ອຍໆຫາຍໄປ, ກໍ່ແມ່ນເວລາທີ່ຜູ້ຂາຍດອກໄມ້ຢູ່ຮ້ານຕ່າງໆລຽບຕາມເສັ້ນທາງເຂົ້າຕະຫຼາດດ່າຫຼາດຊັບຊ້ອນເຄື່ອງຂອງໄວ້ ເພື່ອສະຫງວນບໍລິເວນໃຫ້ຕະຫຼາດກາງຄືນດ່າຫຼາດ ຫຼືເອີ້ນວ່າຕະຫຼາດເອິມຝູ ”
ນາລົກ”
. ຕະຫຼາດກາງຄືນດ່າຫຼາດມີຫຼາຍຈຸດພິເສດສະເພາະທີ່ໄດ້ສ້າງຄວາມພາກພູມໃຈໃຫ້ແກ່ທຸກຄົນທີ່ມາແຫ່ງນີ້. ໄປທ່ອງທ່ຽວດ່າຫຼາກ, ຖ້າບໍ່ຄົ້ນຫາຕະຫຼາດກາງຄືນ, ທ່ານຈະຮູ້ສຶກເສຍດາຍຢ່າງແນ່ນອນ.
(ຕະຫຼາດກາງຄືນດ່າຫຼາດ)
ຈາກໜອງຊວນເຮືອງໄປລຽບຕາມຖະໜົນ ເລດ້າຍແຮ່ງ ທີ່ມີຄວາມຍາວປະມານ 500 ແມັດ, ໃນເວລາແຕ່ 5-7 ນາທີ, ທ່ານຈະໄປຮອດຕະຫຼາດກາງຄືນດ່າຫຼາດ. ຕະຫຼາດຖືກຈັດຂຶ້ນໃນກາງຄືນວັນເສົາ ແລະ ວັນອາທິດ, ເວລາແຕ່ 19 ໂມງມື້ນີ້ ເຖິງ 3-4 ໂມງຂອງມື້ຕໍ່ມາ. ໃນໄລຍະເວລານີ້, ບັນດາເສັ້ນທາງຢູ່ອ້ອມຕະຫຼາດກາງຄືນກໍ່ຫ້າມບໍ່ໃຫ້ພາຫະນະຈະລາຈອນໄປມາ ເພື່ອຮັບໃຊ້ໃຫ້ຄົນຍ່າງ.
ເມື່ອເວົ້າເຖິງຊື່ຕະຫຼາດໃນເມື່ອກ່ອນ, ທ່ານ ຫງວຽນວັນອານ, ຜູ້ດຳລົງຊີວິດຢູ່ເຂດຕະຫຼາດກາງຄືນໃຫ້ຮູ້ວ່າ:
“ກ່ອນນີ້ຕະຫຼາດມີຊື່ວ່າ ເອິມຝູ ”ນາລົກ”, ເພາະວ່າຢູ່ເຂດນີ້ບໍ່ທັນມີໄຟຟ້າເຍືອງທາງ, ພຽງແຕ່ມີແສງໂຄມໄຟທີ່ມືດມົວຂອງຜູ້ເລາະຂາຍສິນຄ້າເທົ່ານັ້ນ, ເຮັດໃຫ້ຜູ້ຄົນທັງຫຼາຍຮູ້ສຶກປຽບເໝືອນແດນນາລົກ. ແຕ່ເມື່ອມີລະບົບໄຟຟ້າເຍືອງທາງແລ້ວ, ຕະຫຼາດແຫ່ງນີ້ຍັງຄົງຮັກສາຊື່ເດີມຢູ່ ເພາະຕະຫຼາດໄດ້ຕິດພັນກັບປະຊາຊົນຢູ່ທີ່ນີ້ມາແຕ່ດົນແລ້ວ, ດັ່ງນັ້ນເຂົາເຈົ້າຈຶ່ງບໍ່ຢາກປ່ຽນຊື່“
ມາຕະຫຼາດແຫ່ງນີ້, ທ່ານຈະເຫັນສິນຄ້າຫຼາຍປະເພດທີ່ວາງຂາຍໃນຮ້ານຕ່າງໆຄື: ເຄື່ອງທີ່ລະນຶກ, ດ້ວຍເກາະຫອຍລູກກະແຈ, ຕຸກກະຕາ, ກະເປົ່າເຮັດດ້ວຍຜ້າພື້ນເມືອງ ແລະ ໂສ້ງເສື້ອຫຼາຍປະເພດທີ່ມີສີສັນຫຼາກຫຼາຍ. ຍິ່ງເຂົ້າເຂດໃຈກາງຕະຫຼາດເທົ່າໃດຈຳນວນສິນຄ້າທີ່ຖືກວາງຂາຍກໍ່ຫຼາຍເທົ່ານັ້ນ, ຜູ້ຊື້ຜູ້ຂາຍກໍ່ຫຼາຍກວ່າ, ອັນໄດ້ເຮັດໃຫ້ຕະຫຼາດມີຄວາມຄຶກໂຄມໜາແໜ້ນຍິ່ງຂຶ້ນ:
