ກອງປະຊຸມຄັ້ງປະຖົມມະລຶກສະພາແຫ່ງຊາດຊຸດທີ XVI ຈະມີຫຼາຍເນື້ອໃນວຽກງານທີ່ສຳຄັນ

[VOVWORLD] - ຕອນບ່າຍວັນທີ 03 ເມສາ, ຢູ່ຫໍສະພາແຫ່ງຊາດ ຫວຽດນາມ ໄດ້ດຳເນີນການຖະແຫຼງຂ່າວເພື່ອແຈ້ງໃຫ້ຊາບກ່ຽວກັບຮ່າງລາຍການກອງປະຊຸມຄັ້ງປະຖົມມະລຶກ, ສະພາແຫ່ງຊາດຊຸດທີ XVI. ຄາດວ່າ, ກອງປະຊຸມດັ່ງກ່າວຈະດຳເນີນພາຍໃນເວລາປະມານ 11 ວັນ, ໂດຍແບ່ງອອກເປັນ 2 ງວດ (ງວດທີ 1 ແຕ່ວັນທີ 6 ເມສາ ຫາວັນທີ 12 ເມສາ; ງວດທີ 2 ແຕ່ວັນທີ 20 ເມສາ ຫາວັນທີ 23 ເມສາ).

ຕາມລາຍການແລ້ວ, ສະພາແຫ່ງຊາດຈະພິຈາລະນາ, ຕັດສິນວຽກງານກົງຈັກການຈັດຕັ້ງ, ບຸກຄະລາກອນ; ຮັບຮອງເອົາຮ່າງກົດໝາຍ 8 ສະບັບ, ມະຕິກ່ຽວກັບການກຳນົດກົດໝາຍ 1 ສະບັບ; ພ້ອມທັງພິຈາລະນາບັນດາບັນຫາທາງດ້ານເສດຖະກິດ - ສັງຄົມ, ການເງິນ, ງົບປະມານ, ການຕິດຕາມກວດກາ ແລະ ຫຼາຍເນື້ອໃນສຳຄັນອື່ນ. ເມື່ອແຈ້ງໃຫ້ຊາບກ່ຽວກັບຈຸດໃໝ່ຂອງກອງປະຊຸມ, ທ່ານ ຫງວຽນວັນຫຽນ, ຮອງຫົວໜ້າຫ້ອງວ່າການສະພາແຫ່ງຊາດ ໃຫ້ຮູ້ວ່າ:

“ໄປຄຽງຄູ່ກັບການສ້າງກົງຈັກການຈັດຕັ້ງບຸກຄະລາກອນໃຫ້້ສົມບູນແບບ, ສະພາແຫ່ງຊາດຊຸດທີ XVI ຈະເຄື່ອນໄຫວຢ່າງຮອບດ້ານ, ຄົບຖ້ວນ, ໃນບັນດາພັນທະໜ້າທີ່ຂອງຕົນ, ລວມທັງການສ້າງກົດໝາຍຕິດຕາມກວດກາສູງສຸດ ແລະ ຕັດສິນບັນດາບັນຫາສຳຄັນ. ກ່ຽວກັບການເຄື່ອນໄຫວຕິດຕາມກວດກາ, ສະພາແຫ່ງຊາດກໍຕັດສິນບັນດາໄລຍະກວດກາຂອງປີ. ກ່ຽວກັບແບບວິທີການຈັດຕັ້ງກໍຈະມີການປ່ຽນແປງຕາມທິດນັບມື້ນັບທັນສະໄໝ ແລະ ເປັນມືອາຊີບກວ່າ, ໝູນໃຊ້ເຕັກໂນໂລຢີຂໍ້ມູນຂ່າວສານຢ່າງແຮງ”.

ກອງປະຊຸມຄັ້ງປະຖົມມະລຶກສະພາແຫ່ງຊາດຊຸດທີ XVI ກໍສຸມໃສ່ການປຶກສາຫາລືບັນດານະໂຍບາຍສົກປີການເງິນ, ເງິນຕາ ແລະ ບັນດາມາດຕະການຊຸກຍູ້ການເຕີບໂຕ, ລະອຽດແມ່ນຫັນບັນດາເປົ້າໝາຍ, ມາດຕະການແກ້ໄຂເປັນລະອຽດ ເພື່ອແນໃສ່ຮັບປະກັນໃຫ້ປະເທດພັດທະນາຢ່າງວ່ອງໄວ, ຍືນຍົງ, ມຸ່ງໄປເຖິງເປົ້າໝາຍເຕີບໂຕ 2 ຕົວເລກ.