 ທ່ານເລຂາທິການໃຫຍ່ ໂຕເລິມ ພົບປະກັບທ່ານປະທານາທິບໍດີສິງກະໂປ Tharman Shanmugaratnam (ພາບ: TTXVN) |
ທີ່ການພົບປະ, ທ່ານປະທານາທິບໍດີ Tharman Shanmugaratnam ໄດ້ເນັ້ນໜັກວ່າ ເລື່ອງສອງປະເທດຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ ໄດ້ຊ່ວຍເປີດໜ້າປະຫວັດສາດໃໝ່ໃນການພົວພັນສອງຝ່າຍ. ໂດຍຢ້ຳຄືນຄວາມປະທັບໃຈຕໍ່ການພັດທະນາໂດຍໄວຂອງ ຫວຽດນາມ, ທ່ານປະທານາທິບໍດີ Tharman Shanmugaratnam ສະແດງຄວາມໄວ້ເນື້ອເຊື່ອໃຈຕໍ່ ຫວຽດນາມ ໃນການຮັກສາທີ່ຕັ້ງ ແມ່ນໜຶ່ງໃນບັນດາພື້ນຖານເສດຖະກິດທີ່ມີຄວາມຂະຫຍັນຂັນເຄື່ອນສຸດໃນພາກພື້ນ, ຖານະບົດບາດສາກົນໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ.
ສ່ວນທ່ານເລຂາທິການໃຫຍ່ ໂຕເລິມ ເຫັນດີເປັນເອກະພາບຕໍ່ບັນດາຄຳເຫັນຂອງທ່ານປະທານາທິບໍດີ Tharman Shanmugaratnam ກ່ຽວກັບສອງປະເທດເພີ່ມທະວີຄວາມສາມັກຄີ, ການຮ່ວມມືນຳກັນ ແລະ ກັບບັນດາປະເທດສະມາຊິກ ອາຊຽນ ເພື່ອຍົກລະດັບຄວາມສາມາດ, ສ້າງຄວາມເຂັ້ມແຂງດ້ວຍຕົນເອງ, ເປັນເຈົ້າການຮັບມືກັບບັນດາສິ່ງທ້າທາຍພາຍນອກດ້ວຍຕົນເອງ. ທ່ານເລຂາທິການໃຫຍ່ ໂຕເລິມໄດ້ແລກປ່ຽນກ່ຽວກັບບັນດາທິດທາງໃຫຍ່ ແລະ ມາດຕະການລະອຽດເພື່ອຜັນຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານທີ່ຫາກໍ່ສ້າງຕັ້ງໃໝ່, ໃນນັ້ນມີເລື່ອງສອງປະເທດກາຍເປັນບັນດາຄູ່ຮ່ວມມືນຳໜ້າໃນພາກພື້ນກ່ຽວກັບການຮ່ວມມືດ້ານວິທະຍາສາດເຕັກໂນໂລຢີ, ນະວັດຕະກຳ, ການຫັນເປັນດີຈີຕອນ ແລະ ພະລັງງານ, ເຊື່ອມຕໍ່ຂໍ້ມູນ, ຜະລິດຊິບເຄິ່ງຊັກນຳໄຟຟ້າ, ເຕັກໂນໂລຢີໃໝ່, ປັນຍາປະດິດ.
ກ່ອນໜ້ານັ້ນ, ທ່ານເລຂາທິການໃຫຍ່ ໂຕເລິມ ກໍ່ໄດ້ພົບປະກັບທ່ານປະທານສະພາແຫ່ງຊາດ ສິງກະໂປ Seah Kian Peng. ການນຳສອງຝ່າຍໄດ້ເຫັນດີເປັນເອກະພາບຕີລາຄາຫວຽດນາມ ແລະ ສິງກະໂປ ແບ່ງປັນຫຼາຍຈຸດທີ່ຄ້າຍຄືກັນກ່ຽວກັບມູນຄ່າ, ວັດທະນະທຳ ແລະ ວິໄສທັດພັດທະນາກໍ່ຄືຫຼັກໝັ້ນຮ່ວມກ່ຽວກັບຫຼາຍບັນຫາໃນພາກພື້ນ ແລະ ສາກົນ. ສອງຝ່າຍເພິ່ງພໍໃຈຕໍ່ບັນດາໝາກຜົນທີ່ຕັ້ງໜ້າ ແລະ ແທ້ຈິງໃນການຮ່ວມມືສອງຝ່າຍ ໄລຍະຜ່ານມາໃນຫຼາຍຂົງເຂດ.
ກໍ່ໃນຕອນບ່າຍວັນທີ 12 ມີນາ, ຢູ່ສິງກະໂປ, ທ່ານເລຂາທິການໃຫຍ່ ໂຕເລິມ ໄດ້ພົບປະ ແລະ ແລກປ່ຽນກັບທ່ານ ຫຼີຊຽນຫຼົງ ອະດີດນາຍົກລັດຖະມົນຕີ, ລັດຖະມົນຕີຂັ້ນສູງ, ທີ່ປຶກສາຂັ້ນສູງຂອງພັກກະທຳເພື່ອປະຊາຊົນສິງກະໂປ ແລະ ໃຫ້ການຕ້ອນຮັບທ່ານ Teo Chee Hean ລັດຖະມົນຕີຂັ້ນສູງ, ລັດຖະມົນຕີປະສານງານຄວາມໝັ້ນຄົງແຫ່ງຊາດ ສິງກະໂປ.
