ໄລຍະຜ່ານມາ, ດົ່ງທາບ ຍາມໃດກໍເອົາໃຈໃສ່ເປັນພິເສດເຖິງປັດໄຈ “ສີຂຽວ” ໃນການພັດທະນາການທ່ອງທ່ຽວ. ນີ້ກໍແມ່ນພື້ນຖານແກ່ນສານໃນຍຸດທະສາດການທ່ອງທ່ຽວຂອງທ້ອງຖິ່ນ, ໂດຍສຸມໃສ່ຮູບແບບນິເວດກະສິກຳ. ພ້ອມທັງ, ພັດທະນາແບບຍືນຍົງ ແລະ ບັນດາຮູບແບບການທ່ອງທ່ຽວທີ່ບໍ່ສົ່ງຜົນເສຍຫາຍຕໍ່ສິ່ງແວດລ້ອມ, ຮັກສາທັດສະນີຍະພາບທຳມະຊາດຢູ່ບັນດາເຂດທ່ອງທ່ຽວນິເວດ, ເຊັ່ນ: ປ່າສະຫງວນແຫ່ງຊາດ ຈ່າມຈິມ, ເຂດປູຊະນີຍະສະຖານ ແສວກຸຍ, ໝູ່ບ້ານດອກໄມ້ ຊາແດັກ; ເຂດທ່ອງທ່ຽວນິເວດໜອງບົວ ທາບເມື່ອຍ, ໂຮມສະເຕ ບ້ານສວນ, ການທ່ອງທ່ຽວສວນໝາກກ້ຽງນ້ອຍ ລາຍວຸງ. ນອກຈາກນັ້ນແລ້ວ, ທາງທ້ອງຖິ່ນກໍໄດ້ຊຸກຍູ້ການນຳໃຊ້ລົດໄຟຟ້າພະລັງງານແສງຕາເວັນ, ຈຳກັດການນຳໃຊ້ພລາດຕິກຢູ່ບັນດາສະຖານທີ່ທ່ອງທ່ຽວອີກດ້ວຍ. ໃນນັ້ນ, ຈຸດສຸມແມ່ນການທ່ອງທ່ຽວນິເວດໜອງບົວ ທາບເມື່ອຍ, ກະສິກຳສີຂຽວໝູນວຽນ ແລະ ສະຖາປັດຕະຍາກຳສີຂຽວ, ເພື່ອແນໃສ່ຍົກລະດັບການທ່ອງທ່ຽວ ແລະ ປົກປັກຮັກສາລະບົບນິເວດທ້ອງຖິ່ນໄວ້. ຈາກນັ້ນ, ກໍເຮັດໃຫ້ ຈິນຕະນາການຂອງຫຼາຍວິສາຫະກິດປ່ຽນແປງ, ປະຊາຊົນເຮັດການທ່ອງທ່ຽວຈາກ “ການຜະລິດກະສິກຳ” ໄປສູ່ “ເສດຖະກິດກະສິກຳ”, ດ້ວຍການປະສານລະຫວ່າງກະສິກຳແບບອັດສະລິຍະ ແລະ ການທ່ອງທ່ຽວຕົວຈິງ…
ປັດຈຸບັນ, ຢູ່ທ້ອງຖິ່ນ ມີຫຼາຍເຂດທ່ອງທ່ຽວໄດ້ສ້າງບັນດາລາຍການທ່ອງທ່ຽວນິເວດ, ການທ່ອງທ່ຽວຊຸມຊົນ, ການທ່ອງທ່ຽວໝູນວຽນ, ທັງເປັນມິດກັບສິ່ງແວດລ້ອມ, ທັງເປັນເອກະລັກສະເພາະ. ທ່ານ ເຈືອງວັນມາຍ, ເຈົ້າຂອງເຂດທ່ອງທ່ຽວນິເວດ ນາມເຮືອງ, ຕາແສງ ເຕິນຮົ່ງ, ແຂວງ ດົ່ງທາບ ແລະ ອ້າຍ ຫງວຽນແທັງຟອງ, ແຂກທ່ອງທ່ຽວມາຈາກນະຄອນ ໂຮ່ຈີມິນ, ແບ່ງປັນວ່າ:
“ເຂດທ່ອງທ່ຽວຂອງຂ້າພະເຈົ້າມີເນື້ອທີ່ປະມານ 2 ເຮັກຕາ, ມັນບໍ່ຄືກັນກັບສະຖານທີ່ທ່ອງທ່ຽວແຫ່ງໃດ. ຢູ່ທີ່ນີ້ມີຫຼາຍເບ້ຍໄມ້, ມີຕົ້ນໄມ້ກິນໝາກທີ່ຫາຍາກຂອງ ຫວຽດນາມ ແລະ ມີບາງຕົ້ນໄມ້ກິນໝາກທີ່ເປັນຜະລິດຕະພັນພິເສດຢູ່ເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ. ສວນແຫ່ງນີ້ເຮັດຕາມວິທີການອໍແກນິກ. ປັດຈຸບັນ, ສວນໝາກນ້ຳນົມຂອງຂ້າພະເຈົ້າແມ່ນສວນໃຫຍ່ສຸດຢູ່ ຫວຽດນາມ”.
“ຂ້າພະເຈົ້າມາແຕ່ໄກ, ໂດຍໄດ້ຮູ້ຈັກເຖິງເຂດທ່ອງທ່ຽວນິເວດ ນາມເຮືອງ ຜ່ານຂໍ້ມູນໃນສື່ສັງຄົມອອນໄລ. ເປັນຄັ້ງທຳອິດທີ່ມາເຂດທ່ອງທ່ຽວແຫ່ງນີ້, ຂ້າພະເຈົ້າມາພ້ອມກັບຄອບຄົວ, ດ້ວຍຈຸດປະສົງເພື່ອໃຫ້ລູກນ້ອຍ ແລະ ພໍ່ແມ່ມີໂອກາດໄດ້ຢ້ຽມຊົມ, ລົງຕົວຈິງ. ເມື່ອມາຮອດເຂດທ່ອງທ່ຽວແຫ່ງນີ້, ຂ້າພະເຈົ້າເຫັນວ່າ ອາກາດຢູ່ນີ້ປອດໂປ່ງທີ່ສຸດ”.
ໄປຄຽງຄູ່ກັບເປົ້າໝາຍອະນຸລັກຮັກສາລະບົບນິເວດ, ເລື່ອງຜູກພັນລະຫວ່າງການທ່ອງທ່ຽວສີຂຽວ ກັບເຕັກໂນໂລຢີດີຈີຕອນຢ່າງແໜ້ນແຟ້ນ ຈະແມ່ນຂໍ້ກຸນແຈເພື່ອສ້າງບັນດາລາຍການທ່ອງທ່ຽວແບບອັດສະລິຍະໃຫ້ດີທີ່ສຸດ. ດົ່ງທາບ ໄດ້ເຊັນບົດບັນທຶກການຮ່ວມມືຍຸດທະສາດຫຼາຍສະບັບເພື່ອພັດທະນາພື້ນຖານໂຄງລ່າງດີຈີຕອນທີ່ທັນສະໄໝ; ນຳໃຊ້ພື້ນຖານດີຈີຕອນ, ສື່ສັງຄົມອອນໄລເພື່ອໂຄສະນາພາບພົດ; ຫັນບັນດາສະຖານທີ່ທ່ອງທ່ຽວເປັນດີຈີຕອນ ແລະ ໝູນໃຊ້ການທ່ອງທ່ຽວແບບອັດສະລິຍະ, ແຜນທີ່ດີຈີຕອນ ເພື່ອຊ່ວຍຄົ້ນຫາຂໍ້ມູນໄດ້ຢ່າງວ່ອງໄວ. ຕາມທ່ານ ເຈິ່ນຫືວຕ່າຍ, ເຈົ້າຂອງເຂດທ່ອງທ່ຽວສວນຕົ້ນໄມ້ປະດັບ ງອກລານ, ຕາແສງ ຊາແດັກ, ແຂວງ ດົ່ງທາບ ແລ້ວ, ດ້ວຍຄວາມສາມາດພົວພັນ ແລະ ການເຊື່ອມຕໍ່ຢ່າງກວ້າງຂວາງນັ້ນ, ບັນດາແພຼດຟຼອມສື່ສັງຄົມອອນໄລ, ຄື: Facebook, Zalo, Instagram… ໄດ້ ແລະ ພວມກາຍເປັນ “ຜູ້ຊ່ວຍວຽກທີ່ດີທີ່ສຸດ” ຊ່ວຍໂຄສະນາບັນດາສະຖານທີ່ທ່ອງທ່ຽວ, ໜູນຊ່ວຍແຂກທ່ອງທ່ຽວ ແລະ ຍົກສູງຄວາມສາມາດແກ້ງແຍ້ງໃຫ້ແກ່ຂະແໜງການທ່ອງທ່ຽວຂອງທ້ອງຖິ່ນ:
“ກ່ອນນີ້, ສະຖານທີ່ທ່ອງທ່ຽວຂອງຂ້າພະເຈົ້າ ແລະ ຂອງຊາແດັກ ຍັງບໍ່ທັນໄດ້ເປັນທີ່ຮູ້ຈັກເຖິງຢ່າງກວ້າງຂວາງຄືໃນປັດຈຸບັນ. ຊຸມປີມໍ່ໆມານີ້, ພວກຂ້າພະເຈົ້າໄດ້ໂຄສະນາຜະລິດຕະພັນທ່ອງທ່ຽວຂອງຕົນຜ່ານ Tiktok, Zalo… ແລະ ໂຄສະນາເອງ, ຈາກນັ້ນ ບັນດາຜະລິດຕະພັນທ່ອງທ່ຽວໃໝ່ ກໍ່ໄດ້ຮັບການແຜ່ກະຈາຍ ແລະ ມີເຄື່ອງໝາຍການຄ້າ. ນັ້ນກໍແມ່ນບັນຫາປ່ຽນແປງທີ່ຈຳເປັນ, ພວກຂ້າພະເຈົ້າຕ້ອງຮູ້ເພື່ອພັດທະນາຕາມຄວາມຕ້ອງການ”.
ປີ 2025, ຂະແໜງການທ່ອງທ່ຽວ ດົ່ງທາບ ໄດ້ຕ້ອນຮັບແຂກທ່ອງທ່ຽວປະມານ 7,3 ລ້ານເທື່ອຄົນ. ທ່ານນາງ ຫງວຽນທິອວຽນຈາງ, ຫົວໜ້າພະແນກວັດທະນະທຳ, ກິລາ ແລະ ທ່ອງທ່ຽວແຂວງ ດົ່ງທາບ, ໃຫ້ຮູ້ວ່າ ໄລຍະ 2026 – 2030, ຈຸດສຸມແມ່ນຫັນຂໍ້ມູນເປັນດີຈີຕອນ, ພັດທະນາການທ່ອງທ່ຽວອັດສະລິຍະ ແລະ ໝູນໃຊ້ບັນດາແພຼດຟອມດີຈີຕອນເຂົ້າໃນການສົ່ງເສີມ, ໂຄສະນາ. ທາງແຂວງກໍໝູນໃຊ້ເຕັກໂນໂລຢີສະເໝືອນຈິງ, ປັນຍາປະດິດ (AI) ແລະ ປະຕູຖານຂໍ້ມູນການທ່ອງທ່ຽວເພື່ອຍົກລະດັບການທ່ອງທ່ຽວ, ມຸ່ງໄປເຖິງເປົ້າໝາຍຕ້ອນຮັບແຂກທ່ອງທ່ຽວ 8 ລ້ານເທື່ອຄົນໃນປີ 2026 ແລະ 50 ລ້ານເທື່ອຄົນໃນປີ 2030.