ຕະຫຼາດກາງຄືນດ່າຫຼາດກໍ່ແມ່ນບ່ອນທີ່ແຂກທ່ອງທ່ຽວສາກົນ ກໍ່ຄືພວກເພື່ອນໜຸ່ມຢູ່ແຫ່ງນີ້ມັກມາຊື້ເຄື່ອງຂອງ. ຍ້ອນຢູ່ທີ່ນີ້ອາກາດເຢັນສະບາຍໃນຍາມກາງເວັນ, ແຕ່ພັດໜາວໃນຍາມ
![ຄົ້ນຫາຕະຫຼາດກາງຄືນດ່າຫຼາດ - ảnh 2](https://image.vovworld.vn/w730/uploaded/vovworld/bcgmbuiq/2014_08_14/3.jpg)
ກາງຄືນ, ດັ່ງນັ້ນໃນຕະຫຼາດກໍ່ຂາຍເຄື່ອງກັນໜາວດ້ວຍແລນຫຼາຍປະເພດຄື: ຜ້າພັນຄໍ, ໝວກ ແລະ ເສື້ອ, ສິ່ງພິເສດນັ້ນແມ່ນເຄືອ່ງແລນຢູ່ທີ່ນີ້ມີລາຄາຖືກກວ່າຢູ່ບ່ອນອື່ນ, ນັກທ່ອງທ່ຽວສາມາດຕໍ່ລາຄາ ແລະ ເລືອກເຟັ້ນຕາມໃຈມັກ. ປ້າ ຫງວຽນທິລົ້ວ, ເຈົ້າຂອງຮ້ານຂາຍເຄື່ອງກັນໜາວໃຫ້ຮູ້ວ່າ:
“ນັກທ່ອງທ່ຽວທັງພາຍໃນປະເທດ ແລະ ຕ່າງປະເທດມາແຫ່ງນີ້, ນອກຈາກກິນດຶ່ມ, ລະຫຼິ້ນບັນເທິງແລ້ວ, ເຂົາເຈົ້າຍັງມັກມາຕະຫຼາດເພື່ອຊື້ເສື້ອ, ຜ້າພັນຄໍ ແລະ ໝວກແລນໃຫ້ຕົນ ຫຼື ເປັນຂອງຕ້ອນໃຫ້ພີ່ນ້ອງ ແລະ ໝູ່ເພື່ອນອີກ, ລາຄາໃຫ້ຜະລິດຕະພັນແຕ່ລະອັນພຽງປະມານແຕ່ 40.000 -100.000 ດົ່ງເທົ່ານັ້ນ. ແຕ່ລະມື້ຂ້າພະເຈົ້າຂາຍເສື້ອ, ຜ້າແລນໄດ້ປະມານ 15-20 ອັນ”.
ຢູ່ຕະຫຼາດກາງຄືນຍັງມີບັນດາຮ້ານຂາຍອາຫານທີ່ເປັນເອກະລັກສະເພາະຫຼາຍເຍື່ອງເພື່ອຮັບໃຊ້ນັກທ່ອງທ່ຽວ, ນອກນັ້ນຍັງມີອາຫານທຳມະດາສາມັນຫຼາຍປະເພດທີ່ສ້າງຄວາມສະດວກໃຫ້ນັກທ່ອງທ່ຽວທັງໄປທັງກິນໄດ້ຄື: ສາລີລວກ, ມັນດາງປີ້ງ, ປາມືກປີ້ງ...ອີກ . ອ້າຍ ຮ່ວາງດິ່ງຕ໋ວນ, ນັກທ່ອງທ່ຽວມາຈາກຮ່າໂນ້ຍ, ໃຫ້ຮູ້ວ່າ:
“ຂ້າພະເຈົ້າໄປທ່ອງທ່ຽວດ່າຫຼາດ 2-3 ເທື່ອແລ້ວ, ແຕ່ເທື່ອໃດຂ້າພະເຈົ້າກໍ່ສະຫງວນເວລາໄປຕະຫຼາດກາງຄືນ, ເພາະວ່າຢູ່ທີ່ນີ້ມີຫຼາຍສິ່ງທີ່ຈັບອົກຈັບໃຈ, ນັບແຕ່ເຄືອ່ງເປັນທີລະນຶກ ຕະຫຼອດຮອດອາຫານພິເສດສະເພາະຫຼາຍເຍື່ອງຄືເຂົ້າໜົມຈື່ນ, ຫອຍລວກ, ມັນດາງປີ້ງ...ຂ້າພະເຈົ້າຄິດວ່າຖ້າມາຢ້ຽມຢາມດ່າຫຼາດທ່ານຄວນແວ່ຢາມຕະຫຼາດກາງຄືນແຫ່ງນີ້“.
ຕະຫຼາດກາງຄືນດ່າຫຼາດໄດ້ສ້າງຄວາມປະທັບໃຈບໍ່ພຽງແຕ່ໃຫ້ນັກທ່ອງທ່ຽວພາຍໃນປະເທດເທົ່ານັ້ນ, ຫາກນັບທັງນັກທ່ອງທ່ຽວຕ່າງປະເທດອີກດ້ວຍ ແລະ ນີ້ຈະເປັນອານຸສອນທີ່ໜ້າຈົດຈຳສຳລັບນັກທ່ອງທ່ຽວແຕ່ລະຄົນ.