ໃນຕອນກາງຄືນ, ຕົວເມືອງ ຮ່າໂນ້ຍ ມິດສະຫງົບງຽບ, ຢູ່ເຂດຕະຫຼາດ ດອກໄມ້ ກວາງບ໋າ ຟາກຄັນຄູ ງີຕ່າມ, ຕາແສງ ກວາງອານ, ເມືອງໄຕໂຮ່ ພັດແຈ້ງສະຫວ່າງດ້ວຍດອກໄຟ, ຄັບຄາໜາແໜ້ນທັງຜູ້ຊື້ ແລະ ຜູ້ຂາຍ. ໂດຍບໍ່ຮູ້ຈັກວ່າມີມາແຕ່ເວລາໃດ, ຕະຫຼາດຂາຍດອກໄມ້ກາງຄືນກວາງບ໋າ ໄດ້ກາຍເປັນຕະຫຼາດຂາຍສົ່ງໃຫຍ່ທີ່ສຸດສຳລັບດອກໄມ້ສົດຊະນິດຕ່າງໆ ຂອງຊາວຮ່າໂນ້ຍ. ໄປຕະຫຼາດຂາຍດອກໄມ້ກາງຄືນແມ່ນຈັບອົກຈັບໃຈທີ່ສຸດ .
![ຕະຫຼາດຂາຍດອກໄມ້ກາງຄືນ ກວາງບ໋າ-ຕະຫຼາດນັດທີ່ເປັນເອກະລັກສະເພາະຂອງຮ່າໂນ້ຍ - ảnh 1](https://image.vovworld.vn/w730/uploaded/vovworld/bcgmbuiq/2015_11_14/chohoa.jpg)
ຕະຫຼາດຂາຍດອກໄມ້ກາງຄືນ ກວາງບ໋າ |
ຕະຫຼາດຂາຍດອກໄມ້ກາງຄືນກວາງບ໋າ ຕັ້ງຢູ່ຖະໜົນ ງີຕ່າມ ເຊິ່ງແມ່ນບ່ອນຊື້-ຂາຍດອກໄມ້ສົດໃຫຍ່ສຸດຂອງຮ່າໂນ້ຍ ແລະ ແມ່ນຕະຫຼາດຂາຍສົ່ງດອກໄມ້ສົດໃຫ້ທົ່ວທັງນະຄອນກໍ່ຄືສອງສາມນະຄອນທີ່ຢູ່ອ້ອມຂ້າງ. ຕະຫຼາດມີກົກເຄົ້າມາຈາກຕະຫຼາດນ້ອຍໂຮມເຂົ້າກັນຢູ່ສາມແຍກຕາແສງເຍິດເຕິນ, ຕະຫຼາດນີ້ຖືກສ້າງຕັ້ງຂຶ້ນເນື່ອງຈາກຄວາມຕ້ອງການຂອງປະຊາຊົນເຂດ ເຍິດເຕິນ, ກວາງອານ ແລະ ບາງຕາແສງຢູ່ເມືອງ ຕື່ລຽມ. ເຖິງວ່າຈະແມ່ນ ຍບາມລະດູໜາວ ຫຼື ລະດູຮ້ອນກໍ່ຕາມ, ແຕ່ເຂດຕະຫຼາດ ຍາມໃດກໍ່ ເຕັມໄປດ້ວຍຄົນຊື້ ແລະ ຄົນຂາຍ. ເມື່ອເຂົ້າໄປໃນຕະຫຼາດ ກໍປຽບເໝືອນໄດ້ ເຂົ້າໄປໃນປ່າດອກໄມ້ທີ່ຫອມກຸ້ມໄປທົ່ວ.
