ເຖິງວ່າບັນດາຄວາມມານະພະຍາຍາມທາງການທູດ ແນໃສ່ເຊື່ອມຕໍ່ການເຈລະຈາລະຫວ່າງ ອາເມລິກາ - ອີຣານ ຍັງຄົງສືບຕໍ່ໄດ້ຮັບການຊຸກຍູ້ກໍຕາມ, ແຕ່ຄວາມເຄັ່ງຕຶງຢູ່ເຂດອ່າວ ເປີເຊຍ ຍັງສືບຕໍ່ເພີ່ມຂຶ້ນ, ພິເສດແມ່ນຢູ່ຊ່ອງແຄບທະເລ Hormuz. ກ່າວຄຳເຫັນທີ່ທຳນຽບ 5 ແຈ ເມື່ອວັນທີ 16 ເມສາ, ທ່ານ Pete Hegseth ລັດຖະມົນຕີກະຊວງສົງຄາມ ອາເມລິກາ ຖະແຫຼງວ່າ, ວໍຊິງຕັນ ຈະສະກັດກັ້ນທຸກການເຄື່ອນໄຫວຂອງກ່ຳປັ່ນເຂົ້າ - ອອກບັນດາທ່າກ່ຳປັ່ນຂອງ ອີຣານ ຢູ່ຊ່ອງແຄບທະເລ Hormuz “ຈົນເຖິງເມື່ອໃດທີ່ ຍັງມີຄວາມຈຳເປັນ”, ພ້ອມທັງເພີ່ມທະວີກຳລັງກົດດັນທາງການທະຫານ ແລະ ເສດຖະກິດ. ໃນຂະນະນັ້ນ, ທ່ານ Dan Caine ປະທານສະພາຫົວໜ້າເສນາທິການທະຫານປະສົມ ອາເມລິກາ ເນັ້ນໜັກວ່າ ຄຳສັ່ງປິດລ້ອມຈະໄດ້ໝູນໃຊ້ສຳລັບກ່ຳປັ່ນທຸກລຳ, ໂດຍບໍ່ມີການຈຳແນກສັນຊາດ ແລະ ອາເມລິກາ ພ້ອມແລ້ວທີ່ຈະນຳໃຊ້ກຳລັງອາວຸດ ໃນເວລາທີ່ຈຳເປັນ.
ວົງການເຈົ້າໜ້າທີ່ ອາເມລິກາ ຢັ້ງຢືນວ່າ ບັນດາມາດຕະການນີ້ ທີ່ຈິງແລ້ວແມ່ນເລັ່ງໃສ່ບັນດາທ່າກ່ຳປັ່ນ ແລະ ຝັ່ງທະເລຂອງ ອີຣານ, ຫາກບໍ່ແມ່ນປິດລ້ອມຊ່ອງແຄບທະເລ Hormuz ທັງໝົດ ແຕ່ຂອບເຂດການປະຕິບັດ ອາດຈະໄດ້ຮັບການເປີດກວ້າງໄປຍັງເຂດທະເລສາກົນ. ພ້ອມດຽວກັນນັ້ນ, ວໍຊິງຕັນ ກໍໄດ້ຜັນຂະຫຍາຍບັ້ນຮົບ “Economic Fury” ເພື່ອແນໃສ່ເພີ່ມທະວີກຳລັງກົດດັນທາງດ້ານເສດຖະກິດຕໍ່ກັບ ເຕເຮຣານ, ໄປຄຽງຄູ່ກັບບັນດາຄຳສັ່ງລົງໂທດໃໝ່ ແນໃສ່ຂະແໜງນ້ຳມັນບໍ່ ອີຣານ.