“ໃນສະພາບການເສດຖະກິດສີຂຽວຕິດພັນກັບເປົ້າໝາຍພັດທະນາເສດຖະກິດຂອງແຂວງ, ສຳລັບການທ່ອງທ່ຽວ ດ້ວຍການກຳນົດພັດທະນາສີຂຽວຕິດພັນກັບການຫັນເປັນດີຈີຕອນ ແມ່ນພື້ນຖານເພື່ອຊຸກຍູ້ການພັດທະນາການທ່ອງທ່ຽວແບບຍືນຍົງ. ດ້ວຍຄວາມຄາດຫວັງປ່ຽນແປງໃໝ່ ແລະ ຄວາມສາມາດປັບຕົວເຂົ້າກັບຄວາມຕ້ອງການພັດທະນາໃໝ່, ທາງແຂວງໄດ້ລະດົມແຫຼ່ງກຳລັງ, ເຊື່ອມຕໍ່ວິສາຫະກິດເຂົ້າລະບົບຕ່ອງໂສ້ມູນຄ່າເພື່ອສ້າງຜະລິດຕະພັນທ່ອງທ່ຽວໃໝ່, ກິດຈະກຳໃໝ່, ການບໍລິການໃໝ່, ເພື່ອຍົກສູງຜະລິດຕະພັນຕາມທິດສີວິໄລ, ປອດໄພ ແລະ ເປັນມືອາຊີບໃຫ້ແກ່ການພັດທະນາຂະແໜງທ່ອງທ່ຽວ”.
ການປະສານລະຫວ່າງປັດໄຈ “ສີຂຽວ” ແລະ “ດີຈີຕອນ” ບໍ່ພຽງແຕ່ແມ່ນໄມ້ງັດເທົ່ານັ້ນ, ຫາກຍັງແມ່ນທິດກ້າວເດີນຍຸດທະສາດແບບຍືນຍົງ ຊ່ວຍໃຫ້ ດົ່ງທາບ ຢັ້ງຢືນທີ່ຕັ້ງໃນແຜນທີ່ທ່ອງທ່ຽວ ຫວຽດນາມ. ດ້ວຍເລື່ອງຖືລະບົບນິເວດແມ່ນ້ຳລຳເຊທີ່ເປັນເອກະລັກນັ້ນເປັນພື້ນຖານ, ບັນດາໝູ່ບ້ານອາຊີບຫັດຖະກຳພື້ນເມືອງເປັນຈິດວິນຍານ ແລະ ເຕັກໂນໂລຢີດີຈີຕອນເປັນປີກ, ດົ່ງທາບ ພວມຫັນເປົ້າໝາຍກາຍເປັນສະຖານທີ່ທ່ອງທ່ຽວທີ່ “ປອດໄພ - ເປັນມິດ - ມີຄຸນນະພາບ” ໃຫ້ປະກົດຜົນເປັນຈິງເທື່ອລະກ້າວ. ການປະສານສົມທົບນີ້ ໄດ້ນຳມາເຊິ່ງ “ກະແສຄື້ນລົມໃໝ່”, ຊ່ວຍໃຫ້ແຂກທ່ອງທ່ຽວມີການຢ້ຽມຢາມຕົວຈິງ, ເຂົ້າເຖິງຂໍ້ມູນໄດ້ຢ່າງງ່າຍດາຍ, ພ້ອມທັງຊ່ວຍປະຊາຊົນທ້ອງຖິ່ນຍົກສູງລາຍຮັບ, ອະນຸລັກຮັກສາບັນດາຄຸນຄ່າວັດທະນະທຳຂອງທ້ອງຖິ່ນໄວ້ໄດ້./.