ພິເສດ, ໃກ້ຈະຮອດວັນພະຈັນເຕັມດວງ, ວັນທີ່ໜຶ່ງໂດຍໄລຕາມ ຈັນທະປະຕິທິນຫຼືວັນບຸນຕ່າງໆຄື: ວັນແມ່ຍິງສາກົນ 08/03, ວັນແຫ່ງຄວາມຮັກ 14/02, ບຸນປີໃໝ່ປະຈໍາຊາດ......ຈະມີດອກໄມ້ນຳມາວາງຂາຍຢູ່ຕະຫຼາດຫຼາຍກວ່າ, ບັນດາຜູ້ຄົນມາຊື້ດອກໄມ້ກໍ່ມີຫຼາຍກວ່າ, ບັນຍາກາດການຊື້-ຂາຍດອກໄມ້ພັດແຮງມີຄວາມຄຶກຄື້ນກວ່າ. ເອື້ອຍ ຮ່າທິທູ ຂາຍຍ່ອຍຢູ່ຕະຫຼາດຂາຍ ດອກໄມ້ກາງຄືນ ກວາງບ໋າ ໃຫ້ຮູ້ວ່າ:
“ດອກໄມ້ຢູ່ຕະຫຼາດນີ້ຍາມໃດກໍ່ສວຍງາມທີ່ສຸດ, ເພາະວ່າມັນຖືກກັບ ອາກາດ, ຖືກກັບລະດູ, ຮັບປະກັນຄຸນນະພາບ. ຕະຫຼາດຂາຍດອກໄມ້ກວາງບ໋າ ແມ່ນຕະຫຼາດຂາຍສົ່ງ, ເພາະສະນັ້ນພວກຂ້າພະເຈົ້າຕ້ອງຂາຍດອກໄມ້ທີ່ ສວຍງາມ, ລາຄາເໝາະສົມ. ວັນອາທິດ ຫຼື ວັນພັກຕ່າງໆ ລູກຄ້າຈະຊື້ ດອກໄມ້ຫຼາຍກວ່າ”
ຕະຫຼາດຂາຍດອກໄມ້ກາງຄືນກວາງບ໋າເຄື່ອນໄຫວໃນສອງຜຽນ: ຜຽນທີໜຶ່ງ ແມ່ນເລີ່ມແຕ່ເວລາ ສອງໂມງຫາສີ່ໂມງ ແມ່ນຊື້-ຂາຍຍົກ ສະນັ້ນເມື່ອມາຕະຫຼາດໃນເວລານິີ້ ຈະຊື້ໄດ້ດອກໄມ້ສົດດ້ວຍລາຄາຖືກທີ່ສຸດ; ສ່ວນແຕ່ເວລາ ສີ່ໂມງຮອດຕອນເຊົ້າແມ່ນຜຽນທີສອງ, ແມ່ນການຊື້-ຂາຍຍ່ອຍ ລາຄາກໍ່ຈະສູງກວ່າຜຽນທີໜຶ່ງ. ເວລາສອງໂມງເຊົ້າແມ່ນເວລາທີ່ຕະຫຼາດເລີ່ມເຕົ້າໂຮມ, ສະນັ້ນ ບັນດາລົດ ບັນທຸກ, ລົດຂົນສົ່ງກໍ່ພາກັນຕ່່າງດອກໄມ້ເຂົ້າຕະຫຼາດ. ດອກໄມ້ຢູ່ຕະຫຼາດ ກວາງບ໋າ ໄດ້ຮັບການຕີລາຄາວ່າ: ແມ່ນດອກໄມ້ສົດ ແລະ ສວຍງາມທີ່ສຸດ, ຖືກສົ່ງມາຈາກບັນດາເຂດທີ່ຢູ່ອ້ອມແອ້ມຄື: ໄຕຕືວ, ດົງອານ, ຢາເລິມ, ຟຸກອຽນ ຫຼື ຖືກຂົນສົ່ງມາຈາກບັນດາເຂດທີ່ຢູ່ຫ່າງໄກຄືດ່າລາດ. ດ້ວຍຄວາມອຸດົມສົມບູນ ບັນດາດອກໄມ້ທີ່ໄດ້ວາງຂາຍຢູ່ທີ່ນີ້, ລູກຄ້າມາຕະຫຼາດ, ສາມາດເລືອກຊື້ ດອກໄມ້ທີ່ຄຸ້ນເຄີຍກັບຕົນເອງ ເຊັ່ນ ດອກກຸຫຼາບ, ດອກລີລີ, ດອກເບັນຈະມາດ, ດອກຂົນຕາ........ຕະຫຼອດຮອດບັນດາດອກໄມ້ທີ່ນໍາເຂົ້າຈາກຕ່າງປະເທດຄື: ດອກທິວລິບ, ດອກເດນຟີນຽມ, ດອກມ່ານຕາ......ຖ້າຢາກເລືອກໄດ້ດອກໄມ້ ທີ່ຖືກໃຈ, ຜູ້ຊື້ຕ້ອງມາຕະຫຼາດແຕ່ເຊົ້າເພື່ອລໍຖ້າດອກໄມ້ໃໝ່. ໄປຕະຫຼາດ ກາງຄືນ ກໍ່ມີຄວາມເປັນເອກະລັກສະເພາະຂອງມັນໂດຍບໍ່ນ້ອຍໜ້າກັບໄປ ສະຖານທີ່ອື່ນໆ. ຕາມປົກກະຕິແລ້ວ ຜູ້ທີ່ໄປຕະຫຼາດກາງຄືນນັ້ນແມ່ນ ຕ້ອງຖືເອົາໄຟສາຍໄປພ້ອມ ເພື່ອກວດກາຄຸນນະພາບ ແລະ ສີຂອງດອກໄມ້.
ໂດຍແຕກຕ່າງກັບບັນຍາກາດຂອງບັນດາຕະຫຼາດນັດທີ່ເຄີຍພົບເຫັນ, ຕະຫຼາດຂາຍດອກໄມ້ກາງຄືນກວາງບ໋າ ບໍ່ໄດ້ຂາຍສິນຄ້າຊະນິດອື່ນໆ, ບັນຍາກາດການຊື້-ຂາຍກໍ່ບໍ່ໄດ້ເນື່ອງນັນເກີນຂອບເຂດ. ເພື່ອນ ໂງທູຮ່ຽນ ຢູ່ຄຸ້ມ ອານເຢືອງ ແບ່ງປັນວ່າ:
“ຕາມປົກກະຕິ ນ້ອງໄປຕະຫຼາດດອກໄມ້ໃນຕອນເຊົ້າ ແຕ່ວ່າມື້ນີ້ແມ່ນວັນທີ 01 ເພາະສະນັ້ນບັນຍາກາດຄຶກຄື້ນກວ່າມື້ທຳມະດາ. ຢູ່ຖະໜົນແມ່ນບໍ່ມີຄົນທ່ຽວແຕ່ວ່າ ເມື່ອເຂົ້າມາໃນຕະຫຼາດພັດມີຕວາມແຕກຕ່າງ ແລະ ມີຊີວິດຊີວາທີ່ສຸດ. ໃນຕະຫຼາດມີດອກໄມ້ຫຼາຍຊະນິດ ສະນັ້ນນ້ອງບໍ່ຮູ້ວ່າຈະເລືອກເອົາດອກໄມ້ຊະນິດໃດ ?”
ສ່ວນເພື່ອນ ບຸຍທຸຍຕຽນ ຢູ່ ບັກນິງ ໃຫ້ຮູ້ວ່າ:
“ບັນດາດອກໄມ້ຢູ່ທີ່ນີ້ອຸດົມສົມບູນທີ່ສຸດ, ລາຄາກໍ່ເໝາະສົມ ຕົນເອງກໍ່ສາມາດເລືອກເອົາບັນດາດອກໄມ້ເຊິ່ງຕົນເອງມັກໄດ້ຕາມໃຈ. ມາຕະຫຼາດດອກໄມ້ຕົນເອງມີຄວາມຮູ້ສຶກສະດວກສະບາຍຄືກັບວ່າໄດ້ເຊື່ອມຕົວເຂົ້າກັບທຳມະຊາດ”
ຕະຫຼາດນັດກາງຄືນທີ່ຄັບຄາໜາແໜ້ນ ຍັງແມ່ນສະຖານທີ່ດຶງດູດຄວາມສົນໃຈຂອງນັກທ່ອງທ່ຽວຕ່າງປະເທດເມື່ອມາຢ້ຽມຢາມຮ່າໂນ້ຍເປັນຈຳນວນຫຼວງຫຼາຍ. ນາງ Anni Bell-Miller ມາຈາກ ອັງກິດ ໃຫ້ຮູ້ວ່າ:
“ນີ້ແມ່ນຄັ້ງທຳອິດທີ່ຂ້າພະເຈົ້າໄດ້ມາຕະຫຼາດນີ້, ທີ່ນີ້ງາມທີ່ສຸດ, ແລະ ແມ່ນຕະຫຼາດທີ່ມີເອກະລັກສະເພາະທີ່ສຸດ”
ສຳລັບນັກທ່ອງທ່ຽວມານີ້ເພື່ອຮັບຊົມຄວາມງາມຂອງດອກໄມ້, ພວກເຂົາກໍ່ ຈະຊື້ໄດ້ດອກໄມ້ສົດ, ສວຍງາມ ແລະ ຖືກໃຈທີ່ສຸດເພື່ອນຳໄປຕົບແຕ່ງສະເພາະ ໃນເຮືອນຂອງຕົນ, ອັນໄດ້ເຮັດໃຫ້ຊີວິດເພີ່ມສີສັນຂຶ້ນຕື່ມ.